1. Paquemodo el tres Testigo de Jehova ya esta leal con ele?

IMAGINA con el siguiente ecsena donde envuelto el maga Testigo de Jehova. (1) Na escuela el un joven hermana cuando el de suyu maestra ya manda con el todo estudiante na clase que participa na un holiday. Sabe le que gendeh este aceptable con Dios poreso con respeto le nuay conforma participa. (2) Ta participa na predicacion el un joven hermano que huyain. Ya realiza le que el de suyu schoolmate amo el ta queda na sunod casa​—un estudiante quien ya gangguia con el maga Testigo de Jehova. Pero ya anda siempre el hermano na ese casa para predica. (3) Ta trabaja enbuenamente el un hermano para dale el necesidad del de suyu familia. Un dia, ya manda con ele hace el de suyu amo un cosa que ilegal. Maskin pa posible con ele quita na trabajo, ya explica el hermano que debe le queda honesto y sigui con el ley cay amo se el Dios ta manda con el de suyu maga siervo.​—Rom. 13:1-4; Heb. 13:18.

2. Cosa maga pregunta kita considera y porque?

² Cosa calidad tiene el tres individual? Posible puede tu nota cuanto calidad, igual como coraje y pagka-honesto. Pero todo sila ya demonstra un precioso calidad, el integridad. Cada uno kanila ya dale mira lealtad con Jehova. Nuay sila man compromiso na maga principio del Dios. El integridad el ya manda move kanila para hace se. Asigurao que alegre si Jehova kanila cay ya dale sila mira ese calidad. Quierre tambien kita hace alegre con el diaton Tata na cielo. Poreso, discuti kita con este maga pregunta: Cosa el integridad? Porque kita se necesita? Y paquemodo kita hace fuerte con el diaton determinacion mentena diaton integridad durante este tiempo de dificultad?

3. (a) Paquemodo el maga siervo del Dios ta demonstra integridad? (b) Cosa maga ejemplo ta dale mira que importante kanaton que nuay defecto, completo o entero el un cosa?

³ Como maga siervo del Dios, ta dale kita mira integridad si con todo corazon el diaton amor y devocion para con Jehova como un Persona. Como resulta, ta considera kita una el de suyu voluntad na diaton maga decicion. Considera con el cuanto informacion acerca si paquemodo ya usa con el palabra integridad na Biblia. El Hebreo palabra que yan translate “integridad” quierre decir completo, nuay defecto o entero. Por ejemplo, el maga Israelita ta ofrece animal como sacrificio con Jehova y asegun na Ley, ese maga animal debe nuay defecto. * (Lev. 22:21, 22) Gendeh kanila ta permiti ofrece animal que falta pies, orejas o ojos, o tiene enfermedad. Importante con Jehova que ese animal nuay defecto. (Mal. 1:6-9) Puede kita entende si porque importante con Jehova que el un cosa nuay defecto o completo. Si ta cumpra kita un cosa, fruta man ese, libro o herramienta, no quierre kita aquel tiene defecto. Quierre kita aquel completo, nuay defecto o entero. Na igual manera, ansina clase de amor y lealtad quierre si Jehova.

4. (a) Porque el un imperfecto gente puede tiene integridad? (b) Asegun na Salmo 103:12-14, cosa si Jehova ta expecta kanaton?

⁴ Posible, ta sinti kita que ta puede kita hace manada kamali. Pero debe ba kita pensa que necesita kita queda perfecto para tiene integridad? Considera el dos razon si porque gendeh kita se debe pensa. Una, gendeh tan focus si Jehova con el diaton maga kamali. El de suyu Palabra ta habla: “Si kamali el cosa tu ta mira, O Jah, O Jehova, quien puede para?” (Sal. 130:3) Sabe si Jehova que imperfecto kita y preparao le para perdona kanaton. (Sal. 86:5) Ika-dos, sabe si Jehova el diaton limitacion y gendeh le ta expecta mas pa na cosa kita puede hace. (Le con el Salmo 103:12-14.) Entonces, na cosa manera kita queda nuay defecto adelante con Jehova?

5. Para na maga siervo de Jehova, porque necesita el amor para tiene integridad?

⁵ Para na maga siervo de Jehova, necesita el amor para tiene integridad. El diaton amor y leal devocion para con Dios como el diaton Tata na cielo, debe esta completo, nuay defecto o entero. Si el diaton amor hay esta ansina maskin bajo na probanza, ese ta dale mira que tiene kita integridad. (1 Cron. 28:9; Mat. 22:37) Considera otravez con el tres Testigo de Jehova que ya menciona na primer parapo. Porque quel sila ya hace? No quierre ba el joven hermana man enjoy na escuela, o quierre ba el joven hermano que man huya le na gente con quien le predica, o quierre ba el hermano quita con ele na trabajo? Siempre gendeh. Ya hace sila quel cay sabe sila que tiene maga justo principio si Jehova y tan focus sila na cosa ta hace alegre con ele. Cay ta ama sila con Jehova, pirmi sila ta considera con ele antes de hace un decicion. Na ese manera, ya dale sila mira que tiene sila integridad.

6. (a) Porque kita necesita integridad? (b) Paquemodo kanda Adan y Eva nuay puede demonstra integridad?

⁶ Porque kita todo necesita integridad? Necesita tu se cay si Satanas ya cuestiona con Jehova y ya cuestiona tambien le contigo. Ese rebelloso angel ya hace con el de suyu mismo cuerpo como Satanas o “el uno quien ta resisti” cuando na jardin de Eden. Ya hace le malo el nombre de Jehova cuando ya clama le que el Dios malo, canalla y deshonesto. Makatriste cay ya iscuji kanda Adan y Eva el lao de Satanas  y yan rebelde con Jehova. (Gen. 3:1-6) Na Eden, tiene sila manada oportunidad para hace fuerte el diila amor para con Jehova. Pero cuando ya pone kanila na probanza si Satanas, el diila amor tiene defecto, gendeh completo o entero. El otro issue ahora amo: Tiene ba gente quien esta leal con Dios Jehova por causa na amor con ele? O posible ba demonstra integridad el gente? Ese issue ya enfrenta si Job.

7. Base na Job 1:8-11, paquemodo si Jehova y si Satanas ta mira con el integridad de Job?

⁷ Ya vivi si Job na tiempo cuando na Egipto el maga Israelita. Bien diferente el integridad de Job. Imperfecto le y tan kamali igual kanaton. Pero, ta ama con ele si Jehova por causa na de suyu integridad. Posible que ya gangguia ya si Satanas con Jehova acerca na integridad del gente. Poreso, ya manda le con Satanas nota con Job. El manera del vida de Job ya dale mira que imbustero si Satanas! Ya pidi si Satanas que pone na probanza con el integridad de Job. Ya confia si Jehova con el de suyu amigo, si Job, poreso ya permiti Le con Satanas que hace se.​—Le con el Job 1:8-11.

8. Paquemodo si Satanas ya ataca con Job?

⁸ Nuay lastima si Satanas y un criminal. Ya saca le con el todo cosas que tiene si Job, ya mata con el de suyu maga esclavo y ya hace malo con el de suyu reputacion. Ya ataca si Satanas con el familia de Job y ya mata con el de suyu diez anak. Despues, ya ataca le con el salud de Job. Ya dale le con Job un bien duele enfermedad que ya sale afectao el entero cuerpo de suyu. Por causa na sobra tristeza y lingasa, el mujer de Job ya manda con ele que maldeci con Dios y muri. Si Job mismo quierre que  muri ya lang le pero ya mentena siempre le de suyu integridad. Despues, ya busca otro manera si Satanas. Ya usa le con el tres amigo de Job. Ya visita este maga hombre con Job por cuanto dia pero nuay sila puede dale comforta. Yan sermon sila con ele y ya regaña. Ya clama sila que el Dios amo el causa del de suyu maga problema y nuay queber el Dios na de suyu integridad. Gane, ya acusa sila que mal gente si Job quien conviene experiencia el cosas que ta pasa con ele!​—Job 1:13-22; 2:7-11; 15:4, 5; 22:3-6; 25:4-6.

9. Maskin ya experiencia maga dificultad, cosa nuay hace si Job?

⁹ Cosa el reaccion de Job na maga dificultad que ya experiencia le? Ya regaña le con el de suyu tres falso amigo y ya puede le habla maga cosas que na uliji ya admiti le que gendeh justo. Mas quierre si Job dale prueba que justo le contra dale prueba que justo el Dios. Ya puede le se hace cay gendeh le perfecto. (Job 6:3; 13:4, 5; 32:2; 34:5) Pero maskin na bien dificil situacion, nuay si Job deja con Dios Jehova. Nuay le creé con el de suyu maga falso amigo. Ya habla le: “Imposible para conmigo que declara con ustedes como recto! Hasta hay muri yo, gendeh yo hace perde el de mio integridad!” (Job 27:5) Ese maga palabra ta dale mira que si Job determinao mentena de suyu integridad, maskin cosa pa sucede. Si ya puede se hace si Job, puede tambien kita.

10. Paquemodo tu ya queda envuelto na acusacion de Satanas con Job?

¹⁰ Paquemodo tu ya queda envuelto na acusacion de Satanas con Job? Cay dol ta habla le que gendeh tu deverasan ta ama con Dios Jehova, que descanza tu sirvi con ele si vida ya de tuyu el envuelto y gendeh tu puede mentena de tuyu integridad! (Job 2:4, 5; Rev. 12:10) Cosa tu ta sinti con ese? Ya sinti ba tu duele? Pero, pensa tu este: Ta confia contigo si Jehova poreso ya dale le contigo un bonito oportunidad. Ta permiti le con Satanas que pone na probanza con el de tuyu integridad. Tiene confianza si Jehova que hay mentena tu de tuyu integridad y ayuda tu dale prueba que imbustero si Satanas. Y ta promete si Jehova que ayuda le contigo para hace se. (Heb. 13:6) Un grande privilegio gayot que confia kanaton el Soberano na universo! Ya puede ba tu mira si porque bien importante el integridad? Ta ayuda se kanaton para dale prueba que imbustero si Satanas, defende con el nombre del diaton Tata y suporta con el manera del de suyu rulanza. Paquemodo kita puede mentena el diaton integridad?

11. Cosa kita puede aprende con Job?

¹¹ Mas ta ataca si Satanas con el maga siervo del Dios na este “ultimo maga dia.” (2 Tim. 3:1) Paquemodo kita hace fuerte diaton determinacion que mentena con el diaton integridad ahora? Mira kita si cosa kita puede aprende con Job. Antes le enfrenta con el maga probanza, manada beses ya le ya mentena de suyu integridad con Jehova. Considera con el tres leccion que puede kita aprende con ele acerca si paquemodo hace fuerte con el diaton determinacion mentena diaton integridad.

12. (a) Como ya menciona na Job 26:7, 8, 14, paquemodo si Job ya tiene hondo apreciacion y respeto con Jehova? (b) Paquemodo kita puede tiene hondo apreciacion para con Dios?

¹² Ya tiene hondo apreciacion si Job con Jehova y como resulta, ya puede le hace fuerte el de suyu amor con Ele. Ya dale le tiempo para medita con el maga bonito creacion de Jehova. (Le con el Job 26:7, 8, 14.) Para con ele, bien bale gayot el cosa ya crea el Dios igual como el tierra, cielo, celaje y trueno. Pero, ya realiza le que un poco lang el cosa le sabe acerca na bien manada creacion del Dios. Ya aprecia tambien ele con el maga palabra de Jehova. Si Job ya habla: “Ya guarda yo el de  suyu maga palabra.” (Job 23:12) Si Job tiene hondo apreciacion y respeto con Jehova. Ta ama le con el de suyu Tata y quierre hace alegre con ele. Como resulta, si Job ya queda mas determinao mentena el de suyu integridad. Debe ansina tambien kita. Si compara na maga gente na tiempo de Job, mas mucho kita cosa sabe acerca na maga bonito creacion. Y tiene kita el entero inspirao libro, el Biblia, que ta ayuda kanaton para conoce si quien gayot si Jehova. El todo cosa kita ya aprende puede ayuda kanaton para tiene hondo apreciacion. Y este hondo apreciacion y respeto con Jehova hay manda tambien move kanaton para ama y obedece con ele y ayuda kanaton hace fuerte el diaton determinacion mentena con el diaton integridad.​—Job 28:28.

13-14. (a) Base na Job 31:1, paquemodo si Job ya dale mira obediencia? (b) Paquemodo kita puede imita con Job?

¹³ El obediencia de Job na todo cosas ya ayuda con ele mentena el de suyu integridad. Sabe si Job que para tiene integridad, necesita le obedece con Jehova. El deverasan, cada vez kita ta obedece ta queda fuerte el diaton determinacion para mentena con el diaton integridad. Todo’l dia ya hace esfuerzo si Job para obedece con Dios. Por ejemplo, con cuidao le na de suyu conducta con el maga mujer. (Le con el Job 31:1.) Como un casao, sabe le que gendeh propio dale romantico atencion con maskin quien que gendeh de suyu mujer. Ahora, ta vivi kita na mundo que lleno de sexual tentacion. Igual con Job, ta evita ba kita dale gendeh propio atencion con maskin quien que gendeh diaton mujer o marido? Ta evita ba tambien kita mira maskin cosa clase de pornografia? (Mat. 5:28) Si ta hace kita esfuerzo cada dia para controla con ese, ta hace kita fuerte con el diaton determinacion mentena con el diaton integridad.

¹⁴ Ya obedece tambien si Job con Jehova na manera del de suyu mirada na maga material cosas. Sabe si Job que si pone le el de suyu confianza  na de suyu maga material cosas, hay comete le serioso culpa y conviene con ele castiga. (Job 31:24, 25, 28) Ahora, ta vivi kita na mundo que ta pone sobra importancia na material cosas. Si cultiva kita justo mirada na sen y material cosas, como cosa ta anima kanaton el Biblia, ta hace kita fuerte con el diaton determinacion mentena con el diaton integridad.​—Prov. 30:8, 9; Mat. 6:19-21.

15. (a) Cosa ya puede ayuda con Job para mentena con el de suyu integridad? (b) Si tan focus kita con el diaton esperanza, paquemodo este puede ayuda kanaton?

¹⁵ Yan focus si Job na bendicion que hay dale con ele poreso ya puede le mentena de suyu integridad. Ta creé si Job que ta mira si Jehova con el de suyu integridad. (Job 31:6) Maskin ta enfrenta le maga probanza, si Job tiene confianza que bendici con ele si Jehova. Y asigurao que ese confianza ya ayuda con ele para mentena con el de suyu integridad. Bien alegre si Jehova na integridad de Job poreso ya premia le con Job maskin imperfecto pa este! (Job 42:12-17; Sant. 5:11) Y asigurao que hay tiene si Job mas grande bendicion na futuro. Tiene ba tu fuerte confianza que si Jehova hay bendici contigo por causa na de tuyu integridad? El diaton Dios nuay cambia. (Mal. 3:6) Si ta acorda kita que ta dale le valor con el diaton integridad, hay esta claro kanaton el diaton esperanza na futuro.​—1 Tes. 5:8, 9.

16. Cosa kita debe determinao hace?

¹⁶ Entonces, queda determinao mentena con el de tuyu integridad! Tiene vez, posible ta sinti tu que etu lang el quien ta mentena integridad pero tiene millones igual contigo quien ta hace tambien se na entero mundo. Poreso, gendeh tu solo. Queda tu igual con el maga fiel hombre y mujer de antes quien ya mentena con el diila integridad, maskin pa mata kanila. (Heb. 11:36-38; 12:1) Ojala todo kita queda determinao mentena con el diaton integridad igual con Job, quien ya habla: “Gendeh yo hace perde el de mio integridad!” Y ojala puede kita dale gloria con Jehova hasta para cuando por medio del diaton integridad!