ARTICULO 3
CANCION 35 Hace Una con el Mas Importante
Hace Decision que Ta Hace Alegre con Jehova
“El miedo con Jehova amo el principio del sabeduria y el saber acerca con el De Con Todo Sagrao amo el entendimiento.” —PROV. 9:10.
SI COSA PUEDE APRENDE
Si paquemodo el saber y entendimiento puede ayuda kanaton para hace maga buen decision.
1. Cosa kita necesita hace cada dia?
NECESITA kita hace maga decision cada dia. Tiene maga decision que facil lang para hace, igual como si cosa kita come o si cosa hora kita durmi. Pero tiene maga decision que mas dificil para hace cay posible puede este afecta con el diaton salud, alegria, familia, maga amigo o diaton adoranza. Siempre, quierre kita que puede kita beneficia y el diaton familia na maga decision que hay hace kita. Mas pa, quierre kita que puede se hace alegre con Jehova.—Roma 12:1, 2.
2. Cosa puede ayuda contigo para puede hace maga buen decision?
2 Mas puede tu hace buen decision si (1) saca tu maga informacion, (2) considera si cosa si Jehova ta pensa y (3) examina con el maga decision que posible tu hace. Na este articulo, hay discuti kita con ese y puede tambien kita aprende si paquemodo kita puede usa enbuenamente con el diaton entendimiento.—Prov. 2:11.
SACA MAGA INFORMACION
3. Ilustra si porque importante que saca anay maga informacion antes hace decision.
3 El una que necesita kita hace para puede hace buen decision amo que saca maga informacion. Porque se importante? Imagina que tiene un paciente quien ya anda na doctor para consulta acerca na de suyu grabe enfermedad. Hay dale ba dayun medicina el doctor maskin nuay pa le examina con el paciente o pregunta si cosa este ta sinti? Siempre gendeh. El un experienciao doctor hay pricura anay sabe el maga importante informacion acerca na paciente. Ansina tambien si ta hace maga decision. Pero paquemodo tu puede saca maga informacion?
4. Cosa tu hace para saca maga informacion? (Proverbio 18:13) (Mira tambien con el letrato.)
4 Puede tu saca maga informacion si pregunta tu. Por ejemplo, si ya invita contigo na un celebracion hay atende ba tu? Si gendeh tu bien conoce con el quien hay hace con el celebracion y si cosa sucede alla, necesita tu pregunta con ele: “Onde y cuando hace con el celebracion? Manada ba el quien invitao? Quien hay vicia con el maga suceso alla? Quien-quien el atende? Cosa tu ta plaña hace na celebracion? Tiene ba maga alcoholico tomada?” Si sabe tu el contestacion na ese maga pregunta, puede se ayuda contigo para hace buen decision.—Le con el Proverbio 18:13.
Pregunta para puede saca maga informacion (Mira con el parapo 4) a
5. Cosa tu debe hace si tiene ya tu maga informacion?
5 Si tiene ya tu maga informacion, pensa si cosa posible sucede. Por ejemplo, paquemodo si atende el cuanto individual quien gendeh ta sigui na maga principio na Biblia? O quetal si tiene maga alcoholico tomada y nuay quien hay vicia alla? Gendeh ba posible hay queda este un wild party o tiene cosa malo que hay sucede alla? (1 Ped. 4:3) O paquemodo si hay tupa este na dia del de ustedes miting o ministerio? Si puede tu imagina si cosa posible sucede, hay queda mas facil para contigo que hace maga buen decision. Pero, tiene pa tu otro cosa que debe hace. Deverasan, tiene ya tu idea si cosa hay sucede. Pero, cosa gaha si Jehova ta pensa acerca con ese?—Prov. 2:6.
CONSIDERA SI COSA SI JEHOVA TA PENSA
6. Asegun na Santiago 1:5, porque kita debe pidi el ayuda de Jehova?
6 Pidi con Jehova que ayuda contigo que sabe si cosa le ta pensa acerca na situacion. Ya promete si Jehova que hay dale le kanaton el sabeduria para hace maga decision que ta hace alegre con ele. Ta dale le sabeduria “con todo el maga gente con bondad y gendeh [tan] alang-alang.”—Le con el Santiago 1:5.
7. Paquemodo tu sabe si cosa ta pensa si Jehova acerca na un situacion? Ilustra.
7 Si ya reza ya tu con Jehova para pidi el de suyu guia, pricura sabe si cosa el de suyu contestacion. Considera con este ilustracion: Si ya perde tu camino mientras ta viaja, posible pidi tu ayuda con el un persona quien ta queda na ese lugar. Pero, hay sale ba tu dayun antes pa le habla si cosa tu debe hace? Siempre gendeh. Hay oi gayot tu enbuenamente si cosa le habla. Na igual manera, despues tu pidi el sabeduria con Jehova, pricura sabe el de suyu contestacion antes tu hace decision. Busca maga ley y principio na Biblia que aplicable na de tuyu situacion. Por ejemplo, si acerca na celebracion que ya menciona enante, puede tu considera anay si cosa el Biblia ta habla acerca na maga wild party, mal asosacion y si cosa debe el mas importante na diaton vida.—Mat. 6:33; Roma 13:13; 1 Cor. 15:33.
8. Cosa puede ayuda contigo para incuntra con el maga informacion que necesita tu? (Mira tambien con el letrato.)
8 Pero para incuntra con el informacion que necesita tu, posible que necesita tu el ayuda del otro. Puede tu pidi consejo na un mature hermano o hermana. Pero, puede tambien tu beneficia si etu mismo el man research. Manada tu puede incuntra informacion na diaton maga study tool, igual na Research Guide for Jehovah’s Witnesses y Scriptures for Christian Living. Acorda que goal de tuyu que hace un decision que hay hace alegre con Jehova.
Considera si cosa si Jehova ta pensa (Mira con el parapo 8) b
9. Paquemodo kita puede asigura que el diaton decision puede hace alegre con Jehova? (Efeso 5:17)
9 Paquemodo kita puede asigura que el decision que hay hace kita puede hace alegre con Jehova? Una, necesita kita conoce gayot con ele. El Biblia ta habla: “El saber acerca con el De Con Todo Sagrao amo el entendimiento.” (Prov. 9:10) Claro que hay tene kita deverasan entendimiento si sabe kita el maga calidad de Jehova, de suyu proposito y si cosa le ta ama y ta odia. Pregunta na de tuyu mismo cuerpo, ‘Base na cosa yo sabe acerca con Jehova, cosa decision yo hace para puede hace alegre con ele?’—Le con el Efeso 5:17, El Nuevo Testamento.
10. Porque mas importante que sigui con el maga principio na Biblia contra na cosa quierre el diaton familia?
10 Para puede hace alegre con Jehova, tiene vez, necesita kita hace maga decision que gendeh aceptable na diaton familia. Por ejemplo, el cuanto mayores posible insisti con el diila anak que casa con el un rico hombre maskin pa gendeh bueno el espiritualidad de este. Deverasan, quierre lang sila que tene buen vida el diila anak. Pero quien hay ayuda con ele para mas progresa na espiritual? Cosa gaha el mirada de Jehova acerca con ese? Puede incuntra con el contestacion na Mateo 6:33. Na ese texto, ta anima con el maga Cristiano que ‘busca una con el Reino.’ Maskin pa ta honra kita con el diaton maga mayores y ta respeta con otro maga gente, mas importante kanaton que hace alegre con Jehova.
EXAMINA CON EL MAGA DECISION QUE POSIBLE TU HACE
11. Cosa calidad el ya menciona na Filipo 1:9, 10 que puede ayuda contigo que examina con el maga decision que hay hace tu?
11 Despues tu considera con el maga principio na Biblia acerca na de tuyu situacion, debe tu examina con el maga decision que posible tu hace. (Le con el Filipo 1:9, 10, NWT; mira con el study note “full discernment.”) Puede ayuda contigo el entendimiento para mira si cosa posible el resulta del cada decision. Tiene maga decision que facil lang para hace. Pero gendeh todo decision ansina. El entendimiento puede ayuda contigo para hace buen decision maskin na maga dificil situacion.
12-13. Paquemodo el entendimiento puede ayuda contigo para hace buen decision si ta busca tu trabajo?
12 Imagina con este situacion. Ta busca tu trabajo para puede suporta con el de tuyu familia. Despues, tiene contigo ya ofrece dos trabajo. Ya saca tu el todo informacion acerca con ese maga trabajo—el schedule, el clase de trabajo, si paquemodo de largo el viaje para alla y otro pa. Y gendeh tambien contra na maga principio na Biblia ese maga trabajo. Posible mas quierre tu con el uno cay ya gusta tu con el clase de trabajo o cay mas alto el sueldo. Pero antes tu hace decision, tiene pa otro cosas que necesita tu considera.
13 Por ejemplo, tupa ba ese trabajo na schedule del de ustedes miting na congregacion? Si iscuji tu con ese trabajo, puede pa ba tu siempre dale el emocional y espiritual necesidad del de tuyu familia? Si considera tu con ese, puede se ayuda contigo para hace una con el “cosas que mas importante”—el de tuyu adoranza y el necesidad del de ustedes familia—en vez con el material cosas. Por medio con ese, puede tu hace un decision que hay bendici si Jehova.
14. Paquemodo el entendimiento y amor puede ayuda kanaton para evita hace tisut con otro?
14 El entendimiento puede ayuda kanaton para considera si paquemodo puede afecta con otro el diaton decision. Na ese manera, puede kita evita “hace tisut con otro.” (Fil. 1:10, NWT) Importante se especialmente si ta hace kita maga personal decision. Por ejemplo, si ta decidi acerca na mudada y ichura, posible tiene tu un particular estilo que quierre. Pero paquemodo si man tisut el otro por causa con ese? El entendimiento hay ayuda kanaton para considera si cosa sila ta sinti. El diaton amor hay motiva kanaton para pensa el bien “del los demas” y queda modesto. (1 Cor. 10:23, 24, 32; 1 Tim. 2:9, 10) Si hace kita se, hay hace kita un decision que ta dale mira el diaton amor y respeto para con otro.
15. Cosa tu necesita considera antes tu hace un importante decision?
15 Si ta hace tu un importante decision, pensa tambien con el tiempo, material cosas y fuerza que necesita para puede cumpli con ese decision. Gane, ya enseña kanaton si Jesus que “carcula el maga gastos.” (Luc. 14:28) Puede tu man cuento na cada miembro del de tuyu familia para puede sila sabe si cosa sila necesita hace para suporta con el de tuyu decision. Porque se importante? Puede se ayuda contigo para sabe si necesita ba tu man adjust con el de tuyu decision o si tiene ba otro mas practical decision. Si inclui tu con el de tuyu familia y oi con el diila sugestion, hay queda sila mas preparao que ayuda contigo para cumpli con el de tuyu decision.—Prov. 15:22.
HACE MAGA DECISION QUE ASIGURAO HAY TENE BUEN RESULTA
16. Cosa tu necesita hace para puede hace un decision que hay tene buen resulta? (Mira tambien con el cajon “ Si Paquemodo Hace Maga Buen Decision.”)
16 Si ya hace tu con el todo cosas que ya menciona na este articulo, puede tu hace un buen decision. Ya puede ya tu saca con el maga informacion y examina con el maga principio que puede ayuda contigo hace decision que ta hace alegre con Jehova. Ahora, puede tu pidi con Jehova que ayuda contigo para tene buen resulta el de tuyu decision.
17. Cosa el secreto para puede hace maga buen decision?
17 Maskin pa ya puede ya tu hace maga buen decision de antes, acorda que gendeh tu debe confia na de tuyu lang mismo saber o experiencia. Sino, para puede tu continua hace maga buen decision, necesita tu confia na sabeduria de Jehova. Ele lang el puede dale contigo deverasan saber y entendimiento que amo el maga importante aspeto del sabeduria. (Prov. 2:1-5) Puede si Jehova ayuda contigo hace maga decision que hay hace alegre con ele.—Sal. 23:2, 3.
CANCION 28 Queda Amigo de Jehova
