1. Cosa dificil situacion el ya enfrenta si David?

TA ESCAPA si David. Si Saul, el poderoso rey del Israel, determinao que mata con ele. Cuando necesita comida si David, ya descanza le na ciudad de Nob, donde ya pidi lang le cinco pedazo de pan. (1 Sam. 21:1, 3) Despues, ele y el de suyu maga gente ya esconde na un cueva. (1 Sam. 22:1) Porque ya guinda si David na ese situacion?

2. Paquemodo si Saul ya pone con el de suyu mismo cuerpo na un peligroso situacion? (1 Samuel 23:16, 17)

² Yan celos gayot si Saul con David cay manada gente el ta gusta con ele y ya ganá le na manada guerra. Sabe tambien si Saul que nuay mas le el favor de Jehova como el rey del Israel por causa na de suyu mismo desobediencia y ya iscuji si Jehova con David para queda rey. (Le con el 1 Samuel 23:16, 17.) Maskin pa ansina, como el rey del Israel, tiene manada soldao si Saul y manada el quien ta suporta con ele poreso necesita escapa si David. Ya pensa ba si Saul que puede le anda contra na proposito del Dios para con David? (Isa. 55:11) Nuay habla el Biblia pero puede kita asigura con este un cosa: Ya pone si Saul con el de suyu mismo cuerpo na un peligroso situacion. Aquellos quien tan contra con Dios pirmi ta perde!

3. Cosa ya sinti si David maskin pa na de suyu maga circumstancia?

³ Gendeh un ambicioso gente si David. Nuay le iscuji que queda rey del Israel. Si Jehova el ya decidi que hace con ele rey. (1 Sam. 16:1, 12, 13) Ya odia gayot si Saul con David. Pero, nuay disculpa si David con Jehova na peligro que ta enfrenta le. Y nuay tambien le reclama que bien poco lang el de suyu comida y necesita le esconde na un cueva. Gane, posible que  talli le na ese mismo cueva cuando ya escribi le con el bonito cancion de alabanza que ta inclui el maga palabra del texto onde yan base el diaton tema: “Aquellos quien ta busca con Jehova gendeh falta cosas bueno.”—Sal. 34:10.

4. Cosa maga pregunta kita hay considera y porque este importante?

⁴ Manada del maga siervo de Jehova el falta comida y otro pa maga cosas que necesita para vivi. * Deverasan gayot se especialmente na reciente pandemic. Y na grande tribulacion que cerca ya sucede, puede kita expecta que hay enfrenta kita mas dificil tiempo. (Mat. 24:21) Poreso, hay contesta kita con este cuatro pregunta: Na cosa manera si David nuay “falta cosas bueno”? Porque kita debe aprende queda contento? Porque kita puede asigura que hay cuida kanaton si Jehova? Y paquemodo kita puede prepara ahora para na futuro?

5-6. Paquemodo el Salmo 23:1-6 puede ayuda kanaton para entende si cosa quierre decir de David cuando ya habla le que el maga siervo del Dios “gendeh falta cosas bueno”?

⁵ Cosa quierre decir de David cuando ya habla le que el maga siervo de Jehova “gendeh falta cosas bueno”? Puede kita saca idea si considera kita con el maga semejante palabra que puede incuntra na Salmo 23. (Le con el Salmo 23:1-6.) Ya introduci si David con este salmo por medio na maga palabra: “Si Jehova el de mio Pastor. Nuay yo cosa hay falta.” Na otro maga versiculo na ese salmo, ya menciona si David con el maga cosas que deverasan importante—el abundancia espiritual bendicion que ya tiene le cay ya acepta le con Jehova como el de suyu Pastor. Ya guia con ele si Jehova “na maga camino de pagka-recto” y con lealtad Le ya suporta con David na maga bueno y dificil tiempo. Ya admiti si David que el de suyu vida junto con Jehova gendeh quierre decir que hay queda le nuay problema. Tiene vez, posible le man luya que dol  ta camina le “na bien iscuru valle” y hay tene le maga enemigo. Pero cay si Jehova el de suyu Pastor, ‘gendeh hay tene miedo’ si David.

⁶ Ya puede contesta con el diaton pregunta: Na cosa manera si David nuay “falta cosas bueno”? Na espiritual manera, ya tiene le el todo cosa le necesita. El de suyu alegria nuay depende na maga material cosas. Satisfechao si David na cosa ya dale con ele si Jehova. El de con todo importante para con ele amo el bendicion y proteccion del de suyu Dios.

7. Asegun na Lucas 21:20-24, cosa dificil situacion el ya enfrenta el maga Cristiano na Judea del primer siglo?

⁷ Na maga palabra de David, puede kita mira si paquemodo de importante que tene kita justo mirada na maga material cosas. Puede kita usa maskin cosa material cosas que tiene kita pero gendeh kita debe hace con este el de con todo importante cosa na diaton vida. Amo se el un importante verdad que ya entende el maga Cristiano quien ta queda na Judea del primer siglo. (Le con el Lucas 21:20-24.) Ya dale kanila aviso si Jesus que hay llega el tiempo cuando el ciudad de Jerusalem hay queda “encirculao de maga soldao.” Si sucede se, necesita sila “escapa para na monte.” Si hace sila se, hay salva sila. Pero, tiene sila cosa necesita sacrificia. Cuanto año ya el ya pasa, el The Watchtower ya habla este: “Ya deja sila con el diila maga simentera y casa, y nuay gane sila lleva con el diila maga riqueza estaba na diila casa. Ciendo ta confia sila na proteccion y suporta de Jehova, ya hace sila una con el de suyu adoranza en vez con el otro maga cosas que dol importante.”

8. Cosa importante leccion kita puede aprende na cosa ya sucede con el maga Cristiano quien ta queda na Judea del primer siglo?

⁸ Cosa importante leccion kita puede aprende na cosa ya sucede con el maga Cristiano quien ta queda na Judea del primer siglo? Aquel mismo articulo del The Watchtower ya habla: “Na futuro, posible kita experiencia maga probanza que hay dale mira si paquemodo de importante kanaton el maga material cosas. Este ba el de con todo importante cosa o el salvacion cay ya esta kita leal con Dios? Si llega el fin, posible kita enfrenta maga dificultad y necesita hace maga sacrificio. Necesita kita queda preparao que hace el maskin cosa, igual con el maga Cristiano del primer siglo quien ya sale na Judea.” *

9. Paquemodo el consejo de apostol Pablo con el maga Hebreo ya puede anima contigo?

⁹ Ta puede ba tu imagina si paquemodo de dificil para con aquellos maga Cristiano que deja con el halos todo del diila maga cosas y principia otravez na primero? Necesita sila fe para confia que hay dale kanila si Jehova el maga cosas que necesita sila. Pero, tiene cosa puede ayuda kanila. Cinco año antes anda man campo el maga Romano alrededor del Jerusalem, ya dale si apostol Pablo con el maga Hebreo este buen consejo: “No ustedes man ambriento. Comforma ustedes con el maga cosa-cosa tiene ustedes, cay el Dios ya habla: Gendeh yo contigo ay deja ni gendeh yo ay abandona contigo. Poreso ta puede kita habla con comfianza: El Señor amo el quien ta ayuda conmigo. Gendeh yo ay tene miedo. Cosa man puede hace el gente conmigo?” (Heb. 13:5, 6) Asigurao, aquellos quien ya sigui con el consejo de Pablo antes anda ataca el maga Romano mas facil ya puede man adjust na un simple manera de vida na diila nuevo locacion. Asigurao sila que hay dale si Jehova con el diila maga necesidad. El maga palabra de Pablo ta asigura kanaton que puede tambien kita confia con Jehova que hay dale le el cosa kita necesita.

10. Cosa el secreto de Pablo que ya habla le kanaton?

¹⁰ Ya dale semejante consejo si Pablo con Timoteo que aplicable tambien kanaton ahora. Ele ya escribi: “Basta tiene lang kita comida y camisa, conforma ya lang kita con esos.” (1 Tim. 6:8) Quierre decir ba de este que gendeh ya kita puede come un sabroso comida, tene decente casa onde queda o cumpra nuevo ropa tiene vez? Gendeh ese el punto de Pablo. El cosa le ta habla amo que debe kita queda contento na maskin cosa que tiene kita. (Fil. 4:12) Ese el secreto de Pablo. El de con todo precioso cosa que tiene kita amo el diaton relacion na diaton Dios y gendeh el maskin cosa material que tiene kita.—Hab. 3:17, 18.

11. Cosa leccion acerca na pagka-contento el puede kita aprende na maga palabra de Moises para na maga Israelita?

¹¹ Posible, diferente el diaton mirada na mirada de Jehova na cosa kita necesita. Considera si cosa ya habla si Moises con el maga Israelita despues sila esta por 40 año na desierto: “Ya bendici si Jehova el de ustedes Dios con el todo cosa ustedes ya hace. Sabe gayot si Jehova si paquemodo ustedes ya viaja na este grande desierto. Adentro na 40 año, yan junto con ustedes si Jehova el de ustedes Dios, y nuay ustedes cosa ya falta.” (Deut. 2:7) Durante de aquel 40 año, ya dale mana si Jehova con el maga Israelita para come. El diila maga ropa—el mismo maga ropa que tiene sila cuando ya sale sila na Egipto—nuay queda daan. (Deut. 8:3, 4) Maskin pa el cuanto  posible ya mira con este maga provision como bien simple, ya hace acorda si Moises con el maga Israelita que tiene sila el todo cosa sila necesita. Hay queda alegre si Jehova si aprende kita queda contento—que aprecia maskin el maga simple provision que ta dale le y mira con este como un bendicion y rindi gracias con ele.

12. Cosa ta dale mira que ya confia si David con Jehova y gendeh na de suyu mismo cuerpo?

¹² Sabe si David que leal si Jehova y interesao gayot con aquellos quien ta ama con Ele. Maskin pa na peligro el de suyu vida cuando ya escribi le con el Salmo 34, por medio na fe, ya puede mira si David con “el angel de Jehova” que tan campo alrededor con ele. (Sal. 34:7) Posible, ya compara si David con el angel de Jehova na un soldao quien tan campo y pirmi alerto si tiene llega contrario. Maskin pa un animoso soldao si David y ya promete con ele si Jehova que hay queda le rey, nuay depende si David na de suyu abilidad guerria piedra o usa espada para hace perde con el de suyu contrario. (1 Sam. 16:13; 24:12) Ya confia si David con el de suyu Dios y asigurao le que el angel de Jehova ‘ta salva con aquellos quien ta tiene miedo con Ele.’ Siempre, gendeh kita ta expecta que hay ricibi kita milagroso proteccion ahora. Pero, sabe kita que nuay ni uno quien ta confia con Jehova el experiencia permanente peligro.

13. Si ataca el Gog de Magog, porque dol facil lang ataca kanaton pero porque kita gendeh debe tene miedo? (Mira con el letrato na cover.)

¹³ Gendeh mas tarda, hay pone na probanza con el diaton confianza na abilidad de Jehova para protege kanaton. Cuando el Gog de Magog, el alianza del maga nacion, hay ataca con el maga siervo del Dios, posible kita pensa que na peligro el diaton vida. Necesita kita queda convincido que puede y hay salva kanaton si Jehova. Para na maga nacion, dol aquel kita maga carnero que pronto lang ataca y nuay quien ta protege. (Eze. 38:10-12) Nuay kita armas y nuay kanaton man train na guerra. Hay pensa el maga nacion que facil lang kanaton hace perde. Gendeh sila puede mira con el cosa kita ta puede mira por medio na fe—el bien manada angel que tan campo alrededor na maga siervo del Dios, quien preparao defende kanaton. Paquemodo el maga nacion hay puede mira kanila? Nuay sila fe con Dios. Hay espanta gayot sila cuando el maga soldao na cielo hay ayuda kanaton!—Rev. 19:11, 14, 15.

14. Cosa kita puede hace ahora para prepara na futuro?

¹⁴ Cosa kita puede hace ahora para prepara na futuro? Una, necesita kita tene el justo mirada na maga material cosas, cay sabe kita que hay deja kita con ese llega el tiempo. Necesita tambien kita queda contento y queda bien alegre por causa na diaton relacion con Jehova. Si mas conoce kita con el diaton Dios, hay queda kita mas convincido que hay protege le kanaton si ataca ya el Gog de Magog.

15. Cosa ya experiencia si David cuando joven le que ya enseña con ele que gendeh gayot con ele abandona si Jehova?

¹⁵ Considera si cosa pa ya puede ayuda con David y puede ayuda kanaton para prepara na maga probanza. Si David ya habla: “Pruba y mira que bueno si Jehova; alegre el gente quien ta hace refugio con ele.” (Sal. 34:8) Este maga palabra ta explica si porque sabe si David que puede le depende na suporta de Jehova. Pirmi ya confia si David con Jehova y nuay gayot con ele abandona el de suyu  Dios. Cuando joven si David, ya anda le man contra con el un gigante Filisteo que si Goliat y ya habla con ese mafuerza soldao: “Na este mismo dia hay entrega si Jehova con uste na de mio mano.” (1 Sam. 17:46) Despues, cuando ta sirvi si David con Saul, manada beses el rey ya pricura mata con ele. Pero, “junto si Jehova con” David. (1 Sam. 18:12) Cay ya experiencia ya si David con el ayuda de Jehova de antes, sabe si David que puede le confia con Ele na de suyu presente probanza.

16. Na cosa maga practical manera kita puede “pruba” con el pagka-bueno de Jehova?

¹⁶ Si mas ta depende kita na guia de Jehova ahora, hay tene kita mas confianza que puede le salva kanaton na futuro. Necesita kita tene fe y queda preparao que confia con Jehova para pidi day off con el diaton amo para puede kita atende na asemblea o convencion o pidi que man adjust con el hora del diaton trabajo para puede kita atende el todo miting y dale mas tiempo na ministerio. Paquemodo si nuay conforma el diaton amo y ya quita kanaton na trabajo? Tiene ba kita fe que nunca kanaton hay deja o abandona si Jehova y que pirmi le dale kanaton el diaton maga necesidad? (Heb. 13:5) Manada de aquellos quien ta sirvi full-time el puede relata maga experiencia que ta dale mira si paquemodo si Jehova ya ayuda kanila na tiempo que bien necesita sila con ele. Fiel si Jehova.

17. Cosa el yeartext para na 2022 y porque este justo na diaton tiempo?

¹⁷ Cay junto kanaton si Jehova, nuay kita razon para tene miedo si cosa sucede na futuro. Nunca kanaton abandona el diaton Dios si hace kita una con el de suyu Reino na diaton vida. Para hace acorda kanaton que necesita kita prepara ahora para na maga dificultad na futuro y para confia que nunca kanaton abandona si Jehova, el Cuerpo Gobernante ya iscuji con el Salmo 34:10 como el diaton yeartext para na año 2022: “Aquellos quien ta busca con Jehova gendeh falta cosas bueno.”