1. Paquemodo kita puede dale tiempo para con Jehova?

BIEN quierre kita dale tiempo con el maga persona con quien kita ta ama. El un alegre maridable quierre-quierre man junto con uno y otro. El maga jovenes tan enjoy man junto con el diila maga amigo y amiga. Y todo kita alegre man junto con el diaton maga hermano y hermana na fe. Pero el mas importante, bien quierre kita dale tiempo para con el diaton Dios. Puede kita hace con este si reza kita con ele, le con el de suyu Palabra y medita con el de suyu proposito y de suyu maga bonito calidad. Bien precioso el tiempo que ta dale kita para con Jehova!—Sal. 139:17.

2. Cosa dificultad kita ta enfrenta?

² Maskin pa bien quierre kita dale tiempo para con Jehova, gendeh este pirmi facil hace. Ocupao kita poreso dificil para kanaton que dale tiempo para na maga espiritual actividad. El secular trabajo, maga responsibilidad na familia y otro pa actividad ta saca grande tiempo que posible ta sinti kita que nuay mas kita tiempo para reza, estudia o medita.

3. Cosa el otro que puede saca con el diaton tiempo?

³ Tiene pa otro cosa que posible ta saca con el diaton tiempo. Si gendeh kita con cuidao, posible kita permiti con el maga actividad que gendeh malo para saca con el tiempo que puede era kita usa para queda mas cerca con Jehova. Por ejemplo, considera con el recreacion. Tiene vez, bueno si ta  puede kita man relax. Pero, maskin el maga buen recreacion puede saca grande hora poreso nuay mas kita bastante tiempo para na maga espiritual actividad. Necesita kita pone na lugar con el recreacion.—Prov. 25:27; 1 Tim. 4:8.

4. Cosa kita considera ahora?

⁴ Na este articulo, hay considera kita si porque necesita kita hace maga justo prioridad. Hay discuti tambien kita si paquemodo kita puede usa enbuenamente con el diaton tiempo para con Jehova y si paquemodo kita beneficia si hace kita con ese.

5. Paquemodo puede ayuda con el un joven que iscuji con el de con todo buen vida si considera le con el consejo na Efeso 5:15-17?

⁵Iscuji con el de con todo buen vida. Mas mucho, ta pensa el maga jovenes si cosa el de con todo buen manera para usa sila con el diila vida. El diila maga maestra y familia que gendeh Testigo posible anima kanila que saca alto educacion para puede sila tene un buen trabajo y puede hace manada sen. Ese educacion posible saca bien grande tiempo. Pero, el maga mayores y maga hermano y hermana na congregacion posible anima con el maga jovenes que usa con el diila vida na servicio con Jehova. Cosa puede ayuda con el un joven que ta ama con Jehova para hace el de con todo buen decision? Hay beneficia le si le ele con el Efeso 5:15-17 y medita con ese. (Le.) Despues le con ese maga versiculo, el un joven posible pregunta na de suyu mismo cuerpo: ‘Cosa el “querer del Dios”? Cosa decision el hace alegre con ele? Cosa decision el puede ayuda conmigo para usa enbuenamente con el de mio tiempo?’ Acorda que “malo el maga dia” y este sistema que ta rula si Satanas cerca ya termina. Bueno para kanaton si usa kita con el diaton vida na manera que puede hace alegre con Jehova.

6. Cosa decision el ya hace si Maria y porque buen decision quel?

⁶Hace maga justo prioridad. Para puede usa enbuenamente con el diaton tiempo, posible necesita kita decidi entre el dos actividad que gendeh malo. El cosa ya sucede cuando ya visita si Jesus na casa de Maria y Marta ta ilustra con ese punto. Cay bien alegre si Marta que ya visita kanila si Jesus, ya prepara le bien manada comida. Pero el de suyu hermana, si Maria, ya sinta cerca con Jesus y ya oi con el de suyu maga enseñanza. Maskin pa bueno el intencion de Marta na cosa le ya hace, si Maria “ya escuji el parte mas bueno.” (Luc. 10:38-42) Posible despues del cuanto tiempo, ya ulvida si Maria con el comida que ya prepara na ese ocasion pero puede kita asigura que nuay gayot le ulvida con el cosa le ya aprende con Jesus. Igual si paquemodo de precioso con Maria el tiempo que junto le con Jesus, precioso tambien kanaton el diaton tiempo para con Jehova. Paquemodo kita puede usa enbuenamente con ese tiempo?

7. Porque bien importante el rezo, estudiada y meditacion?

⁷Acorda que el rezo, estudiada y meditacion amo parte del diaton adoranza. Si ta reza kita, tan cuento kita con el diaton Tata na cielo quien ta ama gayot kanaton. (Sal. 5:7) Si ta estudia kita con el Biblia, ta saca kita “el saber del Dios,” el Tuburan del todo sabeduria. (Prov. 2:1-5) Si ta medita kita, ta considera kita con el maga buen calidad de Jehova y con el de suyu proposito para kanaton y para con el todo maga gente. Tiene  pa ba mas buen manera para usa con el de tuyu tiempo? Pero, cosa puede ayuda kanaton para hace con ese?

8. Cosa leccion kita puede aprende si paquemodo si Jesus ya usa con el de suyu tiempo na desierto?

⁸Si posible, busca un silencio lugar. Considera con el ejemplo de Jesus. Antes le principia con el de suyu ministerio aqui na tierra, ya esta si Jesus por 40 dia na desierto. (Luc. 4:1, 2) Na ese silencio lugar, ya puede reza si Jesus con Jehova y ya medita con el voluntad del de suyu Tata para con ele. Asigurao, ya puede gayot este prepara con Jesus para na maga probanza que hay enfrenta le. Paquemodo tu puede beneficia na ejemplo de Jesus? Si grande el de ustedes familia, posible man dificil tu busca un silencio lugar na de ustedes casa. Si ansina, puede tu busca un justo lugar apuera. Ese el cosa ta hace si Julie si quierre le dale tiempo para reza con Jehova. Ele y el de suyu marido ta queda na un diutay apartment na France y dificil busca lugar que silencio. “Poreso, ta anda yo na parque todo el dia,” ya habla si Julie. “Alla, puede yo queda solo, concentra y man cuento gayot con Jehova.”

9. Maskin pa ocupao si Jesus, paquemodo le ya dale mira que valoroso con ele el de suyu relacion con Jehova?

⁹ Bien ocupao si Jesus. Durante el de suyu ministerio na tierra, ta sigui con ele el grupo de maga gente y todo sila quierre man junto con ele. Na un ocasion, el “entero pueblo ya anda man dalasukan adelante del puerta” para mira con ele. Maskin pa ansina, ya asigura si Jesus que pirmi le tiene tiempo para na de suyu relacion con Jehova. Antes subi el sol, ya incuntra le “un lugar silencio” donde ya puede le man cuento solo-solo con el de suyu Tata.—Mar. 1:32-35.

10-11. Asegun na Mateo 26:40, 41, cosa bien importante consejo el ya dale si Jesus con el de suyu maga dicipulo na jardin de Getsemani pero cosa ya sucede?

¹⁰ Na ultimo noche del vida de Jesus na tierra, cuando cerca ya acaba el de suyu ministerio, ya busca le otravez un silencio lugar onde le puede medita y reza. Ya incuntra le con ese lugar na jardin de Getsemani. (Mat. 26:36) Na ese ocasion, ya dale si Jesus con el de suyu maga dicipulo un bien importante consejo acerca na rezo.

¹¹ Considera si cosa ya sucede. Cuando ya llega sila na jardin de Getsemani, bien denoche ya quel—posible lampas ya media noche. Ya habla si Jesus con el maga apostoles que “esta despierto” y ya anda le reza. (Mat. 26:37-39) Pero mientras ta reza le, ya puede sila durmi. Cuando ya mira le que durmido sila, ya anima kanila otravez si Jesus que “esta despierto y reza.” (Le con el Mateo 26:40, 41.) Ya mira le que sobra el diila stress  y cansao gayot sila. Con compasion ya habla si Jesus que “el cuerpo maluya.” Dos beses pa ya anda reza si Jesus y cuando ya bira le, ya puede le mira que ta durmi el de suyu maga dicipulo en vez de reza.—Mat. 26:42-45.

12. Cosa kita puede hace si tiene vez ta sinti kita bien stress o bien cansao ya para reza?

¹²Iscuji justo tiempo. Posible, ta sinti kita bien stress o bien cansao ya para reza. Si ya sucede este contigo, gendeh tu solo. Cosa tu puede hace? El cuanto quien yan anad que reza con Jehova na fin del dia ya realiza que mas bueno reza mas temprano cada denoche cuando gendeh pa sila bien cansao. El otro ya puede realiza que mas ta puede sila concentra si ta reza sila na un especifico posicion. Pero, paquemodo si bien malingasa tu o bien maluya? Habla con Jehova si cosa tu ta sinti. Puede tu asigura que ta entende contigo el diaton lastimoso Tata.—Sal. 139:4.

13. Paquemodo el maga gadget posible destorba con el diaton tiempo para con Jehova?

¹³Si ta estudia, evita con el maga cosas que puede destorba contigo. Gendeh lang el rezo el manera que puede kita hace fuerte con el diaton relacion con Jehova. El estudiada del Palabra del Dios y el atendida na maga miting na congregacion puede tambien ayuda para queda kita mas cerca con Dios. Tiene ba tu cosa puede hace para usa enbuenamente con el de tuyu tiempo na estudiada y na maga miting na congregacion? Pregunta na de tuyu mismo cuerpo, ‘Cosa posible ta destorba conmigo durante el miting o si ta estudia yo?’ Posible gaha que el maga llamada, email o text na de tuyu cell phone o na otro pa gadget? Ahora, billones de maga gente el tiene ese maga gadget. El cuanto researcher ya habla que ta puede ya destorba con el diaton concentracion si tiene cell phone cerca kanaton. “Gendeh tu tan focus na cosa tu ta hace,” ya habla el un professor de psychology. “Bulao el de tuyu pensamiento.” Antes principia el maga asemblea y convencion, pirmi kanaton ta habla que man adjust con el diaton gadget para gendeh este destorba con otro. Puede ba tambien kita hace igual ansina si solo-solo kita para el diaton maga gadget gendeh puede destorba kanaton y con el diaton tiempo para con Jehova?

14. Asegun na Filipo 4:6, 7, paquemodo kanaton ayuda si Jehova para man focus?

 ¹⁴Pidi con Jehova que ayuda contigo man focus. Si ya nota tu que onde-onde ta guinda el de tuyu pensamiento durante el de tuyu estudiada o miting na congregacion, pidi con Jehova que ayuda contigo. Si malingasa tu, posible gendeh facil que no anay pensa con ese y man focus na maga espiritual cosas. Pero, bien importante que hace tu con ese. Reza que dale contigo paz para guarda, gendeh lang con el de tuyu corazon sino pati con el de tuyu “pensamiento.”—Le con el Filipo 4:6, 7.

15. Cosa el un beneficio si dale kita tiempo para con Jehova?

¹⁵ Si dale tu tiempo para man cuento, oi y pensa acerca con Jehova, hay beneficia gayot tu. Paquemodo? Una, mas puede tu hace maga buen decision. El Biblia ta asigura kanaton que “el quien ta sigui junto con el sabio hay queda sabio.” (Prov. 13:20) Poreso si dale tu tiempo para man junto con el Tuburan del sabeduria, si Jehova, hay queda tu mas sabio. Mas puede tu entende si paquemodo tu hace alegre con ele y si paquemodo evita maga decision que hay hace sinti duele con ele.

16. Na cosa manera hay queda kita mas buen maestro si dale kita tiempo para con Jehova?

¹⁶ Ika-dos, hay queda tu mas buen maestro. Si tan Bible study kita con el un persona, el uno del maga de con todo importante goal que puede kita hace amo que ayuda con ele para queda cerca con Jehova. Si mas ta comunica kita con el diaton Tata na cielo, mas queda hondo el diaton amor para con ele y mas puede kita enseña con el diaton Bible study que ama con ele. Ya sucede este con Jesus. Yan cuento le acerca con el de suyu Tata na amable manera poreso el de suyu maga fiel siguidores ya ama tambien con Jehova.—Juan 17:25, 26.

17. Porque el rezo y estudiada puede ayuda kanaton para hace fuerte el diaton fe?

¹⁷ Ika-tres, hay queda mas fuerte el de tuyu fe. Considera si cosa ta sucede si pidi tu con Dios que dale contigo guia, comforta o suporta. Cada vez ta contesta si Jehova con ese maga rezo, ta queda mas fuerte el de tuyu fe con ele. (1 Juan 5:15) Cosa pa puede ayuda contigo para hace fuerte con el de tuyu fe? El personal estudiada. Acorda que “ta tene fe si ya oi con el mensaje.” (Roma 10:17, NWT) Pero para tene fuerte fe, gendeh bastante que saca lang kita saber. Cosa pa kita necesita hace?

18. Ilustra si porque necesita kita medita.

¹⁸ Necesita kita medita na cosa kita ta  aprende. Considera con el experiencia del escritor del Salmo 77. Malingasa le cay ya sinti le que ele y el de suyu maga uban Israelita nuay mas el favor de Jehova. Por causa con ese, gendeh le ta puede durmi denoche. (Versiculo 2-8) Cosa le ya hace? Ya habla le con Jehova: “Hay medita yo con el todo de tuyu maga trabajo y pensa con el de tuyu tratamiento.” (Versiculo 12) Sabe el salmista con el maga cosas que ya hace si Jehova para con el De Suyu maga siervo de antes pero ya pensa siempre le: “Ya ulvida ya ba el Dios dale mira el de suyu favor, o ya perde ya ba el de suyu lastima por causa na de suyu rabia?” (Versiculo 9) El salmista ya medita con el maga actividad de Jehova y con el lastima y compasion que ya dale mira el Dios de antes. (Versiculo 11) El resulta? Ya queda convincido el salmista que gendeh hay abandona si Jehova con el De Suyu maga siervo. (Versiculo 15) Na igual manera, hay queda mas fuerte el de tuyu fe si medita tu con el cosa ya puede hace si Jehova para con el de suyu maga siervo y cosa ele ya hace para contigo.

19. Cosa pa el otro beneficio si dale kita tiempo para con Jehova?

¹⁹ Ika-cuatro y el de con todo importante, hay queda mas hondo el de tuyu amor para con Jehova. Mas pa na otro maga calidad, el amor hay manda move contigo para obedece con Jehova, para hace maga sacrificio que ta hace alegre con ele y para aguanta na maskin cosa probanza. (Mat. 22:37-39; 1 Cor. 13:4, 7; 1 Juan 5:3) Nuay maskin cosa el mas precioso pa na diaton cerca relacion con Jehova!—Sal. 63:1-8.

20. Cosa tu ta plaña hace para dale mas tiempo para con Jehova?

²⁰ Acorda que parte del diaton adoranza el rezo, estudiada y meditacion. Igual con Jesus, busca silencio lugar onde tu puede dale tiempo para con Jehova. Quita con el maga cosas que puede destorba contigo. Pidi con Jehova que ayuda contigo man focus si ta hace tu maga espiritual actividad. Si usa tu enbuenamente con el de tuyu tiempo ahora, hay dale contigo si Jehova vida hasta para cuando na nuevo mundo del Dios.—Mar. 4:24.