1. Paquemodo kita puede beneficia si ta atende kita na Comemoracion del muerte del Cristo cada año?

 ASIGURAO uyun tu que un precioso regalo gayot el rescate. (2 Cor. 9:15) Cay ya sacrificia si Jesus con el de suyu vida, puede kita tene un cerca relacion con Dios Jehova. Ya tiene tambien kita el esperanza de vida hasta para cuando. Poreso, justo lang que dale kita mira apresacion para con el rescate y para con Jehova quien ya dale con ese regalo por causa na amor! (Roma 5:8) Para puede kita continua aprecia con el rescate, ya manda kanaton si Jesus que atende con el Comemoracion del de suyu muerte cada año.—Luc. 22:19, 20.

2. Cosa kita hay discuti na este articulo?

² Na este año, hay hace con el Comemoracion na Sabado, Abril 12, 2025. Asigurao, todo kita ta plaña atende con ese ocasion. Durante el maga semana antes y despues del Comemoracion, hay beneficia gayot kita si medita kita si cosa ya hace si Jehova y el de suyu Anak para kanaton. Na este articulo, hay discuti kita si cosa el rescate ta enseña kanaton acerca con Jehova y con el de suyu Anak. Na sunod articulo, hay aprende tambien kita si paquemodo kita beneficia na rescate y si paquemodo kita dale mira apresacion con ese.

SI COSA EL RESCATE TA ENSEÑA KANATON ACERCA CON JEHOVA

3. Paquemodo el muerte del un perfecto persona puede rescata con el millones de maga gente? (Mira tambien con el letrato.)

³ El rescate ta enseña kanaton acerca na justicia de Jehova. (Deut. 32:4) Cuando ya desobedece si Adan con Dios, ya hereda  kita con el pecado y muerte. (Roma 5:12) Para queda kita librao con ese, ya imbia si Jehova con Jesus para rescata kanaton. Pero, paquemodo el muerte del un persona puede rescata con el millones de maga gente? Si apostol Pablo ya explica: “Por causa del desobediencia de aquel primer gente [si Adan] mucho gente ya queda pecador, pero por causa del obediencia de aquel otro gente [si Jesus], Dios ay puede considera mucho gente como . . . nuay sila pecado.” (Roma 5:19, El Nuevo Testamento; 1 Tim. 2:6) Quierre decir, ya queda kita esclavo na pecado y muerte por causa lang na desobediencia del un perfecto gente. Poreso, puede kita queda librao na pecado y muerte por causa tambien na obediencia del un perfecto gente.

4. Porque nuay lang basta permiti si Jehova que vivi hasta para cuando el maga obediente descendiente de Adan?

⁴ Necesita ba gayot si Jesus muri para puede salva kanaton? Gendeh ba puede permiti ya lang si Jehova con el maga obediente descendiente de Adan que vivi hasta para cuando? Posible puede kita pensa que bueno y razonable solucion se. Pero gendeh se ta reflecta con el perfecto justicia de Jehova. Pirmi le ta hace si cosa el justo poreso nuay gayot le ignora con el desobediencia que ya hace si Adan.

5. Porque kita puede asigura que pirmi si Jehova hace si cosa el justo?

⁵ Pero paquemodo si nuay si Jehova dale el rescate y ya permiti le que vivi hasta para cuando el maga imperfecto descendiente de Adan? Si ansina, posible pensa el maga gente que baka gendeh tambien le dale mira justicia na otro maga cosas. Por ejemplo, baka man duda sila si cumpli ba gayot si Jehova con el todo de suyu promesa. Pero, gendeh kita debe man lingasa cay nunca se sucede. Ciendo ya hace si Jehova si cosa el justo maskin pa necesita le sacrificia con el de suyu precioso Anak, puede kita asigura que pirmi le hace si cosa el justo.

6. Na cosa manera el rescate ta dale mira el amor de Jehova para kanaton? (1 San Juan 4:9, 10)

⁶ Puera con el justicia, tiene pa otro calidad si Jehova que ya motiva con ele para dale el rescate—el amor. (Juan 3:16; le con el 1 San Juan 4:9, 10.) El rescate ta revela que si Jehova gendeh lang quierre que obtene kita el vida hasta para cuando sino quierre tambien le que queda kita parte del de suyu familia. Considera este: Despues comete pecado si Adan, gendeh mas le parte del familia de Jehova. Poreso, todo kita gendeh parte del familia del Dios cuando ya nace kanaton. Pero por causa con el rescate, ta perdona si Jehova con el diaton maga pecado y na uliji, todo quien ta  demonstra fe con Dios y ta obedece con ele hay queda parte del de suyu familia. Y maskin ahora pa lang, puede ya kita tene cerca relacion con Jehova y con el diaton maga hermano y hermana. Claro, ta ama gayot kanaton si Jehova!—Roma 5:10, 11.

7. Porque kita puede habla que bien grande el amor de Jehova para kanaton?

⁷ Puede kita entende si paquemodo de grande el amor de Jehova para kanaton si considera kita el sacrificio que ya hace le para puede dale el rescate. Ta clama si Satanas que nuay siervo del Dios quien hay esta leal con Ele si enfrenta sila dificultad. Para dale mira que gendeh justo si Satanas, ya permiti si Jehova que sufri si Jesus antes le muri. (Job 2:1-5; 1 Ped. 2:21) Ya mira si Jehova si paquemodo el maga gente ya gangguia con Jesus, ya latiga con ele y ya clava na estaca. Y ya mira tambien Le si paquemodo ya sufri na estaca el de suyu precioso Anak hasta ya muri este. (Mat. 27:28-31, 39) Puede era si Jehova sangga con aquel todo. Por ejemplo, considera este. Ya habla el maga gente acerca con Jesus: “Si deverasan ta ama con [Jesus] el Dios, salva era el Dios con [ele].” Puede era quel hace si Jehova. (Mat. 27:42, 43) Pero si ya hace le quel, gendeh puede rescata kanaton y nuay kita esperanza. Poreso, ya permiti si Jehova que sufri el de suyu Anak hasta muri este.

8. Ya sinti ba duele si Jehova cuando ya mira le que ta sufri el de suyu Anak? Explica. (Mira tambien con el letrato.)

⁸ Un poderoso Dios si Jehova pero gendeh este quierre decir que gendeh le ta sinti duele. Ya crea kanaton na de suyu imagen. Ciendo ta sinti kita duele, ansina tambien si Jehova. Gane, el Biblia ta habla que ta “sinti [le] duele.” (Sal. 78:40, 41) Considera tambien con el experiencia de Abraham y Isaac. Ya manda si Jehova con Abraham que ofrece con el de suyu unico anak como un sacrificio. (Gen. 22:9-12; Heb. 11:17-19) Pensa si cosa ta sinti si Abraham mientras ta prepara le para mata con Isaac. Asigurao que mas pa con ese el cosa ya sinti si Jehova mientras ta mira le que ta hace sufri el maga gente con el de suyu Anak.—Mira con el video Imita con el Diila Fe—Abraham, Part 2 na jw.org.

9. Cosa el Roma 8:32, 38, 39 ta enseña acerca na amor de Jehova?

⁹ El rescate ta enseña que bien grande gayot el amor de Jehova para kanaton—mas pa se na amor del diaton familia o maga amigo. (Le con el Roma 8:32, 38, 39.) Gane, mas ta ama si Jehova kanaton contra que ta ama kita con el diaton mismo cuerpo. Si quierre tu tene vida hasta para cuando, mas quierre se si Jehova para contigo. Si quierre tu ricibi el perdon na de tuyu maga culpa, mas quierre se si  Jehova dale contigo. El cosa lang le ta pidi amo que aprecia kita con el rescate, demonstra fe y queda obediente con ele. Claro que el rescate amo un expresion del amor del Dios. Y na nuevo mundo, hay aprende pa kita mas acerca na amor de Jehova.—Ecl. 3:11.

SI COSA EL RESCATE TA ENSEÑA KANATON ACERCA CON JESUS

10. (a) Porque yan lingasa si Jesus? (b) Paquemodo si Jesus ya vindica con el nombre de Jehova? (Mira tambien con el cajon “ El Integridad de Jesus Ya Vindica con el Nombre de Jehova.”)

¹⁰ Importante con Jesus el reputacion del de suyu Tata. (Juan 14:31) Cuando ya acusa con Jesus que ya comete le blasfemia y yan contra na gobierno, yan lingasa le que baka afecta este con el reputacion del de suyu Tata. Poreso, ya reza le: “Mio Tata, si posible era, desaleja ya lang este copa conmigo.” (Mat. 26:39) Ya mentena si Jesus el de suyu integridad con Jehova hasta na de suyu muerte. Como resulta, ya puede vindica con el nombre del de suyu Tata.

11. Paquemodo ya dale mira hondo amor si Jesus para na maga gente? (Juan 13:1)

¹¹ El rescate ta enseña tambien kanaton que ta ama gayot si Jesus con el maga gente, especialmente con el de suyu maga dicipulo. (Prov. 8:31; le con el Juan 13:1.) Por ejemplo, sabe si Jesus que hay enfrenta le bien dificil maga situacion aqui na tierra y sufri le antes muri. Maskin pa ansina, nuay le hace con el de suyu assignment por causa lang cay ya manda con ele si Jehova sino cay ta ama gayot le con el maga gente. Con todo corazon le ya predica, ya enseña y ya ayuda con el maga gente. Gane, maskin na dia del de suyu muerte, ya laba si Jesus con el pies del de suyu maga apostoles, ya enseña kanila y ya dale kanila comforta. (Juan 13:12-15) Despues, cuando ta sufri le na  estaca, ya hace pa esfuerzo si Jesus para dale esperanza con el un criminal y ya hace manera para tiene quien cuida con el de suyu nana. (Luc. 23:42, 43; Juan 19:26, 27) Entonces, ya dale mira hondo amor si Jesus gendeh lang por medio del de suyu muerte sino ya demonstra tambien le se na de suyu entero vida aqui na tierra.

12. Paquemodo si Jesus ta continua hace maga sacrificio para na bien diaton?

¹² Deverasan, ya muri si Jesus “una vez lang . . . para todo el tiempo” para na bien diaton. Pero, ta continua le siempre hace maga sacrificio para kanaton. (Roma 6:10, El Nuevo Testamento) Paquemodo? Ta continua le dale tiempo y esfuerzo para ayuda kanaton que beneficia na rescate. Considera si cosa le ta hace ahora. Ta sirvi le como el diaton Rey, Alto Sacerdote y el cabeza del congregacion. (1 Cor. 15:25; Ef. 5:23; Heb. 2:17) Con ele tambien ya dale el trabajo para ajunta con el maga iscujido y con el grande grupo. Y ese trabajo hay completa lang antes termina el grande tribulacion. a (Mat. 25:32; Mar. 13:27) Mas pa, ta asigura le que ta puede kita ricibi espiritual comida durante na este ultimo maga dia. (Mat. 24:45) Y adentro del de suyu Un Mil Año Rulanza, hay continua le hace maga cosas para na bien diaton. Claro que ya dale gayot si Jehova con el de suyu Anak para kanaton!

CONTINUA APRENDE

13. Paquemodo tu puede continua aprende acerca na amor del Dios y del Cristo para kanaton?

¹³ Puede tu aprende pa mas acerca na amor de Dios Jehova y de Jesucristo para kanaton si continua tu medita con ese. Por ejemplo, durante el maga semana antes y despues del Comemoracion, puede tu le con el cuanto Evangelio. Pero, no pricura le manada capitulo na un tiempo lang. Sino, hinay-hinay lang le y pricura busca omento razon si porque kita debe ama con Jehova y con Jesus. Despues, habla con otro el cosa tu ya puede aprende.

14. Harmonia na Salmo 119:97, paquemodo el research puede ayuda kanaton para aprende pa mas acerca na rescate y na otro pa topico? (Mira tambien con el letrato.)

¹⁴ Si ya dura ya tu na verdad posible familiar ya tu na maga topico igual na justicia del Dios, de suyu amor y el rescate. Pero, baka ta pensa tu que nuay mas tu cosa nuevo puede aprende acerca con ese. El deverasan, nuay limitacion el cosa kita puede aprende acerca con ese maga topico y otro pa. Entonces, cosa tu puede  hace? Le y estudia con el diaton maga publicacion. Si tiene cuanto cosas que gendeh tu tanto ta entende, puede tu man research. Despues, medita con el cosa tu ya estudia y si cosa este ta enseña contigo acerca con Jehova, de suyu Anak y el diila amor para contigo.—Le con el Salmo 119:97.

15. Porque kita debe continua busca maga tesoro na Biblia?

¹⁵ Si nuay tu incuntra nuevo cosas mientras tan research tu o ta estudia, no man luya. Imagina que igual tu con aquellos quien ta busca oro. Con paciencia sila ta busca por cuanto hora o dia para puede incuntra maskin bien diutay pedazo de oro. Pero ta continua se sila hace cay valuable kanila el cada pedazo de oro. Pero mas valuable pa con ese el maga tesoro na Biblia! (Sal. 119:127; Prov. 8:10) Poreso, queda paciencioso y continua le con el Biblia cada dia.—Sal. 1:2.

16. Paquemodo kita puede imita con Jehova y con Jesus?

¹⁶ Mientras ta estudia tu, pensa si paquemodo tu puede aplica con el cosa tu ya aprende. Por ejemplo, para puede imita con el justicia de Jehova, trata con otro con imparcialidad. Para puede imita con el amor de Jesus para con Jehova y con otro, queda preparao hace maga sacrificio para na nombre de Jehova y na diaton maga hermano y hermana. Y igual con Jesus, predica con otro para puede tambien sila tene el oportunidad que acepta con el precioso regalo de Jehova.

17. Cosa kita considera na sunod articulo?

¹⁷ Si mas ta entende kita y ta aprecia con el rescate, mas ta queda hondo el diaton amor para con Jehova y con el de suyu Anak. Como resulta, mas ama tambien sila kanaton. (Juan 14:21; Sant. 4:8) Poreso, ojala usa kita con el maga provision que ya dale kanaton si Jehova para continua aprende acerca na rescate. Na sunod articulo, hay considera kita con el cuando maga beneficio que puede kita tene por causa na rescate y si cosa kita puede hace para dale mira apresacion na amor de Jehova.