1-2. Porque kita ta atende na Comemoracion cada año?

 CERCA 2,000 año ya el ya pasa, ya dale si Jesus el de suyu vida para kanaton. Por causa con ese, ya tiene kita el oportunidad para tene vida hasta para cuando. Na noche antes le muri, ya manda si Jesus con el de suyu maga siguidores que acorda con el de suyu sacrificio por medio na un simple ocasion.—1 Cor. 11:23-26.

² Ta obedece kita con ese mandamiento de Jesus cay ta ama gayot kita con ele. (Juan 14:15) Para dale mira apresacion na cosa le ya hace, durante el tiempo de Comemoracion cada año, ta pensa kita y ta reza acerca si cosa el ya queda posible por causa na de suyu muerte. Ta hace tambien kita mas na ministerio y ta anima con el manada para man junto kanaton na este especial ocasion. Y siempre, determinao kita que gendeh permiti con el maskin cosa que sangga kanaton para atende na Comemoracion.

3. Cosa kita hay considera na este articulo?

³ Na este articulo, hay considera kita tres importante cosas que ta hace el maga siervo de Jehova para comemora con el muerte de Jesus: (1) ta sigui sila con el manera que ya establicia si Jesus, (2) ta invita sila con otro para atende na Comemoracion y (3) ta atende sila na Comemoracion maskin pa na maga dificil situacion.

4. Cosa maga verdad el ta hace acorda kanaton na Comemoracion cada año y porque kita debe gendeh hace no vale nada con este? (Lucas 22:19, 20)

⁴ Cada año na Comemoracion, ta puede kita oi un discurso que base na Biblia que ta dale claro contestacion na cuanto  maga pregunta. Ta aprende kita si porque el maga gente necesita un rescate y si paquemodo el muerte del un persona ya puede paga con el culpa del manada. Mas pa, ta hace acorda kanaton si cosa ta representa el pan y vino, y si quien debe come y toma con este. (Le con el Lucas 22:19, 20.) Ta medita tambien kita con el maga bendicion que hay ricibi na futuro aquellos quien tiene esperanza aqui na tierra. (Isa. 35:5, 6; 65:17, 21-23) Gendeh kita debe hace no vale nada con este maga verdad. Billones el no sabe acerca con ese y gendeh sila ta entende si paquemodo de valoroso el sacrificio de Jesus. Gendeh tambien sila ta hace con el Comemoracion na manera que ya establicia si Jesus. Porque?

5. Despues muri el mayoria del maga apostoles, paquemodo ya principia comemora el maga gente con el muerte de Jesus?

⁵ Corto tiempo despues muri el mayoria del maga apostoles de Jesus, el maga falso Cristiano ya queda parte del congregacion. (Mat. 13:24-27, 37-39) Ta habla sila “maga cosa-cosa bien malo, para convinci con el maga dicipulo que sigui canila.” (Act. 20:29, 30) Uno na “maga cosa-cosa bien malo” que ya principia enseña el maga falso Cristiano amo que nuay ofrece si Jesus con el de suyu cuerpo “una vez lang para carga el maga pecado de mucho maga gente.” Sino, ta enseña sila que el de suyu sacrificio debe repiti manada beses. (Heb. 9:27, 28) Manada gente ahora el ta creé con este falso enseñanza. Regular sila tan junto na maga iglesia—tiene vez, cada dia pa gane—para observa con el cosa sila ta llama “Santo Sacrificio de La Misa.” b El otro maga religion gendeh ansina de regular ta celebra con el muerte de Jesus pero mayoria del diila maga miembro gendeh gayot ta entende si cosa quierre decir del sacrificio de Jesus. El cuanto posible ta pensa, ‘Puede ba gayot perdona con el de mio maga culpa por causa na muerte de Jesus?’ Porque se sila ta pregunta? Cay ya influencia kanila el maga gente quien ta habla que gendeh puede perdona con el diaton maga culpa por medio na muerte de Jesus. Paquemodo el maga deverasan siguidores de Jesus ya puede enfrenta con este issue?

6. Del 1872, cosa ya puede entende el un grupo de maga estudiante del Biblia?

⁶ Del 1870, el un grupo de maga estudiante del Biblia que ta encabeza si Charles Taze Russell ya principia estudia enbuenamente con el Escritura. Quierre sila sabe si cosa gayot quierre decir del sacrificio de Jesus y si paquemodo debe comemora con el de suyu muerte. Del 1872, ya puede sila entende que ya dale si Jesus un rescate para na todo maga gente. Nuay sila esconde con el cosa sila ya aprende. Sino, ya manda se sila sabe con otro por medio na maga libro, diario y magasin. Y nuay dura, igual na maga Cristiano del primer siglo, ya principia sila celebra con el Comemoracion una vez lang na un año.

7. Paquemodo kita ta beneficia na research que ya hace el maga estudiante del Biblia de antes?

⁷ Ahora, ta beneficia kita na research que ya hace aquel maga Cristiano manada año ya el ya pasa. Paquemodo? Na ayuda de Jehova, ya puede kita entende con el verdad acerca na sacrificio de Jesus y na cosa ese ya puede cumpli. (1 Juan 2:1, 2) Ya aprende tambien kita que asegun na Biblia, tiene dos clase de esperanza el maga gente quien ta hace alegre con Dios—el cuanto hay tene imortal vida na cielo y el millones hay tene vida eterna aqui  na tierra. Ta queda kita mas cerca con Jehova mientras ta aprende kita si paquemodo de grande el de suyu amor para kanaton y si paquemodo kita personal ta beneficia na sacrificio de Jesus. (1 Ped. 3:18; 1 Juan 4:9) Poreso igual na diaton maga fiel hermano de antes, ta invita kita con otro que man junto kanaton para celebra con el Comemoracion na manera que ya establicia si Jesus.

8. Cosa ya hace el maga siervo de Jehova para invita con otro para atende na Comemoracion? (Mira con el letrato.)

⁸ Desde antes, ta invita ya el maga siervo de Jehova con el maga gente para na Comemoracion. Del 1881, ya invita con el maga hermano y hermana na United States para man junto na un casa na Allegheny, Pennsylvania, para na este especial ocasion. Despues del cuanto tiempo, ta hace ya con ese el cada congregacion. Del Marzo 1940, ya habla con el maga publisher que puede sila invita con aquellos na diila teritorio quien interesao atende. Y del 1960, por primer vez, ya dale el Bethel maga printed invitacion con el maga congregacion. Desde aquel, billones ya de maga invitacion el ya puede distribui. Porque kita ta dale grande tiempo y esfuerzo para invita con otro?

9-10. Quien el ta beneficia cay ta pricura kita invita con otro na Comemoracion? (Juan 3:16)

⁹ El un razon si porque kita ta invita con otro para na Comemoracion amo cay quierre kita que aquellos quien ta atende por primer vez hay aprende el verdad acerca si cosa ya hace si Jehova y Jesus para kanaton todo. (Le con el Juan 3:16.) Ta esperanza kita  que el cosa sila mira y oi na Comemoracion hay manda move kanila para aprende pa mas y queda maga siervo de Jehova. Pero, gendeh lang sila el ta beneficia.

¹⁰ Ta invita tambien kita con aquellos quien gendeh mas ta sirvi con Jehova. Ta hace kita se para hace acorda kanila que ta ama siempre kanila el Dios. Manada kanila el ta acepta con el diaton invitacion y alegre kita mira kanila na Comemoracion. Si ta atende sila, ta puede sila acorda el alegria que ya experiencia sila cuando ta sirvi pa sila con Jehova. Considera con el ejemplo de Monica. c Ya queda le otravez un activo publisher durante el COVID-19 pandemic. Despues le atende con el Comemoracion del 2021, ya habla le: “Bien especial gayot el Comemoracion este año para conmigo. Adentro na 20 año, ahora ya lang tambien yo ya puede predica na maga gente y invita kanila para na Comemoracion. Ya hace gayot yo esfuerzo cay bien grande el de mio apresacion na cosa ya hace si Jehova y Jesus para conmigo.” (Sal. 103:1-4) Ta acepta man el maga gente con el diaton invitacion o gendeh, ta pricura siempre kita invita con otro para na Comemoracion cay sabe kita que ta aprecia si Jehova con el diaton esfuerzo.

11. Paquemodo si Jehova ya bendici con el diaton esfuerzo para invita con el maga gente na Comemoracion? (Haggeo 2:7)

¹¹ Ya bendici gayot si Jehova con el diaton esfuerzo que invita con el maga gente para na Comemoracion. Del 2021, maskin pa tiene maga restriccion por causa na COVID-19 pandemic, 21,367,603 el ya atende. Ese numero cerca dos y media beses mas grande contra na numero del maga Testigo de Jehova na entero mundo! Siempre, gendeh lang interesao si Jehova si cuanto el ta atende. Sino, interesao le na cada persona. (Luc. 15:7; 1 Tim. 2:3, 4) Convincido kita que si ta invita kita con otro, ta ayuda kanaton si Jehova para incuntra con el maga sincero individual.—Le con el Haggeo 2:7.

12. Cosa puede hace dificil para kanaton que atende na Comemoracion? (Mira con el letrato.)

¹² Ya predicta si Jesus que durante na ultimo maga dia, hay enfrenta kita manada clase de dificultad—oposicion na familia, persecucion, guerra, epidemia y otro pa. (Mat. 10:36; Mar. 13:9; Luc. 21:10, 11) Por causa con este, tiene vez dificil para kanaton que comemora con el muerte de Jesus. Cosa ya hace el diaton maga hermano y hermana para puede enfrenta con ese maga dificultad y paquemodo si Jehova ya ayuda kanila?

13. Paquemodo si Jehova ya bendici con el coraje y determinacion de Artem que celebra con el Comemoracion maskin na preso?

¹³ Pagka-preso. El diaton maga hermano quien yan preso por causa na diila fe ta hace esfuerzo para puede sila comemora con el muerte de Jesus. Considera con el ejemplo de Artem. Durante el tiempo de Comemoracion del 2020, talli le na un celda que tiene grandor de 17 square meter donde ta pone hasta cinco maga preso. Maskin pa na preso ele, ya puede le tene cuanto maga cosas que puede usa como emblema y ya plaña le para dale un discurso de Comemoracion para na de suyu mismo cuerpo. Pero, ta puma y pirmi ta habla mal palabra el de suyu maga uban na celda. Cosa le ya hace? Ya pidi le kanila si puede sila no anay habla mal palabra y puma por un hora. Ya espanta si Artem cay ya conforma el de suyu maga uban. Ele ya habla, “Ya ofrece  yo kanila que discuti yo acerca na Comemoracion.” Maskin pa ya habla sila que no quierre sila oi acerca con aquel, ya pregunta sila con ele manada cosas despues sila puede mira y oi con ele que ta celebra con el Comemoracion.

14. Cosa maga esfuerzo ya hace el maga siervo de Jehova para celebra con el Comemoracion durante el COVID-19 pandemic?

¹⁴ COVID-19 pandemic. Durante el pandemic, el maga siervo de Jehova nuay puede atende na Comemoracion na personal. Pero, nuay se sangga kanila para celebra con el Comemoracion. d El maga congregacion que tiene access na Internet ya hace con el Comemoracion por medio na videoconference. Pero quetal el millones quien nuay access na Internet? Na cuanto maga nacion, ya hace manera para puede man broadcast con el discurso na TV o radio. Mas pa, yan record el maga branch office con el discurso na mas de 500 lengguaje para maskin aquellos quien ta queda na maga lejos lugar puede celebra con el Comemoracion. Y el maga fiel hermano ya  hace manera para puede lleva con el maga recording con aquellos quien necesita.

15. Cosa tu ya puede aprende na ejemplo del un estudiante de Biblia que si Sue?

¹⁵ Oposicion na familia. Para na cuanto, bien dificil para kanila que atende na Comemoracion por causa na oposicion na familia. Considera con el ejemplo del un estudiante de Biblia que si Sue. Del 2021, na dia antes el Comemoracion, ya habla si Sue con el quien ta conduci Bible study con ele que por causa na oposicion del de suyu familia, gendeh le puede atende na Comemoracion. Ya le el hermana con el Lucas 22:44. Despues ya explica le con Sue que si ta experiencia kita maga dificultad, debe kita sigui con el ejemplo de Jesus que reza con Jehova y confia gayot con Ele. Pagka-alamañana, ya prepara si Sue con el maga emblema y ya mira con el especial programa de Morning Worship na jw.org. Y pagka-denoche, cuando solo le na de suyu cuarto, ya atende le na Comemoracion usando el de suyu cellphone. Despues quel, ya habla si Sue con el quien ta enseña con ele: “Ya puede gayot tu anima conmigo de ayer. Ya hace yo el todo que puede yo hace para atende na Comemoracion y ya ayuda conmigo si Jehova. Ta rindi gayot yo gracias y alegre gayot yo!” Ta mira tu, puede ba contigo ayuda si Jehova si enfrenta tu semejante situacion?

16. Porque kita puede confia que hay bendici si Jehova con el diaton esfuerzo para atende na Comemoracion? (Roma 8:31, 32)

¹⁶ Ta aprecia gayot si Jehova con el diaton esfuerzo para atende na Comemoracion del muerte de Jesus. Puede kita asigura que hay bendici le kanaton si dale kita mira apresacion na cosa le ya hace para kanaton. (Le con el Roma 8:31, 32, NWT.) Entonces, queda kita determinao que atende na Comemoracion este año y pricura mas participa na maga espiritual actividad durante na tiempo de Comemoracion.