Si Harvey el mayor na cuatro man hermano. Ya guinda na verdad el diila familia na Midland Junction, Western Australia, del maga 1930 cuando bien dificil el economia. Ya aprende ama si Harvey con Jehova y ya bautiza na edad de 14. Ya aprende tambien ele que bueno si pirmi acepta con el maga assignment na congregacion. Cuando joven pa le, nuay le conforma cuando ya pidi con ele que le con el El Torre de Guardia na miting cay ya pensa le que gendeh le cualificao. Pero el hermano quien tan cuento con Harvey ya habla con ele, “Si tiene un persona na organizacion de Jehova el ta pidi contigo que hace con el un cosa, ta pensa ele que cualificao tu!”​—2 Cor. 3:5.

Ya aprende yo con el verdad na England, junto con el de mio nana y con el de mio mayor hermana. El de mio tata ya acepta con el verdad na uliji, pero del primero, contra le con ese. Maskin no quierre le, ya bautiza yo cuando nuay pa yo llega diez año. Quierre yo man pioneer y despues, man misionario. No quierre de mio tata que man pioneer yo si gendeh pa yo llega 21 año. Pero, nuay yo plano  espera ansina de tarda. Poreso, cuando 16 yo, ya permiti le conmigo que anda na Australia para queda junto con el de mio de con todo mayor hermana quien ya cambia na ese nacion. Y cuando 18 yo, ya principia yo man pioneer.

Na Australia, ya conoce yo con Harvey. Igual kame quierre sirvi con Jehova como misionario. Ya casa kame del 1951. Despues kame man pioneer junto por dos año, ya principia kame na circuit work. Incluido na diamon circuito el un grande porcion de Western Australia poreso necesita kame viaja maga largo distancia.

Del 1954, ya invita kanamon para atende con el ika-25 clase de Gilead. Cerca ya kame alcanza con el diamon goal que queda misionario. Ya llega kame na New York por medio na barco y ya principia con el hondo estudiada de Biblia. Na Gilead, necesita kame estudia con el lengguaje Spanish, que tormento para con Harvey cay tormento le pronuncia con el letra “r.”

Durante na diamon estudiada, ya anuncia el maga instructor que aquellos quien quierre sirvi na Japan, puede escribi con el diila nombre para entra na un Japanese-language class. Ya decidi kame que espera con el organizacion de Jehova que iscuji si onde kanamon man assign. Si Hermano Albert Schroeder, uno na maga instructor na Gilead, ya sabe que nuay kame escribi diamon nombre. Ya habla le kanamon: “Pruba ustedes pensa otravez.” Cuando nuay siempre kame escribi con el diamon nombre, si Hermano Schroeder ya habla kanamon: “Iyo y el otro maga instructor ya escribi con el de ustedes nombre. Mira si puede ustedes aprende Japanese.” Pronto lang si Harvey ya aprende con este lengguaje.

Ya llega kame na Japan del 1955 cuando tiene pa lang 500 publisher na ese nacion. El edad de Harvey 26 y iyo 24. Yan assign kanamon na ciudad de Kobe onde kame ya sirvi por cuatro año. Despues, alegre kame cuando ya invita kanamon otravez na traveling work y ya sirvi cerca na ciudad de Nagoya. Ya gusta gayot kame con el diamon assignment​—con el maga hermano, el comida y el lugar. Pero, nuay tarda, ya tiene ya tambien kame oportunidad que gendeh habla no con Jehova.

Despues del tres año na traveling work, el Japan branch ya pidi kanamon si quierre ba kame  anda na Taiwan para predica con el maga tribo de Amis. El cuanto del maga Amis hermano ya queda apostata. Y el branch na Taiwan necesita un hermano quien sabe man Japanese para ayuda arregla con el problema. * Ya gusta gayot kame con el diamon assignment na Japan, poreso un dificil decision este. Pero ya aprende si Harvey que pirmi acepta con el un assignment, poreso ya conforma kame anda.

Ya llega kame del Noviembre 1962. El Taiwan tiene 2,271 publisher y mayoria kanila maga Amis. Pero una, necesita kame aprende Chinese. Tiene lang kame un libro y un maestra quien gendeh ta converza Ingles pero ya aprende siempre kame.

Cuando ya llega kame na Taiwan, yan assign con Harvey como el branch servant. Diutay lang el branch poreso puede hace si Harvey con el de suyu responsibilidad na oficina y sirvi tambien junto con el maga Amis hermano hasta tres semana cada mes. Ya sirvi tambien le como district overseer y ta dale maga talk na asemblea. Puede era dale talk si Harvey na Japanese y entende lang el maga Amis hermano. Pero, el gobierno ya permiti lang que hace na Chinese con el maga miting que tiene que hace na religion. Poreso, maskin ta tormenta, ya dale talk si Harvey na Chinese y el un hermano el yan interpret con ese na Amis.

Na aquel tiempo, bajo na martial law el Taiwan, poreso necesita saca permit el maga hermano para puede hace maga asemblea. Gendeh facil saca permit y tiene vez, el maga polis bien tarda ta dale con ese. Si gendeh pa ta dale el maga polis con el permit na semana de asemblea, hay anda si Harvey sinta na estacion de polis hasta dale sila. Ciendo tan huya el maga polis cay tiene ta espera foreigner na diila estacion, ta dale ya lang sila con el permit.

Na maga semana que tan junto kame na maga hermano, ta camina kame maga un hora o mas pa, ta subi monte y ta pasa na maga rio. Ya acorda yo con el primer vez que ya subi yo monte. Despues del almuerzo, ya munta kame bus 5:30 de aga para na lejos barrio, ya cruza rio y ya subi monte. Bien subida gayot quel monte que el pies del hermano enfrente conmigo, na de mio cara ya.

De aquel aga, yan junto si Harvey con el maga local hermano na ministerio, pero iyo, ya predica solo na un diutay barrio donde ta queda el maga gente quien ta converza Japanese. Cuando maga ala-una ya, bien maluya ya gayot yo cay nuay yo come por cuanto hora. Cuando yan mirajan kame de Harvey, nuay ya el maga hermano. Ya cumbida man cambiajan si Harvey con el cuanto magasin para na tres huevos de manok. Ya dale le mira conmigo si paquemodo ta come con este. Ya hace le diutay agujero na cada punta de este y ya chupa con ese. Maskin pa que dol gendeh este bien sabroso, ya pruba yo uno. Pero quien come con el ika-tres huevos? Ya dale quel conmigo si Harvey cay ya pensa le que gendeh  le puede carga conmigo pabolbida si ya desma yo na hambre.

Na un asemblea de circuito, ya puede yo experiencia un cosa que nuevo conmigo. Ta esta kame na casa del hermano na costao del Kingdom Hall. Ciendo bien importante para na maga Amis el bañada, el mujer del circuit overseer ya prepara con el maga cosas que necesita para puede yo baña. Ocupao si Harvey poreso ya habla le conmigo que man una yo. Tiene alla un balde de agua frio, un balde de agua caliente y un palanggana. Pero bien espantao yo cuando el mujer del circuit overseer ya pone con ese apuera del casa donde claro puede mira el maga hermano na Kingdom Hall quien ta ayuda prepara para na asemblea. Ya pidi yo con el mujer del circuit overseer un cosa para tapa. Pero el cosa le ya lleva conmigo hacido de plastic que bien claro. Ya pensa yo que alla ya lang yo atras del casa baña, pero talla tambien el maga ganso que preparao conmigo morde. Ya pensa yo: ‘Ocupao el maga hermano, poreso gendeh sila puede nota que ta baña yo. Pero si gendeh yo baña, baka otro sila sinti. Poreso, baña ya lang gayot yo!’ Amo yo quel cosa ya hace.

Ya realiza si Harvey que el maga Amis hermano tan dificil progresa na espiritual cay manada kanila no sabe le y nuay literatura na diila lengguaje. Ciendo nuevo lang ya principia escribi con el Amis lengguaje, dol practical que enseña con el maga hermano que le na diila mismo lengguaje. Un grande trabajo este, pero despues del cuanto tiempo, el maga hermano ya puede aprende acerca con Jehova na diila mismo lengguaje. Ya principia tiene maga literatura na Amis del maga 1960, y del 1968, tiene ya El Torre de Guardia na Amis.

Pero el gobierno nuay permiti con el maga publicacion que gendeh na Chinese. Poreso, para evita maga problema, yan imprenta con el El Torre de Guardia na Amis na diferente manera. Por ejemplo, por cuanto tiempo, ya usa kame con el Mandarin-Amis edition del El Torre de Guardia. Si tiene quien pregunta, dol ta sale que ta usa lang kame con el magasin para enseña Chinese con el maga gente. Desde aquel tiempo, el organizacion de Jehova ya produci manada literatura  na Amis para ayuda con el maga gente aprende con el verdad na Biblia.​—Act. 10:34, 35.

Durante el 1960 y 1970, manada del maga Amis hermano el gendeh ta vivi harmonia na principio del Dios. Ciendo nuay pa gayot sila entende con el maga principio na Biblia, el cuanto tiene imoral clase de vida, tan burracho, ta usa tabaco y tan mamah. Ya visita si Harvey con el manada congregacion para ayuda con el maga hermano entende con el mirada de Jehova na este maga cosas. Na uno de ese maga visitada, ya experiencia kame con el cosa yo ya cunta na principio de este articulo.

Conforme hace cambio el maga humilde hermano, pero maka-triste que el manada, nuay hace cambio. Poreso, el mas de 2,450 publisher na Taiwan ya queda ya lang 900 adentro na 20 año. Bien maka-luya gayot quel. Pero sabe kame que gendeh gayot bendici si Jehova con el un gendeh limpio organizacion. (2 Cor. 7:1) Despues del cuanto tiempo, ya puede quita con este maga mal practica y na bendicion de Jehova, el Taiwan ahora tiene mas de 11,000 publisher.

Desde 1980, ya puede kame mira que ya queda fuerte na espiritual el maga congregacion de Amis y si Harvey, mas ya tiene grande tiempo para na maga Chinese. Alegre le puede ayuda con el maga marido del manada hermana para queda Testigo de Jehova. Ya acorda yo cuando ya habla ele si paquemodo le de alegre cuando el uno na este maga marido ya reza con Jehova por primer vez. Alegre tambien yo puede enseña con el manada sincero persona para queda cerca con Jehova. Alegre tambien yo puede sirvi na Taiwan branch junto con el anak hombre y anak mujer del uno del de mio maga Bible study del antes.

Ahora, nuay mas el de mio marido. Despues del cerca 59 año de casao, ya muri si Harvey del Enero 1, 2010 por causa na cancer. Cerca seis decada le ya sirvi full-time! Tan miss gayot yo siempre con ele. Pero, bien alegre yo cay ya puede yo sirvi junto con ele na dos nacion. Ya aprende kame converza dos dificil lengguaje de Asia. Pero si Harvey, ya aprende tambien escribi na ese maga lengguaje por causa na de suyu trabajo.

Despues del cuanto año, el Cuerpo Gobernante ya decidi que mas bueno si bira yo na Australia cay de edad ya yo. El primer cosa que ya pensa yo amo, ‘No quierre yo sale na Taiwan.’ Pero ya enseña conmigo si Harvey que nunca habla no na organizacion de Jehova, poreso gendeh yo se hace. Na uliji, mas ya puede yo mira que justo quel decision.

Ahora, ta sirvi yo na Australasia branch durante el semana y na local congregacion durante el weekend. Na Bethel, alegre yo puede dale tour usando el lengguaje Japanese y Chinese. Y alegre yo espera con el resureccion que ya promete si Jehova. Sabe yo que hay acorda le con Harvey quien ya aprende que nunca habla no con Jehova.​—Juan 5:28, 29.