1-2. (a) Cosa ya habla el Biblia acerca con Moises y cosa le ya hace? (b) Cosa un bonito razon kita tiene para queda sumiso?

YA HABLA el Biblia que si Moises amo el “de con todo sumiso na todo gente na entero tierra.” (Num. 12:3) Quierre decir ba este que ele maluya, miedo tiene confrontacion y tiene miedo hace decicion? Ese el cosa ta pensa el otro acerca na un sumiso persona. Pero gendeh se deverasan. Si Moises mafuerza, tiene coraje y gendeh ta tiene miedo hace decicion. Na ayuda de Jehova, ya confronta le con el rey del Egipto, ya guia con el posible 3,000,000 gente na desierto y ya ayuda con el nacion de Israel para ganá contra con el diila maga enemigo.

² Nuay kita experiencia el maga dificultad que ya enfrenta si Moises pero cada dia, necesita kita enfrenta con el maga gente o situacion que ta hace dificil para kanaton queda sumiso. Pero tiene un bonito razon para cultiva con este calidad. Ya promete si Jehova que “el maga sumiso hay hereda con el tierra.” (Sal. 37:11) Puede ba tu habla que tu un sumiso persona? Habla ba el otro que ansina tu clase de gente? Antes kita puede contesta con ese maga importante pregunta, necesita kita una sabe si cosa quierre decir que queda sumiso.

3-4. (a) Na cosa igual el pagka-sumiso? (b) Cosa cuatro calidad kita necesita para queda kita sumiso y porque?

³ Igual na un bonito painting el pagka-sumiso. * Na cosa manera?  Igual na un pintor que ta usa diferente y bonito maga color para produci un painting, debe tambien kita tiene maga diferente calidad para queda sumiso. Cuanto de este maga calidad amo el humildad, obediencia, pagka-calmao y coraje. Porque kita necesita con este maga calidad para puede hace alegre con Jehova?

⁴ El maga humilde gente lang el ta obedece con el voluntad del Dios. Parte del voluntad del Dios amo que queda kita calmao. (Mat. 5:5; Gal. 5:23, NW) Si ta hace kita con el voluntad del Dios, rabiao kanaton si Satanas. Poreso maskin pa humilde y calmao kita, manada gente quien parte del mundo de Satanas el rabiao kanaton. (Juan 15:18, 19) Como resulta, necesita kita coraje para puede resisti con Satanas.

5-6. (a) Porque bien rabiao si Satanas con el maga sumiso? (b) Cosa maga pregunta kita contesta?

⁵ El un sumiso persona bien diferente con el un persona que orgulloso, gendeh ta puede controla de suyu rabia y ta desobedece con Jehova. Ansina gayot si Satanas. Poreso, bien rabiao le con el maga sumiso! Ta dale sila mira que bien malo le cay tiene sila maga buen calidad que nuay ele. Y mas pa, ta dale sila prueba que imbustero le. Porque? Cay maskin cosa pa le habla o hace, gendeh le puede sangga con el maga sumiso que sirvi con Jehova!​—Job 2:3-5.

⁶ Cosa maga situacion mas dificil para kanaton queda sumiso? Y porque kita debe continua cultiva ese calidad? Para contesta con este maga pregunta, man repaso kita con el ejemplo de Moises, del tres Hebreo cautivo na Babilonia y de Jesus.

7-8. Cosa el reaccion de Moises cuando nuay con ele dale mira respeto el otro?

⁷ Si tiene kita autoridad: Posible, dificil para con aquellos quien tiene autoridad que esta sumiso especialmente si gendeh kanila ta respeta o si ta cuestiona con el diila decicion aquellos con quien sila tiene autoridad. Ya sucede ya ba se contigo? Paquemodo si ansina contigo ya hace el un miembro del de tuyu familia? Cosa tu hace? Considera si cosa ya hace si Moises na ese situacion.

⁸ Ya iscuji si Jehova con Moises como lider del Israel y ya permiti con ele que escribi con  el maga ley para con ese nacion. Sin duda que ta suporta si Jehova con Moises. Pero maskin pa ansina, el de suyu hermana y hermano, kanda Miriam y Aaron, yan contra y ya cuestiona con el de suyu decicion que casa con el mujer que ya iscuji le. El cuanto quien tiene posicion igual de Moises posible rabia y pricura man balus​—pero gendeh si Moises. Nuay le dayun rabia. Gane, cuando ya castiga con Miriam que donde ya queda le un leproso, ya pidi si Moises con Jehova que cura con ele. (Num. 12:1-13) Porque ansina el reaccion de Moises?

9-10. (a) Cosa si Jehova ya hace entende con Moises? (b) Cosa puede aprende con Moises el maga cabeza del familia y maga anciano?

⁹ Ya permiti si Moises que man train con ele si Jehova. Maga 40 año ya pasa, cuando miembro pa le del familia del rey de Egipto, gendeh sumiso si Moises. Bien pronto le rabia y ya puede pa gane le mata un gente quien para con ele gendeh ta actua na justo manera. Ya pensa si Moises que uyun si Jehova na cosa le ya hace. Por 40 año, ya hace entende si Jehova con Moises que gendeh lang coraje el necesita le para guia con el maga Israelita; necesita le queda sumiso. Y para queda sumiso, necesita tambien le queda humilde, calma y obediente. Ya aprende se ele y ya queda un buen lider.​—Ex. 2:11, 12; Act. 7:21-30, 36.

¹⁰ Ahora, el maga cabeza del familia y maga anciano debe imita con Moises. Si gendeh contigo ta dale mira respeto, no dayun rabia. Queda humilde y admiti si tiene tu kamali. (Ecl. 7:9, 20) Sigui con el direccion de Jehova si paquemodo solva con el maga problema. Y pirmi contesta na calmao manera. (Prov. 15:1) El maga cabeza del familia y maga anciano quien ta hace ese ta hace alegre con Jehova, ta ayuda mentena con el paz y ta dale buen ejemplo si paquemodo queda sumiso.

11-13. Cosa el buen ejemplo que ya dale kanaton el tres Hebreo?

¹¹ Si ta persigui kanaton: Desde antes pa, el maga gente quien ta rula ta persigui con el maga siervo de Jehova. Ta habla sila que ya comete kita maga “crimen,” pero el deverasan, ya iscuji kita “obedece con el Dios, y gendeh con el maga gente.” (Act. 5:29) Posible que gangguia kanaton, hace preso o gulpia. Pero na ayuda de Jehova, gendeh kita man balus sino hay esta kita calmao.

¹² Considera con el ejemplo del tres Hebreo cautivo—kanda Hananias, Misael y Azarias. *  Ya manda kanila el rey del Babilonia que hinca con el grande imagen que hacido de oro. Na calmao manera, ya explica sila con el rey si porque gendeh sila adora con el imagen. Ya esta sila obediente con Dios maskin pa ya amenaza kanila el rey que quema kanila na un bien caliente horno. Ya salva dayun kanila si Jehova pero nuay sila expecta que hace quel ele para kanila. Sino, conforme sila acepta maskin cosa que permiti si Jehova que sucede kanila. (Dan. 3:1, 8-28) Ya dale sila mira que el maga sumiso deverasan tiene coraje. Nuay maskin quien rey, maskin cosa amenazo y castigo el puede quita con el diaton determinacion que dale con Jehova diaton “exclusivo devocion.”​—Ex. 20:4, 5.

¹³ Si ta pone na probanza con el diaton lealtad con Jehova, paquemodo kita puede imita con el tres Hebreo? Con humildad kita confia que si Jehova hay ayuda kanaton. (Sal. 118:6, 7) Calmao y con respeto kita contesta con aquellos quien ta acusa kanaton. (1 Ped. 3:15) Y nunca kita man compromiso el diaton buen amistad con el diaton amable Tata.

14-15. (a) Cosa posible sucede si sobra kita de stress? (b) Asegun na Maga Actividad 8:32, porque kita puede habla que si Jesus el de con todo buen ejemplo quien ya esta sumiso maskin pa na grabe stress?

¹⁴ Si tan stress kita: Todo kita tan stress por causa na otro-otro maga razon. Posible, ta sinti kita este antes kita saca test na escuela o antes hace un particular actividad na trabajo. O baka cay ta pensa kita con el operacion y medical test que saca kita. Si stress kita, dificil queda sumiso. El maga situacion que gendeh kita tan dificil de antes posible irita kanaton. Posible, puede ya kita habla gendeh bueno con otro o gendeh kanila trata enbuenamente. Si ta sinti tu stress, considera con el ejemplo de Jesus.

¹⁵ Durante el ultimo meses del vida de Jesus na tierra, ya experiencia le sobra stress. Sabe le que cerca ya con ele mata y hay sufri gayot le. (Juan 3:14, 15; Gal. 3:13) Cuanto meses antes del de suyu muerte, ya habla le que malingasa le. (Luc. 12:50) Y cuanto dia antes del de suyu muerte, si Jesus ya habla: “El dimio alma bien triste ahora.” Puede kita mira que humilde le y obediente con Dios cuando ya reza le: “Tata, libra conmigo de este hora?​—Gendeh gayot! Cay este amo el razon porque ya llega yo na este hora. Tata, dale gloria con el de Uste Nombre.” (Juan 12:27, 28) Cuando ya llega ya el hora, con coraje si Jesus ya entrega de suyu cuerpo na maga enemigo del Dios quien ya mata con ele na manera que bien duele y makahuya. Maskin pa ele bien stress y ta sufri, ya hace si Jesus el voluntad del Dios. Asigurao, puede kita habla que si Jesus el de con todo buen ejemplo quien ya esta sumiso maskin pa na grabe stress!​—Le con el Maga Actividad 8:32.

16-17. (a) Paquemodo el maga amigo de Jesus ya actua na manera que ya hace dificil para con ele que esta sumiso? (b) Paquemodo kita puede imita con Jesus?

¹⁶ Na ultimo noche del vida de Jesus como un gente, el de suyu maga amigo ya actua na manera que ya hace dificil para con ele que esta sumiso. Imagina con el stress de Jesus ese noche. Hay esta ba le fiel hasta na de suyu muerte? Ta depende con ele el vida del billones de maga gente. (Rom. 5:18, 19) Y el mas importante, envuelto el reputacion del de suyu Tata. (Job 2:4) Despues, durante el de suyu ultimo cena junto con el de suyu maga amigo, “ya man discutijan tamen el maga dicipulo si quien man diila el mas importante.” Manada beses ya corecta si Jesus con el de suyu maga amigo acerca con  este y gane maskin aquel mismo noche! Pero si Jesus nuay consumi. Na amable pero serioso manera, ya explica le otravez si cosa custumbre sila debe cultiva. Y despues, ya dale le comendacion con el de suyu maga amigo cay ya esta sila junto con ele.​—Luc. 22:24-28; Juan 13:1-5, 12-15.

¹⁷ Cosa tu hace si ya sucede se contigo? Puede kita imita con Jesus y esta calmao maskin pa ta experiencia stress. Obedece con el mandamiento de Jehova que “aguanta y perdona con uno y otro.” (Col. 3:13) Puede kita obedece con este mandato si acorda kita que todo kita ta puede habla o hace maga cosas que ta manda irita con otro. (Prov. 12:18; Sant. 3:2, 5) Y pirmi dale comendacion con otro na diila maga buen calidad.​—Ef. 4:29.

18. Paquemodo si Jehova ta ayuda con el maga sumiso hace justo decicion pero cosa sila debe hace?

¹⁸ Hay hace kita maga justo decicion. Si tan dificil kita decidi si cosa hace, hay ayuda kanaton si Jehova para hace justo decicion. Pero ayuda lang le kanaton si sumiso kita. Ya promete ele que hay oi le “con el pidimiento del maga sumiso.” (Sal. 10:17) Y gendeh lang le basta oi con el diaton maga pidimiento. El Biblia ya promete: “Hay guia le con el maga sumiso na cosa justo y hay enseña le con el maga sumiso acerca na de suyu camino.” (Sal. 25:9) Ta hace se si Jehova por medio na Biblia, na maga publicacion * y na maga programa del “fiel y sabio esclavo.” (Mat. 24:45-47, NW) Debe kita con humildad acepta que necesita kita el ayuda de Jehova, estudia con el material que ta dale le y con todo corazon aplica si cosa kita ya aprende.

19-21. Cosa kamali ya hace si Moises na Kades y cosa maga leccion kita puede aprende con este?

¹⁹ Evita kita man kamali. Pensa otravez con Moises. Por cuanto decada, sumiso le y ya hace alegre con Jehova. Pero cuando cerca ya 40 año ta esta el maga Israelita na desierto, nuay puede esta sumiso si Moises. Nuevo lang ya muri y ya entera na Kades con el de suyu hermana, posible el quien con ele ya salva na Egipto. Y el maga Israelita ta reclama ya tambien que gendeh kanila ta cuida enbuenamente. Este tiempo, ta pelea sila con Moises cay falta agua. Maskin pa na todo milagro que ya hace si Jehova por  medio con Moises y enbuenamente kanila ya guia si Moises, el maga gente reclamoso siempre. Ta reclama sila gendeh lang cay falta agua sino con Moises mismo cay dol ta disculpa sila con ele si porque sila con sequia.​—Num. 20:1-5, 9-11.

²⁰ Ya queda bien rabiao si Moises y nuay esta sumiso. En vez de man cuento con el piedra como cosa ya manda si Jehova, rabiao yan cuento si Moises con el maga gente y ya habla que hace ele milagro. Y despues usando de suyu baston, dos beses le ya pega con el piedra y ya sale mucho agua. Ya comete le serioso kamali cay ya queda le orgulloso y bien rabiao. (Sal. 106:32, 33) Cay nuay le esta sumiso, nuay permiti con Moises entra na tierra que ya promete kanila si Jehova.​—Num. 20:12.

²¹ Puede kita aprende maga importante leccion na este ejemplo. Una, debe kita continua hace esfuerzo para esta sumiso. Si gendeh kita con cuidao, posible kita queda orgulloso y puede kita habla o actua na gendeh buen manera. Ika-dos, dificil esta sumiso si stress kita poreso pricura queda sumiso maskin pa ta experiencia kita dificultad.

22-23. (a) Porque kita debe pricura queda sumiso? (b) Cosa quierre decir del palabra na Sofonias 2:3?

²² Queda kita protegido. Gendeh mas dura, hay quita si Jehova con todo mal gente na tierra y el maga sumiso lang el queda. Como resulta, hay tiene gayot deverasan paz na tierra. (Sal. 37:10, 11) Uno ba tu de aquellos maga sumiso quien sobrevivi? Sucede lang se si hace tu si cosa ya habla si Jehova por medio de profeta Sofonias.​—Le con el Sofonias 2:3.

²³ Porque ya habla el Sofonias 2:3: “Baka hay esconde con ustedes”? Gendeh este quierre decir que gendeh ta puede protege si Jehova con aquellos quien quierre hace alegre con ele y ta ama le. Sino, ta dale este mira que tiene tu cosa necesita hace para queda protegido. Puede kita sobrevivi na “dia del rabia de Jehova” y vivi hasta para cuando si pricura kita ahora queda sumiso y hace alegre con Jehova.