Paquemodo ya principia el maga sinagoga?

EL PALABRA “sinagoga” amo estaba na Griego palabra “asemblea” o “tan junto-junto.” Justo este nombre cay el maga sinagoga amo maga lugar donde tan junto-junto el maga Judio para oi instruccion y para na adoranza desde antes pa. Nuay menciona na Hebreo Escritura acerca na sinagoga pero claro na Cristiano Griego Escritura que este maga lugar establiciao ya del primer siglo C.E.

Mayoria del maga scholar ta creé que el maga sinagoga ya principia na tiempo cuando el maga Judio ya queda cautivo na Babilonia. El Encyclopaedia Judaica ya habla: “El maga Destierro, ciendo lejos na Templo y ta esta na otro lugar, tan junto-junto y ta le con el Escritura posible durante el Sabbath para menora diila tristeza.” Cuando ya libra kanila, posible que ya continua siempre man junto-junto el maga Judio para reza y le con el Escritura y ta establicia maga sinagoga maskin onde sila esta.

Llega el primer siglo C.E., ya queda centro el maga sinagoga del maga religioso actividad y na sociedad del maga Judio na Mediterraneo, na Middle East y na Israel mismo. Si Professor Lee Levine del The Hebrew University of Jerusalem ya habla: “Lugar [el sinagoga] para estudia, para na maga sagrao comida, onde ta hace maga caso na corte, tan deposito sen de comunidad y para na maga miting acerca politica y sociedad.” Y ya habla pa le: “Pero el mas importante amo el maga religioso actividad.” Poreso, gendeh maka-estraña que pirmi ta anda na sinagoga si Jesus. (Mar. 1:21; 6:2; Luc. 4:16) Ya enseña le y ya anima con aquellos talla. Despues establicia con el Cristiano congregacion, si apostol Pablo manada vez tambien ya predica na maga sinagoga. Aquellos quien interesao na maga espiritual cosas ta anda na sinagoga. Poreso, si ta anda na un ciudad si Pablo, una le ta anda na sinagoga y ta predica alla.​—Act. 17:1, 2; 18:4.