1. Cosa ya sucede na familia de Jose por causa na envidia?

TA AMA si Jacob con el todo de suyu anak, pero especial para con ele el 17 año que si Jose. Cosa el efecto de este na maga hermano de Jose? Ya envidia y ya rabia sila con ele. Nuay cosa ya hace malo si Jose para rabia el de suyu maga hermano. Maskin pa ansina, ya vende sila con Jose para queda esclavo y ya habla con el diila tata que el un peligroso animal ya mata con el de suyu favorito anak. Por causa na envidia, ya perde el paz na diila familia y bien dolorido el diila tata.​—Gen. 37:3, 4, 27-34.

2. Asegun na Galacia 5:19-21, porque bien peligroso el envidia?

² Na Escritura, el envidia * amo uno del maga trabajo de laman que puede causa con el un persona para gendeh hereda con el Reino del Dios. (Le con el Galacia 5:19-21.) Mas mucho, el envidia amo el causa del pelea, conflicto y rabia.

3. Cosa kita discuti na este articulo?

³ El cosa ya pasa na maga hermano de Jose ta dale mira si paquemodo el envidia puede destroza con el relacion y paz na familia. Maskin pa gendeh kita hace el cosa ya hace el maga hermano de Jose, imperfecto kita todo y traidor el diaton maga corazon. (Jer. 17:9) Poreso, tiene vez posible kita queda envidioso. Discuti kita el cuanto ejemplo na Biblia que puede ayuda kanaton para sabe si porque el envidia posible crici  na diaton corazon. Y despues, considera kita con el cuanto practical manera para gendeh kita queda envidioso y puede mentena con el paz.

4. Porque el maga Filisteo ya envidia con Isaac?

⁴ Si rico el un persona. Rico si Isaac y ya envidia se el maga Filisteo. (Gen. 26:12-14) Ya tapa pa gane sila con el pozo onde ta saca agua si Isaac para dale toma con el de suyu maga animal. (Gen. 26:15, 16, 27) Igual na maga Filisteo, el cuanto gente ahora ta envidia con aquellos quien tiene mas manada material cosas contra kanila. Gendeh lang sila ta desea si cosa tiene el otro sino no quierre tambien sila que el un persona tiene ese maga cosas.

5. Porque el maga religioso lider ya envidia con Jesus?

⁵ Si ta aprecia con el un persona. El maga Judio religioso lider ya envidia con Jesus cay quierre-quierre con ele el maga gente. (Mat. 7:28, 29) Si Jesus el representante del Dios y ta enseña el verdad. Maskin pa ansina, el maga religioso lider ya hace calayat maga imbusterias y ya hace malo con el reputacion de Jesus. (Mar. 15:10; Juan 11:47, 48; 12:12, 13, 19) Cosa leccion kita puede aprende? Debe kita resisti con el tendencia que envidia con aquellos quien quierre-quierre el maga hermano y hermana por causa na diila maga buen calidad. Y debe kita pricura imita kanila.​—1 Cor. 11:1; 3 Juan 11.

6. Na cosa manera ya dale mira si Diotrephes que envidioso le?

⁶ Si tiene privilegio el un persona. Del primer siglo, si Diotrephes ya envidia con aquellos quien ta guia na Cristiano congregacion. Quierre le “man pa alto” na maga hermano y hermana na congregacion, poreso ya hace le calayat maga gendeh bueno istoria acerca con apostol Juan y con el otro maga hermano. (3 Juan 9, 10) Maskin gendeh kita hace el cosa ya hace si Diotrephes, posible tambien kita principia envidia con el un hermano quien ya ricibi un assignment que quierre kita​—especialmente si ta sinti kita que mas cualificao kita contra con ele.

7. Cosa el efecto del envidia kanaton?

⁷ El envidia igual na un sahbut. Si ya crici ya este na diaton corazon, dificil ya con este arranca. El maga negativo sentido igual na selos, orgullo y pagka-canalla puede hace mas grabe con el envidia. Si envidioso kita, dificil para kanaton queda amable, lastimoso y bueno con otro. Si ta puede kita nota que ta principia ya crici el envidia na diaton corazon, necesita kita con ese quita dayun. Paquemodo kita evita con el envidia?

8. Cosa maga calidad el puede kanaton ayuda para evita con el envidia?

⁸ Puede kita evita con el envidia si humilde kita y contento. Si tiene kita ese maga buen calidad, gendeh kita queda envidioso. Si humilde kita, puede este ayuda para gendeh kita pensa que mas bueno kita con otro. El un humilde gente gendeh ta pensa que mas conviene le ricibi maga cosas contra con otro. (Gal. 6:3, 4) Si contento el un persona, alegre le na cosa le tiene y gendeh ta compara con el de suyu cuerpo con otro. (1 Tim. 6:7, 8) El humilde y contento persona alegre mira si el otro ya ricibi maga buen cosas.

9. Asegun na Galacia 5:16 y Filipo 2:3, 4, cosa puede ayuda kanaton hace el sagrao espiritu?

⁹ Necesita kita el ayuda del sagrao espiritu del Dios para puede kita evita queda envidioso y ayuda kanaton queda humilde y contento. (Le con el Galacia 5:16; Filipo 2: 3, 4.) El sagrao espiritu de Jehova puede kanaton ayuda examina con el diaton pensamiento y motivo. Na ayuda del Dios, puede kita hace positivo con el maga negativo pensamiento y sentido que tiene kita. (Sal. 26:2; 51:10) Considera con el ejemplo de Moises y Pablo quien ya puede evita con el tendencia queda envidioso.

10. Cosa situacion el ya puede era pone na probanza con Moises? (Mira con el letrato na cover.)

¹⁰ Grande el autoridad de Moises na maga siervo del Dios, pero nuay le pruba sangga con otro que tiene tambien ese privilegio. Por ejemplo, ya saca si Jehova parte del de suyu sagrao espiritu con Moises y ya dale este na un grupo de maga anciano na Israel quien ta para cerca na tabernaculo. Despues de ese, ya sabe si Moises que ya ricibi tambien sagrao espiritu el dos anciano maskin nuay sila anda na tabernaculo y ya principia actua como maga profeta. Cosa le ya hace cuando ya habla si Josue que sangga con ese dos anciano? Nuay envidia si Moises con el atencion que ya dale si Jehova con ese dos anciano. Sino, humilde y alegre le con el privilegio que ya ricibi sila. (Num. 11:24-29) Cosa leccion kita puede aprende con Moises?

11. Paquemodo el maga anciano puede imita con Moises?

¹¹ Si un anciano tu, ya pidi ba contigo que man train con el un hermano para na un privilegio que quierre-quierre tu? Por ejemplo, posible que quierre gayot tu conduci con el Estudiada del El Torre de Guardia cada semana. Pero si humilde tu igual con Moises, gendeh tu sinti que gendeh ya tu importante si pidi contigo que man train otro hermano, para llega el tiempo queda tambien le cualificao na ese privilegio. Sino, queda tu alegre cay ya puede tu ayuda con el de tuyu hermano.

12. Na cosa manera ya dale mira el manada Cristiano ahora que contento y humilde sila?

¹² Considera con este otro situacion que ta enfrenta el manada de edad hermano. Adentro del manada año, ya sirvi sila como coordinator del grupo del maga anciano. Pero cuando 80 ya sila, conforme sila dale con otro el diila privilegio. El maga circuit overseer quien 70 ya el edad, humilde ya descanza na diila privilegio y ya acepta otro assignment. Y na reciente maga año, manada Bethelite na entero mundo el ya puede ricibi nuevo assignment. Este maga fiel hermano y hermana nuay man sentimiento con aquellos quien ta hace con el assignment que tiene sila del otro.

13. Porque posible era queda envidioso si Pablo na 12 apostoles?

¹³ Si apostol Pablo amo un otro ejemplo de pagka-contento y humildad. Nuay le permiti que queda le envidioso. Ya trabaja le enbuenamente na ministerio pero humilde le ya habla: “Yo amo el menos con todo del maga Apostol y gendeh conviene llama conmigo Apostol.” (1 Cor. 15:9, 10) El 12 apostoles yan junto con Jesus na ministerio cuando taqui pa le na tierra. Pero si Pablo ya queda lang Cristiano despues del muerte y resureccion de Jesus. Maskin pa ya iscuji con ele na uliji para queda “un apostol para na maga nacion,” si Pablo gendeh entrao na 12 apostoles. (Roma 11:13, NWT; Act. 1:21-26) En vez de queda envidioso na 12 apostoles y con el privilegio cay yan junto sila con Jesus, ya esta contento si Pablo na cosa le tiene.

14. Cosa kita hace si contento y humilde kita?

¹⁴ Si contento y humilde kita, queda kita igual con Pablo y dale mira respeto con aquellos quien tiene autoridad que ya dale si Jehova. (Act. 21:20-26) Ya asigura le que  tiene maga anciano quien guia na Cristiano congregacion. Maskin pa imperfecto sila, ta considera kanila si Jehova como “maga regalo con el maga gente.” (Ef. 4:8, 11) Si dale kita mira respeto con aquellos con quien ya iscuji si Jehova y humilde sigui con el diila direccion, esta kita cerca con Jehova y tiene kita paz na diaton maga hermano y hermana.

15. Cosa kita necesita hace?

¹⁵ Nuay paz si tiene envidia. Necesita kita arranca con el envidia na diaton corazon y evita siembra con ese con otro. Debe kita hace con ese para puede kita obedece con el mandamiento de Jehova que “busca kita con ansias el maga cosa-cosa que ta hace crici con el paz y ta dale animo con uno y otro.” (Roma 14:19) Cosa kita puede hace para ayuda con otro evita queda envidioso y paquemodo kita puede mentena con el paz?

16. Paquemodo kita ayuda con otro evita queda envidioso?

¹⁶ El diaton custumbre y accion tiene grande efecto con otro. Quierre el mundo que man hambug kita na maga cosa kita tiene. (1 Juan 2:16) Pero si hace kita se, causa se envidia con otro. Puede kita evita que man envidia el otro si gendeh kita pirmi man cuento acerca na maga cosas que tiene kita o ta plaña cumpra. El otro manera para evita queda envidioso el otro amo na manera si paquemodo kita ta actua si tiene kita responsibilidad  na congregacion. Si pirmi kita tan cuento acerca na maga privilegio que tiene kita, ta manda kita crici con el envidia na corazon del otro. Pero si dale kita mira deverasan personal interes con otro y manda kanila sinti que tiene sila cosa bueno ta hace, ta ayuda kita kanila queda contento y ta ayuda kita mentena paz y unidad na congregacion.

17. Cosa ya puede hace el maga hermano de Jose y porque?

¹⁷ Puede kita quita con el envidia! Considera otravez con el ejemplo del maga hermano de Jose. Cuanto año despues sila maltrata con Jose, yan mirajan sila otravez na Egipto. Antes habla si Jose si quien gayot le, ya pruba anay le si ya cambia ya ba sila. Ya invita le kanila come donde mas manada comida le ya dale con el menor, si Benjamin, compara con otro. (Gen. 43:33, 34) Pero nuay envidia con Benjamin el de suyu maga hermano. Sino, ya dale sila mira que deverasan sila ta ama con el diila hermano y con el diila tata, si Jacob. (Gen. 44:30-34) Ciendo gendeh ya envidioso el maga hermano de Jose, ya puede sila ayuda para tiene otravez paz na diila familia. (Gen. 45:4, 15) Na igual manera, si quita kita con el maskin cosa clase de envidia, puede este ayuda para mentena el paz na diaton familia y na congregacion.

18. Asegun na Santiago 3:17, 18, cosa sucede si ayuda kita mentena el paz?

¹⁸ Quierre si Jehova que quita kita con el envidia y mentena el paz. Debe kita hace esfuerzo para puede hace con ese dos cosa. Como cosa ya discuti na este articulo, tiene kita tendencia queda envidioso. (Sant. 4:5) Y alrededor kanaton el maga envidioso gente. Pero si queda kita humilde, contento y ta aprecia con otro, gendeh kita queda envidioso. En vez, puede kita ayuda mentena con el paz y cultiva maga buen calidad.​—Le con el Santiago 3:17, 18.