EL PALABRA que ya usa na original lengguaje para na “carro” na New World Translation puede refiri na diferente clase de vehiculo. (Act. 8:28, 29, 38) Pero ta sale que el vehiculo que ya munta el eunuco mas grande pa compara na carro que ta usa para na guerra o para na carrera. Considera con el cuanto razon si porque kita puede habla con ese.

Un alto oficial el eunuco de Etiopia quien ya viaja largo distancia. “Un alto oficial [le] na corte de Candace, el reina del maga de Etiopia. Ele el encargao de todo el maga riqueza del reina.” (Act. 8:27) El Sudan y el sur parte de Egypt na moderno tiempo amo incluido na lugar de Etiopia de antes. Maskin pa posible ya munta le diferente vehiculo durante el de suyu entero viaje, asigurao tiene le maga bagaje ta lleva. El cuanto vehiculo que ya usa del primer siglo para munta el maga pasajero amo maga carro que tiene techo y cuatro rueda. “Este clase de carro puede carga manada bagaje. Mas comfortable tambien el viaje si ta munta con este y puede este viaja lejos distancia,” asegun na libro Acts—An Exegetical Commentary.

Ta le el eunuco cuando ya atraca con ele si Felipe. El Biblia ta habla que “ya corre [si Felipe] cerca . . . y ya oi con ese oficial ta lee el libro del profeta Isaias.” (Act. 8:30, El Nuevo Testamento) El maga carro que ta usa para na viaje gendeh ta puede corre todas. Cay hinay lang este ta corre, puede le el eunuco mientras ta viaja y mas facil para con Felipe que hace apas con este.

“Ya pidi [el eunuco] con Felipe que embarca . . . y sinta junto con ele.” (Act. 8:31) Parao lang el maga quien ta munta na maga carro que ta usa para na carrera. Pero gendeh ansina na maga carro que ta usa para na viaje. Poreso, tiene bastante lugar onde puede sinta el eunuco y si Felipe.

Harmonia na cosa escribido na Maga Actividad capitulo 8 y na maga referencia que tiene acerca na historia, el diaton maga publicacion ta dale ya mira que el eunuco de Etiopia muntao na un vehiculo que mas grande que con el carro que ta usa para na guerra o carrera.