1-2. Cosa ya habla el un angel con el maga mujer na sepultura de Jesus y cosa direccion ya dale si Jesus kanila?

TEMPRANO aga quel del Nisan 16, 33 C.E. Bien triste el maga mujer mientras pa-andada na sepultura onde ya pone con el cuerpo del Señor Jesucristo mas de 36 hora ya el ya pasa. Cuando ya llega sila na sepultura para pasa era hierba y oloroso aceite con el cuerpo, ya espanta sila cay nuay laman el tumba. Un angel ya habla con el maga mujer que ya resucita si Jesus y ya omenta: “Ele ay man una pa que con ustedes anda na Galilea, y alla ay mira ustedes con ele.”​—Mat. 28:1-7, El Nuevo Testamento; Luc. 23:56; 24:10.

² Despues sale el maga mujer na sepultura, si Jesus mismo el ya atraca kanila y ya habla: “Anda avisa con mi maga hermano que sale sila para Galilea. Alla ay mira sila conmigo.” (Mat. 28:10) Posible que tiene bien importante instruccion si Jesus para con el de suyu maga dicipulo ciendo amo este el primer cosa que ya arregla le despues del de suyu resureccion.

3-4. Porque kita puede habla que el mandamiento na Mateo 28:19, 20 gendeh lang para na maga apostoles? (Mira con el letrato na cover.)

³ Le con el Mateo 28:16-20. Durante aquel miting que ya organiza si Jesus, ya hace le claro con el importante trabajo que hay cumpli el de suyu maga dicipulo durante el primer siglo. Amo tambien se el cosa kita ta cumpli ahora. Si Jesus ya habla: “Anda ustedes y hace maga dicipulo con todo el maga gente . . . y insiña canila obedece todo el que ya manda yo con ustedes.”

⁴ Quierre si Jesus que predica el todo de suyu maga dicipulo.  Nuay le este manda con el 11 fiel apostoles lang. Porque kita se puede habla? El maga apostoles lang ba el presente na monte na Galilea cuando ya dale el mandamiento que hace dicipulo? Acorda que el angel ya habla con el maga mujer: “Alla [na Galilea] ay mira ustedes con ele.” Poreso, posible que aquellos maga fiel mujer presente tambien na aquel ocasion. Omento pa, si apostol Pablo ya habla que “ya aparece [si Jesus] con mas de quinientos del maga hermano y hermana na un tiempo lang.” (1 Cor. 15:6) Onde?

5. Porque kita puede habla que el 1 Corinto 15:6 ta refiri na miting na Galilea que ya menciona na Mateo capitulo 28?

⁵ Tiene kita razon para pensa que ta refiri si Pablo con el miting na Galilea que ya menciona na Mateo capitulo 28. Una, de Galilea el mayoria del maga dicipulo de Jesus. Poreso, un monte na Galilea​—en vez na un casa na Jerusalem—​el justo lugar onde puede man junto-junto el bien manada gente. Ika-dos, despues del resureccion de Jesus, yan mirajan ya sila pati de suyu 11 apostoles na un casa na Jerusalem. Si quierre era le que con el maga apostoles lang manda predica y hace dicipulo, ya hace ya era le se na Jerusalem en vez de habla kanila, con el maga mujer y con otro que man mirajan sila na Galilea.​—Luc. 24:33, 36.

6. Paquemodo el Mateo 28:20 ta dale mira que el mandato para hace dicipulo aplicable na diaton tiempo ahora y paquemodo el maga gente ta obedece con este?

⁶ Nota con el ika-tres importante razon. El mandato de Jesus que hace dicipulo gendeh lang para na maga Cristiano del primer siglo. Porque kita se sabe? Na fin del instruccion de Jesus, ele ya habla con el de suyu maga siguidores: “Ay esta yo junto con ustedes todo el dia hasta na fin del mundo.” (Mat. 28:20) Igual na cosa ya habla si Jesus, manada gente ahora el ta hace maga dicipulo. Pensa con este. Cada año, cerca 300,000 gente el ta bautiza como maga Testigo de Jehova y ta queda dicipulo de Jesucristo!

7. Cosa kita discuti ahora y porque?

⁷ Manada del quien ta estudia Biblia el ta progresa para na bautismo. Pero, tiene de aquellos quien regular tan Bible study junto kanaton el tan alang-alang queda dicipulo. Ta gusta sila con el cosa sila ta aprende pero gendeh sila ta progresa para na bautismo. Todo kita quien tiene Bible study quierre ayuda kanila para aplica si cosa sila ta aprende y queda dicipulo del Cristo. Este articulo hay discuti si paquemodo kita puede alcanza con el corazon del diaton Bible study y si paquemodo ayuda con ele para progresa na espiritual. Porque kita necesita discuti con este topico? Cay llega el tiempo, necesita kita decidi si continua pa ba con el estudiada o gendeh ya.

8. Porque gendeh facil tiene vez ayuda con el diaton Bible study para ama con Jehova?

⁸ Quierre si Jehova que el maga gente sirvi con ele cay ta ama sila con ele. Poreso, goal diaton que ayuda con el maga Bible study para entende que si Jehova interesao con el cada individual y ta ama gayot le kanila. Quierre kita que mira sila con Jehova como “el tata del maga quien nuay tata y quien ta protege con el maga viuda.” (Sal. 68:5) Si puede realiza el de tuyu maga Bible study que ta ama gayot kanila el Dios, posible hay principia tambien sila ama con ele. El cuanto maga Bible study posible ta tormenta mira con Jehova como un amable Tata cay el diila mismo tata nuay kanila dale mira amor y cariño. (2 Tim. 3:1, 3) Poreso mientras ta conduci tu Bible study, hace claro kanila el maga bonito calidad de Jehova. Hace entende con el de tuyu maga Bible study que el diaton amable Dios quierre que obtene  sila vida eterna y preparao le ayuda kanila para alcanza con ese goal. Cosa pa kita puede hace?

9-10. Cosa maga publicacion kita debe usa para conduci Bible study y porque?

⁹ Usa con el libro “Cosa Kanaton Puede Enseña el Biblia?” y “Esta Ustedes na Amor del Dios.” Este maga publicacion ya diseña para ayuda kanaton alcanza con el corazon del diaton maga Bible study. Por ejemplo, el capitulo 1 del libro Enseña Kanaton ta contesta con el maga pregunta igual: Ta ama ba kanaton el Dios o nuay le queber kanaton?, Cosa ta sinti el Dios si ta sufri el maga gente? y Puede ba tu queda amigo del Dios? Quetal el libro Amor del Dios? Este libro puede ayuda con el Bible study para entende que puede le beneficia si aplica le con el maga principio na Biblia y ayuda este para queda mas cerca con Jehova. Maskin pa ya usa ya tu con este na otro Bible study, prepara enbuenamente con el cada estudiada y pensa si paquemodo este puede ayuda con el de tuyu Bible study.

¹⁰ Pero paquemodo si el de tuyu Bible study interesao na un topico que ta discuti na un publicacion que gendeh parte del diaton Teaching Toolbox? Puede tu con ele anima que le con el  publicacion na otro tiempo para puede ustedes continua estudia con el publicacion para na Bible study.

11. Cuando kita debe principia reza si tan Bible study y paquemodo tu puede hace entende que importante este?

¹¹ Principia con el estudiada por medio na rezo. Mas bueno si principia y termina kita con el estudiada por medio de rezo na mas temprano si posible. Puede se kita hace maga cuanto semana despues establicia el regular Bible study. Debe kita ayuda con el Bible study para realiza que puede lang kita entende con el Palabra del Dios por medio na ayuda del sagrao espiritu del Dios. El cuanto maga hermano ta le con el Santiago 1:5 para dale mira si porque necesita reza si tan Bible study. Este ta habla: “Si tiene de ustedes quien falta el saber, pidi se con el Dios.” Despues ta pregunta sila con el Bible study, “Paquemodo kita pidi saber con Dios?” El Bible study asigurao man uyun que debe kita reza con Dios.

12. Paquemodo tu usa con el Salmo 139:2-4 para ayuda con el de tuyu Bible study que habla con Jehova si cosa le ta sinti?

¹² Enseña con el de tuyu Bible study si paquemodo reza. Hace entende con ele que quierre si Jehova oi con el de suyu maga sincero rezo. Explica que na diaton privado rezo puede kita habla con Jehova el cosa na diaton corazon​—maga cosas que posible tan huya kita habla na otro gente. Acorda que sabe ya si Jehova si cosa el talli na diaton pensamiento. (Le con el Salmo 139:2-4.) Puede tambien kita anima con el diaton maga Bible study que pidi ayuda con Jehova para puede sila quita con el gendeh justo pensamiento y vicio. Pone kita que cuanto tiempo ya tan Bible study el un persona pero tan enjoy siempre le con el un celebracion que gendeh para na maga Cristiano. Sabe le que malo este pero quierre-quierre siempre le con el cuanto parte de este. Anima con ele que habla con Jehova si cosa le ta sinti y pidi ayuda para puede le ama con el cosa lang ta ama el Dios.​—Sal. 97:10.

13. (a) Porque kita debe invita dayun con el diaton Bible study na diaton maga miting si posible? (b) Cosa kita hace para gendeh tiene huya el diaton Bible study si na Kingdom Hall?

¹³ Si posible, invita dayun con el de tuyu Bible study que atende na maga miting. El cosa le puede oi y mira na maga miting puede manda move con ele para progresa y sirvi con Jehova. Dale con ele mira el video Cosa Ta Hace na Kingdom Hall? y convida con ele atende. Si posible, arregla para tiene le transportacion para anda na miting. Bueno tambien si convida tu otro-otro publisher para man junto na de ustedes estudiada. Na ese manera, manada con quien puede conoce el de tuyu Bible study y posible, gendeh le tiene huya si atende le na diaton maga miting.

14. Cosa manda move con el Bible study para progresa na espiritual?

¹⁴ El diaton goal amo que ayuda con el diaton Bible study para progresa na espiritual. (Ef. 4:13) Si el un persona ya conforma man Bible study, posible que interesao le si paquemodo este puede ayuda con ele. Pero mientras ta crici el de suyu amor con Jehova, posible puede le pensa si paquemodo puede ayuda con otro, incluido ya aquellos parte del congregacion. (Mat. 22:37-39) Na justo tiempo, no man huya menciona que tiene kita privilegio para suporta con el Reino por medio na diaton donacion.

15. Paquemodo kita ayuda con el diaton Bible study para hace si cosa el justo si enfrenta le problema?

¹⁵ Enseña con el de tuyu Bible study si cosa hace si enfrenta problema. Pone kita que el de  tuyu Bible study, un unbaptized publisher, ya habla contigo que ya ofende le na cosa ya hace el un hermano na congregacion. En vez de habla si quien el justo o mali, explica si cosa ta habla el Biblia que debe le hace. Puede le perdona con el hermano y ulvida con el cosa ya sucede. Si gendeh le se puede hace, debe le converza con el hermano na amable manera y el de suyu goal amo para ‘gana otravez con el hermano.’ (Compara na Mateo 18:15.) Ayuda con el de tuyu Bible study para prepara si cosa le habla. Dale mira si paquemodo usa con el JW Library^® app, Research Guide for Jehovah’s Witnesses y jw.org^® para sabe maga practical manera si paquemodo enfrenta con el situacion. Si sabe le si paquemodo solva con el problema na maga hermano antes pa le bautiza, grande el posibilidad que hay tiene le buen relacion na maga hermano na congregacion si bautizao ya le.

16. Porque bueno que invita con otro publisher que man junto kanaton si ta conduci kita Bible study?

¹⁶ Invita con otro​—y con el circuit overseer durante el visita​—para man junto na estudiada. Porque? Puera con el cuanto razon que ya menciona enante, el otro publisher posible puede dale ayuda con el de tuyu Bible study que gendeh tu puede dale. Pone kita que el Bible study cuanto beses ya pruba descanza puma pero nuay puede hace con ese. Invita un hermano o hermana quien ya puede quita con ese vicio​—maskin pa ya tormenta le quita del primero—​para man junto na de ustedes estudiada. Este hermano o hermana posible puede dale practical consejo que necesita el Bible study. Si gendeh tu comfortable conduci Bible study junto na un experienciao hermano o hermana, puede tu pidi con ele que ele conduci con el estudiada. Si invita tu con otro para man junto na de ustedes estudiada, el de tuyu Bible study puede beneficia na diila maga experiencia. Acorda que goal diaton ayuda con el diaton Bible study para progresa na espiritual.

17-18. Cosa tu debe considera si ta decidi si debe ba descanza con el estudiada?

¹⁷ Si el de tuyu Bible study gendeh ta hace cambio na de suyu vida, llega el tiempo que necesita tu pregunta con el de tuyu mismo cuerpo, ‘Debe ba yo descanza con el diamon estudiada?’ Antes de hace decision, debe tu pensa con el abilidad del persona. El cuanto maga gente mas tarda ta progresa si compara con otro. Pregunta na de tuyu mismo cuerpo: ‘El de mio Bible study ba ta progresa uyun na de suyu situacion?’ ‘Ta “obedece” ba le o ta aplica con el cosa le ta aprende?’ (Mat. 28:20) Posible, necesita largo tiempo para progresa el un Bible study pero debe le hace maga cambio na de suyu vida.

¹⁸ Pero paquemodo si ya dura ya ta estudia el un Bible study pero gendeh le ta dale mira que ta aprecia le con el cosa le ta estudia? Considera  con este situacion: El de tuyu Bible study ya acaba ya estudia con el libro Enseña Kanaton y ta estudia ya con el libro Amor del Dios pero nuay pa le atende maskin una vez na miting o maskin na Comemoracion. Y manada beses le ya habla que gendeh anay ustedes man Bible study, maskin na gendeh bien importante razon. Si igual ansina el de tuyu Bible study, necesita tu converza franca con ele. *

19. Cosa tu puede habla con el un Bible study quien dol gendeh ta aprecia con el cosa le ta estudia y cosa tu necesita considera?

¹⁹ Puede tu pregunta con ele: ‘Para contigo, cosa el bien dificil hace para queda un Testigo de Jehova?’ Posible contesta le, ‘Quierre yo estudia con el Biblia pero nunca yo queda un Testigo de Jehova!’ Si ansina el de suyu custumbre despues del cuanto tiempo que tan Bible study ustedes, tiene pa ba razon para continua con el estudiada? Pero, posible tambien que habla contigo el de tuyu Bible study por primer vez si porque gendeh le ta progresa. Por ejemplo, baka ta sinti le que gendeh gayot le puede predica na casa en casa. Si sabe tu si cosa le ta sinti, mas tiene tu idea si cosa hace para ayuda con ele.

20. Paquemodo el Maga Actividad 13:48 puede ayuda kanaton para decidi si continua ba con el Bible study o gendeh?

²⁰ Maka-triste que tiene cuanto maga Bible study el igual na maga Israelita na tiempo de Ezequiel. Acerca kanila, si Jehova ya habla con Ezequiel: “Mira! Para kanila, igual tu na un romantico cancion que ya canta con bonito voz y ya tuca na instrumento de cuerdas. Hay oi sila si cosa tu habla pero gendeh sila hace con ese.” (Eze. 33:32) Posible, gendeh facil para kanaton que habla con el un persona que gendeh ya kita man Bible study con ele. Pero, acorda que “corto [ya] lang el tiempo.” (1 Cor. 7:29) En vez de usa con el diaton tiempo para man Bible study con el maga gendeh ta progresa, mas bueno si busca kita con aquellos quien ta dale mira que “tiene [sila] justo condicion de corazon para obtene vida eterna.”​—Le con el Maga Actividad 13:48, NWT.

21. Cosa el diaton yeartext para na año 2020 y cosa este ayuda kanaton hace?

²¹ Na año 2020, el diaton yeartext hay ayuda kanaton para pensa si paquemodo kita queda mas efectivo na hacida de dicipulo. Ta inclui este el cosa ya habla si Jesus durante el importante miting na monte na Galilea: “Anda ustedes y hace maga dicipulo . . . , bautiza canila.”​—Mat. 28:19.