1. Cosa kita puede hace para queda alegre si Jehova?

 IMAGINA que ya dale tu con el de tuyu amigo un especial regalo que bonito y usable. Cosa gaha tu sinti si ya esconde lang le con el regalo y ya ulvida ya con ese? Asigurao, sinti tu triste. Pero, si ya rindi le gracias contigo y ya usa gayot con el regalo hay queda tu alegre. Cosa el punto? Ya dale si Jehova con el de suyu Anak como un regalo para kanaton. Asigurao, alegre le si dale kita mira apresacion para na ese regalo y na amor que ya demonstra le cuando ya dale le el rescate!—Juan 3:16; Roma 5:7, 8.

2. Cosa kita discuti na este articulo?

² Pero mientras ta pasa el tiempo, posible perde el diaton apresacion na regalo de rescate. Baka alegre kita que tiene kita ese regalo pero dol ya ulvida ya kita con ese. Para gendeh se sucede, debe kita regular cultiva con el diaton apresacion na cosa ya hace el Dios y el Cristo para kanaton. Puede kanaton ayuda este articulo para hace se. Hay discuti kita si paquemodo kita ta beneficia na rescate ahora y si paquemodo kita beneficia con ese na futuro. Hay considera tambien kita si paquemodo kita puede dale mira apresacion na amor de Jehova, especialmente durante na este tiempo de Comemoracion.

SI PAQUEMODO KITA TA BENEFICIA AHORA

3. Cosa el un manera que ta beneficia kita na rescate ahora?

³ Ta beneficia ya kita ahora na rescate que ya hace el Cristo. Por ejemplo, por causa na rescate, ta perdona si Jehova con el diaton maga culpa. Gendeh le obligao que perdona kanaton  pero ta hace le se cay quierre le. Gane, el un salmista ya habla na un cancion: “Etu, O Jehova, bueno y preparao perdona.”—Sal. 86:5; 103:3, 10-13.

4. Para con quien si Jehova ya dale el rescate? (Lucas 5:32; 1 Timoteo 1:15)

⁴ El cuanto posible ta sinti que gendeh sila conviene ricibi el perdon de Jehova. Pero el deverasan, todo kita nuay el derecho para ricibi el perdon del Dios. Gane, si apostol Pablo ya habla que “gendeh conviene llama [con ele] Apostol.” Pero ya habla le: “Por causa del gracia del Dios, ansina yo.” (1 Cor. 15:9, 10) Si ta arripinti kita na diaton maga pecado, ta perdona kanaton si Jehova. Ta hace le se, gendeh cay conviene kita ricibi perdon sino cay ta ama le kanaton. Si ta sinti tu que gendeh tu conviene ricibi el perdon de Jehova, acorda que ya dale le el rescate gendeh para na maga perfecto gente sino para na maga pecador quien ta arripinti.—Le con el Lucas 5:32; 1 Timoteo 1:15.

5. Justo ba para pensa que debe kanaton perdona si Jehova cay ta sirvi kita con ele? Explica.

⁵ Gendeh kita debe pensa que debe kanaton perdona si Jehova cay ya dura ya kita ta sirvi con ele. Deverasan, ta aprecia si Jehova con el todo cosa kita ya hace para con ele. (Heb. 6:10) Pero, ya dale le kanaton el rescate como un regalo y gendeh como un pago para na diaton servicio. Si ta pensa kita que el diaton servicio amo el razon si porque conviene kanaton perdona si Jehova, dol ta habla kita que gendeh kita necesita el rescate.—compara na Galacia 2:21.

6. Porque si Pablo ya hace gayot esfuerzo na servicio con Jehova?

⁶ Sabe si Pablo que maskin cosa le hace, gendeh le puede tene el derecho para ricibi el favor del Dios. Si ansina, porque le ya hace gayot esfuerzo na servicio con Jehova? Ya hace le se, gendeh para ricibi perdon sino para dale mira el de suyu apresacion na incomparable pagka-bueno de Jehova. (Ef. 3:7) Igual con Pablo, ta continua kita hace esfuerzo na servicio con Jehova, gendeh para ricibi el De Suyu perdon sino para dale mira apresacion.

7. Cosa pa el otro manera que ta beneficia kita na rescate ahora? (Roma 5:1; Santiago 2:23)

⁷ Tiene pa otro manera que ta beneficia kita na rescate ahora. Por causa na rescate, puede kita tene cerca relacion con Jehova. a Como cosa ya menciona del ya pasa articulo, nuay kita personal relacion con Dios cuando ya nace kita. Pero por causa na rescate, puede kita tene “paz con Dios” y queda cerca con ele.—Le con el Roma 5:1; Santiago 2:23.

8. Porque kita ta rindi gracias con Jehova por causa na privilegio de rezo?

⁸ Considera con este especial privilegio que tiene kita por causa na diaton personal relacion con Jehova—el rezo. Puera que ta oi si Jehova si ta reza kita junto con otro, ta oi tambien le con el diaton maga personal rezo. Si ta reza kita, ta queda kita calmao y ta tiene paz na pensamiento. Pero mas pa con ese, puede tambien queda mas fuerte el diaton relacion con Dios. (Sal. 65:2; Sant. 4:8; 1 Juan 5:14) Cuando na tierra si Jesus, pirmi le ta reza cay sabe le que ta oi si Jehova con ele y que puede se ayuda para queda mas fuerte el de suyu relacion con el de suyu Tata. (Luc. 5:16) Ta rindi gayot kita gracias con Jehova cay por causa na rescate, puede kita queda maga amigo de suyu y man cuento pa gane con ele!

 SI COSA EL MAGA BENEFICIO NA FUTURO

9. Paquemodo el maga fiel siervo de Jehova hay beneficia na rescate na futuro?

⁹ Paquemodo el maga fiel siervo de Jehova hay beneficia na rescate na futuro? Hay obtene sila el vida hasta para cuando. Manada ahora ta pensa que dol imposible este cay desde antes, ta muri ya gayot el maga gente. Pero, el original proposito de Jehova para na maga gente amo que vivi sila hasta para cuando. Si nuay era culpa si Adan, nuay quien pensa que imposible se sucede. Y maskin pa dol dificil para creé que puede kita ricibi el vida hasta para cuando, puede kita asigura que hay sucede se cay grande el sacrificio que ya hace si Jehova para queda se posible.—Roma 8:32.

10. Cosa ta esperanza el maga escujido y otro maga carnero?

¹⁰ Maskin na futuro pa el vida hasta para cuando, quierre si Jehova que pensa kita ahora acerca con ese. Imagina con el esperanza del maga iscujido. Hay vivi sila na cielo y rula junto con el Cristo. (Rev. 20:6) El otro maga carnero hay vivi na paraiso tierra que gendeh mas sinti dolor y tristeza. (Rev. 21:3, 4) Uno ba tu na otro maga carnero quien ta esperanza que vivi hasta para cuando na tierra? No pensa que mas bajo el de tuyu esperanza contra na maga iscujido. Gane, ya diseña si Jehova con el maga gente para vivi hasta para cuando na tierra. Poreso asigurao, hay queda gayot kita bien alegre si cumpli ya se!

11-12. Cosa el cuanto bendicion na Paraiso que puede kita expecta? (Mira tambien con el maga letrato.)

¹¹ Imagina si cosa clase de vida tu hay tene na Paraiso tierra. Gendeh mas tu man lingasa acerca na enfermedad o na muerte. (Isa. 25:8; 33:24) Hay dale gayot si Jehova el todo buen cosas que quierre tu. Quierre ba tu aprende acerca na maga animal, tuca maga instrumento o man drawing? Asigurao que necesita alla que tiene quien diseña y construi casa, y maga siembrador. Y siempre, necesita tambien alla quien prepara maga comida,  hace maga materiales y cuida con el maga siembra. (Isa. 35:1; 65:21) Ciendo vivi tu hasta para cuando, manada tu tiempo para aprende hace con ese y con el otro pa maga cosas.

¹² Asigurao hay queda gayot kita alegre que puede otravez man junto con aquellos con quien hay resucita! (Act. 24:15) Imagina tambien el oportunidad que aprende pa mas acerca con Jehova mientras ta estudia con el manada cosas que ya crea le. (Sal. 104:24; Isa. 11:9) Mas pa na todo, hay puede ya kita sirvi con Jehova que gendeh tan lingasa que baka comete kita pecado. Hay iscuji ba tu con “el maga alegria que ta sale na pecado y gendeh ta dura” contra con ese maga bendicion na futuro? (Heb. 11:25) Asigurao gendeh! Sino hay hace kita maskin cosa sacrificio para puede obtene con ese maga bendicion. Gendeh dura, el diaton esperanza que vivi na Paraiso tierra hay cumpli ya. Poreso, gendeh este esta como un esperanza lang hasta para cuando. Todo este ya queda posible cay ya dale si Jehova el rescate por medio del de suyu Anak por causa na de suyu grande amor para kanaton!

DALE MIRA APRESACION NA AMOR DE JEHOVA

13. Paquemodo kita dale mira que ta aprecia kita con el amor de Jehova? (2 Corinto 6:1)

¹³ Paquemodo kita dale mira que ta aprecia kita con el rescate que ya dale si Jehova para kanaton? Puede kita se hace si hace kita prioridad na diaton vida el servicio con ele. (Mat. 6:33) Justo lang que hace kita se ciendo ya muri si Jesus “para aquellos quien ta vivi gendeh mas ay vivi para diila mismo, sino para de Aquel quien ya muri y ya resucita por causa diila.” (2 Cor. 5:15) Asigurao, no quierre kita que hace no vale nada con el razon si porque si Jehova ya dale mira con el de suyu incomparable pagka-bueno para kanaton.—Le con el 2 Corinto 6:1.

14. Paquemodo kita demonstra fe na direccion de Jehova?

¹⁴ Puede tambien kita dale mira apresacion na amor de Jehova si demonstra kita fe na de suyu direccion. Na cosa manera? Si ta hace kita maga decision igual si acerca na educacion y trabajo, debe kita considera si cosa quierre si Jehova que hace kita. (1 Cor. 10:31; 2 Cor. 5:7) Si tiene kita fe na direccion de Jehova y ta sigui con ese, mas ta queda fuerte el diaton fe y relacion con ele. Mas queda tambien deverasan para kanaton el diaton esperanza.—Roma 5:3-5; Sant. 2:21, 22.

15. Paquemodo kita puede demonstra con el diaton apresacion durante el tiempo de Comemoracion?

¹⁵ Tiene pa otro manera si paquemodo kita dale mira apresacion con el amor de Jehova. Puede kita usa con el diaton tiempo durante el maga semana antes y despues del Comemoracion para dale mira que ta aprecia kita con el rescate. Puera que plaña kita atende  na Comemoracion, puede tambien kita invita con otro. (1 Tim. 2:4) Explica kanila si cosa sucede na Comemoracion. Puede tu dale mira kanila el maga video Porque Ya Muri si Jesus? y Acorda con el Muerte de Jesus na jw.org. El maga anciano debe asigura que puede sila invita con el maga gendeh activo. Imagina con el alegria de aquellos na cielo y na tierra si bira ya na congregacion el cuanto na maga perdido carnero de Jehova! (Luc. 15:4-7) Na Comemoracion, pricura kita man greet gendeh lang con el diaton maga hermano y hermana sino especialmente con aquellos maga nuevo y con aquellos ya dura ya nuay atende. Quierre kita manda sinti kanila que welcome sila!—Roma 12:13.

16. Porque kita debe hace pa mas na ministerio durante na tiempo de Comemoracion?

¹⁶ Puede pa ba tu hace pa mas na maga espiritual actividad durante na tiempo de Comemoracion? Si hace tu se, ta dale se mira que ta aprecia tu con el cosa ya hace el Dios y el Cristo para kanaton. Si mas participa kita na ministerio, mas puede kita mira el suporta de Jehova para kanaton. Como resulta, mas queda fuerte el diaton confianza con ele. (1 Cor. 3:9) Omento pa, asigura que puede tu sigui na schedule del lehida de Biblia para na Comemoracion que puede incuntra na Examining the Scriptures Daily o na chart na workbook de miting. Gane, puede tu hace con ese como de tuyu study project.

17. Cosa el ta hace alegre con Jehova? (Mira tambien con el cajon “ Maga Manera Para Dale Mira Apresacion na Amor de Jehova.”)

¹⁷ Posible por causa na de tuyu circumstancia, gendeh tu puede hace con el todo que ya menciona na este articulo. Pero acorda que gendeh ta compara si Jehova con el cosa tu ta puede hace na cosa ta puede hace el otro. Sino, ta mira le si cosa el na de tuyu corazon. Alegre le si ta puede le mira con el de tuyu grande apresacion para na de suyu precioso regalo, el rescate.—1 Sam. 16:7; Mar. 12:41-44.

18. Porque kita ta rindi gayot gracias con Dios Jehova y con Jesucristo?

¹⁸ Por causa na rescate, ta puede perdona con el diaton maga culpa, ya queda kita amigo de Jehova y puede kita ricibi el vida hasta para cuando. Ojala dale kita pirmi mira apresacion con el amor de Jehova cay por causa con ese amor, ya hace le posible que puede kita ricibi con ese maga bendicion. (1 Juan 4:19) Ojala demonstra tambien kita apresacion con Jesus quien ta ama gayot kanaton y ya dale el de suyu vida para kanaton!—Juan 15:13.