1. Igual con Rey David, cosa posible puede pregunta el cuanto kanaton?

TODO kita quierre queda calmao y tiene paz na vida. Nuay quien quierre man lingasa. Pero tiene vez, posible kita queda bien malingasa. Gane, el cuanto del maga siervo de Jehova posible puede pregunta igual con el cosa ya pregunta si Rey David con Jehova: “Hasta cuando yo man lingasa y queda triste cada dia?”​—Sal. 13:2.

2. Cosa kita discuti na este articulo?

² Maskin pa gendeh kita puede evita que gendeh gayot man lingasa, tiene kita cosa puede hace para menora con ese. Na este articulo hay discuti kita una con el cuanto cosa que posible causa kanaton para man lingasa. Despues, hay considera kita con el seis practical manera que puede kita hace para esta calmao mientras ta enfrenta con el diaton maga problema.

3. Cosa maga dificultad kita ta enfrenta y tiene ba kita cosa puede hace para controla con ese?

³ Manada cosas el puede causa kanaton para man lingasa y nuay kita cosa puede hace para controla con ese. Por ejemplo, gendeh kita puede evita que subi el precio del comida, camisa y pagada na casa cada año. Gendeh tambien kita puede controla si cuanto beses kanaton pricura engaña el diaton maga uban na trabajo o na escuela para hace maga deshonesto o imoral cosas. Y gendeh kita puede sangga con el crimen  na diaton lugar. Ta enfrenta kita con este maga dificultad cay ta vivi kita na un mundo donde el mayoria del maga gente gendeh ta sigui con el maga principio na Biblia. Si Satanas, el dios de este mundo, sabe que el cuanto maga gente hay permiti que “el maga lingasa de este mundo” hay sangga kanila para sirvi con Jehova. (Mat. 13:22; 1 Juan 5:19) Poreso, gendeh mas kita estraña que este mundo lleno de problema que ta causa kanaton maga gente para man lingasa.

4. Cosa posible sucede kanaton si sobra kita man lingasa?

⁴ Posible que queda kita bien malingasa na diaton maga problema que nuay mas ya kita cosa ta puede hace. Por ejemplo, baka tan lingasa kita cay gendeh bastante el diaton sueldo para na diaton necesidad o baka enferma kita y gendeh puede trabaja o baka quita pa gane kanaton na trabajo. Posible, tan lingasa kita que baka gendeh kita esta fiel y desobedece con el ley del Dios. Gendeh mas tarda, si Satanas hay causa con aquellos con quien le ta controla para ataca con el maga siervo del Dios poreso baka man lingasa kita si cosa kita hace si llega ese tiempo. Posible pensa kita, ‘Malo ba que man lingasa yo acerca con ese maga cosas?’

5. Cosa quierre decir cuando ya habla si Jesus: “No ustedes man lingasa”?

⁵ Sabe kita que ya habla si Jesus con el de suyu maga siguidores: “No ustedes man lingasa.” (Mat. 6:25) Quierre decir ba de este que gendeh kita debe man lingasa acerca na maskin cosa? Gendeh! Gane, el cuanto del maga leal siervo de Jehova de antes, ya sinti tambien lingasa pero ya continua sila tiene el favor de Jehova. * (1 Rey 19:4; Sal. 6:3) El deverasan, ta dale kanaton asiguranza si Jesus. No quierre le que queda kita sobra de malingasa acerca na diaton maga necesidad y causa kanaton que gendeh mas hace una na diaton vida el servicio con Dios. Cosa kita puede hace para gendeh queda sobra de malingasa?​—Mira con el cajon “ Si Paquemodo Hace con Ese.”

6. Asegun na Filipo 4:6, 7, cosa puede hace calma kanaton?

⁶ (1) Reza pirmi. El maga Cristiano quien tan lingasa puede incuntra alivio si man cuento sila con Jehova na rezo. (1 Ped. 5:7) Como contestacion na de tuyu rezo, puede tu ricibi “el paz del Dios, . . . que noay [gente] quien ta puede entende.” (Le con el Filipo 4:6, 7.) Ta hace kanaton calma si Jehova por medio na de suyu poderoso sagrao espiritu.​—Gal. 5:22.

7. Cosa kita debe acorda si ta reza con Dios?

⁷ Si ta reza tu con Jehova, habla con ele si cosa gayot tu ta sinti. Queda especifico. Habla con ele si cosa el de tuyu problema y si cosa tu ta sinti acerca con ese. Si tiene posible solucion, pidi con ele sabeduria para sabe tu si cosa hace y pidi fuerza para hace con ese. Si nuay solucion el de tuyu problema, pidi con Jehova que ayuda contigo para gendeh tu queda sobra de malingasa. Si especifico tu na de tuyu maga rezo, mas puede tu claro mira si paquemodo ta contesta con ese si Jehova. Si nuay pa contesta con el de tuyu rezo, no descanza reza. Quierre si Jehova gendeh lang que queda tu especifico sino continua tambien reza con ele.​—Luc. 11:8-10.

8. Cosa kita debe inclui na diaton rezo?

⁸ Si ta habla tu con el de tuyu lingasa con  Jehova na rezo, no ulvida que rindi gracias con ele. Bueno para kanaton que pensa con el diaton maga bendicion maskin pa bien dificil el diaton circumstancia. Si tiene vez tan dificil kita habla si cosa gayot kita ta sinti, acorda que ta contesta si Jehova con el diaton maga rezo maskin habla lang kita ‘Pabor ayuda conmigo!’​—2 Cron. 18:31; Roma 8:26.

9. Paquemodo kita tiene deverasan seguridad?

⁹ (2) Confia na sabeduria de Jehova y gendeh na de tuyu mismo. Del ika-ocho siglo B.C.E., el maga gente de Juda ya tiene miedo por causa na maga Asiriano. Cay no quierre sila perde na maga Asiriano, ya pidi sila ayuda na Egipto. (Isa. 30:1, 2) Ya habla kanila si Jehova que el diila decision hay resulta na peligro. (Isa. 30:7, 12, 13) Por medio con Isaias, ya habla si Jehova con el maga gente si paquemodo sila tiene deverasan seguridad. Ele ya habla: “Puede ustedes tiene fuerza si esta ustedes calmao y dale mira confianza” con Jehova.​—Isa. 30:15b.

10. Cosa el cuanto maga situacion que puede kita dale mira que ta confia kita con Jehova?

¹⁰ Paquemodo kita dale mira que ta confia kita con Jehova? Considera con el cuanto ejemplo. Pone kita que ya ofrece contigo un trabajo que mas grande el sueldo pero necesita tu dale grande tiempo y sangga este con el de tuyu espiritual rutina. O el de tuyu uban na trabajo ya dale mira que tiene le interes contigo pero gendeh le bautizao siervo del Dios. O paquemodo si el de tuyu familia ya dale contigo ultimatum: “Kame o de tuyu Dios?” Na cada uno de este situacion, necesita tu hace un dificil decision pero hay dale contigo si Jehova el direccion que necesita tu. (Mat. 6:33; 10:37; 1 Cor. 7:39) Pero el pregunta, Hay confia ba tu con Jehova y aplica con el de suyu direccion?

11. Cosa maga ejemplo na Biblia el puede kita estudia para esta kita calmao maskin pa tiene oposicion?

¹¹ (3) Aprende na maga bueno y mal ejemplo. El Biblia ta contene manada ejemplo que ta dale mira que bien importante que esta calmao y confia con Jehova. Mientras ta estudia tu con este, nota si cosa ya ayuda con el maga siervo del Dios para esta calmao maskin pa ta enfrenta grabe oposicion. Por ejemplo, cuando el corte suprema del maga Judio ya manda con el maga apostoles que descanza predica, nuay sila tiene miedo. En vez, con animo sila ya declara: “Necesita came obedece con el Dios, y gendeh con el maga gente.” (Act. 5:29) Maskin despues kanila latiga, el maga apostoles nuay man panic. Porque? Cay sabe sila que ta suporta kanila si Jehova. Alegre le na cosa sila ya hace. Poreso, ya continua sila predica con el buen noticia. (Act. 5:40-42) Y cuando cerca ya muri si dicipulo Esteban, ya esta le bien calmao y el de suyu cara ya queda “dol cara de un angel.” (Act. 6:12-15) Porque? Cay asigurao le que tiene le el favor de Jehova.

12. Asegun na 1 Pedro 3:14 y 4:14, porque kita puede queda alegre si ta persigui kanaton?

¹² El maga apostoles tiene claro evidencia que junto kanila si Jehova. Ya dale le kanila poder para hace maga milagro. (Act. 5:12-16; 6:8) Pero ahora, gendeh mas se ta hace si Jehova. Maskin pa ansina, por medio na de suyu Palabra, ya asigura kanaton si Jehova que si ta persigui kanaton por causa cay ta hace kita si cosa el justo, alegre le na cosa kita ta hace y junto kanaton el de suyu espiritu. (Le con el 1 Pedro 3:14; 4:14.) Poreso, en vez de man lingasa si cosa kita hace si persigui kanaton na futuro, mas bueno si man focus kita na cosa kita puede hace ahora para hace fuerte con el diaton confianza que si Jehova puede  suporta y salva kanaton. Igual na cosa ya hace el maga dicipulo del antes, debe tambien kita confia con el promesa de Jesus: “Ay dale yo con ustedes maga palabra y saber que noay ni uno del ustedes maga contrario quien ay puede resisti o contravene.” Tiene kita el garantia: “El de ustedes paciencia ay salva con el de ustedes vida.” (Luc. 21:12-19) Y no ulvida que ta acorda si Jehova maskin el de con todo diutay detalle del de suyu maga siervo quien fiel ya muri y hay resucita le kanila.

13. Cosa el beneficio si estudia kita con el maga experiencia de aquellos quien nuay esta calmao y confia con Jehova?

¹³ Puede tambien kita aprende na maga experiencia de aquellos quien nuay esta calmao y confia con Jehova. Si estudia kita con el diila maga ejemplo, ayuda este para evita kita con el kamali que ya hace sila. Por ejemplo, na principio del rulanza de Rey Asa de Juda, ya confia le con Jehova cuando ya ataca kanila el bien manada soldao y ya ganá sila cay ya ayuda kanila si Jehova. (2 Cron. 14:9-12) Pero cuando ya ataca kanila si Rey Baasa de Israel que tiene mas poco soldao, si Asa ya paga con el maga Siriano para ayuda kanila en vez de pidi ayuda con Jehova como cosa le ya hace de antes. (2 Cron. 16:1-3) Y cuando ya tiene le grabe enfermedad, nuay le confia con Jehova que ayuda con ele.​—2 Cron. 16:12.

14. Cosa kita puede aprende na kamali que ya hace si Asa?

¹⁴ Del una, ya confia si Asa con Jehova cuando ya enfrenta le problema. Pero na uliji, nuay mas le pidi ayuda con Dios, sino ele mismo ya pricura solva con el de suyu problema. Del primero, dol bien practical el plano de Asa que pidi ayuda con el maga Siriano para man guerra contra na Israel. Pero nuay tarda el paz na Juda. Si Jehova ya habla con ele por medio na un profeta: “Cay ya confia tu con el rey de Siria y gendeh con Jehova de tuyu Dios, el maga soldao del rey de Siria ya escapa na de tuyu mano.” (2 Cron. 16:7) Debe kita queda con cuidao que gendeh confia con el diaton mismo cuerpo para solva con el diaton maga problema que gendeh mas kita ta pidi guia con Jehova por medio na de suyu Palabra. Maskin pa necesita dayun kita hace decision, debe confia kita con Jehova y hay ayuda le kanaton hace justo decision.

15. Cosa kita puede hace si ta le con el Biblia?

¹⁵ (4) Man memorize maga texto na Biblia. Si ya puede tu le maga texto na Biblia que ta dale mira si paquemodo de importante que esta calmao y confia con Jehova, pricura man memorize con ese. Baka puede ayuda contigo si le tu con este suena o escribi con este y man review pirmi. Ya manda con Josue que regular le con el libro del Ley y medita con ese para puede hace justo decision. El cosa ele puede le hay ayuda tambien con ele para gendeh tiene miedo na cosa le ta enfrenta. (Jos. 1:8, 9) Manada texto na Palabra del Dios el puede dale contigo paz na pensamiento y corazon para puede enfrenta con el maga situacion que posible contigo causa lingasa o miedo.​—Sal. 27:1-3; Prov. 3:25, 26.

16. Paquemodo si Jehova ta usa con el congregacion para ayuda kanaton esta calmao y confia con ele?

¹⁶ (5) Man junto con el maga siervo del Dios. Ta usa si Jehova con el diaton maga hermano y hermana para ayuda kanaton esta calmao y confia con ele. Na diaton maga miting, ta beneficia kita na instruccion que ta dale estaba na maga talk, maga comento del otro y si tan cuento kita na diaton maga hermano y hermana. (Heb. 10:24, 25) Puede tambien anima kanaton si habla kita si cosa kita ta sinti con el diaton maga amigo y amiga na  congregacion. El “buen palabra” estaba na un amigo puede ayuda kanaton para menora el diaton lingasa.​—Prov. 12:25.

17. Asegun na Maga Hebreo 6:19, na cosa manera el diaton esperanza puede ayuda kanaton esta calmao maskin pa na dificil circumstancia?

¹⁷ (6) Continua hace fuerte con el diaton esperanza. El diaton esperanza ta sirvi “igual como un ancla asegurao para del diaton alma” y ta ayuda kanaton esta calmao maskin pa ta enfrenta dificil circumstancia o tan lingasa. (Le con el Maga Hebreo 6:19.) Medita con el promesa de Jehova acerca na futuro donde gendeh mas kita man lingasa. (Isa. 65:17) Imagina con el de tuyu mismo cuerpo na nuevo mundo donde tiene paz y nuay mas malo cosa ta sucede. (Miq. 4:4) Puede tambien tu hace fuerte con el de tuyu esperanza si man cuento tu acerca con este con otro. Hace el todo cosa tu puede na trabajo predicacion y hacida de dicipulo. Si hace tu se, puede tu asigura que “el [de tuyu] esperanza ay cumpli gayot.”​—Heb. 6:11.

18. Cosa posible sucede na futuro y paquemodo kita puede enfrenta con ese?

¹⁸ Mientras ta queda cerca el fin de este sistema de maga cosas, hay experiencia kita mas manada dificultad que causa kanaton lingasa. El diaton yeartext para na 2021, puede ayuda kanaton para enfrenta con ese maga dificultad y esta calmao, gendeh por medio na diaton mismo fuerza, sino cay ta confia kita con Jehova. Ojala dale kita mira por medio na diaton maga accion que tiene kita fe na promesa de Jehova: “Puede ustedes tiene fuerza si esta ustedes calmao y dale mira confianza.”​—Isa. 30:15.