1-2. Cosa kita debe continua hace despues del bautismo? Explica.

 PIRMI ba tu ta limpia con el de tuyu casa? Posible antes tu queda alli, ya limpia tu con ese enbuenamente. Pero cosa sucede si gendeh mas tu limpia con ese? Hay queda este mabuling dayun. Para esta presentable el de tuyu casa, necesita tu regular limpia con ese.

² Ansina tambien si acerca na diaton pensamiento y personalidad. Siempre antes kita bautiza, ya hace kita esfuerzo para hace maga cambio na diaton vida y para ‘limpia todo mancha na diaton cuerpo o espiritu.’ (2 Cor. 7:1) Pero ahora, necesita kita sigui con el consejo de apostol Pablo que continua ‘vivi un vida nuevo.’ (Ef. 4:23) Porque importante que continua kita hace con ese? Cay facil lang kanaton influencia y hace mabuling el mundo. Para puede evita con ese y esta aceptable con Jehova, debe kita regular examina con el diaton pensamiento, personalidad y deseo.

3. Cosa quierre decir que hace cambio na diaton pensamiento? (Roma 12:2)

³ Cosa kita necesita hace para ‘cambia con el diaton maga custumbre por medio del diaton maga pensamiento nuevo’? (Le con el Roma 12:2.) El Griego expresion para na este maga palabra puede tambien man translate como “compone con el pensamiento.” Poreso, gendeh bastante que hace lang kita maga buen cosas. Sino, debe kita examina si cosa gayot kita clase de persona y hace maga cambio para puede kita sigui con el maga principio de Jehova. Gendeh lang kita debe hace con este una vez sino pirmi.

4. Cosa kita hace para este sistema de maga cosas gendeh puede influencia con el diaton pensamiento?

 ⁴ Si perfecto ya kita, puede kita hace alegre con Jehova na todo cosa kita ta hace. Pero mientras tanto, necesita kita continua hace esfuerzo que hace con ese. Nota que na Roma 12:2, ya habla si Pablo que necesita kita hace cambio na diaton pensamiento para puede discubri si cosa el voluntad del Dios. En vez de permiti con el diaton mismo cuerpo que queda influenciao na este sistema de maga cosas, debe kita una examina con el diaton mismo cuerpo para determina si ta permiti ba kita con el pensamiento del Dios que influencia con el diaton maga goal y decision.

5. Paquemodo kita puede examina si deverasan ba gayot kita ta creé que bien cerca ya el dia de Jehova? (Mira con el letrato.)

⁵ Considera un ejemplo. Quierre si Jehova que ‘espera kita con ansias con el llegada del dia del Dios.’ (2 Ped. 3:12) Pregunta con el de tuyu mismo cuerpo: ‘El de mio manera de vida ba ta dale mira que ta entende yo que bien cerca ya termina con este sistema de maga cosas? El de mio maga decision ba acerca na educacion y trabajo ta dale mira que el servicio con Jehova amo el de con todo importante cosa na de mio vida? Tiene ba yo fe que hay dale si Jehova el de mio maga necesidad y del de mio familia o pirmi yo tan lingasa acerca na maga material cosas?’ Pensa si paquemodo de alegre si Jehova si ta mira le kanaton que ta vivi harmonia na de suyu voluntad.—Mat. 6:25-27, 33; Fil. 4:12, 13.

6. Cosa kita necesita continua hace?

⁶ Necesita kita regular examina con el diaton pensamiento y hace con el maga necesita cambio. Ya habla si Pablo con el maga de Corinto: “Examina el de ustedes cuerpo y mira si ta esta ustedes na fe. Pruba el de  ustedes cuerpo.” (2 Cor. 13:5) Para ‘esta na fe,’ gendeh bastante que atende lang tiene vez na maga miting na congregacion y participa na ministerio. Sino, incluido tambien aqui el diaton pensamiento, deseo y motivo. Poreso, necesita kita continua hace cambio na diaton pensamiento por medio na lehida del Palabra del Dios, pensa igual si paquemodo si Jehova ta pensa y despues, hace el maskin cosa que necesita para puede hace alegre con ele.—1 Cor. 2:14-16.

7. Asegun na Efeso 4:31, 32, cosa pa kita necesita hace y porque posible dificil este?

⁷ Le con el Efeso 4:31, 32. Puera que hace cambio na diaton pensamiento, necesita tambien kita “visti el camisa del Nuevo Naturaleza” o personalidad. (Ef. 4:24) Necesita esfuerzo para hace con ese. Debe kita quita na diaton personalidad el maga custumbre igual na rabia y agrabio. Porque posible dificil con este hace? Cay el cuanto de este maga custumbre tiene ya kita desde antes pa. Por ejemplo, el Biblia ya habla que el cuanto maga gente “pronto rabia” y “rabion.” (Prov. 29:22) El un persona quien tiene este custumbre de antes posible necesita continua hace esfuerzo despues del bautismo, como cosa ta dale mira este sunod experiencia.

8-9. Paquemodo el experiencia de Stephen ta dale mira que necesita kita continua hace esfuerzo para quita con el maga umalin custumbre?

⁸ El un hermano que si Stephen yan dificil controla con el de suyu rabia. Ele ya habla: “Maskin despues yo bautiza, necesita yo siempre controla con el de mio rabia. Por ejemplo, un ocasion cuando ta predica kame na casa en casa, ya hace yo apas con el ladron quien ya ruba con el radio del de mio coche. Cuando cerca ya yo con ele, ya larga le con el radio y ya corre. Cuando ya habla yo con otro si paquemodo yo ya puede saca otravez con el radio, el un anciano ya pregunta conmigo, ‘Stephen, cosa tu hace si ya puede tu cuji con ele?’ Ese pregunta ya manda conmigo pensa y ya motiva conmigo que continua hace cambio na de mio custumbre.” b

⁹ Como cosa ta dale mira el experiencia de Stephen, el diaton umalin custumbre posible sale maskin pa pensaba kita que ya puede ya kita quita con ese. Si sucede se contigo, no man luya y no pensa que ya falla tu como un Cristiano. Maskin si apostol Pablo ya admiti: “Cada vez quiere yo hace el bueno ta abuya dayun el malo.” (Roma 7:21-23) El todo imperfecto Cristiano necesita vicia que gendeh bira el maga umalin custumbre que igual na maga polvos y buling que ta queda manada na diaton casa. Poreso, necesita kita continua hace esfuerzo para esta limpio. Paquemodo kita puede hace con ese?

10. Cosa kita hace para quita con el maga gendeh buen custumbre? (1 San Juan 5:14, 15)

¹⁰ Reza con Jehova acerca con el custumbre que tan dificil tu quita y puede tu confia que hay oi y ayuda le contigo. (Le con el 1 San Juan 5:14, 15.) Maskin pa gendeh quita si Jehova con ese custumbre por medio na un milagro, puede le hace fuerte contigo para gendeh tu demonstra con ese custumbre. (1 Ped. 5:10) Pero, necesita tu actua harmonia na de tuyu maga rezo y gendeh hace maga cosas que posible causa para bira ese umalin custumbre. Por ejemplo, queda con cuidao si ta mira maga salida y programa na TV o si ta le maga libro cay posible ta hace este sale que justo el maga custumbre que ta  pricura tu quita. Y evita pensa maga gendeh buen cosas.—Fil. 4:8; Col. 3:2.

11. Cosa kita puede hace para continua visti con el nuevo personalidad?

¹¹ Maskin pa necesita tu quita con el daan personalidad, importante tambien que cultiva con el nuevo personalidad. Paquemodo tu puede hace con ese? Pricura imita con Jehova mientras ta aprende tu acerca con el de suyu maga calidad. (Ef. 5:1, 2) Por ejemplo, si ta le tu un istoria na Biblia que ta dale mira acerca con el perdon de Jehova, pregunta na de tuyu mismo cuerpo, ‘Ta perdona ba yo con otro?’ Si ta le tu acerca con el compasion de Jehova para con aquellos quien ta sufri, pregunta na de tuyu mismo cuerpo, ‘Ansina ba tambien el cosa yo ta sinti para con el maga hermano y hermana quien ta necesita y ta dale ba yo se mira por medio na de mio accion?’ Visti con el nuevo personalidad para puede tu continua hace cambio na de tuyu pensamiento. Y man paciencia con el de tuyu mismo cuerpo mientras ta hace tu con ese.

12. Paquemodo ya experiencia si Stephen que el Biblia puede cambia con el vida del un gente?

¹² Ya realiza si Stephen que ya menciona enante que hinay-hinay le ya puede visti con el nuevo personalidad. Ele ya habla: “Desde el de mio bautismo, ya enfrenta yo manada situacion que posible conmigo causa para queda violente. Ya aprende yo que evita con el maga gente quien ta manda conmigo rabia o solva con el situacion na calma manera. Manada gente, incluido el de mio mujer, ya comenda conmigo si paquemodo yo ta puede controla con este maga situacion. Nuay tambien yo expecta que puede yo quel hace! Pero, sabe yo que gendeh yo quel puede hace maga cambio na de mio mismo cuerpo lang. Sino, ta creé yo que ya queda lang se posible por causa na poder del Biblia.”

13. Cosa puede ayuda kanaton para cultiva maga justo deseo? (Galacia 5:16)

¹³ Le con el Galacia 5:16. Para puede kita hace si cosa el justo, ta dale kanaton si Jehova el de suyu sagrao espiritu. Si ta le kita con el Palabra del Dios, ta permiti kita con ese espiritu para influencia kanaton. Ta ricibi tambien kita sagrao espiritu si ta atende kita na diaton maga miting. Na ese maga miting, ta puede kita man junto con el maga hermano y hermana quien igual kanaton, ta pricura tambien hace si cosa el justo y ta puede se anima kanaton. (Heb. 10:24, 25; 13:7) Y si sincero kita atraca con Jehova na rezo y pidi con ele que ayuda kanaton na maga cosas que tan dificil kita, hay dale le kanaton el de suyu sagrao espiritu para puede kita continua hace esfuerzo. Maskin pa posible gendeh perde el maga gendeh justo deseo si hace kita con este maga cosas, hay ayuda este para gendeh kita sigui con ese maga deseo. Como cosa ta habla el Galacia 5:16, aquellos quien ta vivi asegun con el espiritu ‘gendeh hay sigui con el maga mal deseo del cuerpo.’

14. Porque importante que continua cultiva maga justo deseo?

¹⁴ Si tiene ya kita buen rutina de maga espiritual actividad, importante que mentena kita con ese rutina y continua cultiva maga justo deseo. Porque? Cay gendeh ta descanza el uno del diaton maga enemigo—el tentacion que hace si cosa el malo. Maskin pa ya bautiza ya kita, posible quierre siempre kita hace con el maga cosas que debe kita evita, igual con el juego de sen, sobra alcoholico tomada o pornografia. (Ef. 5:3, 4) El un joven hermano ya admiti: “El uno na maga bien dificil para conmigo amo que ta quierre yo na igual hombre. Pensaba yo perde lang ese  sentido pero ta sinti siempre yo con ese.” Cosa puede ayuda contigo si tan dificil gayot tu na un gendeh justo deseo?

15. Porque puede anima kanaton cay sabe kita que ya puede ya resisti el otro con el maga gendeh justo deseo? (Mira con el letrato.)

¹⁵ Mientras ta resisti tu con el un gendeh justo deseo, acorda que gendeh tu solo. El Biblia ta habla: “Todo ese maga tentacion di ustedes . . . amo ya man ese el clase de problema ya pasa con todo el maga otro gente.” (1 Cor. 10:13a, El Nuevo Testamento) El otro Biblia yan translate con ese como: “El maskin cosa tentacion que ya llega con ustedes ya experiencia ya el otro maga gente.” Ya escribi con este maga palabra para na maga hombre y mujer Cristiano quien ta queda na Corinto. El cuanto kanila maga homosexual, burrachon y ya comete adulterio de antes. (1 Cor. 6:9-11) Ta pensa ba tu que despues del diila bautismo, nuay mas sila man dificil con ese maga gendeh justo deseo? Yan dificil siempre sila. Deveras, maga iscujido Cristiano sila pero imperfecto siempre sila. Asigurao, tiene maga tiempo que yan dificil siempre sila resisti con el maga gendeh justo deseo. Puede se anima kanaton. Porque? Cay ta dale este mira que maskin cosa pa el gendeh justo deseo que tan dificil tu quita ahora, tiene ya quien ya puede resisti con ese. Puede gayot tu ‘esta pirmi na fe, cay sabe tu que el de tuyu maga hermano y hermana na entero mundo ta sufri tambien igual contigo.’—1 Ped. 5:9.

16. Cosa kita debe evita pensa y porque?

¹⁶ No pensa que nuay otro quien puede entende con el un particular dificultad que ta enfrenta tu. Cay si hace tu se, puede se causa contigo para pensa que nuay mas esperanza el de tuyu situacion y nuay tu cosa puede hace para resisti con el maga gendeh justo deseo. Gane, otro el cosa ta enseña el Biblia. Este ta habla: “Puede ustedes tene comfianza  con Dios cay gendeh Ele ay permiti que ustedes ay tene tentacion mas grande pa que con el de ustedes fuerza. . . . Ele ay dale con ustedes el fuerza para aguanta el tentacion y el manera para desaleja con ese.” (1 Cor. 10:13b) Poreso, maskin pa tan dificil gayot kita na un gendeh justo deseo, puede kita esta fiel con Jehova. Na ayuda de Jehova, puede kita evita que sigui con ese deseo.

17. Maskin pa gendeh kita puede evita que gendeh tene maga gendeh justo deseo, cosa kita puede hace?

¹⁷ Pirmi acorda con este: Como un imperfecto gente, gendeh tu puede evita que gendeh tene maga gendeh justo deseo. Pero si sucede se, puede tu dayun resisti con ese, igual con Jose quien ya escapa dayun na mujer de Potifar. (Gen. 39:12) Puede tu evita que sigui con el maga gendeh justo deseo!

18-19. Mientras ta pricura kita hace cambio na diaton pensamiento, cosa kita puede pregunta na diaton mismo cuerpo?

¹⁸ Para puede hace cambio na diaton pensamiento, debe kita continua asigura que el diaton pensamiento y accion ta hace alegre con Jehova. Para puede hace con ese, regular examina con el de tuyu mismo cuerpo y pregunta: ‘El de mio maga accion ba ta dale mira que ta creé yo que bien cerca ya el fin de este sistema? Mas ta puede ba yo demonstra con el nuevo personalidad? Ta permiti ba yo con el espiritu de Jehova para guia con el de mio vida para puede yo resisti con el maga gendeh justo deseo?’

¹⁹ Mientras ta examina tu con el de tuyu mismo cuerpo, man focus na progreso y no expecta perfeccion. Si ta mira tu que necesita tu hace maga cambio, no man luya. Sino, sigui con el consejo na Filipo 3:16: “Continua kita siempre obedece el mismo verdad que ya sigui ya kita.” (El Nuevo Testamento) Si hace tu se, puede tu asigura que hay bendici si Jehova con el de tuyu maga esfuerzo.