ARTICULO 4
CANCION 30 My Father, My God and Friend
Ta Ama Gayot Contigo si Jehova
“Si Jehova bien cariñoso.”—SANT. 5:11, NWT.
SI COSA PUEDE APRENDE
Si paquemodo el amor de Jehova ta hace kanaton mas cerca con ele y ta manda sinti kanaton que protegido kita, refrescao y que ta cuida le kanaton.
1. Cosa tu ta imagina si ta pensa acerca con Jehova?
YA PRUBA ya ba tu imagina con Jehova? Si tan cuento tu con ele na rezo, cosa tu ta puede pensa? Maskin pa gendeh kita ta puede mira con Jehova, manada cosa ya menciona el Biblia acerca con ele. Ya llama con Jehova como “un sol y defensa” y “un fuego.” (Sal. 84:11; Heb. 12:29) Na un vision, ya menciona que si Jehova amo igual na un safiro, un brillante metal y arcoiris. (Eze. 1:26-28) Posible, man bilib kita con este cuanto cosas que ya menciona acerca con Jehova o posible tene pa gane kita miedo.
2. Cosa posible el cuanto razon si porque dificil para con otro que queda cerca con Jehova?
2 Cay gendeh kita ta puede mira con Jehova, posible dificil para kanaton para creé que ta ama le kanaton. El cuanto ta pensa que gendeh gayot kanila puede ama si Jehova por causa na cosa sila ya experiencia de antes. Baka nuay sila sinti amor na diila tata. Ta entende si Jehova ansina clase de maga sentido y si paquemodo se ta afecta kanaton. Para ayuda kanaton, ya revela le con el de suyu maga bonito calidad na de suyu Palabra.
3. Porque kita debe considera acerca na amor de Jehova?
3 Si ta pensa kita acerca con Jehova, ta pensa kita con el palabra amor. El Biblia ta habla que “el Dios amor.” (1 Juan 4:8) El todo cosa le ta hace amo por causa na amor. Bien fuerte el amor del Dios poreso ta extende le con ese maskin con aquellos quien gendeh ta ama con ele. (Mat. 5:44, 45) Na este articulo, hay considera kita acerca con Jehova y de suyu amor. Si aprende kita mas acerca na diaton Dios, mas hay ama kita con ele.
TA AMA GAYOT KANATON SI JEHOVA
4. Cosa tu ta sinti acerca na amor de Jehova? (Mira tambien con el letrato.)
4 “Si Jehova bien cariñoso.” (Sant. 5:11, NWT) Na Biblia, ya compara le con el de suyu mismo cuerpo na un cariñosa nana. (Isa. 66:12, 13) Imagina con el un nana quien amable ta cuida con el de suyu diutay anak. Ta pone le con este na de suyu sabacan y tan cuento na hinay y calmao voz. Si ta llura el bata o ta sinti duele, ta dale el nana si cosa este necesita. Na igual manera, si dolorido kita, puede kita confia na amor de Jehova. El salmista ya escribi: “Cuando bien malingasa yo, ya dale uste conmigo comforta y alivio.”—Sal. 94:19.
“Igual na un nana que ta dale comforta con el de suyu anak, hay continua yo dale comforta con ustedes” (Mira con el parapo 4)
5. Cosa el efecto contigo del amor leal de Jehova?
5 Leal si Jehova. (Sal. 103:8) Gendeh le abandona kanaton si ya puede kita hace gendeh justo cosa. Manada beses ya hace triste el nacion de Israel con Jehova; pero, ya asigura le con aquellos quien ya arripinti que ta ama le siempre kanila. Ele ya habla: “Ya queda tu precioso na de mio ojos, ya honra contigo y ya ama yo contigo.” (Isa. 43:4, 5) Nuay cambia el amor del Dios. Puede kita pirmi confia con ese. Maskin pa ya hace kita maga serioso kamali, gendeh si Jehova abandona kanaton. Si arripinti kita y bira con Jehova, puede kita mira que ta ama le siempre kanaton. Ya promete le que “ele hay perdona completamente” kanaton. (Isa. 55:7) El Biblia ya menciona que por causa na de suyu perdon, puede kita experiencia el “Tiempo de Consuelo” o alivio que ta sale con Jehova.—Act. 3:19, 20.
6. Cosa ta enseña kanaton el Zacarias 2:8 acerca con Jehova?
6 Le con el Zacarias 2:8. a Cay ta ama le kanaton, ta entende si Jehova con el diaton maga sentido y bien quierre le que protege kanaton. Ta sinti le duele si ta sinti kita duele. Poreso, puede kita reza: “Guarda conmigo igual como con el pupila del de tuyu ojos.” (Sal. 17:8) El ojos amo un sensitivo y importante parte del diaton cuerpo. Poreso cuando ya compara si Jehova kanaton na pupila del de suyu ojos, dol ta habla le, ‘Si quien man ta hace sinti duele con ustedes, de mio maga siervo, ta hace tambien sinti duele con el cosa que precioso conmigo.’
7. Porque kita debe queda mas convincido na amor de Jehova?
7 Quierre si Jehova que queda kita convincido que ta ama le con el cada uno kanaton. Pero sabe le que por causa na diaton maga experiencia de antes, posible kita pensa si puede ba gayot le ama kanaton. O posible ta experiencia kita maga situacion ahora que ta causa kanaton para man duda na amor de Jehova. Cosa puede ayuda kanaton para queda mas convincido que ta ama le kanaton? Si aprende kita si paquemodo si Jehova ya dale mira amor con Jesus, con el maga iscujido y kanaton todo.
SI PAQUEMODO SI JEHOVA TA DALE MIRA EL DE SUYU AMOR
8. Porque convincido si Jesus que ta ama con ele el de suyu Tata?
8 Por billones de año yan junto si Jehova y si Jesus. Por causa con ese, ya queda sila bien close con uno y otro. Sila el pinaka ya dura ya junto. Claro ya dale mira si Jehova el de suyu amor con Jesus, como cosa kita puede le na Mateo 17:5. Puede lang era habla si Jehova, “Bien alegre yo con Ele.” Pero quierre le manda sabe kanaton que ta ama gayot le con Jesus. Poreso, ya llama le con ele “el dimio Anak con quien yo ta ama gayot.” Proud gayot si Jehova con Jesus, especialmente na cosa este preparao hace. (Ef. 1:7) Nuay gayot man duda si Jesus acerca na cosa ta sinti el de suyu Tata para con ele. Asigurao gayot le que ta ama con ele si Jehova. Poreso, manada beses le ya habla que ta ama con ele el de suyu Tata.—Juan 3:35; 10:17; 17:24.
9. Cosa expresion ya usa para refiri na amor de Jehova para na maga iscujido? Explica. (Roma 5:5)
9 Ya dale tambien mira si Jehova el de suyu amor para na maga iscujido. (Le con el Roma 5:5.) Nota con el expresion “ya bacia el disuyo amor.” El un referencia ya compara con ese igual como agua na rio que ta corre para kanaton. Este ilustracion ta dale gayot mira si paquemodo de grande el amor de Jehova para na maga iscujido. El maga iscujido sabe que “el Dios . . . ta ama” kanila. (Jud. 1) Puede kita mira si cosa el diila sentido na cosa ya escribi si apostol Juan: “Mira ustedes si paquemodo de grande el amor del Tata canaton, para llama Le canaton maga anak del Dios.” (1 Juan 3:1) Con el maga iscujido lang ba ta ama si Jehova? Gendeh. Ya dale prueba si Jehova que ta ama le kanaton todo.
10. Cosa el de con todo grande evidencia que ta ama si Jehova contigo?
10 Cosa el de con todo grande evidencia del amor de Jehova? El rescate—el de con todo grande expresion de amor na universo! (Juan 3:16; Roma 5:8) Ya dale si Jehova con el de suyu precioso Anak y ya permiti con ele que muri para na todo gente para puede perdona con el diaton maga pecado y puede kita queda De Suyu amigo. (1 Juan 4:10) Si mas ta medita kita con el sacrificio que ya hace si Jehova y si Jesus, mas puede kita entende si paquemodo de grande el diila amor para con el cada uno kanaton. (Gal. 2:20) Nuay dale con el rescate por causa lang na justicia de Jehova. Ya dale con este por causa na amor. Ya dale prueba si Jehova que ta ama le kanaton cuando ya sacrificia le con el de con todo precioso persona con ele—si Jesus. Ya permiti si Jehova que sufri y muri el de suyu Anak para kanaton.
11. Cosa kita puede aprende na Jeremias 31:3?
11 Como cosa kita ya puede mira, gendeh si Jehova ta esconde con el de suyu sentido. Sino, ta dale le mira el de suyu amor. (Le con el Jeremias 31:3. b) Ya hace si Jehova kanaton cerca con ele cay ta ama le kanaton. (Compara na Deuteronomio 7:7, 8.) Nuay maskin cosa y maskin quien el puede separta kanaton na ese amor. (Roma 8:38, 39) Cosa tu ta sinti acerca na ese amor? Le con el Salmo 23 y mira si cosa el efecto del amor y cuidada de Jehova con David y si cosa el efecto de este para kanaton todo.
COSA TU TA SINTI ACERCA NA AMOR DE JEHOVA?
12. Cosa el contenido del Salmo 23?
12 Le con el Salmo 23:1-6. c El Salmo 23 amo un cancion que ta dale mira el confianza de David na amor y cuidada de Jehova. Ya menciona le con el amistad que tiene le na de suyu Pastor que si Jehova. Ya sinti protegido si David cay ya permiti le que guia con ele si Jehova y completamente le ta confia con Ele. Y sabe si David que hay dale con ele mira amor si Jehova na de suyu entero vida. Porque le bien asigurao con ese?
13. Porque asigurao si David que cuida con ele si Jehova?
13 “Nuay yo cosa hay falta.” Ya sinti si David que ta cuida gayot con ele cay pirmi con ele ta dale si Jehova el cosa le necesita. Tiene si David el amistad y favor del Dios. Poreso, asigurao gayot le que maskin cosa pa hay sucede na futuro, hay continua dale si Jehova el de suyu maga necesidad. El confianza de David na amor de Jehova mas grande pa contra na de suyu maga lingasa y ya hace se con ele deverasan alegre y contento.—Sal. 16:11.
14. Na cosa manera posible dale mira si Jehova el de suyu amable cuidada kanaton?
14 Ta cuida kanaton si Jehova, especialmente si tiene ta sucede maga mal cosas na diaton vida. Si Claire, d quien ta sirvi na Bethel por mas de 20 año, no sabe si paquemodo ayuda con el de suyu familia cuando ya enfrenta sila maga sunod-sunod problema. Yan stroke el de suyu tata, yan disfellow el uno del de suyu maga hermana y ya tiene problema na financial el diila familia poreso ya perde el diila negocio y casa. Paquemodo si Jehova ya dale mira el de suyu amable cuidada kanila? Si Claire ya habla: “Ya asigura si Jehova que tiene pirmi el de mio familia el cosa sila necesita cada dia. Pirmi kanamon ta dale si Jehova mas pa na cosa kame ta imagina! Pirmi yo ta pensa con el maga situacion cuando ya experiencia yo el amor de Jehova y gendeh gayot yo con ese ulvida. Este maga experiencia ta ayuda conmigo para continua maskin pa ta experiencia maga probanza.”
15. Porque ya sinti refrescao si David? (Mira tambien con el letrato.)
15 “Ta refresca le conmigo.” Tiene maga tiempo, yan lingasa si David por causa na todo maga problema y dificultad que ta enfrenta le. (Sal. 18:4-6) Pero, ya queda le refrescao por causa na amor y cuidada de Jehova. Ya guia si Jehova con el de suyu amigo na “mazacate lugar” y na “maga lugar de descanzo que donde abundancia el agua.” Como resulta, ya tiene otravez fuerza si David y ya puede le continua.—Sal. 18:28-32.
Maskin pa na bien dificil situacion si David, ya queda le refrescao por causa na amor y cuidada de Jehova (Mira con el parapo 15)
16. Paquemodo ya refresca contigo el amor de Jehova?
16 Ansina tambien ahora. Por causa na amor leal de Jehova, ya puede kita continua maskin pa ya enfrenta maga dificultad y sufrimiento na vida. (Lam. 3:22; Col. 1:11) Considera con el ejemplo de Rachel. Bien triste gayot le cuando el de suyu marido ya deja con ele y con Jehova durante el COVID-19 pandemic. Paquemodo si Jehova ya ayuda con ele? Ele ya habla: “Ya asigura si Jehova que puede yo sinti que ta ama conmigo. Ya usa si Jehova con el maga hermano y hermana para man junto conmigo, lleva conmigo maga comida, imbia maga mensaje y texto, man smile conmigo y pirmi hace acorda que si Jehova ta cuida conmigo. Pirmi yo ta rindi gracias con Jehova cay ya dale le conmigo un amable familia.”
17. Porque nuay tiene miedo si David?
17 “Gendeh yo ta tiene miedo, cay junto tu conmigo.” Mas mucho, na peligro el vida de David y manada le maga poderoso enemigo. Pero, el amor de Jehova ya manda sinti con ele que protegido le. Ya puede sinti si David que pirmi si Jehova junto con ele y ya dale se con ele asiguranza. Poreso, ya puede le canta: “Ya libra [si Jehova] conmigo na maga miedo que tiene yo.” (Sal. 34:4) Manada razon para tene miedo si David pero ya puede le quita con ese cay sabe le que ta ama con ele si Jehova.
18. Cay sabe tu que ta ama contigo si Jehova, paquemodo se hace fuerte contigo si ta tiene tu miedo?
18 Si ta enfrenta maga maka-miedo situacion, na cosa manera ta queda kita fuerte cay asigurao kita que ta ama kanaton si Jehova? El un pioneer que si Susi ya habla si cosa sila ya sinti del de suyu marido cuando yan suicide el diila anak: “Si tiene tragedia ta sucede, puede gayot este afecta kanaton y puede kita sinti que nuay kita cosa puede hace. Pero el amor de Jehova ya manda kanamon sinti que protegido kame.” Si Rachel que ya menciona enante ya acorda: “Un noche cuando bien dolorido yo, malingasa y ta tiene miedo, ya llura yo mientras suena ta reza con Jehova. Despues de ese, ya sinti yo que ya dale le conmigo alivio y ya hace le conmigo calmao, igual na cosa ta hace el un nana na de suyu baby. Y ya puede yo durmi. Gendeh gayot yo ulvida con ese tiempo.” El un anciano que si Tasos yan preso por cuatro año cay nuay le conforma queda soldao. Paquemodo le ya sinti el amor y cuidada de Jehova? Ele ya habla: “Ya dale si Jehova conmigo mas pa na cosa yo necesita. Ya hace este fuerte con el de mio confianza que puede yo confia con ele completamente. Y por medio na de suyu sagrao espiritu, ya dale conmigo si Jehova alegria maskin pa talli yo na dificil situacion. Ya puede yo mira que si mas ta confia yo con Jehova, mas ta puede yo sinti que ta ama gayot le conmigo. Poreso, ya principia yo sirvi como un regular pioneer maskin pa preso yo.”
QUEDA CERCA NA DE TUYU CARIÑOSO DIOS
19. (a) Cay sabe kita que ta ama kanaton el Dios, paquemodo se afecta con el diaton rezo? (b) Cosa maga palabra acerca na amor de Jehova el bien quierre tu? (Mira con el cajon “ Maga Palabra que Ta Asigura Kanaton que Ta Ama Kanaton si Jehova.”)
19 El maga experiencia que ya discuti kita ta dale prueba que junto kanaton si Jehova, “el Dios [de] amor.” (2 Cor. 13:11) Interesao le con el cada uno kanaton. Convincido kita que “palibut [kanaton] el De Suyu amor leal.” (Sal. 32:10) Si mas ta medita kita si paquemodo le ya dale mira el de suyu amor kanaton, mas ta queda le real kanaton y ta queda kita mas cerca con ele. Puede kita atraca con ele na rezo y habla con ele si paquemodo de necesita kita con el de suyu amor. Puede kita habla el diaton maga lingasa con ele y confia que ta entende le kanaton y bien quierre le ayuda kanaton.—Sal. 145:18, 19.
20. Na cosa manera el amor de Jehova mas ta hace kanaton cerca con ele?
20 Igual si paquemodo bien quierre kita que sinti con el calor si frio el tiempo, bien quierre tambien kita sinti con el amor de Jehova. Amable y cariñoso gayot si Jehova. Poreso, puede tu queda alegre cay ta ama le contigo. Ojala todo kita puede dale mira el diaton amor con ele y habla: “Ta ama yo con Jehova”!—Sal. 116:1.
COSA DE TUYU CONTESTACION?
-
Cosa tu puede habla acerca na amor de Jehova?
-
Porque tu puede asigura que ta ama gayot contigo si Jehova?
-
Cosa el efecto del amor de Jehova contigo?
CANCION 108 God’s Loyal Love
a Zacarias 2:8: “Cay este el cosa ya habla si Jehova de maga soldao, con quien despues glorifica, ya imbia conmigo na maga nacion quien ta ataca con ustedes: ‘Si quien ta mete con ustedes, ta mete con el pupila del de mio ojos.”
b Jeremias 31:3: “Estaba na lejos ya aparece conmigo si Jehova y ya habla: ‘Hasta para cuando el de mio amor para contigo. Poreso, iyo ya hala contigo por medio na de mio amor leal.’”
c Salmo 23:1-6: “Si Jehova el de mio Pastor.Nuay yo cosa hay falta. 2 Ta manda le conmigo acusta na mazacate lugar; ta guia le conmigo na maga lugar de descanzo que donde abundancia el agua. 3 Ta refresca le conmigo. Ta guia le conmigo na maga camino de pagka-recto por causa na de suyu nombre. 4 Maskin pa camina yo na bien iscuru valle, gendeh yo ta tiene miedo, cay junto tu conmigo; el de tuyu baston ta dale conmigo seguridad. 5 Ya prepara tu un mesa para conmigo adelante del de mio maga enemigo. Ya vacia tu aceite na de mio cabeza; bien lleno el de mio copa. 6 El de tuyu pagka-bueno y amor leal hay esta junto conmigo na de mio entero vida, y hay queda yo na casa de Jehova na de mio entero vida.”
d Ya cambia con el cuanto nombre.