Del 1913, ya bautiza con el de mio tata, si John Mills, na New York City na edad de 25. Si Hermano Russell el quien ya dale el talk de bautismo. Nuay dura, ya anda si Papang na Trinidad donde ya casa le con Constance Farmer, un activo Estudiante de Biblia. Ya ayuda si Papang con el de suyu amigo, si William R. Brown, para dale mira el salida “Photo-Drama of Creation.” Ya hace sila este hasta yan assign con Hermano y Hermana Brown na West Africa del 1923. El de mio mayores que igual tiene esperanza na cielo ya continua sirvi con Jehova na Trinidad.

Nueve kame man hermano y hermana. El mayor amo si Rutherford que estaba na apellido del presidente del Watch Tower Bible and Tract Society de antes. Ya nace yo del Deciembre 30, 1922 y el de mio nombre ya saca na apellido de Clayton J. Woodworth, el editor del The Golden Age (ahora Awake!). Nuay mas ya kanamon manda saca alto educacion el diamon mayores sino ya anima sila kanamon que tiene maga espiritual goal. Bueno enseña si Mamang usando el Escritura. Quierre-quierre si Papang cunta istoria estaba na Biblia. Ta pretende le como ele el caracter na Biblia para puede kame imagina el istoria.

Ya tiene buen resulta el diila esfuerzo. Na cinco man hermano, tres kanamon el ya puede entra escuela na Gilead. El diamon tres hermana yan pioneer por largo tiempo na Trinidad and Tobago. Por medio del diila enseñanza y buen ejemplo, el diamon mayores ya hace kanamon engranda “na casa de Jehova.” El cosas que ya anima sila kanamon ya puede ayuda para esta y crici kame “na patio del diaton Dios.”​—Sal. 92:13.

Ta organiza con el predicacion na diamon casa. Tan junto-junto el maga pioneer alla y pirmi sila tan cuento acerca con Hermano George Young de Canada y un misionario quien ya visita na Trinidad. Alegre man cuento el de mio mayores  acerca con el diila uban de antes na predicacion, el man maridable Brown, que na aquel tiempo talla na West Africa. Todo este ya manda move conmigo para principia predica na edad de diez año.

Bien franca el mensaje na diaton magasin na aquel tiempo que ta revela el trabajo del falso religion, negocio y mabuling politica. Como resulta, del 1936 el maga clero ya convinci con el gobernador de Trinidad que prohibi con el todo publicacion del Watch Tower. Ya esconde kame el maga publicacion pero ya continua kame este usa hasta ya acaba. Ya predica kame usando maga placard y ya distribui maga handbill mientras ta marcha y tan bicicleta. Junto na un grupo estaba na barrio de Tunapuna que tiene sound-car, ya predica kame maskin na maga lejos lugar na Trinidad. Bale gayot! Este maga suceso ya anima conmigo para bautiza na edad de 16 año.

El espiritual cosas que ya ricibi kame estaba na diamon mayores y aquel maga experiencia ya causa para tiene yo goal queda misionario. Nuay cambia el de mio goal cuando ya anda yo na Aruba del 1944 y yan junto yo alla con Hermano Edmund W. Cummings. Bien alegre kame cay tiene diez gente quien ya atende con el Comemoracion del 1945. Del 1946, ya forma el primer congregacion na ese isla.

Nuay dura, ya puede yo predica na informal manera con el de mio uban na trabajo, si Oris Williams. Ya pricura si Oris defende con el doctrina que ya enseña con ele. Pero por medio na un Bible study, ya aprende le si cosa deverasan ta habla el Biblia y ya bautiza le del Enero 5, 1947. Despues, ya queda kame in love na uno’y otro y ya casa kame dos. Ya principia le man pioneer del Noviembre 1950. Junto con Oris ya queda yo bien alegre.

Del 1955, ya invita kanamon na Gilead School. Como preparacion, yan resign kame na diamon trabajo, ya vende diamon casa y otro pa cosas y despues, ya sale kame na Aruba. Del Julio 29, 1956, ya gradua kame na ika-27 clase de Gilead y yan assign kanamon na Nigeria.

Cuando ya acorda si Oris el diamon pasada, ya puede le habla: “El sagrao espiritu de Jehova puede ayuda con el un persona para man adjust na maga dificultad na servicio como misionario. Gendeh igual na de mio marido, nuay na pensamiento de mio queda misionario. Mas quierre yo na casa lang y tiene maga anak. Ya cambia de mio pensamiento cuando ya realiza yo que bien apuro el predicacion del buen noticia. Despues gradua na Gilead, preparao ya yo y determinao predica como un misionario. Cuando para munta ya kame na barco Queen Mary, si Worth Thornton que estaba na oficina de Hermano Knorr, ya habla kanamon que ojala tiene kame buen viaje. Ya menciona tambien le que hay sirvi kame na Bethel. Yan lingasa yo y ya habla, ‘Ha, Bethel?’ Pero ya puede dayun yo man adjust y ya gusta yo sirvi na Bethel que donde ya tiene yo otro-otro assignment. Yan enjoy gayot yo con el trabajo como un receptionist. Quierre-quierre yo man cuento con el maga gente y este assignment ya dale conmigo oportunidad para conoce maga Nigerian hermano. Manada ta llega mapolvos, cansao, con sequia y con hambre. Alegre yo dale kanila comida y otro pa cosa que necesita sila. Todo se para na servicio con Jehova y ese el cosa conmigo ta hace alegre.” Si, el cada assignment ya ayuda kanamon para progresa.

Na un celebracion de familia na Trinidad del 1961, ya cunta si Hermano Brown cuanto maga experiencia de suyu na Africa. Despues, ya relata yo el progreso na Nigeria. Si Hermano Brown ya pone su brazo na hombro de mio y ya habla con el de mio tata: “Johnny, nuay tu puede llega na Africa pero bueno cay si Woodworth ya puede!” Si Papang ya contesta: “Bueno se Worth, continua!” El cosa ya habla aquellos maga experienciao siervo de Jehova ya ayuda para queda mas fuerte de mio deseo cumpli enbuenamente con el de mio ministerio.

Del 1962, ya tiene yo privilegio para ricibi mas training na ika-37 clase de Gilead adentro de diez meses. Si Hermano Wilfred Gooch, el branch  overseer del Nigeria aquel tiempo, amo uno del maga estudiante del ika-38 clase de Gilead y yan assign con ele na England. Por causa con ese, iyo el ya queda branch overseer na Nigeria. Igual con Hermano Brown, onde-onde yo yan viaje y ya conoce maga Nigerian hermano. Maskin pa nuay sila maga cosas que tiene el maga gente na maga rico lugar, alegre y contento sila. Prueba se que el alegre vida gendeh ta depende na sen y material cosas. Maskin ansina el diila situacion, bonito mira kanila que limpio, arreglao y decente ta muda na miting. Si ta atende convencion, manada kanila el ta munta na truck y na bolekajas * (un bus na diila lugar que abierto el costao). Mas mucho, tiene maga mensaje escribido na ese bus. Uno de ese amo: “Na maga diutay tulu de agua ya forma el mar.”

Deverasan gayot ese maga palabra! Importante el esfuerzo del cada individual, incluido el diamon esfuerzo de Oris. Del 1974, el Nigeria amo el primer nacion apuera del United States que ya tiene 100,000 publisher. Ya progresa gayot el trabajo!

Durante ese progreso, ya sucede el Guerra Civil na Nigeria del 1967 hasta 1970. Por cuanto mes, nuay comunicacion na branch office el maga hermano na Biafra que na otro lao del Niger River. Poreso, necesita kame lleva maga espiritual comida kanila. Como cosa ya menciona na principio, con rezo y confianza con Jehova, ya travesa kame con ese rio manada beses.

Ta puede ga’t yo acorda el maga tiempo que ta travesa kame con ese rio. Na peligro el diamon vida por causa na enfermedad, na maga soldao quien ta tira dayun y otro pa. Gendeh basta-basta puede pasa na maga soldao de gobierno pero mas makamiedo si na otro lao del rio donde tiene maga rebelde. Un noche, ya travesa yo con ese rio muntao na un baroto sale na Asaba para na Onitsha y ya anda na Enugu para anima con el maga hermano quien tiene responsibilidad na congregacion alla. Na otro viaje, ya puede tambien kame anima con el maga anciano na Aba na tiempo de blackout que ya manda el gobierno. Na Port Harcourt, ya termina dayun el diamon miting por medio na rezo cuando el maga soldao ya puede ya entra na Biafra.

Bien importante ese maga miting para dale asiguranza con el maga hermano que ta cuida y ta ama kanila si Jehova y para dale kanila consejo acerca na neutralidad y unidad. El maga Nigerian hermano ya puede aguanta bajo na ese maga dificultad. El diila amor para na uno’y otro mas fuerte que con el discriminacion y ya esta sila unido. Un grande privilegio gayot que junto yo kanila na ese tiempo de dificultad!

Del 1969, si Hermano Milton G. Henschel amo el chairman del International Assembly na Yankee Stadium, New York que tiene tema “Peace on Earth.” Como de suyu assistant, manada yo cosa ya aprende con ele. Ya ricibi yo este training na justo tiempo cay del 1970 ya tiene kame International Assembly na Lagos, Nigeria que tiene tema “Men of Goodwill.” Maskin nuevo lang ya acaba el guerra civil, ya tiene siempre buen exito este ocasion na ayuda de Jehova. Por primer vez, yan translate con el programa na 17 lengguaje y tiene 121,128 quien ya atende. Presente kanda Hermano Knorr, Hermano Henschel y el otro pa visita estaba na United States y England durante ese asemblea que donde tiene 3,775 quien ya bautiza​—uno de maga asemblea que donde bien manada el ya bautiza desde tiempo de Pentecostes. Bien busy yo ayuda organiza con ese ocasion. El numero del maga publisher bien pronto ya queda manada!

Na mas de 30 año na Nigeria, tiene vez ta sirvi yo como un traveling overseer y como un zone overseer na West Africa. Ya aprecia gayot el maga misionario cay ya dale kanila atencion y ya anima kanila! Un grande privilegio para conmigo que puede asigura kanila que nuay kanila ulvida! Ya aprende yo na este assignment que si dale kita mira personal interes con otro, puede se ayuda kanila para progresa y mentena el unidad del organizacion de Jehova.

Solamente na ayuda de Jehova, ya puede kame aguanta maskin ya enfrenta kame maga  problema por causa na guerra civil y enfermedad. Ya puede gayot kame mira que ta bendici kanamon si Jehova. Habla pa si Oris:

“Cuanto beses kame ya tiene malaria. Un tiempo, ya desma si Worth y ya lleva con ele na hospital na Lagos. Ya habla conmigo que baka muri el de mio marido pero bueno cay nuay se sucede! Cuando ya dispierta ya le, ya converza le acerca na Reino del Dios con el nurse quien ta vicia con ele. Despues, ya sigui yo con Worth visita con el nurse, si Mr. Nwambiwe, para cultiva de suyu interes na Biblia. Ya acepta ele el verdad y na uliji, ya queda un anciano na Aba. Manada tambien yo con quien ya puede ayuda para queda siervo de Jehova, maskin maga devoto Muslim. Pero yan enjoy gayot kame conoce y ama con el maga Nigerian, incluido el diila cultura, practica y lengguaje.”

Este el otro cosa que ya aprende kame: Para progresa na diamon assignment na otro lugar, necesita kame aprende ama con el diaton maga hermano y hermana maskin diferente el diila cultura kanamon.

Despues kame sirvi na Bethel na Nigeria, del 1987 ya ricibi kame un nuevo assignment para sirvi como maga misionario na un bonito isla de St. Lucia na Caribbean. Bien bonito el diamon assignment pero ya enfrenta kame maga dificultad que nuevo para kanamon. Gendeh igual na Africa que donde ta casa na manada mujer el un hombre, aqui na St. Lucia, el maga gente tan junto maskin gendeh casao. El Palabra del Dios ya manda move con el manada na diamon maga Bible study para hace maga necesita cambio.

Cuando de edad ya kame, el Cuerpo Gobernante ya transfiri kanamon na world headquarters na Brooklyn, New York, U.S.A., del 2005. Cada dia, ta rindi yo gracias con Jehova cay ya dale le conmigo mujer igual con Oris. Ya muri le del 2015 y gendeh yo puede pone na palabra si paquemodo quel de duele. Nuay yo con ele con quien puede compara y bien amable mujer gayot le. Ya ama gayot yo con ele adentro de 68 año que junto kame. Ya puede kame sabe si cosa el necesita para queda alegre na matrimonio y na congregacion. Necesita kita somete, perdona, esta humilde y dale mira el fruta del espiritu.

Si tan luya kame, ta confia kame con Jehova que ayuda le kanamon continua sirvi con ele. Mientras ta continua kame man adjust, ta puede kame mira que mas ta queda enbuenamente el maga cosa-cosa​—y na futuro, tiene pa mas bonito cosa que ta espera kanamon!​—Isa. 60:17; 2 Cor. 13:11.

Ya bendici si Jehova el esfuerzo del de mio mayores y del otro pa na Trinidad and Tobago. Asegun na reciente report, tiene 9,892 quien ya queda parte del verdadero adoranza. Na Aruba, manada el quien ta ayuda para hace fuerte con el congregacion onde yo estaba. Alli na ese isla, tiene ya ahora 14 congregacion. El numero del publisher na Nigeria mas ya queda manada y ahora 381,398 ya. Y na isla de St. Lucia, 783 el quien ta suporta con el Reino de Jehova.

Ahora, mas de 90 ya el de mio edad. Acerca con aquellos con quien ya siembra na casa de Jehova, el Salmo 92:14 ta habla: “Maskin de edad ya, hay produci siempre sila fruta. Hay esta sila fuerte y fresco.” Ta rindi gayot yo gracias cay ya usa yo el de mio vida na servicio con Jehova. El maga precioso cosa que ya ricibi yo ya anima conmigo para hace el todo na servicio con Jehova. Na amor leal de Jehova, ya deja le que ‘crici yo na patio del de mio Dios.’​—Sal. 92:13.