1-2. Cosa maga dificultad posible enfrenta el maga fiel siervo de Jehova?

 EL MAGA terrible suceso puede derepente cambia con el diaton vida. Por ejemplo, ya puede sabe el un fiel hermano que si Luis a que tiene le cancer. Ya habla con ele el doctor que cuanto meses ya lang el de suyu vida. Si Monika y el de suyu marido ocupao na maga espiritual actividad. Pero un dia, ya sabe si Monika que el de suyu marido cuanto año ya tiene doble manera de vida maskin pa un anciano este. Si Olivia, un single hermana, ya evacua por causa na un grabe tifun. Cuando ya bira le, ya mira le que destrozao ya el de suyu casa. Bien pronto lang ya cambia el vida de este maga individual. Ta relata ba tu na cosa sila ya experiencia? Ya enfrenta ba tambien tu un suceso que dayun lang ya cambia con el de tuyu vida?

² Como maga fiel siervo de Jehova, ta enfrenta siempre kita maga dificultad y ta enferma, igual na otro maga gente. Posible tambien kita experiencia maga oposicion o persecucion estaba con aquellos quien ta odia con el maga siervo del Dios. Gendeh ta sangga si Jehova con este maga cosas. Pero, ya promete le que ayuda le kanaton. (Isa. 41:10) Como resulta, puede kita mentena con el diaton alegria, hace maga buen decision y esta leal con ele maskin pa na maga bien dificil situacion. Na este articulo, hay examina kita cuatro manera que ta ayuda kanaton si Jehova durante na maga grabe suceso na diaton vida. Hay considera tambien kita si cosa kita necesita hace para beneficia na ayuda que ta dale le.

 HAY GUARDA CONTIGO SI JEHOVA

3. Si ta experiencia un grabe suceso, cosa kita posible man dificil hace?

³ El dificultad. Si ta experiencia kita un grabe suceso, posible kita man dificil pensa enbuenamente y hace decision. Porque? Cay posible, bien dolorido el diaton corazon y bien malingasa kita. Baka sinti kita que dol ta camina kita na escuridad y no sabe kita si onde pasa. Nota si cosa ya sinti el dos hermana que ya menciona enante acerca na cosa sila ya experiencia. Si Olivia ya habla: “Despues queda destrozao el de mio casa por causa na tifun, no sabe mas yo si cosa hace.” Acerca na cosa ya hace con ele el de suyu marido, si Monika ya habla: “Puera que ya queda yo bien desmayao, ya sinti tambien yo que dol ya lansia con el de mio corazon. No sabe mas yo si paquemodo hace con el maga cosas que ta hace yo de antes. Nuay gayot yo expecta que hay sucede este conmigo.” Paquemodo kanaton ta ayuda si Jehova si ta sinti kita bien triste?

4. Asegun na Filipo 4:6, 7, cosa kanaton ta promete si Jehova?

⁴ Si cosa ta hace si Jehova. Ta promete le que dale le kanaton “el paz del Dios.” (Le con el Filipo 4:6, 7.) Este paz ta refiri na tranquilidad que ta sinti kita cay sabe kita que tiene kita buen relacion con ele. “Noay quien ta puede entende” con este paz; quierre decir, mas pa este na cosa kita puede imagina. Ya puede ya ba tu experiencia que ya queda tu bien calmao despues tu reza con todo corazon con Jehova? Ese sentido amo “el paz del Dios.”

5. Paquemodo el paz del Dios ta guarda con el diaton pensamiento y corazon?

⁵ Ese mismo texto ya habla tambien que el paz del Dios “ay guarda” o protege con el diaton “maga corazon y maga pensamiento.” El original palabra para na “guarda” amo un expresion que ta refiri na maga soldao quien ta guarda con el un ciudad desde na maga ataque del maga enemigo. El maga gente na ese ciudad ta puede durmi enbuenamente cay sabe sila que ta protege kanila el maga soldao. Na igual manera, si el paz del Dios ta guarda con el diaton corazon y pensamiento, ta queda kita calmao cay sabe kita que protegido kita. (Sal. 4:8) Igual con Ana, maskin pa gendeh dayun queda enbuenamente el diaton situacion, puede siempre kita tene paz na pensamiento. (1 Sam. 1:16-18) Y si calmao kita, mas facil para kanaton que pensa enbuenamente y hace maga buen decision.

6. Cosa kita puede hace para ricibi el paz del Dios? (Mira tambien con el letrato.)

⁶ Si cosa kita necesita hace. Si tan lingasa tu, reza hasta puede tu sinti el paz del Dios. (Luc. 11:9; 1 Tes. 5:17) Si Luis que ya menciona enante ya explica si cosa ya puede ayuda kanila del de suyu mujer que si Marie cuando ya sabe sila que cuanto meses ya lang el de suyu vida. Ele ya habla: “Na maga situacion igual ansina, bien  dificil hace decision acerca na curada y na otro pa maga cosas. Pero el rezo ya puede gayot ayuda kanamon para tene paz na pensamiento.” Si Luis y el de suyu mujer ya habla que ya reza gayot sila manada beses. Ya pidi sila con Jehova que dale kanila paz na pensamiento, un calmao corazon y sabeduria para puede hace maga buen decision. Y ya sinti gayot sila el de suyu ayuda. Si ta enfrenta tu un dificultad, continua reza y hay experiencia tu el paz de Jehova que ta guarda con el de tuyu corazon y pensamiento.—Roma 12:12.

HAY HACE CONTIGO FUERTE SI JEHOVA

7. Cosa kita posible sinti si ta experiencia kita un dificil probanza?

⁷ El dificultad. Si ta experiencia kita un dificil probanza, posible que gendeh mas kita puede sinti, pensa o actua igual de antes. Baka sinti kita que bien facil lang cambia el diaton emocion. Si Marie que ya menciona enante ya habla que ya sinti le otro-otro emocion despues muri si Luis. Ele ya habla: “Tiene maga tiempo que ya queda yo bien depress y ya tiene lastima con el de mio mismo cuerpo. Ya rabia tambien yo cay ya muri le.” Puera con ese, ya queda tambien triste si Marie y yan dificil cay necesita le decidi na maga cosas que si Luis el ta hace de antes. Tiene maga tiempo, ya sinti le que dol entre medio le del mar durante el tifun. Paquemodo kanaton ta ayuda si Jehova si no sabe kita si cosa hace por causa na diaton emocion?

8. Como cosa ya menciona na Isaias 33:6, cosa kanaton ta asigura si Jehova?

⁸ Si cosa ta hace si Jehova. Ta asigura le kanaton que hay hace le fuerte kanaton. (Le con el Isaias 33:6. b) Si tiene tifun, posible que onde-onde guinda el barco por causa na marijada. Para gendeh se sucede, manada barco el tiene maga stabilizer na ambuslao del barco abajo’y agua. Este maga stabilizer puede ayuda para gendeh tanto man uyuk el barco. Na ese manera, hay queda mas safe y mas comfortable el viaje del maga pasajero. Pero, mas puede ayuda este maga stabilizer si ta corre el barco. Na igual manera, hay hace kanaton fuerte si Jehova si continua kita sirvi con ele.

9. Paquemodo el diaton maga research tool puede ayuda kanaton para controla con el diaton maga emocion? (Mira tambien con el letrato.)

⁹ Si cosa kita necesita hace. Si ta experiencia tu grabe emocion, hace el todo para puede tu mentena con el de tuyu espiritual rutina. El deverasan, posible que gendeh tu puede hace con ese igual si paquemodo tu ta hace con ese de antes. Pero acorda que razonable si Jehova. (Compara na Lucas 21:1-4.) Mas pa, dale tiempo para na personal estudiada y meditacion. Porque?  Cay por medio na de suyu organizacion, ta dale kanaton si Jehova maga bonito informacion estaba na Biblia que puede ayuda para controla con el diaton emocion. Para incuntra el cosa tu necesita, puede tu usa con el maga research tool igual na JW Library^® app, Watch Tower Publications Index y Research Guide for Jehovah’s Witnesses. Si Monika que ya menciona enante ya habla que ta usa le con ese maga research tool cada vez le ta sinti grabe emocion. Por ejemplo, tan search le con el palabra “rabia.” Tiene vez, tan search le “traicion” o “lealtad.” Despues, ta le ele con ese hasta sinti le alivio. Ele ya habla: “Cuando ya principia yo man research, malingasa pa yo. Pero cuando ya continua yo le, ya sinti yo que dol aquel ta abraza conmigo si Jehova. Ya puede yo realiza que ta entende si Jehova con el maga emocion que ta sinti yo y ta ayuda le conmigo.” Ese maga provision estaba con Jehova puede tambien ayuda contigo para controla con el de tuyu maga emocion hasta queda tu calmao.—Sal. 119:143, 144.

HAY SUPORTA CONTIGO SI JEHOVA

10. Cosa kita posible sinti despues del un grabe suceso?

¹⁰ El dificultad. Despues del un grabe suceso, posible que tiene maga dia que mahina kita na fisical y emocional. Posible sinti kita igual na un baldao atleta quien bien paspas ta corre de antes pero ahora, piang-piang ya ta camina. Baka tan dificil kita hace con el maga trabajo que bien facil lang hace de antes o nuay kita tanto gana hace con el maga cosas que tan enjoy kita de antes. Igual con Elias, baka tan dificil kita levanta y quierre ya lang durmi. (1 Rey 19:5-7) Cosa ya promete si Jehova que hace si ta sinti kita luya?

11. Cosa el otro manera que ta ayuda kanaton si Jehova? (Salmo 94:18)

¹¹ Si cosa ta hace si Jehova. Ya promete le que hay suporta le kanaton. (Le con el Salmo 94:18. c) Igual con el un baldao atleta quien necesita suporta para puede move, posible necesita kita ayuda para esta activo na servicio con Jehova. Na ese maga tiempo, ta asigura kanaton si Jehova: “Iyo, si Jehova el de tuyu Dios, ta agarra con el de tuyu derecha mano, el quien ta habla contigo, ‘No tiene miedo. Hay ayuda yo contigo.’” (Isa. 41:13) Si Rey David ya experiencia con este ayuda. Cuando ya enfrenta le maga probanza y dificultad por causa na de suyu maga enemigo, ya habla le con Jehova: “El de tuyu derecha mano ta suporta conmigo.” (Sal. 18:35) Pero paquemodo si Jehova ta suporta kanaton?

12. Con quien posible usa si Jehova para ayuda kanaton si tan luya kita?

 ¹² Para suporta kanaton, mas mucho ta motiva si Jehova con otro para ayuda kanaton. Por ejemplo, un tiempo cuando yan luya si David, el de suyu amigo que si Jonatan ya visita con ele para hace fuerte y anima con ele. (1 Sam. 23:16, 17) Na igual manera, ya usa si Jehova con Eliseo para dale practical ayuda con Elias. (1 Rey 19:16, 21; 2 Rey 2:2) Ahora, posible usa si Jehova con el diaton familia, amigo, amiga o maga anciano para suporta kanaton. Pero si tan depress kita, posible mas quierre kita que esta lang solo-solo. No quierre kita man junto con otro. Normal lang ese reaccion. Pero, cosa kita hace para ricibi el suporta de Jehova?

13. Cosa kita necesita hace para ricibi el suporta de Jehova? (Mira tambien con el letrato.)

¹³ Si cosa kita necesita hace. Evita con el tendencia que separta con el de tuyu mismo cuerpo. Si separta kita con el diaton mismo cuerpo, posible que principia kita man focus na diaton mismo cuerpo y na maga problema que ta enfrenta kita. Y por causa con ese, baka gendeh kita puede hace buen decision. (Prov. 18:1) Siempre, tiene maga tiempo que necesita kita man solo-solo, especialmente si tiene tragedia ya sucede. Pero, si separta kita con el diaton mismo cuerpo por largo tiempo, posible que kita mismo el ta sangga con el ayuda de Jehova. Poreso maskin pa dificil, acepta con el ayuda del de tuyu familia, amigo, amiga y maga anciano na tiempo de dificultad. Mira kanila como manera de Jehova para suporta contigo.—Prov. 17:17; Isa. 32:1, 2.

HAY DALE CONTIGO COMFORTA SI JEHOVA

14. Cosa maga maka-miedo situacion kita posible enfrenta?

¹⁴ El dificultad. Posible, tiene maga tiempo que hay tene kita miedo. Na Biblia, puede kita le que el maga fiel siervo del Dios ya menciona que yan lingasa sila y ya tiene miedo por causa na diila maga enemigo o na otro pa maga razon. (Sal. 18:4; 55:1, 5) Na igual manera, posible que ta enfrenta kita oposicion na escuela, na trabajo, na diaton familia o na gobierno. Posible ta tiene pa gane kita miedo que baka muri kita por causa na diaton enfermedad. Na ese maga tiempo, baka sinti kita que nuay kita cosa puede hace igual na un diutay bata. Paquemodo kanaton ta ayuda si Jehova?

15. Cosa asiguranza kanaton ta dale el Salmo 94:19?

¹⁵ Si cosa ta hace si Jehova. Ta dale le kanaton comforta y alivio. (Le con el Salmo 94:19. d) Este salmo posible manda kanaton pensa con  el un diutay bata mujer que ta tiene miedo y gendeh ta puede durmi por causa na fuerte trueno. Pero, ya anda con ele el de suyu tata y ya abraza con ele hasta puede le durmi. Maskin ta continua siempre el trueno, gendeh le ta tiene miedo cay ta abraza con ele el de suyu tata. Si ta enfrenta kita maga maka-miedo probanza, el diaton Tata na cielo quierre tambien que abraza kanaton hasta queda kita calmao. Paquemodo kita puede ricibi comforta estaba con Jehova?

16. Cosa kita hace para ricibi el comforta de Jehova? (Mira tambien con el letrato.)

¹⁶ Si cosa kita necesita hace. Regular dale tiempo con Jehova—reza con ele y le con el de suyu Palabra. (Sal. 77:1, 12-14) Como resulta, si enfrenta tu dificultad, con el de tuyu Tata na cielo tu una pidi ayuda. Habla con Jehova si cosa el maga cosas que ta causa contigo miedo y lingasa. Deja con ele que man cuento contigo y dale contigo comforta por medio na Escritura. (Sal. 119:28) El cuanto libro na Biblia puede dale comforta contigo si ta tiene tu miedo. Por ejemplo, puede anima contigo el maga libro de Job, Salmo y Proverbio, y el maga palabra de Jesus na Mateo capitulo 6. Si reza tu con Jehova y le con el de suyu Palabra, hay sinti tu el de suyu comforta.

17. Cosa kita puede asigura?

¹⁷ Puede kita asigura que man junto kanaton si Jehova durante el bien dificil tiempo del diaton vida. Gendeh gayot kita solo. (Sal. 23:4; 94:14) Ya promete si Jehova que ele hay guarda, hace fuerte, suporta y dale comforta kanaton. Acerca con Jehova, el Isaias 26:3 ya habla: “Hay guarda tu con aquellos quien ta confia gayot contigo; hay continua tu kanila dale paz, cay contigo sila ta confia.” Poreso, confia con Jehova y hace el todo cosa tu puede hace para ricibi el de suyu ayuda. Si hace tu se, hay tene tu el fuerza maskin durante el bien dificil tiempo del de tuyu vida.