1-2. Cosa maga situacion ta enfrenta el manada siervo de Jehova y cosa posible el efecto de este kanila?

CONSIDERA con el tres ecsena: Ya habla con el un joven hermano que tiene le enfermedad que ta hace con ele bien maluya. Ya quita na trabajo con el un buen trabajador hermano que mas de 50 año ya y nuay le puede incuntra otro trabajo, maskin pa ya pricura le busca. El un fiel y de edad hermana limitao ya na cosa le ta puede hace na servicio con Jehova.

² Si ta experiencia tu igual ansina situacion, posible ta sinti tu que nuay mas tu valor. Ese maga situacion puede quita con el de tuyu alegria y respeto na cuerpo y puede tiene mal efecto na de tuyu relacion con otro.

3. Cosa el mirada de Satanas y de aquellos quien bajo na de suyu influencia na vida del maga gente?

³ Este mundo ta dale mira si cosa el mirada de Satanas na vida del maga gente. Ta considera le kanila como nuay valor. Ya habla le con Eva que hay tiene le libertad si desobedece le con Dios maskin pa sabe si Satanas que muerte el resulta del desobediencia. Ta controla si Satanas con el sistema de comercio, politica y religion de este mundo. Poreso, gendeh maka-estraña que manada negociante, politico y religioso lider el nuay queber na vida y si cosa ta sinti el maga gente.

4. Cosa kita discuti na este articulo?

⁴ Pero, quierre si Jehova que realiza kita que tiene kita valor.  Ta ayuda le kanaton si ta enfrenta kita maga situacion que posible manda kanaton sinti que nuay kita valor. (Sal. 136:23; Roma 12:3) Este articulo hay discuti si paquemodo kanaton ta ayuda si Jehova na este maga situacion: (1) Si tiene kita enfermedad, (2) si tan dificil kita na financial y (3) si ta sinti kita que nuay mas kita cosa puede hace para con Jehova cay de edad ya. Pero, aprende kita una si porque kita puede asigura que valoroso con Jehova el cada uno kanaton.

5. Porque tu convincido que el maga gente valoroso con Jehova?

⁵ Maskin pa estaba kita na polvos, bien precioso kita. (Gen. 2:7) Considera el cuanto razon si porque kita sabe que valoroso kita con Jehova. Ya crea le con el maga gente que tiene abilidad para imita con el de suyu maga calidad. (Gen. 1:27) Gane, mas alto kita si compara na otro maga creacion del Dios na tierra. Kita el cuida con el tierra y con el maga animal.​—Sal. 8:4-8.

6. Cosa el otro prueba que valoroso con Jehova el maga imperfecto gente?

⁶ Maskin despues comete pecado si Adan, valoroso siempre el maga gente con Jehova. Bien precioso kita para con ele poreso ya dale le con el de suyu Anak, si Jesus, para rescata kanaton. (1 Juan 4:9, 10) Por medio de ese rescate, hay resucita si Jehova con aquellos quien ya muri por causa na pecado de Adan​—el maga “bueno y el maga pecador.” (Act. 24:15) El Palabra de Jehova ta dale mira que precioso kita con ele maskin cosa pa el condicion del diaton salud, estado na vida o edad.​—Act. 10:34, 35.

7. Cosa pa el otro maga razon para creé el maga siervo del Dios que precioso sila con Jehova?

⁷ Tiene pa otro razon para creé que precioso kita con Jehova. Ya hace le manera para queda kita cerca con ele y ya mira le si paquemodo kita ya responde na buen noticia. (Juan 6:44) Mientras ta atraca kita con Jehova, mas ta atraca le cerca kanaton. (Sant. 4:8) Si Jehova ta dale tambien tiempo y ta hace esfuerzo para enseña kanaton. Prueba este que valoroso kita con ele. Sabe le si cosa clase de gente kita ahora y sabe le que puede pa kita hace maga necesita cambio. Ta disciplina tambien le kanaton cay ta ama le kanaton. (Prov. 3:11, 12) Claro gayot que precioso kita con Jehova!

8. Na cosa manera el Salmo 18:27-29 puede afecta con el diaton mirada na diaton maga dificultad?

⁸ El cuanto ta mira con Rey David como nuay valor, pero sabe le que ta ama y ta suporta con ele si Jehova. Por causa con ese, ya cambia el de suyu mirada na de suyu situacion y ya puede le aguanta. (2 Sam. 16:5-7) Si ta sinti kita bien triste o ta experiencia problema, puede kanaton ayuda si Jehova para cambia el diaton mirada na diaton situacion y ayuda le kanaton para puede enfrenta con el maskin cosa dificultad. (Le con el Salmo 18:27-29.) Si tiene kita el ayuda de Jehova, nuay maskin cosa el puede hace descanza con el diaton alegre servicio con ele. (Roma 8:31) Considera kita ahora tres especifico situacion donde bien necesita kita acorda que valoroso kita y ta ama kanaton si Jehova.

9. Na cosa manera el enfermedad ta afecta con el diaton mirada na diaton cuerpo?

⁹ Si tiene kita enfermedad, puede este afecta con el diaton emocion y manda kanaton sinti que nuay mas kita valor maskin con quien. Posible, tan huya kita si ta puede nota el otro que enfermo kita o si ta necesita kita con el ayuda del otro. Maskin pa no sabe el  otro que enfermo kita, posible ta tiene siempre kita huya cay gendeh mas kita ta puede hace el maga cosas que ta puede kita hace de antes. Na ese maga situacion, ta anima y ta ayuda kanaton si Jehova. Paquemodo?

10. Asegun na Proverbio 12:25, cosa puede ayuda kanaton si enfermo kita?

¹⁰ Si enfermo kita, el maga “buen palabra” puede anima kanaton. (Le con el Proverbio 12:25.) Na Biblia, puede kita incuntra con el maga buen palabra que ya pone si Jehova para hace kanaton acorda que importante kita con ele maskin pa tiene kita enfermedad. (Sal. 31:19; 41:3) Si pirmi kita le con ese maga palabra, ayuda kanaton si Jehova para puede kita enfrenta con el negativo emocion que resulta del diaton enfermedad.

11. Na cosa manera el un hermano ya experiencia con el ayuda de Jehova?

¹¹ Considera con el ejemplo de Jorge. Tiene le enfermedad que pronto lang ya queda grabe. Como resulta, ya sinti le que nuay le valor. “Grabe el dolor que ya sinti yo y ya tiene yo huya cay ta mira conmigo el maga gente por causa na de mio enfermedad,” ya habla si Jorge. “Mientras ta queda mas grabe el de mio condicion, ya pensa yo si paquemodo cambia de mio vida. Bien triste yo y ya pidi con Jehova que ayuda conmigo.” Paquemodo con ele ya ayuda si Jehova? “Ciendo tan dificil yo concentra, ta le lang yo maga cuanto versiculo na Salmo que ta dale mira el amor de Jehova para na de suyu maga siervo. Cuanto beses yo ta le con ese maga texto cada dia y ta dale este conmigo comforta. Despues del cuanto tiempo, ya puede nota el maga gente que pirmi ya yo tan smile. Ya habla pa gane sila que el de mio positivo mirada ya puede anima kanila. Ya puede yo realiza que ya contesta si Jehova con el de mio rezo! Ya  ayuda le conmigo que cambia el de mio mirada na de mio mismo cuerpo. Yan focus yo na cosa ta habla el de suyu Palabra acerca na de suyu mirada conmigo maskin pa tiene yo enfermedad.”

12. Si tiene tu enfermedad, cosa tu hace para experiencia con el ayuda de Jehova?

¹² Si tiene tu enfermedad, puede tu asigura que sabe si Jehova si cosa tu ta sinti. Pidi con ele que ayuda contigo para puede tu tiene justo mirada na de tuyu situacion. Despues, busca na Biblia el maga buen palabra que ya pone si Jehova para contigo. Man focus na maga texto que ta dale mira si paquemodo de valoroso el maga siervo de Jehova para con ele. Si hace tu se, puede tu mira que bueno si Jehova con todo aquellos quien fiel ta sirvi con ele.​—Sal. 84:11.

13. Cosa posible sinti el un cabeza del familia si ya quita con ele na trabajo?

¹³ Quierre el todo cabeza del familia que puede sila dale el necesidad del diila familia. Pero pone kita que ya quita na trabajo con el un hermano maskin pa nuay le cosa ya hace malo. Ya pricura le busca otro trabajo pero nuay le incuntra. Na ansina situacion, posible sinti le que nuay le valor. Na cosa manera puede con ele ayuda si man focus le na maga promesa de Jehova?

14. Porque si Jehova ta cumpli con el de suyu maga promesa?

¹⁴ Si Jehova pirmi ta cumpli con el de suyu maga promesa. (Jos. 21:45; 23:14) Ta hace se ele por causa na manada razon. Una, ta afecta este con el de suyu nombre o reputacion. Ya promete si Jehova que hay cuida le con el de suyu maga leal siervo y ta sinti le que obligao le cumpli con ese promesa. (Sal. 31:1-3)  Mas pa, sabe si Jehova que hay queda kita bien triste si gendeh le cuida con aquellos parte del de suyu familia. Ya promete le que dale el diaton material y espiritual necesidad y nuay cosa puede sangga con ele para cumpli con ese promesa!​—Mat. 6:30-33; 24:45.

15. (a) Cosa dificultad ya enfrenta el maga Cristiano del primer siglo? (b) Cosa kanaton ta asigura el Salmo 37:18, 19?

¹⁵ Si acorda kita si porque ta cumpli si Jehova con el de suyu maga promesa, puede kita asigura que ayuda le kanaton enfrenta el diaton problema na financial. Considera con el ejemplo del maga Cristiano del primer siglo. Cuando ya persigui con el congregacion na Jerusalem, “todo sila, fuera lang el maga Apostol, ya escapa.” (Act. 8:1) Pensa si cosa el resulta de este. Problema na financial! Posible que ya perde el casa y trabajo o negocio del maga hermano y hermana. Pero, nuay kanila abandona si Jehova. Nuay tambien perde el diila alegria. (Act. 8:4; Heb. 13:5, 6; Sant. 1:2, 3) Ya ayuda si Jehova con aquel maga fiel Cristiano y ayuda tambien le kanaton ahora.​—Le con el Salmo 37:18, 19.

16. Cosa situacion posible manda sinti kanaton que gendeh kita valoroso con Jehova?

¹⁶ Mientras ta queda kita de edad, posible sinti kita que nuay mas kita cosa puede dale con Jehova. Posible, ya sinti tambien igual ansina si Rey David mientras ya queda le de edad. (Sal. 71:9) Paquemodo kanaton ayuda si Jehova?

17. Cosa kita puede aprende na experiencia del un hermana, si Jheri?

¹⁷ Considera con el experiencia del un hermana, si Jheri. Ya invita con ele para atende na training si paquemodo mentena con el Kingdom Hall, pero no quierre le anda. Ya habla le: “Vieja ya yo, viuda y nuay cosa sabe. Nuay yo  valor.” Na noche antes del training, ya habla le con Jehova si cosa le ta sinti na rezo. Cuando ya llega le na Kingdom Hall pagka-alamañana, yan duda siempre le si debe ba le anda alla. Durante el programa, ya hace claro el un hermano que el de con todo importante skill que tiene kita amo que conforme kita manda enseña con Jehova. Ya acorda si Jheri: “Ya pensa yo, ‘Tiene yo se skill!’ Ya llura yo cuando ya realiza yo que ya contesta si Jehova con el de mio rezo. Ta asigura le conmigo que tiene yo cosa puede dale y quierre le enseña conmigo.” Si Jheri ya habla: “Ya anda yo na aquel training que ta nervia, maluya y bien triste. Pero ya sale yo alla que tiene confianza y ta sinti que valoroso yo!”

18. Paquemodo ta dale mira el Biblia que valoroso siempre con Jehova el diaton servicio maskin pa de edad ya kita?

¹⁸ Mientras ta queda kita de edad, puede kita asigura que tiene siempre kita trabajo estaba con Jehova. (Sal. 92:12-15) Ya enseña kanaton si Jesus que maskin pa ta mira kita que bien diutay el diaton abilidad o esfuerzo, valoroso con Jehova el cosa kita ta puede hace na servicio con ele. (Luc. 21:2-4) Poreso, man focus na cosa tu puede hace. Por ejemplo, puede tu converza acerca con Jehova, reza para na maga hermano y anima con otro que esta fiel. Ta mira contigo si Jehova como uban de suyu na trabajo, gendeh por causa na cosa tu puede hace, sino por causa na de tuyu obediencia con ele.​—1 Cor. 3:5-9.

19. Cosa kanaton ta asigura el Roma 8:38, 39?

¹⁹ Ta rindi gayot kita gracias cay ta adora kita con Jehova, el Dios con quien precioso el todo quien ta sirvi con ele! Ya crea le kanaton para hace de suyu voluntad y por causa na verdadero adoranza, deverasan kita alegre. (Rev. 4:11) Maskin pa ta mira kanaton el maga gente na mundo como nuay valor, gendeh ansina el mirada de Jehova. (Heb. 11:16, 38) Si ta sinti kita bien triste por causa na enfermedad, problema na financial o cay de edad ya, acorda kita que nuay maskin cosa el puede separta kanaton na amor del diaton Tata na cielo.​—Le con el Roma 8:38, 39.