1-2. (a) Cosa kita todo quierre? (b) Na cosa kita puede asigura?

TODO kita quierre que ama kanaton. Y todo kita quierre que trata kanaton na justo manera. Si nuay kanaton quien ta ama y gendeh kanaton ta trata con justicia, posible queda kita bien triste y sinti que nuay kita valor.

² Sabe si Jehova que quierre kita que ama kanaton y trata con justicia. (Sal. 33:5) Puede kita asigura que ta ama gayot kanaton el Dios y quierre le que trata kanaton na justo manera. Puede este mira na Ley que ya dale si Jehova na nacion de Israel por medio con Moises. Si ta sinti tu bien triste por causa cay el otro nuay contigo trata con amor o justicia, considera si paquemodo el Ley de Moises * ta revela con el amor de Jehova para na de suyu maga siervo.

3. (a) Como cosa ya explica na Roma 13:8-10, cosa kita puede aprende si estudia kita con el Ley de Moises? (b) Cosa maga pregunta hay contesta na este articulo?

³ Si estudia kita con el Ley de Moises, puede kita aprende acerca el amor de Dios Jehova. (Le con el Roma 13:8-10.) Na este articulo, examina kita con el cuanto maga ley que ya dale na Israel y contesta kita con este maga pregunta: Porque kita puede habla que base na amor el Ley? Porque kita puede habla que el Ley ta anima con el maga gente que trata con otro con justicia? Paquemodo debe aplica con el Ley aquellos quien tiene autoridad? Y con quien especifico ta protege el Ley? El  contestacion de ese maga pregunta hay dale kanaton comforta, esperanza y hace kanaton cerca con el diaton amable Tata.​—Act. 17:27; Rom. 15:4.

4. (a) Porque kita puede habla que el Ley de Moises base na amor? (b) Base na Mateo 22:36-40, cosa maga mandamiento el ya hace claro si Jesus?

⁴ Puede kita habla que el Ley de Moises amo base na amor cay amor el ta motiva con Jehova para hace el todo cosas. (1 Juan 4:8) Yan base si Jehova con el entero ley na dos mandamiento​—ama con el Dios y ama con el de tuyu vecinos. (Lev. 19:18; Deut. 6:5; le con el Mateo 22:36-40.) Poreso, puede kita expecta que el cada uno del mas de 600 mandamiento puede enseña kanaton cosas acerca na amor de Jehova. Mira kita con el cuanto ejemplo.

5-6. Cosa quierre si Jehova que hace el man maridable y cosa sabe si Jehova? Dale un ejemplo.

⁵ Queda leal na de ustedes marido o mujer y cuida con el de ustedes maga anak. Quierre si Jehova que el man maridable ama gayot con uno’y otro. (Gen. 2:24; Mat. 19:3-6) El adulterio amo uno de maga bien duele cosa que puede hace el un persona con otro. Poreso, el ika-siete na Diez Mandamiento ta prohibi con este. (Deut. 5:18) Este amo un “culpa con Dios” y un mal cosa que puede hace el un persona na de suyu marido o mujer. (Gen. 39:7-9) El un victima del adulterio posible sinti con el dolor por largo tiempo.

⁶ Sabe gayot si Jehova si paquemodo ta trata el man maridable con uno’y otro. Quierre le que trata enbuenamente con el maga Israelita mujer. El un marido quien ta sigui con el Ley hay ama con el de suyu mujer y gendeh con este basta-basta man divurcio. (Deut. 24:1-4; Mat. 19:3, 8) Pero si ya tiene serioso problema y yan divurcio le con el de suyu mujer, necesita le dale certifico de divurcio con ele. Este certifico hay sirvi proteccion con el mujer na falso acusacion de imoralidad. Mas pa, antes el marido puede dale el certifico de divurcio na de suyu mujer, necesita le consulta con el maga anciano de ciudad. Na ansina manera, puede ayuda el maga anciano con el man maridable salva con el diila matrimonio. Si el un Israelita hombre man divurcio con el de suyu mujer na gendeh valido razon, gendeh si Jehova pirmi ta entrevini. Pero si Jehova ta mira el luha y sufrimiento del mujer y ta sinti gayot le se.​—Mal. 2:13-16.

7-8. (a) Cosa ya manda si Jehova con el maga mayores? (Mira con el letrato na cover.) (b) Cosa maga leccion kita ya puede aprende?

⁷ Ta revela tambien el Ley que si Jehova interesao na bien del maga anak. Ya manda si Jehova con el maga mayores dale gendeh lang el fisical necesidad del diila maga anak sino hasta el diila espiritual necesidad. El maga mayores necesita usa el todo oportunidad para ayuda con el diila maga anak entende con el Ley, mira el importancia de este y aprende ama con Jehova. (Deut. 6:6-9; 7:13) El un razon si porque ya castiga si Jehova con el maga Israelita amo por causa cay ya maltrata sila cuanto del diila maga anak. (Jer. 7:31, 33) Gendeh debe pensa el maga mayores que puede lang sila deja o maltrata con el diila maga anak, sino mira kanila como un regalo estaba con Jehova que necesita cuida.—Sal. 127:3.

⁸ Leccion: Ta nota si Jehova si paquemodo ta trata el man maridable con uno’y otro. Quierre le que ama el maga mayores con el diila maga anak y hay juzga le kanila si maltrata sila con el diila maga anak.

9-11. Porque ya dale si Jehova con el ley que no desea con el cosa del otro?

 ⁹ No desea con el cosa del otro. El ultimo na Diez Mandamiento ta prohibi desea con el cosas del otro. (Deut. 5:21; Rom. 7:7) Ya dale si Jehova con este ley para enseña un importante leccion: El de suyu maga siervo debe guarda con el diila corazon​—el diila pensamiento y sentido. Sabe le que el mal accion ta principia na maga mal pensamiento y sentido. (Prov. 4:23) Si permiti el un Israelita con el mal deseo crici na de suyu corazon, posible le trata con otro na gendeh amable manera. Por ejemplo, si Rey David ya puede hace ese kamali. Buen gente si David. Pero na un ocasion, ya desea le el mujer del otro. El de suyu deseo ya causa con ele para culpa. (Sant. 1:14, 15) Ya comete adulterio si David, ya pricura engaña con el marido del mujer y despues ya mata con este.​—2 Sam. 11:2-4; 12:7-11.

¹⁰ Sabe si Jehova si el un Israelita ta desea con el cosa del otro cay ta puede ele le con el corazon. (1 Cron. 28:9) Este ley ta enseña con el de suyu maga siervo que debe sila evita pensa malo que hay causa kanila para hace mal cosas. Bien sabio y amable Tata gayot si Jehova!

¹¹ Leccion: Si Jehova ta mira si cosa gayot kita clase de persona. Ta mira le si cosa gayot na diaton corazon. (1 Sam. 16:7) Gendeh kita puede esconde con ele si cosa kita ta pensa, ta sinti y ta hace. Ta busca le el cosa bueno kanaton. Pero quierre le que identifica kita y controla con el diaton mal pensamiento antes pa kita hace mal cosas.​—2 Cron. 16:9; Mat. 5:27-30, NW.

12. Cosa pa kanaton ta enseña el Ley de Moises?

¹² Ta enseña tambien kanaton el Ley de Moises que ta ama si Jehova con el justicia. (Sal. 37:28; Isa. 61:8) Ya dale le el perfecto ejemplo si paquemodo trata con otro con justicia. Cuando ya obedece el maga Israelita con el maga ley de Jehova, ya bendici le kanila. Pero cuando ya ignora sila con el de suyu maga ley, ya sufri sila. Considera con el otro dos ley na Diez Mandamiento.

13-14. Cosa si Jehova ta manda na primer dos ley na Diez Mandamiento y paquemodo beneficia el maga Israelita si obedece sila con este?

¹³ Con Jehova lang adora. Na primer dos ley na Diez Mandamiento, ta manda si Jehova con el maga Israelita que adora solamente con ele y ta prohibi le kanila adora na maga imagen. (Ex. 20:3-6) Este maga ley gendeh para na bien de Jehova sino para na bien del de suyu maga siervo. Cuando ya esta sila leal con ele, ya queda enbuenamente el diila vida. Pero cuando ya adora sila maga dios-dios, ya sufri sila.

¹⁴ Pensa con el ejemplo de maga Canaanita. Ya adora sila maga dios-dios que nuay vida en vez con el verdadero y vivo Dios. Como resulta, ya hace sila maga mal cosas. (Sal. 115:4-8) Como parte del diila adoranza, ya comete sila maga maka-asco acto de sexo y ya sacrificia maga bata. Na igual manera, cuando ya ignora el maga Israelita con Jehova y ya adora maga dios-dios, ya hace sila malo diila mismo cuerpo y ya hace sinti duele con el diila familia. (2 Cron. 28:1-4) Aquellos quien tiene autoridad nuay sigui con el maga principio de Jehova acerca na justicia. Ya abusa sila con el diila poder y ya maltrata con aquellos gendeh ta puede defende con el diila mismo cuerpo. (Eze. 34:1-4) Ya dale aviso si Jehova con el maga Israelita que hay juzga le con aquellos quien ta maltrata con el maga mujer y bata. (Deut. 10:17, 18; 27:19) Pero ya bendici le con el de suyu maga siervo cuando leal sila con ele y ya trata con otro con justicia.​—1 Rey 10:4-9.

15. Cosa kita puede aprende acerca con Jehova?

 ¹⁵ Leccion: Gendeh culpable si Jehova si aquellos quien ta clama que ta sirvi con ele ta ignora de suyu maga ley y ta pone na peligro con el de suyu maga siervo. Pero, ta ama kanaton si Jehova y sabe le si ta sufri kita por causa na injusticia. Ta sinti le el dolor que ta sinti kita mas pa na un nana que ta sinti con el sufrimiento del de suyu baby. (Isa. 49:15) Maskin gendeh le dayun entrevini, na justo tiempo hay juzga le con aquellos quien ta maltrata con otro si sila gendeh arripinti.

16-18. Na cosa maga aspeto de vida puede aplica con el Ley de Moises y cosa maga leccion kita puede aprende?

¹⁶ El Ley de Moises ta afecta con el manada aspeto del vida del un Israelita. Poreso, importante que juzga el maga iscujido anciano con el maga siervo del Dios na justo manera. Responsibilidad diila juzga gendeh lang na maga cosas que tiene que hace na adoranza con Jehova sino maskin el maga caso de conflicto o crimen. Nota el siguiente ejemplo.

¹⁷ Si ya mata el un Israelita con el un persona, gendeh con ele dayun mata. El maga anciano na de suyu ciudad hay investiga con el situacion antes de decidi si justo ba sentencia muerte con ele. (Deut. 19:2-7, 11-13) Ta resolva tambien sila otro pa maga caso​—como caso acerca na propiedad y maga caso de man maridable. (Ex. 21:35; Deut. 22:13-19) Si con justicia ta juzga el maga anciano y ta obedece el maga Israelita con el Ley, ta beneficia el todo y ta dale este honor con Jehova.​—Lev. 20:7, 8; Isa. 48:17, 18.

¹⁸ Leccion: Importante con Jehova el todo aspeto del diaton vida. Quierre le que trata kita con otro na amable manera y con justicia. Y ta nota le si cosa kita ta habla y ta hace maskin pa gendeh este ta puede mira el otro.​—Heb. 4:13.

19-21. (a) Paquemodo trata el maga anciano y juez con el maga siervo del Dios? (b) Cosa maga ley ya dale si Jehova y cosa maga leccion kita ya puede aprende?

¹⁹ Quierre si Jehova salva con el de suyu maga siervo na mal influencia del maga cerca nacion. Poreso, ya pidi le con el maga anciano y juez que aplica con el Ley na imparcial manera. Pero aquellos quien tiene autoridad para juzga gendeh debe trata sin lastima con el maga siervo de Jehova o queda sobra de istricto. Sino, necesita sila ama con el justicia.​—Deut. 1:13-17; 16:18-20.

²⁰ Tiene compasion si Jehova con el de suyu maga siervo poreso ya dale le maga ley para evita trata con el cada individual na gendeh justo manera. Por ejemplo, ya puede ayuda el Ley para menora el posibilidad que acusa falso con el un persona na un crimen. El acusao tiene derecho sabe si quien con ele ta acusa. (Deut. 19:16-19; 25:1) Y antes declara que culpable le, necesita tiene dos testigo quien dale evidencia. (Deut. 17:6; 19:15) Paquemodo si  el un Israelita ya comete crimen que donde un testigo lang ya puede mira? Gendeh le debe pensa que gendeh con ele castiga por causa na de suyu mal trabajo. Si Jehova ya puede mira el cosa le ya hace. Adentro na familia, ya dale autoridad con el tata pero limitao lang se autoridad. Na cuanto problema de familia, tiene responsibilidad el maga anciano del ciudad queda envuelto y dale el ultimo decicion.​—Deut. 21:18-21.

²¹ Leccion: Si Jehova ya dale el perfecto ejemplo; nuay le cosa ya hace que gendeh justo. (Sal. 9:7) Ta premia le con el maga leal ta obedece con el de suyu maga principio pero ta castiga le con aquellos quien ta abusa con el diila poder. (2 Sam. 22:21-23; Eze. 9:9, 10) El cuanto ta hace malo y ta pensa que puede lang sila escapa na castigo. Pero si llega ya el justo tiempo de Jehova, hay juzga gayot le kanila. (Prov. 28:13) Y si gendeh sila arripinti, hay puede sila sabe que “bien terrible para con aquel quien ay cai na mano del Dios vivo!”​—Heb. 10:30, 31.

22-24. (a) Con quien especifico ta protege el Ley y cosa kita puede aprende acerca con Jehova? (b) Cosa aviso el puede kita encontra na Exodo 22:22-24?

²² El Ley especifico ta protege con aquellos quien gendeh ta puede protege diila mismo cuerpo, igual na maga bata que nuay mas ya mayores, viuda y maga estranjero. Ya habla con el maga juez de Israel: “Gendeh tu debe quita con el derecho del maga estranjero o del maga bata que nuay tata y no  tu saca con el camisa del un viuda como un garantia.” (Deut. 24:17) Ta dale mira personal interes si Jehova con el maga maluya. Y ta castiga le con aquellos quien ta maltrata kanila.​—Le con el Exodo 22:22-24.

²³ El Ley ta protege tambien con el individual desde na sexual abuso entre na familia. (Lev. 18:6-30) Gendeh igual con el maga nacion alrededor del Israel quien ta permiti lang con ese practica, el maga siervo de Jehova debe mira con ese clase de crimen igual na mirada de Jehova​—como un cosa que detestable.

²⁴ Leccion: Quierre si Jehova que aquellos con quien le ya dale autoridad necesita tiene amable interes con aquellos con quien sila ta guia. Ta odia le con el sexual abuso y quierre le asigura especialmente aquellos maga maluya que ricibi proteccion y justicia.

25-26. (a) Porque kita puede habla que el amor y justicia igual na resuello y vida? (b) Cosa kita discuti na sunod articulo de este serie?

²⁵ El amor y justicia igual na resuello y vida; necesita ese dos para existi el un cosa aqui na tierra. Si convincido kita que ta trata kanaton si Jehova na justo manera, hay queda mas hondo el diaton amor para con ele. Y si ta ama kita con Dios y con el de suyu maga principio, mas motiva este kanaton que ama con otro y trata kanila na justo manera.

²⁶ El contrata del Ley de Moises ya ayuda con el maga Israelita tiene mas cerca relacion con Jehova. Pero, gendeh mas necesita obedece el maga siervo del Dios con ese ley despues cumpli si Jesus con el Ley y tiene cosa que mas bueno ya cambia con ese. (Rom. 10:4) Si apostol Pablo ya habla que el Ley igual como “sombra del maga cosa-cosa bueno que ta vene.” (Heb. 10:1) El sunod articulo de este serie hay discuti con el cuanto de ese maga buen cosas y el importancia del amor y justicia na congregacion.