Ya nace yo na Quebec City, na provincia de Quebec, Canada, que French el lengguaje. El de mio mayores amo si Louis y Zélia quien ta ama y bien bueno conmigo. Huyain el de mio tata y quierre-quierre ele le. Quierre-quierre yo escribi y queda un journalist llega el tiempo.

Cuando maga 12 año yo, si Rodolphe Soucy que uban del de mio tata na trabajo y de suyu amigo ya anda na diamon casa. Maga Testigo de Jehova sila. Nuay yo idea acerca na maga Witness y gendeh yo interesao na diila religion. Pero, ya gusta yo con el manera que ya contesta sila con el maga pregunta usando el Biblia. Ya gusta tambien se el de mio maga mayores, poreso ya acepta kame Bible study.

De aquel tiempo, ta entra yo escuela na un Catholic school. Tiene vez, tan cuento yo con el de mio maga classmate acerca na cosa yo ta aprende na Biblia. Nuay dura, ya gole se el diamon maga maestro que maga padre. En vez de usa con el Escritura para dale mira que gendeh justo el cosa yo ta habla, el uno kanila ya acusa que un rebelde yo adelante del entero clase. Maskin pa maka-stress aquel situacion, ya tiene quel buen resulta ciendo ya ayuda quel para puede yo mira que el cosa ta enseña na escuela gendeh uyun na cosa ta habla el Biblia. Ya realiza yo que debe yo sale alla. Con permiso del de mio mayores, ya cambia yo escuela.

Ya continua yo estudia con el Biblia pero hinay el de mio progreso cay ta tiene yo miedo predica na casa en casa. Bien grande el influencia del Iglesia Catolico y tan contra gayot con el trabajo predicacion. Si Maurice Duplessis, un lider de politica na Quebec, ta suporta con el iglesia. Na suporta de suyu, el maga grupo de maga gente ta causa problema y ta ataca pa  gane con el maga Witness. Na aquel tiempo, necesita gayot coraje para puede predica.

El un hermano quien ya ayuda conmigo para ganá con el miedo amo si John Rae, quien ya gradua na ika-nueve clase de Gilead School. Bien experienciao y humilde si John y facil con ele atraca. Ralo lang le ta conseja conmigo pero manada yo cosa ya aprende na de suyu buen ejemplo. Tan dificil le converza French, poreso tan junto yo con ele na ministerio y ta ayuda para aprende le con el lengguaje. El tiempo que junto kame de John ya ayuda conmigo para decidi queda uno del maga Testigo de Jehova. Diez año despues del primer vez que ya conoce yo con el maga Witness, ya bautiza conmigo del Mayo 26, 1951.

Mayoria del maga hermano y hermana na diamon congregacion na Quebec City amo maga pioneer. El diila buen ejemplo ya motiva conmigo para man pioneer tambien. De aquel tiempo, ta predica kame na casa en casa usando lang el Biblia. Ciendo nuay kame literatura, necesita kame usa enbuenamente con el Escritura. Poreso, ya pricura yo queda familiar con el maga texto na Biblia para puede defende con el verdad. Maskin pa ansina, manada el no quierre le con el Biblia si gendeh este aprobao del Iglesia Catolico.

Del 1952, ya casa yo con Simone Patry, un fiel hermana na diamon congregacion. Ya cambia kame na Montreal y adentro del un año, ya tiene kame anak mujer, si Lise. Maskin pa ya descanza yo man pioneer despues kame casa de Simone, ya pricura kame hace simple diamon vida para puede participa na maga actividad na congregacion como man familia.

Diez año el ya pasa antes yo ya pensa otravez acerca na pioneering. Del 1962, mientras ta atende yo na Kingdom Ministry School para na maga anciano na Canada Bethel por un mes, yan assign conmigo na cuarto junto con Hermano Camille Ouellette. Ya puede gayot anima conmigo el de suyu pagka-activo na ministerio especialmente cay casao le y tiene anak. De aquel tiempo, bien poco lang maga mayores el tan pioneer na Quebec mientras ta hace engranda anak. Maskin pa ansina, amo se el cosa ta plaña hace si Camille. Durante el tiempo que junto kame, ya anima le conmigo que pensa acerca na de mio situacion. Despues lang del cuanto meses, ya puede yo realiza que puede yo otravez queda regular  pioneer. Tiene cuanto el ya cuestiona con el de mio decision, pero yan pioneer siempre yo y ya confia que si Jehova hay bendici con el de mio esfuerzo que dale mas grande tiempo na ministerio.

Del 1964, yan assign kanamon de Simone como special pioneer na Quebec City, el lugar onde kame ya engranda. Ya sirvi kame aqui por cuanto año. Durante ese tiempo, ya menora el oposicion que ya enfrenta kame, pero tiene siempre cuanto el yan contra kanamon.

Un Sabado tarde, ya arresta conmigo na Sainte-Marie, un diutay barrio que gendeh lejos na Quebec City. Un oficial el ya lleva conmigo na estacion de policia y ya hace conmigo preso cay ta predica yo na casa en casa que nuay permit. Despues, ya lleva conmigo na juez que si Baillargeon, un maka-miedo persona. Ya pregunta le si quien el de mio abogao. Cuando ya habla yo que si Glen How, * un conocido Witness abogao, ya nervia le y ya habla: “Nah! Ele pa gayot!” Conocido con Glen How que bien bueno defende con el maga Witness na aquel tiempo. Despues, ya habla conmigo que nuay mas porsigui el caso contra conmigo.

Por causa del oposicion na Quebec, dificil kame busca lugar que puede man renta para conduci maga miting. El diamon diutay congregacion ya puede lang incuntra un daan garaje. Para gendeh kame sinti frio si tiempo de winter, el maga hermano ya usa oil heater. Tan tumpukan kame alrededor de este por cuanto hora antes el miting para dale maga bonito experiencia.

Maka-alegre gayot mira si paquemodo ya progresa el trabajo predicacion. Del maga 1960, tiene lang cuanto bilug diutay congregacion na Quebec City, na region del Côte-Nord y na Gaspé Peninsula. Pero ahora, tiene ya mas de dos circuito na este maga lugar y tan miting el maga hermano na maga bonito Kingdom Hall.

Ya invita kanamon de Simone para sirvi na circuit work del 1970. Del 1973, yan assign kanamon na district work. Durante na ese maga año, manada yo cosa ya puede yo aprende na maga cualificao hermano igual con Laurier Saumur * y David Splane, * quien igual ta sirvi na traveling work. Despues del cada asemblea, kame de David ta dale maga sugestion na uno y otro si paquemodo puede progresa el diamon manera de enseñada. Ya acorda yo cuando ya habla conmigo si David: “Léonce, ya gusta yo con el de tuyu ultimo talk. Bonito quel, pero puede ya yo hace tres talk estaba con aquel material!” Bien manada informacion yo ta inclui na de mio maga talk. Necesita yo aprende hace mas simple con este.

Responsibilidad del maga district overseer que anima con el maga circuit overseer. Pero, manada  del maga publisher na Quebec el bien conoce conmigo. Quierre sila man junto conmigo na ministerio si ta visita yo maga circuito. Maskin pa quierre-quierre yo predica junto kanila, menos el de mio tiempo para man junto con el circuit overseer. Na un ocasion, un amable circuit overseer el ya hace acorda conmigo: “Bueno que ta dale tu tiempo con el maga hermano, pero no ulvida que de mio este semana. Necesita tambien tu anima conmigo.” Este amable consejo ya ayuda conmigo para queda mas balance.

Maka-triste cay del 1976 tiene mal suceso que gendeh kame ta expecta el ya sucede. El de mio amable mujer, si Simone, ya queda bien enfermo y despues ya muri. Bien buen mujer gayot ele cay pirmi le ta pensa el bien del otro y ta ama gayot ele con Jehova. Cay ocupao yo na ministerio, ya ayuda este para gendeh yo queda sobra de dolorido. Ta rindi tambien yo gracias con Jehova na de suyu amable suporta durante quel maga tiempo. Despues, ya casa yo con Carolyn Elliott, un activo pioneer que ta converza Ingles, quien ya anda na Quebec onde tiene grande necesidad. Facil atraca con ele y deverasan le interesao con otro, especialmente na maga huyain o triste. Un bendicion gayot le cuando ya sigui le conmigo na traveling work.

Del Enero 1978, ya pidi conmigo que enseña na primer Pioneer Service School na Quebec. Ya nervia gayot yo ciendo nuevo el curriculum para conmigo y con el maga estudiante. Bueno ya lang cay manada maga experienciao pioneer na primer clase que ya enseña yo. Maskin pa iyo el diila instructor, manada yo cosa ya aprende na maga estudiante.

Aquel mismo año, ya hace con el International Convention que tiene tema “Victorious Faith” na Olympic Stadium na Montreal. Amo este el de con todo grande convencion que ya hace na Quebec que tiene mas de 80,000 el ya atende. Yan assign conmigo na News Service Department. Ya  converza yo na manada journalist y alegre gayot yo que positivo el cosa sila ya escribi acerca kanaton. Mas de 20 hora el interview que ya hace na television y radio y yan publish sila mas de ciento articulo. Como resulta, manada gente el ya puede sabe mas acerca con Jehova y con el de suyu maga siervo.

Un grande cambio para conmigo el ya sucede del 1996. Despues sirvi na Quebec que French el lengguaje desde ya bautiza conmigo, yan assign conmigo na un distrito na Toronto que Ingles el lengguaje. Ya sinti yo que gendeh yo cualificao y tiene yo miedo dale talk cay bien quebrantao el de mio Ingles. Necesita yo reza pirmi y mas confia con Jehova.

Puede gayot yo habla que yan enjoy yo con el dos año mientras ta sirvi na Toronto. Si Carolyn con paciencia gayot ya ayuda conmigo para tiene yo confianza converza Ingles y el maga hermano ya suporta y ya anima conmigo. Unrato lang kame ya tiene maga nuevo amigo.

Puera con el maga trabajo y preparacion para na asemblea, ta anda yo predica na casa en casa por un hora si Viernes denoche. Posible el otro ya puede pensa, ‘Porque man sale pa na predicacion ciendo asemblea na siguiente dos dia?’ Pero, ta puede anima conmigo si tiene yo con quien puede man cuento na ministerio. Maskin hasta ahora, el participacion na ministerio ta hace gayot alegre conmigo.

Del 1998, yan assign kanamon de Carolyn na Montreal como maga special pioneer. Por cuanto año, incluido na de mio assignment que organiza maga special public witnessing y corecta con el gendeh justo idea acerca na maga Testigo de Jehova na news media. Ahora, kame de Carolyn alegre predica na maga foreigner quien nuevo lang ya cambia na Canada y quien quierre aprende pa mas acerca na Biblia.

Mientras ta pensa yo con el 68 año como un bautizao siervo de Jehova, ta sinti yo que ya bendici gayot le conmigo. Ya sinti yo deverasan alegria cay ya aprende yo cultiva amor na ministerio y ya ayuda con el manada gente para sabe con el verdad. Despues de mio anak que si Lise y de suyu marido hace engranda con el diila maga anak, ya sirvi sila como maga regular pioneer. Alegre yo mira con Lise que activo na ministerio. Ta rindi tambien yo gracias con el maga hermano quien ya ayuda conmigo para queda mature na espiritual y hace con el de mio maga teocratico assignment por medio na diila buen ejemplo y consejo. Ya puede yo realiza que puede lang kita continua hace con el assignment que tiene kita si confia kita con el sagrao espiritu de Jehova. (Sal. 51:11) Ta rindi gayot yo gracias con Jehova cay ya dale le conmigo el precioso privilegio que alaba con el de suyu nombre!—Sal. 54:6.