1. Cosa el posible causa del lingasa y cosa el efecto de este kanaton?

YA PUEDE ba tu experiencia sobra lingasa * por causa na un cosa? Siguro, ya sinti tu lingasa cay tiene cosa ya puede habla o hace el otro que ya sinti tu duele. O baka tan lingasa tu na cosa tu ya puede habla o ya hace. Por ejemplo, baka ya puede tu hace un kamali y tan lingasa tu si perdona pa ba contigo si Jehova. Y mas grabe pa, baka ya pensa tu que ciendo bien malingasa tu, quierre decir se que falta tu fe y gendeh tu buen persona. Pero deverasan ba se?

2. Cosa maga ejemplo na Biblia el ta dale mira que el un persona quien tan lingasa gendeh quierre decir que falta le fe?

² Considera con el cuanto ejemplo na Biblia. Si Ana, quien ya queda nana de profeta Samuel, amo un mujer que bien grande el fe. Pero maskin pa ansina, ya queda le bien malingasa cuando ya trata con ele na gendeh buen manera el un miembro del diila familia. (1 Sam. 1:7) Si apostol Pablo tiene grande fe pero ‘yan lingasa le por causa del todo del maga congregacion.’ (2 Cor. 11:28) Bien fuerte el fe de Rey David y ta ama gayot con ele si Jehova. (Act. 13:22) Maskin pa ansina, ya hace kamali si David que ya causa con ele para sinti grabe lingasa. (Sal. 38:4) Si Jehova ya dale comforta y alivio con el cada uno kanila. Examina kita si cosa kita puede aprende na diila ejemplo.

3. Na cosa manera el cosa ya habla el otro puede causa kanaton para man lingasa?

³ Si ya converza o ya trata kanaton na gendeh buen manera, posible kita sinti lingasa. Y deverasan gayot este especialmente si diaton amigo o familia el ya hace kanaton sinti duele. Baka man lingasa kita que ya perde ya el diaton buen relacion kanila. O posible, gendeh de suyu intencion que hace sinti duele kanaton pero ya sinti siempre kita duele na cosa le ya habla. (Prov. 12:18) O posible tambien que el un persona ya habla maga cosas que sabe le hace gayot sinti duele kanaton. Ya puede se experiencia el un joven hermana. “Cuanto año ya el ya pasa,” ya habla le, “el de mio amiga ya hace calayat imbusterias acerca conmigo na Internet. Ya sinti yo duele y yan lingasa. Nuay yo entende si porque le intencional quierre hace sinti duele conmigo.” Si ya hace contigo sinti duele el de tuyu amigo o familia, manada tu cosa puede aprende con Ana.

4. Cosa maga problema el ya experiencia si Ana?

⁴ Manada problema el ya experiencia si Ana. Nuay le anak por cuanto año. (1 Sam. 1:2) Na cultura del maga Israelita de antes, ta creé sila que si baug el un mujer, quierre decir quel que ya maldici con ele el Dios. Poreso, si Ana ya tiene gayot huya. (Gen. 30:1, 2) Y mas ya agraba pa el de suyu situacion ciendo si Penina, el otro mujer del de suyu marido, ya tiene manada anak. Para con Penina, karibal de suyu si Ana poreso ‘pirmi le ta gangguia para hace sinti duele con ele.’ (1 Sam. 1:6) Del primero, bien triste si Ana na de suyu situacion. Y gane, “ta llura le y gendeh ta come.” Bien pesao el cosa le ta sinti. (1 Sam. 1:7, 10) Cosa ya puede dale comforta con Ana?

5. Paquemodo el rezo ya puede ayuda con Ana?

⁵ Ya habla si Ana con Jehova si paquemodo le de triste y ta sinti duele. Despues le reza, ya explica le si cosa el de suyu situacion con el alto sacerdote, si Eli. Despues, si Eli ya habla con ele: “Bolbe con paz y ojala el Dios de Israel hay dale el cosa tu ya pidi con ele.” Cosa el resulta? “Ya sale [si Ana] y ya come y el de suyu cara gendeh mas triste.” (1 Sam. 1:17, 18) El rezo ya ayuda con Ana para queda calma.

6. Cosa maga leccion kita puede aprende con Ana y na Filipo 4:6, 7 acerca na rezo?

⁶ Puede kita queda calma si continua kita  reza con Jehova. Ya dale largo tiempo si Ana para reza con el de suyu Tata na cielo. (1 Sam. 1:12) Puede tambien kita man cuento con Jehova por largo tiempo acerca na diaton maga lingasa, miedo y kamali. Gendeh necesita que bien bonito el hablada del diaton maga rezo. Puede pa gane kita tiene vez llura mientras ta habla con Jehova acerca na diaton maga problema. Maskin pa ansina, si Jehova gendeh gayot cansa oi kanaton. Necesita tambien kita acorda con el consejo na Filipo 4:6, 7. (Le.) Ya menciona si Pablo que debe kita rindi gracias si ta reza kita. Bien manada kita razon para rindi gracias con Jehova. Por ejemplo, puede kita rindi gracias con ele cay ya dale le kanaton vida, por causa na maga buen cosas que ya crea le, na de suyu amor leal y na bonito esperanza que ya dale le kanaton. Cosa pa kita puede aprende con Ana?

7. Cosa regular ta hace si Ana y el de suyu marido?

⁷ Maskin pa manada problema si Ana, regular le ta anda junto con el de suyu marido na casa de adoranza de Jehova na Shilo. (1 Sam. 1:1-5) Cuando na tabernaculo si Ana, ya habla con ele el alto sacerdote, si Eli, que ojala hay contesta si Jehova con el de suyu rezo. Ya dale este comforta con Ana.—1 Sam. 1:9, 17.

8. Paquemodo kanaton puede ayuda el maga miting? Explica.

⁸ Puede kita queda calma si continua kita atende na maga miting na congregacion. Na principio del diaton maga miting, ta reza kita que dale kanaton sagrao espiritu el Dios. El paz amo un parte del fruta del sagrao espiritu. (Gal. 5:22) Si ta atende kita miting maskin pa malingasa kita, ta dale kita oportunidad con Jehova y con el maga hermano y hermana para anima y ayuda kanaton tiene paz na pensamiento y na corazon. El rezo y miting amo maga importante manera que ta dale kanaton alivio si Jehova. (Heb. 10:24, 25) Nota si cosa leccion pa kita puede aprende na experiencia de Ana.

9. Cosa el nuay cambia na situacion de Ana pero cosa el ya cambia?

⁹ Nuay dayun perde el causa del problema de Ana. Cuando ya bolbe le despues adora na tabernaculo, junto siempre sila queda de Penina na un casa. Y nuay habla el Biblia que ya cambia el custumbre de Penina. Poreso, posible que ta continua siempre gangguia con Ana el de suyu karibal. Pero, ya puede queda calma si Ana y ya mentena de suyu paz na pensamiento. Acorda que despues deja si Ana con el de suyu problema con Jehova, nuay mas le man lingasa. Ya permiti le con Jehova que dale comforta y alivio con ele. Y cuanto tiempo despues, ya bendici con Ana y ya tiene le maga anak.—1 Sam. 1:19, 20; 2:21.

10. Cosa kita puede aprende na ejemplo de Ana?

¹⁰ Puede kita queda calma maskin pa nuay perde el causa del diaton lingasa. Maskin pa ta reza y ta atende kita regular na maga miting, posible gendeh siempre perde el cuanto problema. Pero na ejemplo de Ana, ya aprende kita que nuay cosa puede sangga con Jehova para dale alivio con el diaton corazon. Gendeh gayot kanaton ulvida si Jehova y hay bendici le kanaton si esta kita fiel.—Heb. 11:6.

11. Cosa el maga razon si porque malingasa si Pablo?

¹¹ Manada razon si Pablo para sinti lingasa. Por ejemplo, cay ta ama le con el de suyu maga hermano y hermana, malingasa le na diila maga problema. (2 Cor. 2:4; 11:28) Na de suyu assignment como un apostol, el de suyu maga contrario ya gulpia y ya hace preso con  ele. Ya experiencia tambien le otro dificultad como ‘vida de pobre’ que ya causa con ele lingasa. (Fil. 4:12) Y ciendo maga tres beses le ya experiencia que yan lumus el diila barco, puede kita imagina si paquemodo le de malingasa si ta munta barco. (2 Cor. 11:23-27) Cosa ya ayuda con Pablo para puede enfrenta con ese?

12. Cosa ya ayuda para menora el lingasa de Pablo?

¹² Malingasa si Pablo na problema que ta enfrenta el de suyu maga hermano y hermana, pero nuay le pricura solva con ese todo. Sabe si Pablo que gendeh le se puede hace que ele lang mismo. Poreso, ya pidi le con otro para ayuda con el congregacion. Por ejemplo, ya dale le autoridad con el maga hermano, igual con Timoteo y Tito. Asigurao que el trabajo que ya puede hace este dos hermano ya puede gayot menora con el lingasa de Pablo.—Fil. 2:19, 20; Tito 1:1, 4, 5.

13. Paquemodo el maga anciano puede imita con Pablo?

¹³ Pidi ayuda con otro. Igual con Pablo, manada amable anciano ahora el tan lingasa con aquellos na congregacion quien ta enfrenta probanza. Pero, limitao lang el cosa puede hace el un anciano. Si admiti le que gendeh le puede ayuda con todo, hay pidi le ayuda na otro cualificao hermano y man train con el maga joven hermano para ayuda con ele cuida con el maga hermano y hermana.—2 Tim. 2:2.

14. Na cosa nuay man lingasa si Pablo y cosa kita puede aprende na de suyu ejemplo?

¹⁴ Admiti que necesita tu comforta. Humilde si Pablo poreso ya pidi le comforta con el de suyu maga amigo y ya puede ricibi con ese. Nuay le man lingasa que baka mira con ele que mahina si admiti le que ya anima con ele el otro. Na de suyu carta con Filemon, si Pablo ya habla: “Bien grande el dimio alegria y consuelo por causa del dituyo amor.” (Filem. 7) Ya menciona tambien si Pablo con el cuanto maga hermano quien ya anima con ele na tiempo de dificultad. (Col. 4:7-11) Si humilde kita y admiti que necesita kita comforta, el diaton maga hermano y hermana alegre dale el suporta que necesita kita.

15. Na cosa manera ya ricibi alivio si Pablo cuando ya enfrenta le grabe situacion?

¹⁵ Depende na Palabra del Dios. Sabe si Pablo que hay ricibi le comforta na Escritura. (Roma 15:4) Dale tambien este con ele el sabeduria para puede enfrenta maskin cosa  probanza. (2 Tim. 3:15, 16) Cuando yan preso si Pablo por segundo vez na Roma, ya sinti le que cerca ya le muri. Na ese grabe situacion, cosa le ya hace? Ya pidi le con Timoteo que anda con ele dayun y lleva con el “maga rollo.” (2 Tim. 4:6, 7, 9, 13) Porque? Cay aquel maga rollo posible amo el cuanto porcion del Hebreo Escritura que puede usa si Pablo na de suyu personal estudiada del Biblia. Si imita kita con Pablo y regular estudia con el Palabra del Dios, si Jehova hay usa con el Escritura para dale alivio kanaton—maskin cosa pa probanza kita enfrenta.

16. Cosa ya hace si David que ya causa con ele lingasa?

¹⁶ Tiene cosa ya hace si David poreso grabe le yan conciencia. Ya comete le adulterio junto con Batseba, ya hace manera para muri el marido de este y ya pricura esconde con el de suyu culpa. (2 Sam. 12:9) Del primero, ya ignora si David con el de suyu conciencia. Como resulta, ya hace este malo con el de suyu relacion con Dios y ya queda le bien malingasa y enfermo. (Sal. 32:3, 4) Cosa ya ayuda con David para enfrenta con el lingasa que resulta del de suyu maga kamali y cosa puede ayuda kanaton si ya hace kita serioso kamali?

17. Paquemodo el Salmo 51:1-4 ta dale mira que deverasan ya arripinti si David?

¹⁷ Reza que perdona contigo. Na uliji, ya reza si David con Jehova. Ya arripinti le y ya confesa con el de suyu maga pecado. (Le con el Salmo 51:1-4.) Y grande alivio gayot quel ya dale con ele! (Sal. 32:1, 2, 4, 5) Si ya puede tu comete serioso culpa, no pricura esconde con ese. En vez, reza con Jehova y confesa si cosa tu ya hace. Si hace tu se, hay sinti tu alivio y gendeh mas bien culpable. Pero si quierre tu hace bira con el de tuyu buen amistad con Jehova, tiene pa tu cosa necesita hace.

18. Cosa el reaccion de David na disciplina?

¹⁸ Acepta disciplina. Cuando ya imbia si Jehova con profeta Natan para converza con David acerca na de suyu pecado, nuay pricura man razon si David o habla que gendeh quel bien serioso. Ya admiti dayun le que ya comete le pecado, gendeh lang con el marido de Batseba, sino con Jehova. Ya acepta si David con el disciplina de Jehova y ya perdona  con ele si Jehova. (2 Sam. 12:10-14) Si ya comete kita serioso culpa, necesita kita converza con aquellos quien ya iscuji si Jehova que guia kanaton. (Sant. 5:14, 15) Y debe kita evita con el tendencia que man razon pa. Si acepta kita dayun y aplica con el disciplina que ya ricibi kita, mas pronto tambien bira el diaton paz y alegria.

19. Cosa kita debe determinao hace?

¹⁹ Queda determinao que no repiti con el de tuyu kamali. Sabe si Rey David que para puede le evita repiti con el de suyu maga kamali, necesita le con el ayuda de Jehova. (Sal. 51:7, 10, 12) Despues ricibi con el perdon de Jehova, determinao si David que evita con el gendeh justo pensamiento. Como resulta, ya tiene le otravez paz na pensamiento.

20. Paquemodo kita puede dale mira que ta aprecia kita con el perdon de Jehova?

²⁰ Ta dale kita mira que ta aprecia kita con el perdon de Jehova si ta reza kita con ese, ta acepta disciplina y ta hace esfuerzo para evita repiti con el diaton kamali. Si hace kita se, hay tiene kita otravez paz na pensamiento. Si James, un hermano quien ya comete serioso culpa, ya puede experiencia con ese. Ele ya habla: “Cuando ya confesa yo con el de mio culpa na maga anciano, ya sinti yo que ya queda liviano el de mio sentido. Ya tiene yo otravez paz na pensamiento.” Alegre gayot kita cay sabe kita que “cerca si Jehova con aquellos quien dolorido el corazon; ta salva le con aquellos bien triste.”—Sal. 34:18.

21. Cosa kita hace para dale kanaton alivio si Jehova?

²¹ Ciendo bien cerca ya kita na fin, posible que mas omenta el causa del diaton lingasa. Si ta principia tu man lingasa, reza dayun con Jehova que ayuda contigo. Regular estudia con el Biblia. Sigui con el ejemplo de Ana, Pablo y David. Pidi con el de tuyu Tata na cielo que ayuda contigo determina si cosa el causa del de tuyu lingasa. (Sal. 139:23) Permiti con ele que ayuda contigo na de tuyu maga problema, especialmente na maga problema que nuay tu cosa puede hace. Si hace tu se, puede tu queda igual con el salmista quien ya canta con Jehova: “Cuando bien malingasa yo, ya dale uste conmigo comforta y alivio.”—Sal. 94:19.