POR cuanto año, el maga tan contra na Biblia ta clama que si Rey Belsazar, que ya menciona na libro de Daniel, nuay gayot existi. (Dan. 5:1) Ta creé sila con ese cay nuay evidencia el maga arqueologo que deverasan le ya vivi de antes. Pero, ya cambia se del 1854. Porque?

Na ese año, un British consul que si J. G. Taylor, ya anda na de antes ciudad de Ur que na sur parte de Iraq ahora. Ya puede le mira na un grande torre con el cuanto cilindro que hacido de lodo pandayan. El cada uno cilindro tiene maga cuatro pulgada (10 cm) el largor y tiene cosa escribido aqui. Na uno del maga cilindro, escribido el un rezo que ta pidi que tiene largo vida si Rey Nabonido y el de suyu mayor anak hombre, si Belsazar. Maskin el maga critico yan uyun que prueba este que deverasan ya existi si Belsazar.

Pero, nuay lang menciona na Biblia que ya existi si Belsazar sino ya habla tambien este que ele un rey. El maga critico nuay ya tambien creé con ese. Por ejemplo, del maga año 1875, el un cientista, si William Talbot, ya escribi que el cuanto ta habla que “si Bel-sar-ussur [Belsazar] ya rula na tiempo que ta rula tambien el de suyu tata que si Nabonido. Pero nuay gayot maskin diutay evidencia que deverasan este.”

Pero ya solva ese controversia cuando el maga escribido na otro cilindro ya revela que el tata de Belsazar, si Rey Nabonido, nuay na Babilonia por cuanto año. Cosa ya pasa mientras nuay le? “Cuando si Nabonido talla na otro nacion,” ya habla el Encyclopaedia Britannica, “ya encarga le con Belsazar el trono y el mayoria del de suyu maga soldao.” Poreso, puede habla que ya rula tambien si Belsazar na Babilonia durante ese tiempo. Por causa de ese, el arqueologo y scholar de lengguaje que si Alan Millard ya habla que justo lang que “el Libro de Daniel ya llama con Belsazar como ‘rey.’”

Siempre, para na maga siervo del Dios, puede incuntra mismo na Biblia el de con todo claro evidencia que puede confia con el libro de Daniel y inspirao este de Dios.—2 Tim. 3:16.