1. Porque si Jehova ya dale kanaton el regalo de matrimonio?

 UN “ALEGRE Dios” si Jehova y quierre tambien le que queda kita alegre. (1 Tim. 1:11, NWT) Poreso, ya dale le kanaton manada regalo. (Sant. 1:17) Uno de ese maga regalo amo el matrimonio. Si casa el un hombre y mujer, ta promete sila que ama, respeta y aprecia sila con uno y otro. Si continua sila hace fuerte el diila amor con uno y otro, queda gayot sila alegre.—Prov. 5:18.

2. Porque gendeh alegre el manada man maridable ahora?

² Maka-triste, manada man maridable ahora el ya ulvida ya con el maga promesa que ya hace sila na dia del diila casamiento. Como resulta, gendeh sila alegre. Asegun na un reciente report del World Health Organization, manada marido ahora el ta abusa con el diila mujer na fisical, na emocional o na palabra. Maskin pa el un marido ta trata con respeto con el de suyu mujer enfrente con otro, posible que na casa, ta maltrata le con este. Ta causa tambien problema na matrimonio si el un marido ta mira pornografia.

3. Cosa el cuanto razon si porque el un marido ta abusa con el de suyu mujer?

³ Cosa el maga razon si porque el cuanto marido ta maltrata con el diila mujer? Posible que violente el diila tata poreso ya engranda sila que ta pensa que normal lang quel. Posible tambien que por causa se na diila cultura. Ta pensa sila que debe sila domina con el diila mujer para dale mira que “deverasan hombre” sila. El otro no sabe controla con el diila emocion, incluido ya el rabia. El cuanto ya tiene gendeh justo mirada na maga mujer y sexo por causa cay pirmi sila ta mira pornografia. Gane, asegun na maga report, manada marido el ya abusa con el diila mujer  durante el COVID-19 pandemic. Pero, maskin cosa pa el razon, gendeh siempre justo que abusa el maga marido con el diila mujer.

4. Na cosa debe con cuidao el maga Cristiano marido y porque?

⁴ El maga Cristiano marido debe con cuidao que gendeh sigui con el mirada del mundo na maga mujer. a Porque? El un razon amo que el mirada del un persona puede afecta con el de suyu accion. Gane, ya conseja si apostol Pablo con el maga iscujido Cristiano na Roma que “no . . . sigui con el maga custumbre de este mundo.” (Roma 12:1, 2) Cuando ya escribi si Pablo para na maga de Roma, ya dura ya ta sirvi como maga Cristiano aquellos na ese congregacion. Pero, el maga palabra de Pablo ta dale mira que el cuanto na congregacion ta sigui siempre na maga custumbre y pensamiento del mundo. Poreso ya anima le kanila que hace maga cambio na diila pensamiento y conducta. Aplicable siempre ahora ese consejo na maga Cristiano marido. Pero, maka-triste que el cuanto kanila ya queda influenciao na pensamiento de este mundo y gane, ta abusa sila con el diila mujer. b Na mirada de Jehova, paquemodo debe trata el marido con el de suyu mujer? Puede kita sabe el contestacion na texto onde yan base el tema de este articulo.

5. Asegun na 1 Pedro 3:7, paquemodo debe trata el un marido con el de suyu mujer?

⁵ Le con el 1 Pedro 3:7. Ya manda si Jehova con el maga marido que respeta con el diila mujer. El un marido quien ta respeta con el de suyu mujer hay trata con este na amable y buen manera. Na este articulo, hay considera kita si paquemodo el un marido puede dale mira respeto na de suyu mujer. Pero una, discuti kita el maga cosas que debe evita el maga marido.

SI COSA DEBE EVITA EL MAGA MARIDO

6. Cosa ta sinti si Jehova con aquellos quien ta abusa con el diila mujer na fisical? (Colosa 3:19)

⁶ Abuso na fisical. Ta odia si Jehova con aquellos violente. (Sal. 11:5) Especifico le ya menciona que ta odia le con aquellos quien ta abusa con el diila mujer. (Mal. 2:16; le con el Colosa 3:19.) Asegun na 1 Pedro 3:7, si el un marido gendeh ta trata enbuenamente con el de suyu mujer, hay queda malo el de suyu relacion con Dios. Posible pa gane que gendeh oi si Jehova con el de suyu maga rezo.

7. Asegun na Efeso 4:31, 32, cosa debe evita hace el un marido si tan cuento? (Mira tambien con el “Si Cosa Quierre Decir.”)

⁷ Abuso na palabra. El cuanto marido ta ultraja con el diila mujer y ta usa maga duele palabra. Pero, no quierre si Jehova que tene kita “agravio con uno y otro, ni perde el paciencia, ni alza el voz, ni insulta de palabra.” c (Le con el Efeso 4:31, 32.) Ta oi le el todo cosa kita ta habla. Maskin adentro na casa, ta observa si Jehova si paquemodo el marido ta converza con el de suyu mujer. Si ta abusa le con el de suyu mujer na palabra, ta hace le malo, gendeh lang el diila matrimonio, sino maskin el de suyu relacion con Dios.—Sant. 1:26.

8. Cosa ta sinti si Jehova acerca na pornografia y porque?

⁸ Mirada de pornografia. Cosa ta sinti si Jehova acerca na pornografia? Ta odia le con ese. Si el un marido ta mira pornografia, ta hace le malo el de suyu relacion con Jehova y gendeh  le ta respeta con el de suyu mujer. d Ta expecta si Jehova con el maga marido que esta sila leal na diila mujer, gendeh lang na diila maga accion, sino maskin na diila pensamiento. Ya habla si Jesus que si el un hombre ta mira con el otro mujer con malicia, ta comete ya le adulterio “na su corazon.” e—Mat. 5:28, 29.

9. Porque no quierre si Jehova si el un marido ta abusa con el de suyu mujer na sexual manera?

⁹ Abuso na sexo. El cuanto marido ta forza con el diila mujer que hace maga sexual cosas que ta causa para perde el dignidad del diila mujer y man conciencia este. Ta odia con ese si Jehova. Ta expecta le que el marido hay ama y cuida con el de suyu mujer y respeta con el cosa este ta sinti. (Ef. 5:28, 29) Paquemodo si el un Cristiano marido ta abusa con el de suyu mujer o ta mira pornografia? Paquemodo le puede hace maga cambio?

SI PAQUEMODO HACE MAGA CAMBIO

10. Paquemodo el ejemplo de Jesus puede ayuda con el maga marido?

¹⁰ Cosa puede ayuda con el un marido para hace maga cambio y dale mira respeto con el de suyu mujer? Puede le pricura imita con Jesus. Maskin pa gendeh casao si Jesus, ya dale le mira si paquemodo debe trata el un marido con el de suyu mujer na manera si paquemodo le ya trata con el de suyu maga dicipulo. (Ef. 5:25) Por ejemplo, considera kita si paquemodo si Jesus ya trata y ya converza con el de suyu maga apostoles.

11. Paquemodo si Jesus ya trata con el de suyu maga apostoles?

¹¹ Ya trata si Jesus con el de suyu maga apostoles na buen manera y con respeto. Maskin pa ele el diila Señor y Amo, nuay le usa con el de suyu autoridad para domina kanila. Sino, humilde le ya sirvi kanila. (Juan 13:12-17) Ya habla le con el de suyu maga dicipulo: “Aprende conmigo, cay yo paciencioso y humilde de corazon. Ansina ay encontra ustedes descanso.” (Mat. 11:28-30) Nota que paciencioso y calmao si Jesus. El un calmao persona gendeh mahina. Gane, tiene le el fuerza para controla con el de suyu mismo cuerpo. Ta puede le controla con el de suyu emocion maskin pa maka-rabia el situacion.

12. Paquemodo si Jesus ta converza con otro?

¹² Si ta converza si Jesus con otro, ta usa le maga palabra que puede dale comforta y refresca kanila. Gendeh le ta usa maga duele palabra si tan cuento con el de suyu maga siguidores. (Luc. 8:47, 48) Maskin cuando ya insulta y ya pricura con ele manda rabia el de suyu maga enemigo, “noay Ele contesta de insulto.” (1 Ped. 2:21-23) Tiene tambien maga tiempo que ya iscuji si Jesus esta silencio en vez contesta kanila. (Mat. 27:12-14) Un buen ejemplo gayot le para na maga Cristiano marido!

13. Paquemodo el un marido puede aplica con el consejo que “man junto con su mujer”? (Mateo 19:4-6) (Mira tambien con el letrato.)

¹³ Ya dale tambien consejo si Jesus con el maga marido que esta leal na diila mujer. Cuando ya hace le se, ya menciona le el cosa ya habla de suyu Tata que el marido debe “man junto con su mujer.” (Le con el Mateo 19:4-6.) El Griego palabra que yan translate como “man junto” literal quierre decir “hace pilit.” Entonces, el relacion del un marido y mujer debe queda igual na un cosa que ya hace pilit y dificil hace separta. Gane, si tiene cosa ya hace gendeh bueno el uno kanila, dos sila hay sufri. El un marido quien tiene hondo amor na de suyu mujer hay evita con el todo clase de pornografia. Determinao le que gendeh  “mira . . . maga cosas que nuay valor.” (Sal. 119:37) Dol ta hace le contrata na de suyu ojos que nunca le mira con mal deseo con el otro maga mujer.—Job 31:1.

14. Cosa debe hace el un marido para compone con el de suyu relacion con Jehova y con el de suyu mujer?

¹⁴ El un marido quien ta abusa na fisical y na palabra con el de suyu mujer necesita hace cuanto cosas para compone con el de suyu relacion con Jehova y con el de suyu mujer. Una, necesita le admiti que mali el cosa le ta hace. Nuay le cosa puede esconde con Jehova. (Sal. 44:21; Ecl. 12:14; Heb. 4:13) Ika-dos, necesita que gendeh mas le abusa con el de suyu mujer. (Prov. 28:13) Ika-tres, necesita le pidi perdon con el de suyu mujer y con Jehova. (Act. 3:19) Debe tambien le pidi con Jehova que dale con ele el deseo para cambia y ayuda con ele controla de suyu pensamiento, palabra y accion. (Sal. 51:10-12; 2 Cor. 10:5; Fil. 2:13) Ika-cuatro, necesita le actua harmonia na de suyu rezo y odia con el todo clase de violencia y mal palabra. (Sal. 97:10) Ika-cinco, hay pidi le dayun ayuda na maga anciano na congregacion. (Sant. 5:14-16) Ika-seis, hay plaña le si paquemodo evita con ese maga mal conducta. Debe tambien hace con este seis cosas el un marido quien ta mira pornografia. Hay bendici si Jehova con el de suyu esfuerzo que cambia con el de suyu custumbre. (Sal. 37:5) Pero, gendeh bastante que evita lang el un marido con el maga mal conducta. Necesita tambien le aprende dale mira respeto con el de suyu mujer. Paquemodo le se puede hace?

SI PAQUEMODO DALE MIRA RESPETO CON EL DE TUYU MUJER

15. Paquemodo puede dale mira el un marido que ta ama le con el de suyu mujer?

¹⁵ Dale mira amor con el de tuyu mujer. El cuanto maga hermano quien alegre na diila matrimonio ta asigura que tiene sila cosa hace cada dia para dale mira que ta ama gayot sila con el diila mujer. (1 Juan 3:18) Puede el un marido dale mira el de suyu amor na maga simple manera, igual si ta agarra le el mano del de suyu mujer o ta abraza con este.  Puede le man text con el de suyu mujer “I miss you” o man quetal con ele. Tiene maga tiempo, puede tambien le escribi carta para habla que ta ama gayot le con el de suyu mujer. Si ta hace se el un marido, ta honra le con el de suyu mujer y ta hace le fuerte con el diila matrimonio.

16. Porque debe comenda el un marido con el de suyu mujer?

¹⁶ Habla con el de tuyu mujer que ta aprecia tu con ele. Puede tambien dale mira respeto el un marido con el de suyu mujer si ta manda le sabe si porque precioso el de suyu mujer con ele. Puede le se hace si rindi le gracias con el de suyu mujer na todo cosa este ta hace para suporta con ele. (Col. 3:15) Si el un marido sincero ta comenda con el de suyu mujer, asigurao hay queda gayot alegre el de suyu mujer y sinti este que ta honra, ta ama y ta cuida gayot con ele el de suyu marido.—Prov. 31:28.

17. Paquemodo el un marido puede dale mira que ta respeta le el sentido del de suyu mujer?

¹⁷ Respeta con el sentido del de tuyu mujer. Si el un marido ta ama con el de suyu mujer, ta cuida gayot le con este. Para con ele, un precioso regalo el de suyu mujer estaba con Jehova. (Prov. 18:22; 31:10) Poreso, ta dale le mira respeto con el de suyu mujer maskin na maga privado aspeto del diila matrimonio. Gendeh le forza con el de suyu mujer para hace maga sexual cosas que puede hace perde el dignidad del de suyu mujer o causa con este para man conciencia. f Y hay pricura tambien el marido que mentena un limpio conciencia adelante con Jehova.—Act. 24:16.

18. Cosa debe determinao hace el maga marido? (Mira tambien con el cajon “ Cuatro Manera Para Queda un Respetoso Marido.”)

¹⁸ Maga marido, puede ustedes asigura que ta mira y ta aprecia si Jehova con el de ustedes esfuerzo para honra con el de ustedes mujer na todo aspeto del de ustedes vida. Queda determinao que evita hace con el maskin cosa que puede hace sinti duele con ele. Trata con ele con amor y respeto. Si hace tu se, ta dale tu mira que ta ama tu con el de tuyu mujer y ta aprecia con ele. Mas pa, ta puede tu protege con el de con todo importante relacion na de tuyu vida—el de tuyu relacion con Jehova.—Sal. 25:14.