1-2. (a) Porque kita gendeh ta estraña si ta experiencia kita maga probanza? (b) Cosa kita hay considera na este articulo?

 COMO maga siervo de Jehova, gendeh mas kita ta estraña si ta experiencia kita maga probanza. El Biblia ta habla: “Necesita pa kita todo experiencia mucho tormento para puede kita entra na Reino del Dios.” (Act. 14:22) Sabe tambien kita que el cuanto del diaton maga problema gendeh completamente puede solva si nuay pa kita na nuevo mundo, donde “nunca mas ay tene muerte, ni dolor, ni tristeza.”—Rev. 21:4.

² Gendeh ta sangga si Jehova que experiencia kita maga probanza. Pero, ta ayuda le kanaton para aguanta con ese. Nota si cosa ya habla si apostol Pablo na maga Cristiano na Roma. Ya menciona le con el cuanto maga probanza que ele y el de suyu maga hermano ya experiencia. Despues, ele ya habla: “Victorioso kita por medio de Aquel quien ya ama canaton.” (Roma 8:35-37) Este quierre decir que puede ayuda contigo si Jehova para tene buen exito mientras ta experiencia pa tu probanza. Mira kita si paquemodo ya ayuda si Jehova con Jose para tene buen exito y si paquemodo Le puede ayuda contigo.

3. Paquemodo derepente ya cambia el vida de Jose?

³ Claro que ta ama gayot el patriarca que si Jacob con el de suyu anak que si Jose. (Gen. 37:3, 4) Como resulta, el maga mayor anak de Jacob yan celos na diila hermano. Cuando ya tiene sila el oportunidad, ya vende sila con Jose na un grupo de maga Midianita negociante. Este maga negociante ya lleva con Jose na Egipto que mas de cien kilometro de lejos, donde ya vende otravez con ele—na este tiempo con Potifar, el  jefe del maga guardia del Faraon. Derepente lang ya cambia el vida de Jose. Del una, favorito anak le del de suyu tata pero ahora un esclavo le na Egipto!—Gen. 39:1.

4. Paquemodo kita posible experiencia un probanza que semejante na cosa ya experiencia si Jose?

⁴ El Biblia ta habla que “tiene mal cosas ta sucede con todo.” (Ecl. 9:11, Holy Bible—Easy-to-Read Version) Tiene vez, ta experiencia kita dificultad que “ya pasa con todo el maga otro gente” o comon na todo maga gente. (1 Cor. 10:13, El Nuevo Testamento) O posible, ta sufri kita por causa lang cay maga dicipulo kita de Jesus. Por ejemplo, posible kanaton gangguia, man contra o persigui pa gane por causa na diaton fe. (2 Tim. 3:12) Maskin cosa pa el probanza que ta experiencia tu, puede ayuda contigo si Jehova para tene buen exito. Paquemodo se le ya hace con Jose?

5. Cosa ya puede habla si Potifar acerca na todo cosa ta hace si Jose? (Genesis 39:2-6)

⁵ Le con el Genesis 39:2-6. Ya puede nota si Potifar que ma-abilidad si Jose y bien trabajador. Y sabe le si porque. Ya mira si Potifar que “ta bendici si Jehova con el todo cosa [si Jose] ta hace.” b Na uliji, ya hace le con Jose como el de suyu personal ayudante. Ya encarga tambien le con Jose el de suyu entero casa. Cosa el resulta? Ya queda rico si Potifar.

6. Cosa posible ya sinti si Jose na de suyu situacion?

⁶ Imagina si cosa ya sinti si Jose. Cosa ba gayot le quierre aquel tiempo? Quierre ba le que nota y premia con ele si Potifar? Asigurao, mas quierre le queda librao para puede le bira na de suyu tata. Maskin manada le privilegio na casa de Potifar, esclavo le siempre del un persona quien gendeh ta adora con Jehova. Nuay causa si Jehova con Potifar que libra con Jose. Y ya queda pa mas dificil el vida de Jose.

7. Na cosa manera mas ya queda grabe el situacion de Jose? (Genesis 39:14, 15)

⁷ Como cosa ya menciona na Genesis capitulo 39, ya quierre con Jose el mujer de Potifar y bira-bira este ta hace manera para comete le imoralidad. Cada vez ta hace se  el mujer de Potifar, gendeh ta conforma si Jose. Na uliji, ya rabia gayot le con Jose y ya acusa con este que ya pricura man rape con ele. (Le con el Genesis 39:14, 15.) Cuando ya sabe este si Potifar, ya pone le na preso con Jose y ya esta si Jose alla por cuanto año. (Gen. 39:19, 20) Cosa el vida na preso? El Hebreo palabra que ya usa si Jose para na “preso” puede refiri na “pozo.” Este quierre decir que iscuru el de suyu alrededor y ya sinti le que nuay mas le esperanza. (Gen. 40:15; ftn.) Ya indica tambien el Biblia que por cuanto tiempo, ya pone cadena con el de suyu pies y ya amarra de hierro con el de suyu pescuezo. (Sal. 105:17, 18) Mas ya queda grabe el situacion de Jose. Un esclavo le que ta confia el de suyu amo pero ahora ya queda le un preso.

8. Maskin pa ta queda grabe el diaton probanza, cosa kita puede asigura?

⁸ Ya experiencia ya ba tu que ya queda mas grabe el un situacion maskin pa sincero ya tu ya reza con Jehova? Puede se sucede kanaton. Gendeh ta sangga si Jehova que experiencia kita maga probanza na mundo de Satanas. (1 Juan 5:19) Maskin pa ansina, puede tu asigura con este: Bien sabe si Jehova si cosa ta sucede contigo y ta ama gayot le contigo. (Mat. 10:29-31; 1 Ped. 5:6, 7) Mas pa, ele ya promete: “Gendeh yo contigo ay deja ni gendeh yo ay abandona contigo.” (Heb. 13:5) Puede contigo ayuda si Jehova para aguanta maskin pa dol nuay mas esperanza el de tuyu situacion. Mira kita si paquemodo le se ya hace con Jose.

9. Cosa ta dale mira que junto si Jehova con Jose cuando na preso le? (Genesis 39:21-23)

⁹ Le con el Genesis 39:21-23. Maskin na dificil tiempo cuando na preso le, ya ayuda si Jehova con Jose para tene buen exito. Paquemodo? Igual cuando ta sirvi le con Potifar, ya llega el tiempo que ya ganá si Jose con el confianza y respeto del jefe del calaboso. Na uliji, el jefe ya encarga con Jose el todo preso. Gane, el Biblia ta habla que “el jefe del calaboso gendeh mas tan lingasa con el maga cosas que ya encarga con Jose.” Tiene ya ahora productivo trabajo si Jose. Dol gendeh gayot quel maka-creé! Porque ya tiene ese clase de posicion el un preso con quien ya acusa que ya pricura man rape con el mujer del un oficial? Uno lang el razon. Como cosa ta habla na Genesis 39:23, “si Jehova junto con Jose y ta ayuda le para tene buen exito el maskin cosa ta hace si Jose.”

10. Explica si porque posible nuay sinti si Jose que tiene buen exito el todo cosa le ta hace.

¹⁰ Pruba pensa otravez si cosa ya sinti si Jose. Despues con ele falso acusa y hace preso, ya sinti gaha le que tiene buen exito el todo cosa le ta hace? Cosa ba gayot le quierre aquel tiempo? Quierre ba le que ganá el favor del jefe del calaboso? Asigurao, mas quierre le que libra con ele. Ya pidi pa gane le con el otro preso con quien hay libra ya que man cuento con el Faraon para hace con ele sale na aquel preso. (Gen. 40:14) Pero, aquel preso nuay dayun puede man cuento con el Faraon. Como resulta, ya esta si Jose na preso por dos año pa. (Gen. 40:23; 41:1, 14) Maskin pa ansina, ya continua siempre bendici con ele si Jehova. Paquemodo?

11. Cosa abilidad el ya dale si Jehova con Jose y paquemodo este ya puede ayuda para cumpli con el proposito de Jehova?

¹¹ Cuando na preso si Jose, ya causa si Jehova con el rey de Egipto para tene dos sueño. Quierre gayot sabe el Faraon si cosa quel quierre decir. Cuando ya sabe el rey que tiene abilidad si Jose para habla si cosa quierre decir del maga sueño, ya manda le anda con  Jose. Na ayuda de Jehova, ya puede habla si Jose si cosa quierre decir del maga sueño y yan bilib gayot el Faraon na practical consejo que ya dale le. Ya realiza el Faraon que ta ayuda si Jehova con Jose poreso ya hace le con este como administrador de comida na entero Egipto. (Gen. 41:38, 41-44) Na uliji, ya tiene grabe escasez de comida que ya afecta gendeh lang con el Egipto sino con el Canaan tambien, el lugar donde ta queda el familia de Jose. Puede ya ahora salva si Jose con el de suyu familia y preserva el linea del Mesias.

12. Na cosa maga manera ya ayuda si Jehova con Jose para tene buen exito?

¹² Pensa acerca si cosa ya sucede na vida de Jose. Quien ya causa con Potifar para nota con Jose quien un esclavo lang? Quien ya causa con el jefe del calaboso para confia con Jose quien un preso lang? Quien ya dale maga sueño con el Faraon y ya dale abilidad con Jose para habla si cosa quierre decir de aquel? Quien el ya motiva con el Faraon para hace con Jose como el administrador de comida na Egipto? (Gen. 45:5) Claro que si Jehova el ya ayuda con Jose para tene buen exito el todo cosa le ya hace. Maskin quierre mata con Jose el de suyu maga hermano, ya cambia si Jehova el situacion para puede cumpli el De Suyu voluntad.

13. Ta controla ba si Jehova con el cada situacion na diaton vida? Explica.

¹³ Cosa kita puede aprende na istoria de Jose? Ta entrevini ba si Jehova na cada situacion que ta experiencia kita? Ta controla ba le con el cada suceso na diaton vida que dol tiene buen razon si porque ta sucede el todo maga mal cosas? Gendeh ansina el cosa ta enseña el Biblia. (Ecl. 8:9; 9:11) Pero, este el cosa kita sabe: Si ta experiencia kita un probanza, sabe se si Jehova y ta oi le si ta pidi kita ayuda. (Sal. 34:15; 55:22; Isa. 59:1) Mas pa con ese, puede ayuda kanaton si Jehova para aguanta na maga dificultad. Paquemodo?

14. Paquemodo ta ayuda kanaton si Jehova na tiempo de dificultad?

¹⁴ El un manera que ta ayuda kanaton si  Jehova amo que ta anima le kanaton y ta dale comforta na justo tiempo. (2 Cor. 1:3, 4) Amo se ya experiencia si Eziz, un hermano na Turkmenistan con quien ya sentencia dos año na preso por causa na de suyu fe. Ele ya relata, “Na dia cuando ya anda yo na corte, el un hermano ya dale mira conmigo el Isaias 30:15 donde ta habla: ‘Puede ustedes tene fuerza si esta ustedes calmao y dale mira confianza.’ Este versiculo pirmi ta ayuda conmigo para esta calmao y confia con Jehova na todo cosas. Cay ya medita yo con este, ya ayuda este conmigo durante na entero tiempo que na preso yo.” Ta acorda ba tu cuando ya anima contigo y ya dale contigo comforta si Jehova na tiempo que necesita gayot tu?

15-16. Cosa tu ya puede aprende na experiencia de Tori?

¹⁵ Mas mucho, ta puede lang kita mira si paquemodo ya ayuda kanaton si Jehova aguanta na diaton maga probanza si ya acaba ya este. Amo se el cosa ya realiza el un hermana que si Tori. El de suyu anak hombre que si Mason ya sufri na cancer por seis año hasta ya muri este. Ya queda gayot bien triste si Tori. Ele ya habla, “Este ya siguro el de con todo dificil situacion que ya experiencia yo como un nana.” Ele ya omenta, “Asigurao, man uyun el otro maga mayores que mas dificil si ta mira tu que ta sufri el de tuyu anak compara si etu mismo el ta sufri.”

¹⁶ Pero maskin na ese dificil situacion, ya realiza na uliji si Tori si paquemodo si Jehova ya ayuda con ele para aguanta. “Si ta pensa yo acerca con aquel tiempo,” ele ya habla, “ta puede yo mira el amable ayuda de Jehova cuando enfermo el de mio anak. Por ejemplo, maskin bien enfermo si Mason y gendeh puede man cuento con el maga visita, el maga hermano y hermana tan viaje siempre por dos hora para anda na hospital. Pirmi tiene gente  na waiting room quien preparao dale suporta. Ya ayuda tambien sila para na diamon maga material necesidad. Maskin na maga bien dificil tiempo, tiene kame pirmi el cosa kame necesita.” Ya dale si Jehova con Tori el cosa le necesita para aguanta y ansina tambien el cosa le ya hace para con Mason.—Mira con el cajon “ Ya Dale si Jehova el Cosa Gayot Kame Necesita.”

17-18. Cosa puede ayuda kanaton para puede mira y aprecia con el suporta de Jehova durante na tiempo de dificultad? (Salmo 40:5)

¹⁷ Le con el Salmo 40:5. El goal del mountain climber amo que llega le na de con todo arriba parte del monte. Pero, tiene manada lugar na de suyu ruta donde puede le descanza y mira con el maga bonito cosas alrededor. Na igual manera, regular dale tiempo para pensa si paquemodo si Jehova ya ayuda contigo maskin pa ta experiencia tu un dificultad. Na fin del cada dia, pregunta na de tuyu mismo cuerpo: ‘Na cosa manera ya puede yo ricibi el bendicion de Jehova este dia? Maskin talli siempre el problema, paquemodo si Jehova ta ayuda conmigo para aguanta?’ Pensa maskin un bendicion estaba con Jehova que ya ayuda contigo para tene buen exito.

¹⁸ Asigurao, ta reza tu que ojala acaba ya el de tuyu probanza. Justo lang se y razonable. (Fil. 4:6) Pero, debe tambien kita nota con el maga bendicion que tiene kita ahora. Gane, si Jehova ya promete que dale le kanaton fuerza y ayuda kanaton para aguanta. Poreso, nunca hace perde el de tuyu apresacion na suporta de Jehova. Si ta hace tu se, puede tu mira si paquemodo si Jehova ta ayuda contigo para tene buen exito igual si paquemodo le ya ayuda con Jose maskin durante na tiempo de dificultad.—Gen. 41:51, 52.