1-3. (a) Porque ya ama si Jehova con Solomon y cosa maga bendicion ya ricibi si Solomon? (b) Cosa maga pregunta kita contesta na este articulo?

JOVEN pa si Solomon cuando ya principia le queda rey de Israel. Na principio del de suyu rulanza, ya aparece si Jehova con ele na un sueño y ya habla: “Pidi si cosa tu quierre que dale yo contigo.” Si Solomon ya contesta: “Joven lang yo y nuay experiencia. . . . Poreso dale con el de uste siervo un obediente corazon para puede juzga con el de uste maga gente.” (1 Rey 3:5-10) “Un obediente corazon”​—bien humilde gayot si Solomon! Poreso, si Jehova ta ama gayot con ele! (2 Sam. 12:24) Bien alegre el Dios na cosa ya contesta el rey poreso ya dale le con Solomon “un corazon que sabio y tiene entendimiento.”​—1 Rey 3:12.

² Cuando fiel si Solomon, ya ricibi le manada bendicion. Ya tiene le privilegio construi con el templo “para na nombre de Jehova, el Dios de Israel.” (1 Rey 8:20) Ya queda le conocido por causa na sabeduria que tiene le estaba con Dios. Puede kita le na tres libro del Biblia el maga cosas que ya habla ele cuando bajo le na guia del Dios. Uno de ese maga libro amo el Proverbio.

³ Ya menciona con el corazon manada beses na libro del Proverbio. Por ejemplo, na Proverbio 4:23, puede kita le: “Mas pa na todo cosas que guarda tu, protege con el de tuyu corazon.” Na este versiculo, na cosa ta refiri el palabra “corazon”? Contesta kita con ese pregunta na este articulo. Considera tambien kita con el contestacion na este maga pregunta: Paquemodo ta influencia si Satanas con el diaton corazon? Y cosa kita puede hace para protege con el diaton corazon? Para esta fiel con  Dios, necesita kita sabe con el contestacion na este maga pregunta.

4-5. (a) Paquemodo el Salmo 51:6 puede ayuda kanaton para entende si na cosa ta refiri el palabra “corazon”? (b) Paquemodo el diaton fisical salud ta dale mira si paquemodo de importante si cosa kita clase de persona adentro?

⁴ Na Proverbio 4:23, ya usa con el palabra “corazon” para refiri con el “deverasan personalidad del un persona.” (Le con el Salmo 51:6.) Quierre decir, el “corazon” ta refiri con el diaton pensamiento, sentido, motivo y deseo. Este amo si cosa kita clase de persona adentro y gendeh lang si cosa ta puede mira el otro.

⁵ Considera si paquemodo el diaton fisical salud ta dale mira si paquemodo de importante si cosa kita clase de persona adentro. Una, para tiene kita buen salud, debe kita come bastante sustancioso comida y regular man ejercicio. Na igual manera, para mentena el diaton buen espiritualidad, debe kita come bastante espiritual comida y demonstra fe con Jehova. Puede kita demonstra ese fe si aplica kita y habla con otro el cosa kita ya aprende. (Rom. 10:8-10; Sant. 2:26) Ika-dos, si man base lang na diaton ichura posible pensa kita que tiene kita buen salud pero el deverasan, tiene kita enfermedad. Na igual manera, base na diaton maga espiritual rutina, baka pensa kita que fuerte diaton fe pero ta crici ya el mal deseo na diaton corazon. (1 Cor. 10:12; Sant. 1:14, 15) Debe kita acorda que quierre si Satanas influencia con el diaton pensamiento. Paquemodo se ele pricura hace? Y paquemodo kita puede protege con el diaton mismo cuerpo?

6. Cosa quierre si Satanas que queda kita y paquemodo le ta pricura hace con ese?

⁶ Quierre si Satanas que queda kita igual con ele​—un rebelde quien ya ignora con el maga principio de Jehova y ta ama lang de suyu mismo cuerpo. Gendeh kanaton puede forza si Satanas que pensa y actua igual con ele. Poreso, ta pricura le hace este na otro manera. Por ejemplo, ta puede le se hace por medio na maga gente alrededor kanaton quien bajo na de suyu influencia. (1 Juan 5:19) Quierre le que  iscuji kita man junto kanila maskin pa sabe kita que el mal asosacion “ta hace cambia” con el diaton pensamiento y conducta. (1 Cor. 15:33) Efectivo ese tactica con Rey Solomon. Ya casa le manada pagano mujer y na uliji, sila “ya tiene grande influencia con ele” y “hinay-hinay ya hace lejos de suyu corazon con Dios.”​—1 Rey 11:3; ftn.

7. Cosa pa ta usa si Satanas para influencia con el diaton pensamiento y porque kita debe queda con cuidao?

⁷ Ta usa si Satanas con el maga salida y TV show para influencia con el diaton pensamiento. Sabe le que el maga istoria gendeh lang ta entretene kanaton sino ta enseña tambien kanaton si paquemodo pensa, sinti y actua. Ya usa si Jesus maga istoria para enseña maga leccion. Por ejemplo, el istoria acerca na buen Samaritano y na anak hombre quien ya sale na casa y ya malgasta con el de suyu riqueza. (Mat. 13:34; Luc. 10:29-37; 15:11-32) Pero aquellos quien influenciao na pensamiento de Satanas puede tambien usa maga istoria para influencia kanaton. Poreso, necesita kita queda balance. El maga salida y TV show ta puede entretene y enseña kanaton que gendeh ta afecta con el diaton pensamiento. Pero debe kita con cuidao. Si ta iscuji entretenimiento, bueno si pregunta kita con el diaton mismo cuerpo, ‘Este ba salida o TV show ta enseña conmigo que sigui na deseo del de mio cuerpo?’ (Gal. 5:19-21; Ef. 2:1-3) Cosa tu debe hace si ya puede tu nota que el un programa ta introduci con el pensamiento de Satanas? Evita con ese igual na un contagioso enfermedad!

8. Paquemodo puede ayuda el maga mayores con el diila maga anak para protege con el diila corazon?

⁸ Maga mayores, tiene ustedes especial responsibilidad para protege con el de ustedes maga anak na influencia de Satanas. Asigurao que hace ustedes el todo lo que puede para protege con el de ustedes anak na enfermedad. Ta limpia ustedes de ustedes casa y ta buta maskin cosa que posible causa enfermedad con ustedes y con el de ustedes maga anak. Na igual manera,  necesita ustedes protege kanila na maga salida, TV show, electronic game y website que posible influencia kanila na pensamiento de Satanas. Ya dale con ustedes si Jehova autoridad para cuida con el espiritualidad del de ustedes maga anak. (Prov. 1:8; Ef. 6:1, 4) Poreso, no man alang-alang hace maga ley na casa que base na principio del Biblia. Habla con el de ustedes maga joven anak si cosa sila puede y gendeh puede mira y ayuda kanila para entende si porque amo quel el de ustedes decicion. (Mat. 5:37) Mientras ta engranda sila, man train kanila para sila mismo puede determina si cosa el justo y si cosa el mali base na maga principio de Jehova. (Heb. 5:14) Y acorda que manada sila cosa puede aprende na cosa ustedes ta enseña pero mas pa na cosa sila ta mira con ustedes.​—Deut. 6:6, 7; Rom. 2:21.

9. Cosa el un idea de Satanas y porque este peligroso?

⁹ El otro manera que ta influencia si Satanas con el diaton corazon amo que manda kanaton pensa que mas confia con el sabeduria del gente en vez na pensamiento de Jehova. (Col. 2:8) Considera con el un idea de Satanas​—el de con todo importante cosa na vida amo queda rico. Aquellos quien ta pensa ansina posible queda rico o posible tambien gendeh. Maskin cosa pa el resulta, na peligro siempre sila. Porque? Cay posible sila sacrificia diila salud, relacion na familia y maskin buen relacion con Dios para lang queda rico. (1 Tim. 6:10) Ta rindi kita gracias cay el diaton sabio Tata na cielo ta ayuda kanaton para tiene balance mirada na sen.​—Ecl. 7:12; Luc. 12:15.

10-11. (a) Cosa kita debe hace para protege con el diaton mismo cuerpo? (b) Cosa ta hace el maga guardia de antes y paquemodo el diaton conciencia queda como diaton guardia?

¹⁰ Para puede kita protege con el diaton corazon, debe kita determina si cosa el maga peligro y despues, actua dayun para protege con el diaton mismo cuerpo. El palabra que yan translate “protege” na Proverbio 4:23 ta manda kanaton acorda con el trabajo que ta hace el un guardia. Na tiempo de Rey Solomon, el maga guardia ta para y ta vicia na maga pader del ciudad y ta dale aviso si tiene peligro. Si pone se kita na pensamiento, puede se ayuda kanaton para entende si cosa kita debe hace para gendeh puede influencia si Satanas con el diaton pensamiento.

¹¹ Na tiempo de antes, tiene cooperacion el maga guardia y aquellos quien ta vicia con el grande puerta del ciudad. (2 Sam. 18:24-26) Tan ayudahan sila para protege con el ciudad y ta asigura que trancao el grande puerta si tiene contrario ta llega. (Neh. 7:1-3) El diaton conciencia * que yan train base na Biblia puede queda como diaton guardia y ta dale kanaton aviso si ta pricura entra si Satanas na diaton corazon​—si ta pricura le influencia con el diaton pensamiento, sentido, motivo o deseo. Si ya dale kanaton aviso diaton conciencia, debe kita hace el todo para evita con el peligro.

12-13. Na cosa kita posible queda interesao pero cosa kita debe hace?

¹² Considera un ejemplo si paquemodo kita puede protege con el diaton mismo cuerpo na influencia de Satanas. Acerca na “immoralidad, o maskin cosa clase de pendejadas,” si Jehova ya enseña que “no [kita] permiti maskin nombra lang con esos entre [kanaton].” (Ef. 5:3) Pero cosa kita hace si el diaton maga uban na trabajo o na escuela ya principia man  cuento acerca na cosas imoral? Sabe kita que debe kita “desaleja con el maga cosa-cosa que ta man contra con el Dios y el maga mal deseo del diaton maga cuerpo.” (Tito 2:12) El diaton conciencia, como un guardia, posible habla kanaton que tiene peligro. (Rom. 2:15) Pero oi ba kita con este? Baka queda kita interesao oi con el diaton maga uban o mira con el letrato que tiene sila. Pero este el tiempo para evita con el peligro. Puede se kita hace si cambia kita con el istoria o sale alla.

¹³ Necesita coraje para resisti con el pressure del diaton maga uban que pensa o hace maga mal cosas. Puede kita asigura que ta mira si Jehova con el diaton esfuerzo y dale le kanaton el fuerza y sabeduria que necesita kita para resisti con el influencia de Satanas. (2 Cron. 16:9; Isa. 40:29; Sant. 1:5) Pero, cosa pa kita puede hace para protege con el diaton corazon?

14-15. (a) Cosa kita necesita permiti que influencia kanaton y paquemodo kita puede hace con ese? (b) Paquemodo el Proverbio 4:20-22 puede ayuda kanaton para mas beneficia kita na diaton lehida de Biblia? (Mira tambien con el cajon “ Si Paquemodo Medita.”)

¹⁴ Para protege con el diaton corazon, gendeh lang kita resisti con el maga mal influencia sino acepta tambien maga positivo influencia. Pensa otravez con el ilustracion acerca con el guardiao ciudad. El quien ta vicia con el grande puerta del ciudad ta tranca con este para gendeh puede entra el maga contrario, pero tiene vez, ta abri le con este para puede lleva comida y otro necesidad adentro. Si gendeh abri con el grande puerta, muri el maga gente na ciudad. Na igual manera, necesita kita permiti que pirmi kanaton influencia el pensamiento del Dios.

¹⁵ El Biblia ta contene el pensamiento de Jehova. Poreso cada vez kita ta le con este, ta permiti kita que influencia si Jehova con el diaton pensamiento, sentido y accion. Paquemodo kita mas beneficia na diaton lehida de Biblia? Importante el rezo. Un hermana el ya habla: “Antes yo le con el Biblia, ta reza yo con Jehova que ayuda le conmigo para ‘puede yo claro mira el maga bien bonito cosas’ na de suyu Palabra.” (Sal. 119:18) Necesita tambien kita medita con el cosa kita ta le. Si reza kita, le y medita, el Palabra del Dios hay alcanza “na [diaton] corazon” y aprende kita aprecia con el pensamiento de Jehova.​—Le con el Proverbio 4:20-22; Sal. 119:97.

16. Paquemodo ya beneficia el otro na JW Broadcasting?

¹⁶ Ta permiti tambien kita influencia kanaton el pensamiento del Dios si ta mira kita maga programa na JW Broadcasting^®. Un man maridable ya habla: “Contestacion gayot na diamon rezo el maga programa cada mes! Ta hace este fuerte y ta anima kanamon si ta sinti kame triste. Y pirmi kame ta oi con el maga original cancion na diamon casa. Ta oi kame mientras ta cuci, ta limpia o maskin ta toma lang cha.” Este maga programa ta ayuda kanaton para puede protege con el diaton corazon. Ta enseña este kanaton pensa igual si paquemodo si Jehova ta pensa y resisti con el pensamiento de Satanas.

17-18. (a) Cosa sucede si aplica kita con el cosa kita ya aprende con Jehova como cosa ta dale mira na 1 Rey 8:61? (b) Cosa kita puede aprende na ejemplo de Rey Ezequias? (c) Harmonia na rezo de David na Salmo 139:23, 24, cosa kita puede pidi na rezo?

¹⁷ Cada vez ta mira kita con el maga beneficio si ta hace kita si cosa el justo, mas ta queda fuerte el diaton fe. (Sant. 1:2, 3) Alegre kita cay ya hace kita proud con Jehova llama kanaton de suyu maga anak y ese ayuda kanaton para queda mas determinao hace alegre con ele. (Prov. 27:11) El cada probanza que ta enfrenta kita amo un oportunidad para dale mira  con el diaton amable Tata que quierre gayot kita sirvi con ele. (Sal. 119:113) Ta dale kita mira que con todo corazon kita ta ama con Jehova y bien determinao obedece con el de suyu maga mandamiento y hace de suyu voluntad.​—Le con el 1 Rey 8:61.

¹⁸ Man kamali ba kita? Si, cay imperfecto kita todo. Si man kamali kita, acorda con el ejemplo de Rey Ezequias. Yan kamali le pero ya arripinti y ya continua le sirvi con Jehova “con todo corazon.” (Isa. 38:3-6; 2 Cron. 29:1, 2; 32:25, 26) Entonces, resisti kita con el esfuerzo de Satanas que influencia con el diaton pensamiento. Reza kita que tiene kita “un obediente corazon.” (1 Rey 3:9; le con el Salmo 139:23, 24.) Puede kita esta fiel con Jehova si protege kita con el diaton corazon mas pa na todo cosas.