1. Cosa tu puede habla acerca con el familia de Santiago?

SI Santiago, el hermano de Jesus, ya engranda na un familia que tiene fuerte espiritualidad. * El de suyu mayores, si Jose y Maria, ya ama gayot con Jehova y ya hace el diila de con todo para sirvi con Ele. Tiene pa omento bendicion si Santiago—el de suyu mayor hermano amo el ya queda el Mesias. Un bonito privilegio gayot que tiene si Santiago para queda parte de ese familia!

2. Cosa maga razon tiene si Santiago para tene alto mirada na de suyu hermano mayor?

² Tiene manada razon si Santiago para tene alto mirada con el de suyu hermano mayor. (Mat. 13:55) Por ejemplo, bien familiar si Jesus con el Escritura que na edad de 12, yan bilib con ele el maga bien educao anciano na Jerusalem. (Luc. 2:46, 47) Posible, ya trabaja si Santiago junto con Jesus como un carpintero. Si ansina, asigurao ya puede gayot le conoce con el de suyu hermano. Si Nathan H. Knorr pirmi ta habla: “Manada tu cosa puede aprende con el un persona si ta trabaja tu junto con ele.” * Posible, ya puede tambien nota si Santiago que “si Jesus ya crici pisicalmente y na saber y na gracia adelante de Dios y del maga gente.” (Luc. 2:52) Poreso, posible puede kita pensa que si Santiago ya queda uno na maga primer dicipulo de Jesus. Pero, gendeh se el cosa ya sucede.

3. Cosa el reaccion de Santiago cuando ya principia si Jesus con el de suyu ministerio?

³ Durante el ministerio de Jesus aqui na tierra, si Santiago nuay queda uno del de suyu maga dicipulo. (Juan 7:3-5) Gane,  posible uno si Santiago na maga pariente de Jesus quien ya pensa que ya queda ya le “loco.” (Mar. 3:21) Y nuay menciona na Biblia que junto si Santiago con el diila nana, si Maria, cuando ya mata con Jesus na estaca.—Juan 19:25-27.

4. Cosa maga leccion kita hay considera?

⁴ Na uliji, ya demonstra fe si Santiago con Jesus y ya queda un respetao anciano na Cristiano congregacion. Na este articulo, hay considera kita dos leccion que puede kita aprende con Santiago: (1) si porque kita debe esta humilde y (2) paquemodo kita queda un efectivo maestro.

5. Cosa ya hace si Santiago cuando ya aparece con ele si Jesus despues este resucita?

⁵ Del cuando si Santiago ya queda un leal siguidores de Jesus? Despues resucita con Jesus, “ya aparece Le con Santiago y despues con todo el maga Apostol.” (1 Cor. 15:7) Despues sila yan mirajan, ya queda si Santiago uno na maga dicipulo de Jesus. Presente ele cuando el maga apostoles ta espera que ricibi con el sagrao espiritu na un cuarto na Jerusalem. (Act. 1:13, 14) Na uliji, alegre ya sirvi si Santiago como un miembro del cuerpo gobernante del primer siglo. (Act. 15:6, 13-22; Gal. 2:9) Y antes el 62 C.E., ya guia con ele para escribi un carta para na maga iscujido Cristiano. Ese carta ta puede ayuda kanaton ahora, na cielo man o na tierra el diaton esperanza. (Sant. 1:1) Asegun con el un historian del primer siglo que si Josephus, ya mata con Santiago na mandato del un Judio alto sacerdote que si Ananias, anak de Anas. Ya esta fiel si Santiago con Jehova hasta ya termina el de suyu vida aqui na tierra.

6. Na cosa manera diferente si Santiago na maga religioso lider na de suyu tiempo?

⁶Humilde si Santiago. Porque kita se puede habla? Considera con el diferencia del reaccion de Santiago con Jesus na reaccion del manada religioso lider. Cuando ya puede mira si Santiago con el claro prueba que si Jesus el Anak del Dios, humilde le ya acepta con ese. Gendeh ansina el maga lider del maga sacerdote na Jerusalem. Por ejemplo, gendeh sila puede nega que ya resucita si Jesus con Lazaro. En vez acepta que si Jesus amo el representante de Jehova, ya pricura sila mata con Jesus y con Lazaro. (Juan 11:53; 12:9-11) Na uliji cuando ya resucita con Jesus, ya pricura sila esconde con ese verdad na maga gente. (Mat. 28:11-15) Cay  orgulloso aquellos maga religioso lider, nuay sila acepta con el Mesias.

7. Porque kita debe evita con el orgullo?

⁷El leccion: Evita con el orgullo y queda preparao aprende. Igual si paquemodo el enfermedad puede hace duro con el vena na un literal corazon y ta hace con este dificil trabaja enbuenamente, el orgullo puede hace duro con el diaton figurativo corazon y sangga kanaton que obedece con el direccion de Jehova. Ya permiti el maga Fariseo con el diila corazon para queda bien duro que nuay sila creé con el claro evidencia que si Jesus tiene el espiritu del Dios y ele el Anak del Dios. (Juan 12:37-40) Bien peligroso este cay ya sangga este kanila para tene vida hasta para cuando na futuro. (Mat. 23:13, 33) Poreso, bien importante que continua kita permiti con el palabra y espiritu del Dios que cambia con el diaton custumbre y influencia con el diaton pensamiento y diaton maga decision! (Sant. 3:17) Cay humilde si Santiago, ya permiti le con el de suyu mismo cuerpo que aprende con Jehova. Y como cosa kita hay sabe, por causa quel na de suyu humildad que ya queda le un buen maestro.

8. Cosa puede ayuda kanaton para queda maga buen maestro?

⁸ Limitao lang el secular educacion de Santiago. Asigurao que el maga religioso lider na de suyu tiempo ta mira con ele igual si paquemodo sila ta mira con apostol Pedro y Juan—como ‘gendeh estudiao.’ (Act. 4:13) Pero ya aprende si Santiago queda un efectivo maestro, como cosa kita puede mira na libro que ya escribi le. Igual con Santiago, posible limitao el diaton secular educacion. Maskin pa ansina, na ayuda del espiritu de Jehova y na practical training estaba na de suyu organizacion, puede tambien kita queda maga buen maestro. Considera kita con el ejemplo que ya dale mira si Santiago como un maestro y mira kita si cosa maga leccion kita puede aprende.

9. Cosa tu puede habla na manera de enseñada de Santiago?

⁹Nuay usa si Santiago maga dificil palabra o complicao explanacion. Como resulta, el maga quien ta oi con ele sabe si cosa sila necesita hace y si paquemodo con ese hace. Considera por ejemplo el manera si paquemodo ya  enseña si Santiago que el maga Cristiano debe preparao experiencia maga injusticia que gendeh ta guarda agrabio. Ele ya escribi: “Ta habla kita cay alegre aquellos quien ya aguanta con paciencia. Siguro ya puede ustedes oi por causa de Job na sufrimiento, y sabe ya ustedes si cosa el resulta . . . cay lastimoso y misericordioso el Señor.” (Sant. 5:11) Nota que yan base si Santiago con el de suyu maga enseñanza na Escritura. Ya usa le con el Palabra del Dios para ayuda con el maga quien ta oi con ele para mira que pirmi ta bendici si Jehova con aquellos quien leal con Ele, igual con Job. Ya enseña si Santiago con aquel leccion usando el maga simple palabra y explanacion. Na aquel manera, nuay guinda con ele el atencion sino con Jehova.

10. Cosa el un manera que puede kita imita con Santiago si ta enseña?

¹⁰El leccion: Hace simple con el de tuyu mensaje y enseña estaba na Palabra del Dios. Si ta enseña kita con otro, gendeh kita debe pricura dale mira kanila si paquemodo kita de manada cosa sabe. Sino, debe kita dale mira kanila si paquemodo de manada cosa sabe si Jehova y si paquemodo le de bien interesao kanila. (Roma 11:33) Puede kita se hace si pirmi kita tan base na Escritura el cosa kita ta habla. Por ejemplo, en vez que habla con el diaton maga Bible study si cosa kita hace si kita el na diila lugar, debe kita ayuda kanila pensa maga ejemplo na Biblia y entende si cosa si Jehova ta pensa y ta sinti. Como resulta, puede este motiva kanila que tene el deseo que hace alegre con Jehova, gendeh kanaton.

11. Cosa maga dificultad el ya enfrenta el cuanto Cristiano na tiempo de Santiago y cosa consejo ele ya dale kanila? (Santiago 5:13-15)

¹¹Realistico si Santiago. Na de suyu carta, claro que sabe si Santiago si cosa el maga dificultad ta experiencia el de suyu maga hermano y hermana. Ya dale le kanila maga especifico direccion si paquemodo enfrenta con ese. Por ejemplo, el cuanto Cristiano gendeh dayun ta aplica con el consejo que ta dale kanila. (Sant. 1:22) El otro tan afavor con el maga rico. (Sant. 2:1-3) Y el otro ta tormenta controla con el diila palabra. (Sant. 3:8-10) Aquellos maga Cristiano tiene maga serioso problema pero ta creé si Santiago que puede sila cambia. Ya dale le kanila consejo na bueno pero directa manera y ya anima con aquellos quien tan dificil na espiritual que pidi mas ayuda na maga anciano.—Le con el Santiago 5:13-15.

12. Paquemodo kita puede esta positivo si ta ayuda con el maga Bible study?

¹²El leccion: Queda realistico pero tene positivo mirada con otro. Manada de aquellos con quien kita tan Bible study el posible tan dificil aplica con el consejo del Biblia. (Sant. 4:1-4) Posible, hay alcanza pa kanila cuanto tiempo para quita con el diila negativo custumbre y cultiva con el maga buen calidad. Igual con Santiago, debe kita tene el coraje para habla con el diaton maga Bible study si onde sila necesita hace maga cambio. Necesita tambien kita esta positivo y confia que hay hace si Jehova cerca con ele con el maga humilde gente y hay dale le kanila el fuerza para hace maga cambio na diila vida.—Sant. 4:10.

13. Como cosa ya indica na Santiago 3:2, cosa ya admiti si Santiago?

¹³Tiene justo mirada si Santiago na de suyu mismo cuerpo. Nuay sinti si Santiago que especial le o mas importante que con el de suyu maga hermano y hermana cay hermano le de Jesus o cay tiene le maga privilegio. Ya llama le con el otro maga Cristiano como “maga hermano y hermana con quien yo ta ama.” (Sant. 1:16, 19; 2:5) Nuay le dale impresion que perfecto le. Sino, ya inclui le con el de  suyu mismo cuerpo cuando ya habla le: “Todo kita ta comete culpa muchas veces.”—Le con el Santiago 3:2.

14. Porque kita debe admiti que tan kamali kita?

¹⁴El leccion: Acorda que todo kita tan kamali. Gendeh kita debe pensa que mas alto kita que con aquellos con quien kita ta enseña. Porque? Si dale kita impresion con el diaton Bible study que gendeh kita tan kamali, posible le pensa que gendeh gayot le puede hace con el cosa quierre el Dios. Pero si admiti kita que gendeh pirmi facil para kanaton que sigui con el maga principio na Escritura y explica si paquemodo si Jehova ya ayuda kanaton para enfrenta con el diaton maga dificultad, hay ayuda kita con el diaton Bible study para mira que puede tambien le sirvi con Jehova.

15. Cosa tu puede habla acerca na maga ilustracion que ya usa si Santiago? (Santiago 3:2-5, 10-12)

¹⁵Ya usa maga ilustracion si Santiago que ta alcanza na corazon. Asigurao, ya ayuda con ele el sagrao espiritu pero posible manada tambien le cosa ya aprende acerca si paquemodo enseña cuando ya estudia le con el maga ilustracion que ya usa el de suyu hermano mayor, si Jesus. Simple el maga ilustracion que ya usa si Santiago na de suyu carta y claro el maga leccion.—Le con el Santiago 3:2-5, 10-12.

16. Porque kita debe usa maga efectivo ilustracion?

¹⁶El leccion: Usa maga efectivo ilustracion. Si ta usa tu maga justo ilustracion, gendeh lang ta oi el maga gente el leccion que quierre tu que aprende sila. Sino, ta ayuda tu kanila para imagina si cosa tu ta enseña. Puede este ayuda con el quien ta oi contigo para acorda con el maga importante verdad na Biblia. Bien bueno usa si Jesus maga efectivo ilustracion y el de suyu hermano, si Santiago, ya sigui con el de suyu ejemplo. Examina kita ahora con el uno del maga ilustracion de Santiago y considera si porque este bien efectivo.

17. Porque bien efectivo el ilustracion na Santiago 1:22-25?

¹⁷ Le con el Santiago 1:22-25. Manada razon si porque efectivo el ilustracion de Santiago acerca na espejo. Ta enseña le un especifico leccion—para beneficia na Palabra del Dios, gendeh lang kita debe le con ese sino debe kita aplica con el cosa kita ya le. Ya iscuji un ilustracion si Santiago que familiar con el maga gente quien ta oi con ele—un gente quien ta  mira na espejo. Cosa el de suyu punto? No vale nada lang para con el un gente que mira na espejo, ya puede observa con el buling que necesita le quita pero nuay cosa ya hace acerca con ese. Na igual manera, no vale nada lang si le kita con el Palabra del Dios, mira con el un cosa que necesita kita cambia na diaton custumbre pero nuay cosa ya hace acerca con ese.

18. Cosa el tres cosas que debe kita hace si ta usa un ilustracion?

¹⁸ Si ta usa un ilustracion, puede tu imita con el ejemplo de Santiago si hace tu con este tres cosas: (1) Asigura que justo el ilustracion na punto que ta discuti tu. (2) Usa un ilustracion que familiar el quien ta oi contigo. (3) Hace claro si paquemodo aplica con el ilustracion. Si tan dificil tu pensa maga justo ilustracion, mira na Watch Tower Publications Index. Bajo na heading “Illustrations,” puede tu incuntra manada ejemplo que puede tu usa. Pero, acorda que el maga ilustracion igual na un microfono—hay hace este suena y claro con el punto que quierre tu hace sale. Poreso, asigura que con el maga importante punto lang que quierre tu enseña el cosa tu ilustra. Siempre, el de con todo importante razon si porque kita quierre mejora con el diaton abilidad na enseñada amo gendeh para saca el atencion del otro sino para puede ayuda con el mas manada gente que posible para queda parte del alegre familia de Jehova.

19. Paquemodo kita dale mira que ta aprecia kita con el diaton espiritual familia?

¹⁹ Maskin nuay kita el privilegio que engranda junto na un perfecto mayor hermano, tiene kita el privilegio que sirvi con Jehova junto na un grande familia de maga Cristiano hermano y hermana. Ta dale kita mira amor kanila si tan junto kita kanila, ta aprende kanila y leal ta sirvi junto kanila na trabajo predicacion y enseñada. Si ta pricura kita imita con el ejemplo de Santiago na diaton custumbre, conducta y manera de enseñada, ta dale kita honor con Jehova y ta ayuda kita con el maga sincero persona para queda cerca na diaton amable Tata na cielo.