1. Porque el Comemoracion el de con todo importante dia del año? (Lucas 22:19, 20)

 PARA na maga siervo de Jehova, el Comemoracion del muerte del Cristo amo el de con todo importante dia del año. Este el solamente ocasion que especifico ya manda si Jesus con el de suyu maga siguidores que comemora. (Le con el Lucas 22:19, 20.) Tiene manada razon si porque ta espera gayot kita con el tiempo de Comemoracion. Considera kita con el cuanto de ese.

2. Cosa el cuanto razon si porque kita ta espera con el tiempo del Comemoracion?

² El Comemoracion ta ayuda kanaton para medita si porque valoroso el rescate. Ta hace tambien este acorda kanaton si paquemodo kita dale mira apresacion na sacrificio de Jesus. (2 Cor. 5:14, 15) Ta dale tambien este oportunidad kanaton para “puede kita dale animo con uno y otro” como maga hermano y hermana. (Roma 1:12, El Nuevo Testamento) Cada año, manada maga gendeh activo el ta atende. Gane, el cuanto ya bira otravez con Jehova por causa na amable tratamiento que ya experiencia sila alla. Y manada maga persona el ya queda interesao na verdad por causa na cosa sila ya mira y ya oi. Poreso, bien especial gayot para kanaton el Comemoracion!

3. Paquemodo el Comemoracion ta hace unido con el maga hermano y hermana na entero mundo? (Mira tambien con el letrato.)

³ Pensa tambien si paquemodo el Comemoracion ta hace unido con el maga hermano y hermana na entero mundo. Tan junto-junto el maga Testigo de Jehova mientras hinay-hinay ta abaja el sol na entero mundo. Todo kita ta puede oi un discurso que ta hace claro con el importancia del rescate. Ta canta kita dos  cancion de alabanza, ta hace pasa con el maga emblema y con todo corazon ta habla “amen” na cuatro rezo. Adentro del maga 24 hora, el todo congregacion hay hace igual ansina. Ta puede ba tu imagina si paquemodo de alegre si Jehova y si Jesus si ta mira sila kanaton que ta honra kanila na ansina manera?

4. Cosa kita hay discuti na este articulo?

⁴ Na este articulo, hay considera kita con este maga pregunta: Paquemodo kita puede prepara con el diaton corazon para na Comemoracion? Paquemodo kita puede ayuda con otro para beneficia con este? Y paquemodo kita puede ayuda con el maga gendeh activo? El contestacion na este maga pregunta hay ayuda kanaton para queda preparao na este sagrao ocasion.

PAQUEMODO KITA PREPARA DIATON CORAZON PARA NA COMEMORACION?

5. (a) Porque debe kita medita con el importancia del rescate? (Salmo 49:7, 8) (b) Cosa tu ya aprende na video Porque Ya Muri si Jesus?

⁵ El uno na maga de con todo importante manera que puede kita prepara diaton corazon para na Comemoracion amo si medita kita con el importancia del rescate de Jesucristo. Si kita-kita lang, nuay kita cosa puede hace para salva con el diaton mismo cuerpo desde na pecado y muerte. (Le con el Salmo 49:7, 8 a; mira tambien con el video Porque Ya Muri si Jesus?) b Poreso maskin pa dificil para con Jehova y con el de suyu Anak, ya hace Le manera para dale si Jesus el de suyu vida para kanaton. (Roma 6:23) Si mas medita kita con el cosa ya sacrificia si Jehova y si Jesus para kanaton, mas aprecia kita con el rescate. Considera kita con el cuanto sacrificio que preparao hace si Jehova y si Jesus para kanaton. Pero sabe kita una si cosa quierre decir del rescate y si porque si Jesus el debe dale con ese.

6. Cosa quierre decir del rescate y porque si Jesus el debe dale con ese?

⁶ El rescate amo el valor que necesita paga para puede otravez saca con el un cosa. Perfecto el primer hombre, si Adan, cuando ya crea con ele. Cuando ya culpa le, ya hace le perde el oportunidad para obtene vida hasta para cuando—gendeh lang de suyu sino pati del todo de suyu maga anak. Para hace bira con el cosa ya hace perde si Adan, ya ofrece si Jesus el de suyu perfecto vida como sacrificio. Cuando taqui si Jesus na tierra, “noay [le] culpa y noay quien [ya] puede oi imbusterias na su maga labio.” (1 Ped. 2:22) Na tiempo del de suyu muerte, perfecto si Jesus. Poreso cuando ya sacrificia le con el de suyu vida, ya puede paga si Jesus con el valor del vida que ya hace perde si Adan.—1 Cor. 15:45; 1 Tim. 2:6.

7. Cosa el cuanto probanza que ya enfrenta si Jesus cuando taqui na tierra?

⁷ Ya esta obediente si Jesus na de suyu Tata na cielo maskin pa ya enfrenta le manada probanza aqui na tierra. Como un bata, necesita somete si Jesus na autoridad del de suyu imperfecto mayores maskin pa perfecto le. (Luc. 2:51) Como un joven, necesita le resisti con el pressure del otro que desobedece con el de suyu mayores o con Jehova. Y como un adulto, necesita le resisti con el maga tentacion de Satanas Diablo, quien directa pa gane ya habla con ele que no esta leal con Dios. (Mat. 4:1-11) Determinao si Satanas que causa con Jesus para culpa y como resulta, gendeh le puede paga con el rescate.

8. Cosa pa otro probanza ya enfrenta si Jesus?

⁸ Durante el de suyu ministerio aqui na tierra, ya enfrenta pa si Jesus otro maga probanza. Ya persigui y ya amenaza con ele. (Luc. 4:28, 29; 13:31) Necesita le aguanta na maga imperfeccion  del de suyu maga siguidores. (Mar. 9:33, 34) Ya hace con ele pasipala y ya gangguia con ele. Despues, ya mata con ele na bien duele y maka-huya manera. (Heb. 12:1-3) Necesita le aguanta con el ultimo parte del de suyu probanza que nuay el proteccion de Jehova. c—Mat. 27:46.

9. Cosa kita ta sinti acerca na sacrificio de Jesus? (1 Pedro 1:8)

⁹ Claro, grande gayot el cosa ya sacrificia si Jesus. Gendeh ba ta queda mas hondo el diaton amor para con Jesus si ta medita kita con el grande sacrificio que ya hace le para kanaton?—Le con el 1 Pedro 1:8.

10. Cosa ya sacrificia si Jehova para puede dale con el rescate?

¹⁰ Quetal si Jehova? Cosa le ya sacrificia para puede paga si Jesus con el rescate? Si Jehova y si Jesus el tiene el de con todo cerca relacion como man tata’y anak. (Prov. 8:30) Poreso, pensa si paquemodo de afectao si Jehova mientras ta mira le con Jesus que ta aguanta con el manada dificultad aqui na tierra. Sin duda, duele gayot para con Jehova que mira con el de suyu Anak que ta sufri.

11. Dale un ejemplo que ta dale mira si cosa ya sinti si Jehova cuando ya muri si Jesus.

¹¹ El maskin quien mayores quien ya muri el anak sabe gayot si paquemodo se de duele. Tiene kita fuerte fe na resureccion pero duele siempre si ya muri el un persona con quien kita ta ama. Este ejemplo puede ayuda kanaton para entende si cosa ya sinti si Jehova cuando ya mira le que ya sufri y ya muri el de suyu Anak del 33 C.E. d—Mat. 3:17.

12. Cosa kita puede hace durante el maga semana antes el Comemoracion?

¹² Principia ahora hasta na Comemoracion, pruba estudia mas acerca na rescate na de tuyu personal estudiada o De Familia Adoranza. Usa con el Research Guide for Jehovah’s Witnesses o otro pa maga publicacion para sabe mas acerca na rescate. e Mas pa, sigui con el schedule del lehida de Biblia para na Comemoracion que puede mira na Vida y Ministerio de Cristiano—Workbook de Miting. Na dia del Comemoracion, no ulvida mira con el especial programa de Morning Worship. Si prepara kita con el diaton mismo corazon para na Comemoracion, mas puede kita ayuda con otro para beneficia tambien con este.—Esd. 7:10.

AYUDA CON OTRO PARA BENEFICIA

13. Cosa kita necesita una hace para puede ayuda con otro para beneficia na Comemoracion?

¹³ Paquemodo kita puede ayuda con otro para beneficia na Comemoracion? Siempre, el  una que necesita kita hace amo que invita kanila. Puera que invita con el maga gente na ministerio, puede kita hace lista del maga persona con quien kita quierre invita. Incluido alli el diaton maga pariente, uban na trabajo, na escuela y otro pa. Maskin poco lang el diaton printed copia de invitacion, puede kita man share el link del electronic copia de este. Baka espanta kita si cuanto decidi atende.—Ecl. 11:6.

14. Ilustra con el efecto del personal invitacion.

¹⁴ No hace de menos con el diaton maga personal invitacion. El un hermana que gendeh Testigo el marido ya espanta cuando ya habla el de suyu marido con ele que sigui este na Comemoracion. Porque le ya espanta? Cay de antes, manada beses ya le ta convida con el de suyu marido que atende pero gendeh le ta sigui. Porque le ya pensa atende na este tiempo? “Ya dale conmigo invitacion,” ya habla le y ya explica que ya invita con ele el un anciano que conoce le. Ya atende el marido na Comemoracion na aquel año y por manada año despues quel.

15. Cosa kita debe acorda si ta invita con el maga gente na Comemoracion?

¹⁵ Acorda que posible tiene maga pregunta aquellos con quien kita ya invita—especialmente si nuay pa sila atende na diaton maga miting. Bueno si pensa kita si cosa sila posible pregunta y prepara para contesta con ese. (Col. 4:6) Por ejemplo, posible pregunta el cuanto: ‘Cosa sucede alla?’ ‘Paquemodo quel de tarda?’ ‘Cosa ropa debe usa?’ ‘Tiene ba entrance fee?’ ‘Hay colecta ba sen alla?’ Si ta invita con otro na Comemoracion, puede kita pregunta, “Tiene ba tu pregunta?” y despues, contesta con ese. Puede tambien kita usa con el video Acorda con el Muerte de Jesus y Cosa Ta Hace na Kingdom Hall? para ayuda con ele entende si paquemodo ta hace con el diaton maga miting. Y tiene maga bonito punto na leccion 28 del libro Queda Alegre Hasta Para Cuando! que puede kita discuti.

16. Cosa pa otro maga pregunta posible tiene aquellos atende na Comemoracion?

¹⁶ Despues atende na Comemoracion, posible tiene pa otro maga pregunta aquellos maga interesao persona. Posible sila pregunta si porque  nuay o poco lang el quien ya come y ya toma con el maga emblema. Posible tambien sila pregunta si paquemodo de pirmi kita ta hace con el Comemoracion. Y baka quierre sila sabe si ansina ba tambien ta hace con el todo miting del maga Testigo de Jehova. Maskin pa manada de este maga punto hay discuti durante el discurso del Comemoracion, posible necesita mas explanacion aquellos nuevo ya atende. El articulo “Porque Otro el Manera del Maga Testigo de Jehova si Ta Comemora con el Cena del Señor?” na jw.org puede ayuda kanaton para contesta con el cuanto del diila maga pregunta. Quierre kita hace el todo que puede kita hace—antes, durante y despues del Comemoracion—para ayuda con aquellos “quien tiene justo condicion de corazon” para beneficia na este ocasion.—Act. 13:48, NWT.

AYUDA CON EL MAGA GENDEH ACTIVO

17. Paquemodo el maga anciano puede ayuda con aquellos maga gendeh activo? (Ezequiel 34:12, 16)

¹⁷ Durante el tiempo del Comemoracion, paquemodo puede ayuda el maga anciano con aquellos maga gendeh activo? Dale kanila amable atencion. (Le con el Ezequiel 34:12, f 16. g) Antes el Comemoracion, hace manera que puede tu man cuento con el mas manada kanila que posible. Asigura kanila que ta ama tu kanila y quierre tu ayuda kanila. Invita kanila que atende na Comemoracion. Y si atende sila, man welcome kanila na amable manera. Despues del Comemoracion, continua visita o man contact con este maga hermano y hermana, y dale espiritual ayuda que necesita sila para puede bira con Jehova.—1 Ped. 2:25.

18. Paquemodo kita todo puede ayuda con el maga gendeh activo? (Roma 12:10)

¹⁸ El todo na congregacion puede ayuda con el maga gendeh activo quien atende na  Comemoracion. Paquemodo? Si dale kita kanila mira amor, pagka-bueno y respeto. (Le con el Roma 12:10.) Acorda que este maga carnero posible tan alang-alang atende otravez na miting. Baka ta tiene sila miedo que gendeh kanila man welcome. h Poreso, evita maga pregunta que puede hace huya kanila o habla maga cosas que puede hace sinti duele kanila. (1 Tes. 5:11) Acorda que maga hermano y hermana sila diaton. Alegre kita que man junto kanila otravez na adoranza con Jehova!—Sal. 119:176; Act. 20:35.

19. Cosa el maga beneficio si acorda kita con el muerte de Jesus?

¹⁹ Ta rindi gayot kita gracias cay ya manda kanaton si Jesus que comemora con el de suyu muerte cada año. Y sabe kita si porque se importante. Si ta atende kita na Comemoracion, ta beneficia kita y el otro na manada manera. (Isa. 48:17, 18) Mas ta queda hondo el diaton amor para con Jehova y con Jesus. Ta dale kita mira si paquemodo kita ta aprecia con el cosa sila ya hace para kanaton. Mas ta queda kita cerca na diaton maga hermano y hermana. Y puede tambien kita ayuda con otro para sabe si paquemodo sila puede beneficia con el maga bendicion que ya hace posible el rescate. Ojala hace kita el todo para queda preparao para na Comemoracion na este año—el de con todo importante dia del año!