1-2. (a) Cosa kita posible sinti si ta medita kita acerca con el vida y ministerio de Jesus? (b) Cosa kita discuti na este articulo?

 SI YA muri el un persona que importante kanaton, asigurao tan miss gayot kita con ele! Na primero, posible bien duele para kanaton si ta pensa kita con el maga dia antes le ya muri, especialmente si ya sufri gayot le. Pero mientras ta pasa el tiempo, posible ta queda kita alegre si ta pensa kita con el un cosa que ya enseña le, ya hace o ya habla para anima kanaton o para manda kanaton re.

² Na igual manera, ta queda kita triste si ta le kita acerca con el sufrimiento y muerte de Jesus. Durante el tiempo de Comemoracion, ta dale kita tiempo para medita con el importancia del de suyu rescate. (1 Cor. 11:24, 25) Pero, ta queda kita alegre si ta pensa kita con el todo cosas que ya habla y ya hace si Jesus cuando taqui ele na tierra. Ta puede tambien anima kanaton si ta pensa kita acerca si cosa le ta hace ahora y si cosa le hay hace para kanaton na futuro. Si medita kita con este maga cosas y con el de suyu grande amor para kanaton, hay manda este move kanaton para dale mira el diaton apresacion na maga practical manera, como cosa kita hay discuti na este articulo.

3. Porque kita ta aprecia con el rescate?

³ Ta rindi kita gracias si ta medita kita acerca con el vida y muerte de Jesus. Durante na de suyu ministerio aqui na tierra, ya enseña si Jesus con el maga gente acerca con el maga buen cosas que hay hace el Reino del Dios. Ta aprecia gayot kita con este maga verdad. Ta aprecia kita con el rescate cay por causa con este, ya tiene kita buen amistad con Jehova y Jesus.  Aquellos quien ta demonstra fe con Jesus tiene tambien el esperanza que vivi hasta para cuando y puede mira otravez con el diila maga familia y amigo quien ya muri. (Juan 5:28, 29; Roma 6:23) Gendeh kita conviene ricibi con este maga bendicion y gendeh tambien kita puede paga con Dios y con el Cristo na cosa sila ya hace para kanaton. (Roma 5:8, 20, 21) Pero, puede kita dale mira si paquemodo de grande el diaton apresacion. Paquemodo?

4. Paquemodo ya dale mira si Maria Magdalena que ya aprecia le con el cosa ya hace si Jesus para con ele? (Mira con el letrato.)

⁴ Considera con el ejemplo del un Judio que si Maria Magdalena. Ya sufri gayot le cay ya entra con ele siete demonio. Posible, ya sinti le que nuay quien puede ayuda con ele. Poreso, imagina si paquemodo le de alegre cuando ya manda sale si Jesus con ese maga demonio! El de suyu apresacion ya manda move con ele para queda siguidores de Jesus y para usa el de suyu tiempo, fuerza y material cosas para suporta con este na ministerio. (Luc. 8:1-3) Maskin pa ya aprecia gayot si Maria con el cosa ya hace si Jesus para con ele, posible nuay le puede pensa que mas pa el cosa hay hace si Jesus para con ele na futuro. Hay dale si Jesus el de suyu vida para na maga gente “para todo quien ta cree” o ta demonstra fe con ele hay vivi hasta para cuando. (Juan 3:16) Maskin pa ansina, ya dale mira si Maria el de suyu apresacion para con Jesus por medio na de suyu lealtad. Cuando ta sufri si Jesus na estaca, talla cerca si Maria y ta dale con ele comforta y con otro. (Juan 19:25) Despues muri si Jesus, si Maria y el dos otro pa mujer ya lleva maga hierba na tumba. (Mar. 16:1, 2) Ya bendici gayot con Maria cay leal le. Ya puede le mira y man cuento con Jesus despues este resucita—un privilegio que nuay tene el mayoria del maga dicipulo.—Juan 20:11-18.

5. Cosa kita puede hace para dale mira que ta aprecia kita con el todo cosa ya hace si Jehova y Jesus para kanaton?

⁵ Puede tambien kita dale mira el diaton apresacion na todo cosa ya hace si Jehova y Jesus para kanaton si usa kita con el diaton tiempo,  fuerza y material cosas para suporta con el trabajo del Reino. Por ejemplo, puede kita ayuda construi y mentena maga facilidad que ta usa na puro adoranza.

6. Porque kita puede habla que un personal regalo el rescate?

⁶ Si ta pensa kita si paquemodo de grande el amor de Jehova y Jesus para kanaton, ta manda este move kanaton para ama tambien kanila. (1 Juan 4:10, 19) Y mas ya ama pa kita kanila cuando ya puede kita realiza que ya muri si Jesus para con el cada uno kanaton. Sabe este si apostol Pablo y gane ya escribi le con el maga de Galacia: “El Anak del Dios . . . ya ama conmigo y ya dale su cuerpo para muri por causa dimio.” (Gal. 2:20) Por causa na rescate, ya puede hace manera si Jehova para queda tu cerca con ele. (Juan 6:44) Gendeh ba ta queda alegre el de tuyu corazon cay sabe tu que tiene cosa bueno que ya mira contigo si Jehova y que bien grande el cosa le ya sacrificia para puede tu queda de suyu amigo? Gendeh ba se ta hace mas fuerte con el de tuyu amor para con Jehova y Jesus? Poreso debe kita pregunta na diaton mismo cuerpo, ‘Cosa conmigo manda move para hace ese amor?’

7. Como cosa puede mira na letrato, paquemodo kita puede demonstra con el diaton amor para con Jehova y Jesus? (2 Corinto 5:14, 15; 6:1, 2)

⁷ El diaton amor para con Dios y con el Cristo ta manda move kanaton para dale tambien mira amor con otro. (Le con el 2 Corinto 5:14, 15; 6:1, 2.) El un manera que ta demonstra kita ese amor amo si activo kita ta participa na trabajo predicacion. Tan cuento kita con todo con quien kita ta conoce. Gendeh kita ta discrimina con el maga gente por causa na diila raza, tribo o estado na vida. Na ansina manera, ta actua kita uyun na proposito de Jehova “que todo el maga gente ay salva y ay alcanza el completo conocimiento del verdad.”—1 Tim. 2:4.

8. Paquemodo kita puede dale mira amor con el diaton maga hermano y hermana?

 ⁸ Ta dale tambien kita mira que ta ama kita con Dios y con el Cristo si ta dale kita mira amor con el diaton maga hermano y hermana. (1 Juan 4:21) Ta dale kita mira personal interes kanila y ta suporta kanila si ta enfrenta sila maga probanza. Ta dale kita comforta kanila si ya muri el diila familia o amigo, ta visita kanila si enfermo sila y ta anima kanila si tan luya sila. (2 Cor. 1:3-7; 1 Tes. 5:11, 14) Ta continua kita reza para kanila cay sabe kita que “tiene grande poder el rezo de un gente bueno.”—Sant. 5:16, El Nuevo Testamento.

9. Cosa el otro manera que puede kita dale mira que ta ama kita con el diaton maga hermano y hermana?

⁹ Ta dale tambien kita mira que ta ama kita con el diaton maga hermano y hermana si ta hace kita esfuerzo para mentena paz kanila. Ta pricura kita imita si paquemodo si Jehova ta perdona con otro. Si preparao si Jehova que sacrificia con el de suyu Anak para na diaton maga culpa, gendeh ba debe tambien kita perdona con el diaton maga hermano y hermana si ta culpa sila contra kanaton? No quierre kita queda igual con el mal esclavo que ya refiri si Jesus na uno del de suyu maga ilustracion. Maskin pa ya cancela el amo con el de suyu grande debe, ese esclavo nuay perdona con el de suyu uban esclavo quien tiene diutay debe con ele. (Mat. 18:23-35) Si tiene tu conflicto na un hermano o hermana na congregacion, puede ba tu hace iniciativo para hace bira otravez con el paz antes tu atende na Comemoracion? (Mat. 5:23, 24) Si hace tu se, ta dale tu mira que tiene tu grande amor para con Jehova y Jesus.

10-11. Paquemodo puede dale mira el maga anciano que ta ama sila con Jehova y Jesus? (1 Pedro 5:1, 2)

¹⁰ Paquemodo puede dale mira el maga anciano que ta ama sila con Jehova y Jesus? El un importante manera amo si cuida sila con el maga carnero de Jesus. (Le con el 1 Pedro 5:1, 2.) Ya hace se claro si Jesus con apostol Pedro. Despues le desconoce tres beses con Jesus, posible bien quierre si Pedro que dale mira que ta ama le con Jesus. Despues del resureccion de Jesus, ya pregunta le con Pedro: “Simon, anak de Juan, ta ama ba tu conmigo?” Puede kita asigura que preparao hace si Pedro con el maskin cosa para dale mira que ta ama le con el de suyu Maestro. Ya habla si Jesus con Pedro: “Cuida con el dimio maga carnero.” (Juan 21:15-17) Y hasta ya muri si Pedro, ya cuida le enbuenamente con el maga carnero del Señor y na ese manera, ya dale le mira que ta ama le con Jesus.

¹¹ Maga anciano, durante el tiempo de Comemoracion, paquemodo ustedes puede demonstra que importante con ustedes el maga palabra de Jesus con Pedro? Puede ustedes dale mira si paquemodo de grande el de ustedes amor para con Jehova y Jesus si regular ustedes man shepherding con el maga hermano y hermana y si hace ustedes especial esfuerzo para ayuda con el maga gendeh activo que bira con Jehova. (Eze. 34:11, 12) Puede tambien ustedes dale mira personal interes con el maga Bible study y con el maga nuevo interesao quien atende na Comemoracion. Quierre kita manda sinti kanila que welcome sila cay ta esperanza kita que hay queda tambien sila maga siguidores de Jesus.

12. Na cosa manera puede kita tene coraje si medita kita con el maga palabra que ya habla si Jesus na noche antes le muri? (Juan 16:32, 33)

¹² Na noche antes le muri, ya habla si Jesus con el de suyu maga dicipulo: “Na mundo ay sufri gayot ustedes. Pero tene animo, cay ya gana ya yo con el mundo.” (Le con el Juan 16:32, 33.) Cosa ya puede ayuda con Jesus para tene coraje cuando ya amenaza con ele el de  suyu maga enemigo y para esta fiel hasta na de suyu muerte? Ya confia le con Jehova. Sabe le que el de suyu maga siguidores hay enfrenta maga semejante probanza poreso ya pidi le con Jehova que vicia kanila. (Juan 17:11) Porque este ta dale kanaton coraje? Cay mas poderoso si Jehova contra na diaton maga enemigo. (1 Juan 4:4) Ta puede mira si Jehova el todo. Convincido kita que si confia kita con ele, puede le ayuda kanaton para quita con el diaton maga miedo y para puede kita dale mira coraje.

13. Paquemodo ya dale mira coraje si Jose de Arimatea?

¹³ Considera con el ejemplo de Jose de Arimatea. Ta respeta gayot con ele el maga Judio. Miembro le del Sanhedrin, el corte suprema del maga Judio. Pero durante na ministerio de Jesus na tierra, gendeh animoso si Jose. Ya habla si Juan que si Jose “un dicipulo de Jesus, pero de secreto lang, cay tiene le miedo con el maga autoridad Judio.” (Juan 19:38) Maskin pa interesao si Jose na mensaje del Reino, ya esconde le que tiene le fe con Jesus. Asigurao, tiene le miedo que hay perde el de suyu alto posicion na comunidad. Pero, el Biblia ta habla kanaton que despues muri si Jesus, si Jose “ya tene . . . animo para anda con Pilato y pidi el cuerpo de Jesus.” (Mar. 15:42, 43) Nuay mas esconde si Jose que dicipulo le de Jesus.

14. Cosa tu debe hace si tiene tu miedo na gente?

¹⁴ Tiene ba tambien tu miedo na maga gente igual con el cosa ya sucede con Jose? Si na escuela tu o na trabajo, tiene vez ta tiene ba tu huya manda conoce que uno tu del maga Testigo de Jehova? Tan alang-alang ba tu predica con otro o decidi bautiza cay tan lingasa tu si cosa pensa el otro acerca contigo? No permiti con ese maga sentido para sangga contigo que hace si cosa el justo. Sincero reza con Jehova. Pidi con ele que dale contigo coraje para hace con el de suyu voluntad. Si ta mira tu si paquemodo si Jehova ta contesta con el de tuyu maga rezo, hay dale se contigo confianza y hay tene tu coraje.—Isa. 41:10, 13.

15. Despues aparece si Jesus con el de suyu maga dicipulo, cosa sila ya hace por causa na diila alegria? (Lucas 24:52, 53)

¹⁵ Ya queda bien triste el maga dicipulo cuando ya muri si Jesus. Imagina con el de tuyu mismo cuerpo na diila situacion. Nuay lang perde kanila el diila amigo sino ya sinti tambien sila que dol nuay mas sila esperanza. (Luc. 24:17-21) Pero cuando ya aparece kanila si Jesus, ya dale le tiempo para ayuda kanila entende si paquemodo le ya cumpli con el maga profecia na Biblia. Ya dale tambien le kanila un importante trabajo. (Luc. 24:26, 27, 45-48) Cuando ya subi  si Jesus na cielo 40 dia despues, gendeh mas triste el maga dicipulo sino bien alegre. Sabe sila que vivo el diila Maestro y preparao ayuda kanila para cumpli con el diila nuevo trabajo poreso ya queda sila alegre. Como resulta, nuay sila descanza alaba con Jehova.—Le con el Lucas 24:52, 53, NWT; Act. 5:42.

16. Paquemodo kita puede imita con el maga dicipulo de Jesus?

¹⁶ Paquemodo kita puede imita con el maga dicipulo de Jesus? Puede kita queda alegre mientras ta sirvi con Jehova gendeh lang durante el tiempo de Comemoracion sino na entero año. Para sucede este, necesita kita hace una con el Reino del Dios na diaton vida. Por ejemplo, manada el quien yan adjust con el diila hora de trabajo para puede sila participa na ministerio, atende na maga miting y tene regular de familia adoranza. El cuanto ya decidi pa gane que gendeh obtene maga material cosas que ta considera el otro como importante. Ya hace sila se para puede kanila mas usa na congregacion o para puede sila sirvi onde tiene mas grande necesidad. Maskin pa necesita kita aguanta para puede continua sirvi con Jehova, ya promete le que hay bendici gayot le kanaton si hace kita una con el Reino na diaton vida.—Prov. 10:22; Mat. 6:32, 33.

17. Cosa tu determinao hace na este tiempo de Comemoracion? (Mira con el letrato.)

¹⁷ Excited gayot kita atende na Comemoracion na Martes, Abril 4. Antes pa ese tiempo, medita ya acerca na vida y muerte de Jesus y na amor que ya dale sila mira de Jehova para kanaton. Pensa con este maga cosas na entero tiempo de Comemoracion. Por ejemplo, dale tiempo para le y medita acerca na maga suceso que puede mira na chart “Ultimo Semana del Vida de Jesus na Tierra” na Abril 2019 del Vida y Ministerio Workbook. Mientras ta hace tu con ese, busca maga istoria na Biblia que puede hace mas hondo con el de tuyu apresacion, amor, coraje y alegria. Despues, pensa maga manera que puede tu dale mira el de tuyu apresacion. Puede tu asigura que hay aprecia gayot si Jesus con el todo cosa tu ta hace para acorda con ele durante este tiempo de Comemoracion.—Rev. 2:19.