1. Porque el manada gente ahora nuay mas confianza na Biblia?

 MANADA gente ahora el no sabe si con quien sila puede confia. Gendeh sila asigurao si el maga gente con quien sila ta respeta, igual na maga politico, scientist y negociante, ta pensa gayot acerca na diila bien. Mas pa, nuay sila confianza con el maga lider del religion quien ta clama como maga Cristiano. Este maga lider ta habla que ta sigui sila con el Biblia poreso gendeh mas maka-espanta que el maga gente nuay mas tambien confianza na este libro.

2. Asegun na Salmo 119:160, na cosa kita debe queda convincido?

² Como maga siervo de Jehova, convincido kita que ele “el Dios de verdad” y pirmi le quierre si cosa el de con todo bueno para kanaton. (Sal. 31:5; Isa. 48:17) Sabe kita que puede kita confia con el cosa kita ta le na Biblia y ta creé kita que “verdad todo el . . . palabra” del Dios. (Le con el Salmo 119:160.) Tan uyun kita con el cosa ya escribi el un scholar del Biblia: “Nuay maskin diutay imbusterias na cosa ta habla el Dios o maskin diutay chansa que falla este. El maga siervo del Dios puede confia con el cosa le ya habla cay ta confia sila con el Dios quien ya habla con ese.”

3. Cosa kita hay considera na este articulo?

³ Paquemodo kita puede ayuda con otro para confia tambien con el Palabra del Dios? Considera kita tres razon si porque kita puede confia con el Biblia. Hay mira kita con el pagka-exacto de este, el cumplimiento del maga profecia na Biblia y el poder de este para cambia con el vida del gente.

4. Porque el cuanto maga gente tan duda na pagka-exacto del Biblia?

⁴ Ya usa si Jehova maga 40 fiel hombre para escribi con el maga libro na Biblia. Pero, gendeh mas ta existi ahora el maga original manuscrito de este. b El cosa lang kita tiene amo maga copia de maga copia de este. Por causa con ese, el cuanto gendeh asigurao si igual ba siempre el cosa escribido na Biblia ahora na cosa original ya escribi de antes. Ya puede ba tu pensa si porque kita puede asigura con el pagka-exacto del Biblia?

5. Paquemodo ya hace maga copia del Hebreo Escritura? (Mira con el letrato na cover.)

⁵ Para puede preserva con el de suyu mensaje, ya manda si Jehova que hace maga copia de este. Ya dale le instruccion na maga rey de Israel que hace con el diila mismo copia del Ley y ya manda le con el maga Levita que enseña con ese Ley na maga gente. (Deut. 17:18; 31:24-26; Neh. 8:7) Despues libra con el maga Judio na Babilonia, el un grupo de maga experto ya principia hace manada copia del Hebreo Escritura. (Esd. 7:6, ftn.) Con cuidao sila na diila trabajo. Na uliji, ta cunta sila gendeh lang con el maga palabra sino maskin con el maga letra para asigura que exacto el todo cosa sila ya copia. Pero por causa na imperfeccion, ya tiene maga diutay kamali na cuanto maga copia. Maskin pa ansina, ciendo manada copia el ya puede hace, ta puede siempre identifica con el maga kamali. Paquemodo?

6. Paquemodo puede identifica con el maga kamali na maga copia del Biblia?

⁶ Tiene efectivo manera el maga moderno scholar para identifica con el maga kamali na maga copia del Biblia. Para ilustra: Pone kita que ya manda con el 100 gente que escribi copia del un pagina de un libro. El uno kanila ya hace diutay kamali na de suyu copia. Puede identifica con el kamali si compara con este copia na copia del otro. Na igual manera, el maga scholar ta compara manada maga manuscrito del Biblia para puede identifica con el maga kamali o maga cosas que ya quita na maga copia del Biblia.

7. Paquemodo de exacto el maga copia del Biblia?

⁷ Aquellos quien ya hace maga copia del maga manuscrito del Biblia ya hace gayot esfuerzo para asigura que exacto se. Como prueba, considera con este ejemplo. El de con todo daan completo manuscrito del Hebreo Escritura ya hace del 1008 o 1009 C.E. Ta llama con este Leningrad Codex. Pero, ya puede incuntra maga manuscrito del Biblia y maga parte de este que maga 1,000 año mas daan compara na Leningrad Codex. El cuanto posible pensa que despues hace manada copia de aquel maga manuscrito adentro na 1,000 año, bien diferente ya el cosa escribido na Leningrad Codex si compara na aquel maga mas daan manuscrito. Pero, gendeh se deverasan. Cuando ya compara el maga experto con el maga copia, ya puede sila mira que maskin tiene diutay diferencia na maga palabra, igual siempre el mensaje de este.

8. Cosa el diferencia entre na maga copia del Cristiano Griego Escritura si compara na maga copia del otro maga daan libro?

⁸ El maga Cristiano del primer siglo ya hace tambien maga copia del Escritura. Con cuidao sila ya hace maga copia del 27 libro del Griego Escritura que ya usa sila na diila maga miting y na predicacion. Despues compara con el maga copia del Griego Escritura na otro maga libro que ya hace na igual tiempo,  el un experto ya habla: “Tiene mas manada [copia del Griego Escritura] . . . y ta sale que mas completo este.” El libro Anatomy of the New Testament ta habla: “Puede kita confia que el cosa kita ta le na maga bueno y moderno translation [del Griego Escritura] igual lang na mensaje del cosa original ya escribi de antes.”

9. Cosa el Isaias 40:8 ta menciona acerca na mensaje del Biblia?

⁹ El esfuerzo de aquellos quien con cuidao ya hace maga copia del Biblia ya puede ayuda para tene kita exacto Biblia que puede kita le y estudia ahora. c Sabe kita que si Jehova el ya hace manera para puede preserva con el de suyu mensaje. (Le con el Isaias 40:8.) Pero, el cuanto posible habla que maskin ya puede preserva con el mensaje del Biblia gendeh se quierre decir que estaba se con Dios. Poreso, considera kita ahora con el cuanto evidencia que el Biblia inspirao gayot del Dios.

10. Dale ejemplo del un profecia que ta dale mira que deverasan el cosa ta habla na 2 Pedro 1:21. (Mira con el maga letrato.)

¹⁰ Manada maga profecia na Biblia el ya cumpli ya y el cuanto de ese ya cumpli mas de cien año despues con ese ya escribi. El history ya confirma que ya cumpli gayot ese maga profecia. Gendeh mas kita ta espanta con ese cay sabe kita que si Jehova el Autor del maga profecia na Biblia. (Le con el 2 Pedro 1:21.) Considera con el maga profecia acerca na destruccion del ciudad de Babilonia. Del ika-ocho siglo B.C.E., ya guia con profeta Isaias para escribi que hay ataca con el poderoso ciudad de Babilonia. Gane, ya menciona le el nombre del lider quien se hay hace, si Ciro, y si paquemodo le se hace. (Isa. 44:27–45:2) Ya predicta tambien si Isaias que hay destroza con el Babilonia na uliji y queda este abandonao. (Isa. 13:19, 20) Amo gayot se el cosa ya sucede. El Babilonia ya queda bajo na maga de Medo y maga de Persia del 539 B.C.E. y ese grande ciudad abandonao ya ahora.—Mira con el video El Biblia Ya Predicta  con el Destrozo del Babilonia na electronico copia del libro Queda Alegre Hasta Para Cuando!, leccion 03 punto 5.

11. Paquemodo ta cumpli ahora el Daniel 2:41-43?

¹¹ Gendeh lang de antes ta cumpli el maga profecia na Biblia; ta puede tambien kita mira maga profecia que ta cumpli ahora. Por ejemplo, considera con el cumplimiento del profecia de Daniel acerca na Anglo-American World Power. (Le con el Daniel 2:41-43.) Ese profecia ya predicta que este world power “tiene parte fuerte” igual na hierro y “tiene parte mahina” igual na lodo pandayan. Y ahora ta puede kita mira que deverasan se. El Britain y America mafuerza igual na hierro cay grande el de este papel si porque ya ganá el cuanto maga nacion na dos Guerra Mundial y hasta ahora tiene este poderoso fuerza militar. Pero, ta queda tambien mahina el diila poder por causa na maga ordinario gente na este maga nacion quien tan protesta contra na maga negocio y gobierno. El un experto na politica ya habla: “Nuay otro moderno democratico nacion ahora que mas dividido na politica contra na United States.” Y el Britain, el otro parte de este world power, dividido tambien especialmente na este reciente maga año por causa na diferente maga opinion acerca si debe ba este continua man alianza na maga nacion que miembro del European Union. Por causa cay dividido el Anglo-American World Power, dol ta queda ya imposible para na ese maga nacion que actua na cosa sila ta decidi.

12. Na cosa kita ta queda convincido por causa na maga profecia na Biblia?

¹² El cumplimiento del manada maga profecia na Biblia ta hace fuerte con el diaton confianza na maga promesa del Dios para na futuro. Ta sinti kita igual con el salmista quien ya reza con Jehova: “Con ansias yo ta espera con el de tuyu salvacion, cay el de tuyu palabra el de mio esperanza.” (Sal. 119:81) Por medio na Biblia, ya dale kanaton si Jehova “futuro y esperanza.” (Jer. 29:11) El diaton esperanza para na futuro ta depende, gendeh na esfuerzo del gente, sino na maga promesa de Jehova. Ojala continua kita hace fuerte con el diaton confianza na Palabra del Dios por medio que estudia enbuenamente con el maga profecia na Biblia.

13. Asegun na Salmo 119:66, 138, cosa el otro prueba que puede confia con el Biblia?

¹³ El otro razon si porque kita puede confia con el Biblia amo cay ta puede este ayuda con el maga gente si ta sigui sila con el consejo de este. (Le con el Salmo 119:66, 138.) Por ejemplo, tiene maga man maridable quien cerca ya man divurcio el alegre ya ahora na diila matrimonio. El diila maga anak ta engranda na un Cristiano familia donde ta puede sila sinti el seguridad y amor.—Ef. 5:22-29.

14. Relata un ejemplo que ta dale mira si paquemodo ta queda mas enbuenamente el vida del gente si ta aplica le con el verdad na Biblia.

¹⁴ Maskin el maga criminal ya cambia tambien el vida cuando ya aplica sila con el maga consejo na Biblia. Considera si paquemodo el consejo del Biblia ya puede ayuda con el un preso que si Jack. d Un violente criminal le y conocido le como uno na maga de con todo peligroso preso con quien ya sentencia muerte. Pero un dia, ya atende le na un Bible study. Ya puede afecta con ele el pagka-bueno del maga hermano quien ta conduci con el estudiada poreso ya principia tambien le man Bible study. Cuando ya aplica le con el verdad  na de suyu vida, ya cambia el de suyu conducta y ya queda le mas buen persona. Ya llega el tiempo, ya queda le cualificao para queda un unbaptized publisher y ya bautiza. Ya predica le acerca el Reino del Dios na otro maga preso y ya puede le ayuda maga cuatro kanila o mas pa para aprende el verdad. Cuando ya llega el dia que mata con ele, cambiao ya gayot el personalidad de Jack. El uno del de suyu maga abogao ya habla: “Gendeh mas si Jack igual na persona que ya conoce yo 20 año ya el ya pasa. El enseñanza del maga Testigo de Jehova ya cambia gayot con el de suyu vida.” Maskin pa ya porsigui mata con Jack, el de suyu ejemplo ta dale mira que puede kita confia con el Palabra del Dios y tiene este el poder para hace mas enbuenamente con el vida del gente.—Isa. 11:6-9.

15. Na cosa manera diferente el maga siervo de Jehova? (Mira con el letrato.)

¹⁵ Cay ta aplica el maga siervo de Jehova con el verdad na Biblia, unido sila. (Juan 13:35; 1 Cor. 1:10) Claro gayot puede mira con el diaton paz y unidad si compara na maga gente na este mundo que dividido por causa na politica, raza y estado na vida. Cuando ya puede mira el un joven que si Jean con el unidad del maga Testigo de Jehova, ya puede gayot este afecta con ele. Ya engranda le na un nacion na Africa. Cuando ya tiene guerra, ya queda le un soldao. Pero na uliji, ya escapa le para na un nacion que cerca alla. Ya puede le alla conoce con el maga Testigo de Jehova. Si Jean ya habla: “Ya aprende yo que el maga siguidores del verdadero religion gendeh envuelto na politica y gendeh dividido. Sino, ta ama sila con uno y otro.” Ya omenta le: “Ya usa yo con el de mio vida para defende con el un nacion. Pero cuando ya aprende yo el verdad na Biblia, ya manda este move conmigo para usa el de mio vida para sirvi con Jehova.” Ya cambia gayot el vida de Jean. En vez de man guerra contra con el maga gente de otro background, ta predica ya le ahora con  todo el mensaje de paz del Biblia. Ciendo efectivo el consejo del Biblia na maga gente de diferente maga nacionalidad, claro que puede kita confia na Palabra del Dios.

16. Porque importante que hace kita fuerte el diaton confianza na Palabra del Dios?

¹⁶ Mientras mas ta queda grabe el situacion de este mundo, hay pone na probanza con el diaton confianza na verdad. El maga gente posible hace manera para causa kanaton que man duda que deverasan el Biblia o que ta usa si Jehova con el fiel y sabio esclavo para guia con el de suyu maga siervo ahora. Pero si convincido kita que verdad gayot el Palabra de Jehova, puede kita resisti con ese maga ataque. Hay queda kita ‘determinao que obedece con el maga regulacion’ de Jehova “na todo tiempo, hasta na fin.” (Sal. 119:112) “Gendeh [kita] tene huya” habla con otro acerca na verdad y anima kanila que sigui con el maga consejo na Biblia. (Sal. 119:46) Y puede kita aguanta ‘con paciencia y alegria’ na maga bien dificil situacion, incluido el persecucion.—Col. 1:11; Sal. 119:143, 157.

17. Cosa ta hace acorda kanaton el texto para na este año?

¹⁷ Ta rindi gayot kita gracias cay ya revela si Jehova el verdad kanaton! El verdad ta ayuda kanaton para esta calma y ta enseña este kanaton si paquemodo kita vivi na este mundo que ta queda mas magulu. Ta dale este kanaton esperanza que hay tene kita mas bonito futuro bajo na rulanza del Reino del Dios. Ojala el texto para na año 2023 puede ayuda kanaton para esta convincido que verdad todo el Palabra del Dios!—Sal. 119:160.