Igual Ba con Jehova el De Tuyu Tratamiento na Maga Mujer?
TIENE kita el privilegio que sirvi junto na maga fiel mujer. Y ta ama kita y ta aprecia con el cada uno de este maga leal hermana quien ta hace gayot esfuerzo na servicio con Jehova! a Poreso maga hermano, pricura trata kanila na buen manera y con respeto. Pero cay maga imperfecto kita, posible tan dificil kita hace con ese tiene vez. El cuanto hermano ta enfrenta pa otro dificultad.
El cuanto ya engranda na un cultura donde comon para na maga hombre que tene bajo mirada na maga mujer. Por ejemplo, si Hans, un circuit overseer na Bolivia, ya habla que el cuanto hombre ya engranda na cultura donde ya enseña kanila que actua na orgulloso manera. Ese maga hombre ta creé que mas alto sila y gendeh sila ta trata enbuenamente con el maga mujer. Si Shengxian, un anciano na Taiwan, ya habla: “Na lugar onde yo ta queda, manada hombre ta sinti que gendeh debe entramete el maga mujer con el maga hombre. Si el un hombre ya menciona con el opinion del mujer acerca na un cosa, el de suyu maga uban posible hace de menos con ele.” El otro maga hombre ta discrimina con el maga mujer na otro manera. Por ejemplo, tan broma sila maga cosas acerca na maga mujer.
Bueno ya lang, maskin cosa pa el cultura del un hombre, puede le cambia. Puede le quita con el sentido que el maga hombre mas alto que con el maga mujer. (Ef. 4:22-24) Puede le este hace si imita le con el ejemplo de Jehova. Na este articulo, hay discuti kita si paquemodo si Jehova ta trata con el maga mujer, si paquemodo el maga hombre trata con el maga mujer igual con Jehova y si paquemodo el maga anciano puede dale mira respeto na maga hermana.
PAQUEMODO SI JEHOVA TA TRATA CON EL MAGA MUJER?
Si Jehova el de con todo buen ejemplo si paquemodo trata con el maga mujer. Un Tata le que tiene compasion y ta ama le con el de suyu maga anak. (Juan 3:16) Y maga precioso anak de suyu el maga fiel hermana. Considera con el siguiente manera si paquemodo si Jehova ya dale mira que ta ama y ta respeta le con el maga mujer.
Ta trata le kanila na imparcial manera. Ya crea si Jehova con el maga hombre y con el maga mujer Gen. 1:27) Nuay le hace con el maga hombre que mas inteligente o mas ma-abilidad contra na maga mujer ni prefiri con el maga hombre contra na maga mujer. (2 Cron. 19:7) Ya crea le con el maga hombre y mujer que tiene igual abilidad para entende con el maga verdad na Biblia y imita con el de suyu maga bonito calidad. Igual si Jehova ta aprecia con el maga hombre y mujer quien fiel con ele—tiene man sila el esperanza que vivi hasta para cuando na paraiso tierra o sirvi como maga rey y sacerdote na cielo. (2 Ped. 1:1, ftn., NWT) Claro ta dale mira que gendeh ta discrimina si Jehova con el maga mujer.
na de suyu imagen. (Ta oi le kanila. Interesao si Jehova si cosa ta sinti y tan lingasa el maga mujer. Por ejemplo, ya oi le y ya contesta con el maga rezo de Raquel y Ana. (Gen. 30:22; 1 Sam. 1:10, 11, 19, 20) Ya guia tambien le con el maga escritor del Biblia que escribi con el maga istoria del maga hombre quien ya oi con el maga mujer. Por ejemplo, ya obedece si Abraham cuando ya habla si Jehova que oi con el de suyu mujer que si Sara. (Gen. 21:12-14) Ya oi si Rey David con Abigail. Gane, ya sinti le que ya imbia si Jehova con Abigail para man cuento con ele. (1 Sam. 25:32-35) Si Jesus, quien perfecto ya imita con el maga calidad de Jehova, ya oi con el de suyu nana, si Maria. (Juan 2:3-10) Este maga ejemplo ta dale mira que el un manera si paquemodo si Jehova ta dale mira respeto con el maga mujer amo por medio que oi kanila.
Ta dale le kanila maga privilegio. Por ejemplo, ya dale le el responsibilidad con Eva que ayuda cuida con el entero tierra. (Gen. 1:28) Na ese manera, ya dale le mira que ta considera le con Eva que gendeh menos na de suyu marido, si Adan, sino un persona quien puede ayuda con Adan. Ya dale tambien si Jehova el privilegio con el maga profeta que si Debora y Hulda para dale consejo con el de suyu maga siervo, incluido con el un juez y un rey. (Juez 4:4-9; 2 Rey 22:14-20) Ahora, ya dale si Jehova privilegio na maga mujer para cumpli el de suyu voluntad. Ese maga fiel hermana ta sirvi como maga publisher, pioneer y misionario. Ta ayuda sila diseña, construi y mentena maga Kingdom Hall y maga facilidad del organizacion. El cuanto kanila ta sirvi na Bethel; el otro ta sirvi na maga remote translation office. Este maga hermana amo igual na un grupo de maga soldao que ta usa si Jehova para cumpli con el de suyu voluntad. (Sal. 68:11) Claro ta dale mira que gendeh si Jehova ta mira con el maga mujer como mahina o nuay cosa puede hace.
PAQUEMODO TRATA EL MAGA HERMANO CON EL MAGA MUJER IGUAL CON JEHOVA?
Maga hermano, para determina si ta trata ba kita con el maga hermana igual con Jehova, debe kita examina con el diaton pensamiento y maga accion. Para hace con ese, necesita kita ayuda. Igual na un X-ray que ta puede mira si tiene ba problema el literal corazon del un persona, el un buen amigo y el Palabra del Dios puede ayuda kanaton para mira si tiene ba kita maga negativo sentido acerca na maga mujer. Cosa kita puede hace para ricibi ese ayuda?
Pregunta con el un buen amigo. (Prov. 18:17) Puede kita pregunta con el diaton amigo quien bueno, razonable y con quien kita ta confia: “Para contigo, paquemodo yo ta trata con el maga hermana? Puede ba sila habla que ta respeta yo kanila? Tiene ba yo cosa puede hace para mas trata yo kanila enbuenamente?” Si el de tuyu amigo ya menciona cuanto cosas que puede tu hace, no rabia con ele. Sino, queda preparao que hace maga cambio.
Estudia con el Palabra del Dios. El de con todo buen manera para sabe si ta trata ba kita enbuenamente con el maga hermana amo si examina kita con el diaton custumbre y maga accion usando el Palabra del Dios. (Heb. 4:12) Mientras ta estudia kita con el Biblia, puede kita aprende acerca na maga hombre quien ya trata enbuenamente con el maga mujer y con el maga hombre quien nuay se hace. Despues, compara con el diila ejemplo na diaton tratamiento na maga mujer. Omento pa, si considera kita con el manada versiculo na Biblia, puede se ayuda kanaton para gendeh usa con el un texto para suporta con el gendeh justo mirada na maga mujer. Por ejemplo, asegun na 1 Pedro 3:7, debe dale mira honor con el un mujer “cay ele mahinay.” b Quierre decir ba de este que menos le—menos el inteligencia o abilidad—compara na hombre? Gendeh gayot! Gane, si compara kita con el palabra de Pedro na cosa ta habla na Galacia 3:26-29, puede kita mira que ya iscuji si Jehova con el maga mujer y con el maga hombre para rula junto con Jesus na cielo. Si ta estudia kita con el Palabra del Dios y ta pregunta con el un buen amigo acerca na diaton tratamiento na maga mujer, puede kita sabe si paquemodo dale mira el justo respeto na maga hermana.
PAQUEMODO EL MAGA ANCIANO PUEDE DALE MIRA RESPETO CON EL MAGA HERMANA?
El maga hermano na congregacion puede tambien aprende si paquemodo trata con respeto con el maga hermana si sigui sila con el ejemplo del maga amable anciano. Paquemodo el maga anciano puede dale mira que ta respeta sila con el maga hermana? Considera con el cuanto especifico manera.
Ta comenda sila con el maga hermana. Ya dale mira buen ejemplo si apostol Pablo que puede imita el maga anciano. Ya comenda le na publico con el manada hermana por medio na carta que ya escribi le na congregacion na Roma. (Roma 16:12) Ta puede ba tu imagina el alegria de aquel maga hermana cuando ya le con el carta de Pablo na congregacion? Na igual manera, ta comenda el maga anciano con el maga hermana na diila maga bonito calidad y na diila maga esfuerzo para con Jehova. Na este manera, puede sinti el maga hermana que ta aprecia y ta respeta kanila na congregacion. Posible, el maga palabra del maga anciano amo gayot el cosa necesita el maga hermana mientras ta continua sila fiel sirvi con Jehova.—Prov. 15:23.
Comenda
Si ta comenda con el maga hermana, ta asigura el maga anciano que sincero y especifico el cosa sila ta habla. Porque? El un hermana que si Jessica ya habla: “Bonito gayot si el maga hermano ta habla con el hermana ‘Bueno el cosa tu ya hace.’ Pero mas ta aprecia kame si especifico el comendacion que ya dale el maga hermano, igual si ya enseña kame con el diamon maga anak que sinta na miting y esta silencio, o cay ya anda kame incuntra con el un Bible study para puede atende na miting.” Si el maga anciano especifico ta comenda
con el maga hermana, puede se ayuda con el maga hermana para sinti que necesita kanila y precioso sila na congregacion.Ta oi sila con el maga hermana. El maga humilde anciano sabe que gendeh lang sila el tiene maga buen idea. Ese maga anciano ta pidi sugestion na maga hermana y ta oi enbuenamente kanila. Cay ta hace sila se, ta puede sila anima con el maga hermana y sila mismo el ta beneficia. Paquemodo? El un anciano que si Gerardo, quien ta sirvi na Bethel, ya habla: “Ta pidi yo opinion del maga hermana cay ta puede este ayuda conmigo para hace mas enbuenamente con el de mio trabajo. Mas mucho, mas tarda ya sila ta hace con el trabajo compara na maga hermano.” Na congregacion, manada hermana el ta sirvi como maga pioneer poreso manada sila cosa sabe acerca na maga gente alli na teritorio. El un anciano que si Bryan ya habla: “Grande gayot el cosa ta puede ayuda el maga hermana na diaton organizacion. Poreso, aprende na diila maga experiencia!”
Oi
El maga sabio anciano gendeh debe ignora con el maga sugestion del maga hermana. Porque? “El opinion y experiencia del un hermana puede ayuda con el un hermano para entende con el un cosa y tene mas empatia,” ya habla el un anciano que si Edward. (Prov. 1:5) Maskin pa gendeh puede sigui el un anciano con el sugestion que ya dale el un hermana, puede le siempre rindi gracias con el hermana na de suyu sugestion y sabeduria.
Tan train sila con el maga hermana. El maga sabio anciano ta busca maga oportunidad para man train con el maga hermana. Por ejemplo, puede sila enseña con el maga hermana si paquemodo conduci con el miting para na ministerio para preparao sila en caso nuay bautizao hermano el presente. Puede sila man train con el maga hermana si paquemodo usa con el maga tool o maga grande maquina para puede sila ayuda na construida y mentenada de maga facilidad del diaton organizacion. Na Bethel, el maga overseer tan train con el maga hermana para hace con el diferente maga assignment, incluido el maintenance, purchasing, accounting, computer programming y otro pa. Si tan train el maga anciano con el maga hermana, ta dale sila mira que para kanila, tiene potencial el maga hermana y puede kanila confia.
Man train
Manada hermana el ya usa con el training que ya ricibi sila na maga anciano para ayuda con otro. Por ejemplo, el cuanto hermana ya usa con el cosa sila ya aprende na construction para ayuda construi con el casa de aquellos quien ya sale afectao na natural calamidad. El otro maga hermana ya usa con el skill que ya aprende sila na predicacion na publico para man train con el mas manada hermana na este aspeto del ministerio. Cosa ta sinti el maga hermana acerca na maga anciano quien yan train kanila? El un hermana que si Jennifer ya habla: “Cuando ya trabaja yo na construida del un Kingdom Hall, ya dale tiempo para man train conmigo el un overseer. Ya nota le con el trabajo que ya hace yo y ya comenda le conmigo. Ya gusta yo trabaja junto con ele cay ta aprecia y ta confia le conmigo.”
MAGA BENEFICIO SI TA TRATA CON EL MAGA HERMANA COMO FAMILIA
Ta ama kita con el diaton maga fiel hermana igual con Jehova! Poreso, ta trata kita kanila como familia. (1 Tim. 5:1, 2) Ta aprecia kita kanila y tan enjoy kita trabaja junto kanila. Y alegre kita si ta sinti sila que ta ama y ta suporta kita kanila. El un hermana que si Vanessa ya habla: “Ta rindi yo gracias con Jehova cay parte yo del de suyu organizacion que lleno de maga hermano que ta puede gayot anima conmigo.” El un hermana na Taiwan ya habla: “Ta rindi yo gracias cay si Jehova y el de suyu organizacion ta aprecia gayot con el maga mujer y ta respeta con el diamon sentido. Ta hace este fuerte con el de mio fe y ta manda conmigo mas aprecia con el de mio privilegio que queda parte del organizacion de Jehova.”
Bien proud gayot si Jehova si ta mira le con el maga fiel Cristiano hombre que ta pricura dale mira apresacion y respeto con el maga mujer, como cosa le ta hace! (Prov. 27:11) “Na diaton mundo ahora, manada hombre el gendeh ta respeta con el maga mujer,” ya habla el un anciano na Scotland que si Benjamin. “Poreso, si el diaton maga hermana talli na Kingdom Hall, quierre kita manda kanila sinti que ta respeta y ta ama kita kanila.” Ojala hace kita el todo para imita si paquemodo si Jehova ta trata con el diaton maga amable hermana y dale el amor y respeto que conviene sila ricibi.—Roma 12:10.
a Na este articulo, el palabra “hermana” pirmi ta refiri con el maga hermana na fe, gendeh con el hermana del un persona na familia.
b Para na mas detalle acerca con este, mira con el maga articulo “The Value of ‘a Weaker Vessel’” na Mayo 15, 2006, issue del The Watchtower y “Wise Guidance for Married Couples” na Marzo 1, 2005, issue del The Watchtower.