1. Na cosa tan focus el manada gente ahora?

 SIGURO ya puede tu nota que manada ahora el tan focus lang na diila mismo cuerpo. Por ejemplo, el cuanto ta usa con el social media para saca el atencion del otro y man hambug acerca na cosa sila ya puede hace. Poreso, puede kita habla que poco lang ahora el ta dale gloria con Dios Jehova. Na este articulo, hay discuti kita si cosa quierre decir que dale gloria con Jehova y si cosa debe motiva kanaton para hace con ese. Hay aprende tambien kita si paquemodo kita puede dale con Dios el gloria que conviene le ricibi y si paquemodo le mismo hay glorifica con el de suyu nombre na futuro.

SI PAQUEMODO DALE GLORIA CON JEHOVA

2. Paquemodo si Jehova ya dale mira el de suyu gloria na Monte de Sinai? (Mira tambien con el letrato.)

² El Biblia ta dale mira que si Jehova amo un marvelloso Dios. Ya dale le mira el de suyu gloria cuanto dia lang despues le libra con el nacion de Israel desde na Egipto. Imagina este: Millones de maga Israelita el talla cerca na monte de Sinai para oi con el cosa el Dios habla kanila. Ya tiene bien grueso celaje na monte. Acabar, bigla ya tiene fuerte temblor. Yan uyuk el tierra y ya tiene kirlat, trueno y bien suena sonor. (Ex. 19:16-18; 24:17; Sal. 68:8) Asigurao, yan bilib gayot el maga Israelita na gloria y poder que ya dale mira si Jehova.

3. Paquemodo el maga gente puede dale gloria con Jehova?

³ Pero, quetal el maga gente? Puede ba tambien kita dale gloria con Jehova? Si. Puede kita se hace si habla kita con otro acerca el De Suyu grande poder y otro pa maga bonito  calidad. Puede tambien kita dale gloria con Dios si manda kita sabe con otro que ya puede lang kita cumpli con el cuanto cosas por causa na de suyu ayuda. (Isa. 26:12) Uno si Rey David na maga buen ejemplo quien ya dale gloria con Jehova. Na de suyu rezo adelante del congregacion de Israel, ya habla le con Dios: “O Jehova, de tuyu el pagka-marvelloso, poder, hermosura, gloria y pagka-supremo cay de tuyu el todo cosas na cielo y na tierra.” Despues le reza, “el entero congregacion ya alaba con Jehova.”—1 Cron. 29:11, 20.

4. Paquemodo si Jesus ya dale gloria con Jehova?

⁴ Cuando taqui na tierra si Jesus, ya dale le gloria con el de suyu Tata cuando ya manda le sabe con otro que con Jehova estaba el de suyu poder para hace maga milagro. (Mar. 5:18-20) Ya dale tambien le gloria con Jehova na manera si paquemodo le tan cuento acerca na de suyu Tata y si paquemodo le ta trata con otro. Un dia cuando ta enseña le na sinagoga, tiene alla un mujer que 18 año ya controlao de un demonio. Por causa con ese, bien cuba el mujer y no puede para derecho. Dificil gayot quel de suyu situacion. Por causa na compasion de Jesus, ya atraca le con el mujer y amable ya habla: “Libre ya uste del de uste emfermedad.” Despues, ya agarra le con el mujer y ya puede este dayun para enbuenamente. Bien alegre el mujer cay ya queda le bueno poreso, “ya dale le gloria con Dios.” (Luc. 13:10-13) Tiene gayot le buen razon para dale gloria con Jehova y kita tambien.

SI PORQUE KITA QUIERRE DALE GLORIA CON JEHOVA

5. Cosa el maga razon si porque kita tiene hondo respeto con Jehova?

⁵ Ta dale kita gloria con Jehova cay tiene kita hondo respeto con ele. Manada razon si porque kita ta respeta con ele. Si Jehova el Todopoderoso; nuay limitacion el de suyu poder. (Sal. 96:4-7) Bien alto el de suyu sabeduria y claro se puede mira na maga cosas que ya hace le. Ele el Tuburan del diaton vida y el quien ta sustene con ese. (Rev. 4:11) Leal ele. (Rev. 15:4) Pirmi tiene buen resulta el cosa le ta hace y ta cumpli gayot le con el de suyu maga promesa. (Jos. 23:14) Poreso, justo lang el cosa ya habla si profeta Jeremias acerca con Jehova: “Na todo maga sabio na maga nacion y na todo maga reino, nuay gayot quien igual contigo”! (Jer. 10:6, 7) Claro, debe gayot kita respeta con el diaton Tata na cielo. Pero, gendeh lang kita basta ta respeta con Jehova. Ta ama tambien kita con ele.

6. Porque kita ta ama con Jehova?

⁶ Ta dale kita gloria con Jehova cay ta ama gayot kita con ele. Considera con el cuanto maga razon si porque kita ta ama con ele. Lastimoso le y lleno de compasion. (Sal. 103:13; Isa. 49:15) Tiene le empatia kanaton. Ta sinti le duele si ta sinti kita duele. (Zac. 2:8) Facil lang que queda de suyu amigo. (Sal. 25:14; Act. 17:27) Y humilde tambien le; “ta agacha le para mira con el cielo y con el tierra [y] ta hace le levanta con el humilde estaba na polvos.” (Sal. 113:6, 7) Gendeh ba justo lang que dale kita gloria con el diaton marvelloso Dios?—Sal. 86:12.

7. Cosa especial oportunidad kita tiene?

⁷ Ta dale kita gloria con Jehova cay quierre kita que conoce con ele el otro. Manada el no sabe el verdad acerca con Jehova. Porque? Cay ya hace bulak si Satanas con el diila pensamiento por medio na de suyu maga imbusterias acerca con Jehova. (2 Cor. 4:4) Ta convinci le con el maga gente que si Jehova pirmi rabiao, nuay queber kanila y ta causa sufrimiento na mundo. Pero sabe  kita el verdad acerca na diaton Dios! Y tiene kita el oportunidad para habla se con otro para puede sila alaba con Dios. (Isa. 43:10) Discuti kita ahora con el maga palabra na Salmo 96 para mira si cosa pa el otro maga manera que puede kita dale con Jehova el gloria que conviene le ricibi.

OTRO PA MANERA PARA DALE GLORIA CON JEHOVA

8. Cosa el un manera que puede kita dale gloria con Jehova? (Salmo 96:1-3)

⁸ Le con el Salmo 96:1-3. Puede kita dale gloria con Jehova por medio na diaton maga palabra. Na este maga versiculo, ta invita con el maga siervo de Jehova que “canta con Jehova,” “alaba con el de suyu nombre,” “proclama . . . el buen noticia del de suyu salvacion” y “declara con el de suyu gloria na maga nacion.” Todo se amo maga manera que puede kita dale gloria con el diaton Tata na cielo. El maga fiel Judio de antes y el maga Cristiano del primer siglo nuay man alang-alang defende con el reputacion de Jehova y habla con otro el maga buen cosas que ya hace le para kanila. (Dan. 3:16-18; Act. 4:29) Paquemodo kita puede hace igual ansina?

9-10. Cosa tu ya aprende na experiencia de Angelena? (Mira tambien con el letrato.)

⁹ Considera con el experiencia del un hermana na United States que si Angelena. a Con coraje le ya defende con el reputacion de Jehova na compania onde le ta trabaja. Un dia, ya invita con el maga nuevo empleado na un miting donde hay introduci sila con el diila mismo cuerpo na diila maga uban na trabajo. Ya prepara si Angelena maga letrato acerca na de suyu vida como un Testigo de Jehova para manda mira na ese miting. Pero antes llega el de suyu turno para man cuento, tiene un hombre quien ya introduci con el de suyu mismo cuerpo y ya habla que ya engranda le que Testigo de Jehova el de suyu mayores. Ya principia le habla maga negativo cosas acerca na diaton creencia. Ya habla si Angelena: “Yan putuk-putuk gayot yo. Pero, ya pensa yo: ‘Permiti lang ba yo que creé sila con este maga imbusterias acerca con Jehova? Necesita yo defende con Ele.’”

¹⁰ Cuando ya acaba man cuento el hombre, ya reza unrato si Angelena. Despues, con respeto le ya habla con el hombre: “Igual kita ya  engranda que Testigo de Jehova el mayores pero ta sirvi siempre yo con Jehova hasta ahora.” Maskin pa puede sinti el tension, ya esta calmao si Angelena. Ya dale le mira el maga letrato donde junto le con el de suyu maga amiga na maga espiritual ocasion y con respeto le ya defende con el de suyu creencia. (1 Ped. 3:15) Como resulta cuando ya acaba man cuento si Angelena, ya queda calmao el hombre. Y gane, ya habla el hombre que tiene le maga bonito experiencia junto na maga Testigo de Jehova cuando joven le. Si Angelena ya habla: “Necesita kita defende con Jehova y un privilegio gayot que habla el verdad acerca con ele.” Tiene tambien kita el privilegio que alaba con Jehova y glorifica con ele maskin pa el otro ta hace malo con el de suyu nombre.

11. Desde antes, paquemodo el maga siervo de Jehova ta dale mira que ta sigui sila con el principio na Salmo 96:8?

¹¹ Le con el Salmo 96:8. Puede kita dale gloria con Jehova por medio na diaton material cosas. Desde antes, ese ya el cosa ta hace el maga siervo de Jehova. (Prov. 3:9) Por ejemplo, ya dale maga contribucion el maga Israelita cuando ta construi y ta mentena con el templo. (2 Rey 12:4, 5; 1 Cron. 29:3-9) Ya suporta el maga dicipulo con Jesus y con el de suyu maga apostoles “por medio del diila maga bienes.” (Luc. 8:1-3) El maga Cristiano del primer siglo ya dale tambien maga ayuda na diila maga espiritual hermano y hermana. (Act. 11:27-29) Ahora, puede tambien kita dale gloria con Jehova por medio na diaton maga donacion.

12. Paquemodo el diaton maga donacion puede dale gloria con Jehova? (Mira tambien con el letrato.)

¹² Considera con el un experiencia que ta dale mira si paquemodo el diaton maga donacion ta dale gloria con Jehova. Del 2020, ya tiene grabe secas na Zimbabwe por largo tiempo. Millones el ya experiencia grabe hambre y ya sale afectao na secas incluido ya el un hermana que si Prisca. Maskin pa ansina, ya continua si Prisca na de suyu schedule que predica cada Miercoles y Viernes. Gane, ta hace le se maskin na tiempo de siembrada. Cay pirmi le ta anda na ministerio en vez siembra, ya gangguia con ele el de suyu maga vecinos y ya habla con ele, “Hay muri gayot tu na hambre.” Pero, con confianza si Prisca ya contesta kanila, “Desde antes, nuay gayot si Jehova abandona con el de suyu maga  siervo.” Nuay dura, ya ricibi le maga ayuda estaba na diaton organizacion. Ya queda quel posible por causa na donacion del maga hermano y hermana. Yan bilib gayot el maga vecinos de Prisca. Ya habla sila con ele, “Nuay gayot contigo deja el Dios. Poreso, quierre tambien kame aprende acerca con ele.” Na uliji, siete del de suyu maga vecinos el ya principia atende maga miting.

13. Cosa kita hace para el diaton conducta puede dale gloria con Jehova? (Salmo 96:9)

¹³ Le con el Salmo 96:9. Puede kita dale gloria con Jehova por medio na diaton conducta. El maga sacerdote necesita esta limpio mientras ta sirvi na templo de Jehova. (Ex. 40:30-32) Igual kanila, necesita tambien kita queda limpio na fisical. Pero mas pa con ese, necesita que limpio el diaton conducta. (Sal. 24:3, 4; 1 Ped. 1:15, 16) Debe kita hace esfuerzo para quita con el “daan naturaleza” o personalidad, incluido ya el maga mabuling practica y gendeh buen custumbre. Debe tambien kita usa con el “nuevo naturaleza” o pensa y actua na manera que ta reflecta con el maga bonito calidad de Jehova. (Col. 3:9, 10) Na ayuda de Jehova, maskin el maga bien imoral y violente gente puede hace maga cambio y tene nuevo personalidad.

14. Cosa tu ya aprende na experiencia de Jack? (Mira tambien con el letrato.)

¹⁴ Considera con el experiencia del un violente criminal que si Jack. Ta llama con ele el maga gente “El Demonio.” Por causa na de suyu maga crimen, ya sentencia con ele muerte. Pero mientras ta espera con ese, ya conforma le que man Bible study junto con el un hermano quien ta anda visita na preso. Na uliji, ya hace maga cambio si Jack na de suyu personalidad y ya queda cualificao para na bautismo. Grande gayot el cambio que ya hace le. Gane, na dia cuando para mata ya con ele, ya llura el cuanto guardia na preso. El un oficial quien ta trabaja alla ya habla: “De antes, si Jack el de con todo malo aqui na preso. Ahora, uno ya le na de con todo bueno.” Na semana despues del muerte de Jack, ya bira el maga hermano alla para conduci miting. Tiene un preso quien ya atende con el miting por primer vez. Cosa ya motiva con ele para atende? Ya aprecia gayot le con el maga cambio que ya hace si Jack y quierre le sabe si cosa le necesita hace para adora tambien  con Jehova. Claro que el diaton conducta, puede dale gloria con el diaton Tata na cielo!—1 Ped. 2:12.

SI PAQUEMODO SI JEHOVA GLORIFICA DE SUYU NOMBRE NA FUTURO

15. Paquemodo si Jehova completamente glorifica con el de suyu nombre na futuro? (Salmo 96:10-13)

¹⁵ Le con el Salmo 96:10-13. Este maga ultimo versiculo del Salmo 96 ta menciona que si Jehova amo un recto Juez y Rey. Paquemodo si Jehova hay glorifica con el de suyu nombre na futuro? Por medio na maga juzgamiento que hay hace le. Gendeh dura, hay destroza le con el Grande Babilonia quien ta hace malo con el de suyu sagrao nombre. (Rev. 17:5, 16; 19:1, 2) Na ese tiempo, el cuanto posible hay decidi que man junto kanaton na verdadero adoranza. Despues, na Armagedon, hay destroza si Jehova con el entero sistema de Satanas. Hay quita le con todo aquellos quien tan contra y ta habla maga imbusterias acerca con ele. Pero hay salva le con todo aquellos quien ta ama, ta obedece y ta dale gloria con ele. (Mar. 8:38; 2 Tes. 1:6-10) Despues del ultimo probanza que hay sucede despues del Un Mil Año Rulanza del Cristo, completamente hay santifica si Jehova con el de suyu nombre. (Rev. 20:7-10) Na ese tiempo, “el tierra hay llena de saber del gloria de Jehova igual si paquemodo de lleno de agua el mar.”—Hab. 2:14.

16. Cosa tu determinao hace? (Mira tambien con el letrato.)

¹⁶ Asigurao, alegre gayot kita si llega ya ese tiempo cuando el todo hay dale ya con Jehova el gloria que conviene le ricibi. Mientras ta espera con ese, tiene kita el privilegio que dale gloria con Dios na cada oportunidad que tiene kita. Para hace kanaton acorda que bien importante se, el Cuerpo Gobernante ya iscuji con el Salmo 96:8 como el texto para na año 2025: “Dale con Jehova el gloria que conviene para na de suyu nombre.”