1-2. Porque y paquemodo ya hace posible si Jehova que queda kita parte del de suyu familia?

SI Jehova ya invita kanaton para queda parte del de suyu familia. Bien grande privilegio gayot se! El miembro de ese familia amo maga gente quien ya dedica el diila mismo cuerpo con Dios y tiene fe na rescate del de suyu Anak. Un alegre familia kita. El diaton vida ahora tiene proposito y alegre kita na diaton esperanza que vivi hasta para cuando—na cielo man o na Paraiso tierra.

² Maskin pa necesita hace grande sacrificio si Jehova, amor el ya manda move con ele para hace posible que queda kita parte del de suyu familia. (Juan 3:16) “Ya compra ya le [kanaton] con un precio bien grande.” (1 Cor. 6:20, El Nuevo Testamento) Por medio del rescate, si Jehova ya hace posible para puede kita tiene cerca relacion con ele. Tiene kita el privilegio que llama como el diaton Tata con el de con todo poderoso Persona na universo. Y como cosa kita ya discuti del ya pasa articulo, si Jehova el de con todo buen Tata.

3. Cosa maga pregunta kita posible pregunta? (Mira tambien con el cajon “ Ta Mira Ba Conmigo si Jehova?”)

³ Igual con el un escritor de Biblia, posible puede kita pregunta: “Cosa yo paga con Jehova na todo buen cosas que ya hace le para conmigo?” (Sal. 116:12) El deverasan, gendeh gayot kita puede paga con el diaton Tata na cielo. Pero, el de suyu amor para kanaton ta manda move kanaton para ama tambien con ele. Si apostol Juan ya escribi: “Necesita  kita ama, cay el Dios ya ama canaton una.” (1 Juan 4:19) Na cosa maga manera kita puede dale mira que ta ama kita con el diaton Tata na cielo?

4. Asegun na Santiago 4:8, porque kita debe hace esfuerzo para queda cerca con Jehova?

⁴ Quierre si Jehova que queda kita cerca y man cuento con ele. (Le con el Santiago 4:8.) Ta anima le kanaton que “reza firmi” y ta oi le kanaton. (Roma 12:12) Pirmi le tiene tiempo y gendeh ta cansa oi kanaton. Y ta oi kita con ele por medio na lehida de Biblia y maga publicacion que ta ayuda kanaton para entende con ese. Ta oi tambien kita con ele si ta pone kita atencion na maga miting na congregacion. Igual si paquemodo el regular comunicacion ta puede ayuda para esta cerca el maga anak na diila mayores, el regular comunicacion con Jehova ta ayuda kanaton esta cerca con ele.

5. Cosa kita hace para queda mas aceptable el diaton maga rezo con Jehova?

⁵ Pensa con el calidad del de tuyu rezo con Dios. Quierre si Jehova que habla kita con ele si cosa kita ta pensa y ta sinti. (Sal. 62:8) Pregunta con el de tuyu mismo cuerpo: ‘El de mio maga rezo ba dol mensaje que ya copia lang yo o un carta que yo mismo ya escribi?’ Asigurao que ta ama gayot tu con Jehova y quierre tu que esta fuerte el de tuyu relacion con ele. Para hace se, debe tu regular man cuento con ele. Habla con ele si cosa gayot tu ta sinti, si cosa contigo ta hace alegre y si cosa contigo ta hace triste. Confia que puede tu pidi ayuda con ele.

6. Cosa kita debe hace para esta cerca con el diaton Tata na cielo?

⁶ Para esta cerca con el diaton Tata na cielo, debe kita pirmi rindi gracias con ele. Uyun kita con el salmista quien ya escribi: “Bien manada el cosa tu ya hace, O Jehova, de mio Dios, el de tuyu maga bonito trabajo y el cosa tu ta pensa para kanamon. Nuay quien puede compara contigo; si pruba yo habla acerca con este, gendeh yo puede ciendo bien manada este!” (Sal. 40:5) Gendeh lang kita basta ta sinti apresacion con Jehova, sino ta dale kita mira con ese por medio na diaton palabra y accion. Si hace kita se, ta dale kita mira que diferente kita na manada gente. Ta vivi kita ahora na un mundo donde el maga gente gendeh ta aprecia con el todo cosa ta hace el Dios para kanila. Gane, uno del maga señal que ta vivi ya kita na “ultimo maga dia” amo que el maga gente no sabe rindi gracias. (2 Tim. 3:1, 2) No quierre gayot kita queda igual kanila!

7. Cosa quierre si Jehova que hace kita y porque?

⁷ No quierre el maga mayores que man peleajan el diila maga anak. Na igual manera, si Jehova quierre que el todo del de suyu maga anak tiene union entre con uno y otro. Gane, el amor que tiene kita na uno y otro ta dale mira que maga verdadero Cristiano kita. (Juan 13:35) Uyun kita con el salmista quien ya escribi: “Que bien bueno y bonito que el maga hermano tan junto-junto que tiene unidad!” (Sal. 133:1) Si ta ama kita con el diaton maga hermano y hermana, ta dale kita mira que ta ama kita con Jehova. (1 Juan 4:20) Que bien bonito queda parte del familia de maga hermano y hermana quien “man amigo con uno y otro [y] con cariño”!—Ef. 4:32.

8. Asegun na 1 San Juan 5:3, cosa el primer razon si porque kita ta obedece con Jehova?

⁸ Quierre si Jehova que obedece el maga anak con el diila maga mayores y quierre tambien le que obedece kita con ele. (Ef. 6:1)  Debe lang kita obedece con ele ciendo ele el diaton Creador, el quien ta sustene con el diaton vida y el de con todo sabio mayores. Pero, el primer razon si porque kita ta obedece con Jehova amo cay ta ama kita con ele. (Le con el 1 San Juan 5:3.) Maskin pa manada razon si porque debe kita obedece con ele, gendeh le ta forza kanaton. Ya dale si Jehova kanaton el libertad para decidi, poreso alegre le si ta iscuji kita que obedece con ele cay ta ama kita con ele.

9-10. Porque importante que sabe kita con el maga principio de Jehova y obedece con ese?

⁹ El maga mayores quierre que queda protegido el diila maga anak. Amo se el razon si porque sila ta hace maga ley para na diila maga anak. Si el maga anak ta obedece con ese maga ley, ta dale sila mira que ta confia y ta respeta sila con el diila maga mayores. Pero mas importante que sabe y sigui kita con el maga ley y principio del diaton Tata na cielo. Si hace kita se, ta dale kita mira con Jehova que ta ama y ta respeta kita con ele y kita mismo ta beneficia con ese. (Isa. 48:17, 18) Pero, aquellos quien gendeh ta sigui con Jehova y con el de suyu maga principio ta hace lang sinti duele con el diila mismo cuerpo.—Gal. 6:7, 8.

¹⁰ Si ta vivi kita uyun na maga principio de Jehova, ta protege kita con el diaton mismo cuerpo na peligro na fisical, emocional y espiritual. Sabe si Jehova si cosa el mas bueno para kanaton. Si Aurora, quien ta queda na United States, ya habla: “Sabe yo que el diaton  obediencia con Jehova ta resulta gayot na de con todo buen vida que posible.” Deverasan gayot ese para kanaton todo. Na cosa manera tu ya beneficia cay ya obedece tu con el amable direccion de Jehova?

11. Paquemodo kanaton puede ayuda el rezo?

¹¹ El rezo puede ayuda kanaton queda obediente maskin dificil con ese hace. Tiene vez, por causa na imperfeccion, tan lisud kita obedece con Jehova. Pero, necesita kita resisti con el diaton tendencia que desobedece con ele. El salmista ya pidi con Dios: “Dale conmigo el deseo para obedece contigo.” (Sal. 51:12) Si Denise, un regular pioneer, ya habla: “Si tan dificil yo obedece con el un mandamiento de Jehova, ta reza yo que dale conmigo fuerza para hace si cosa el justo.” Puede gayot kita asigura que si Jehova ta contesta ansina clase de rezo.—Luc. 11:9-13.

12. Asegun na Efeso 5:1, cosa kita debe hace?

¹² Le con el Efeso 5:1. Como “maga anak [de Jehova] con quien Ele ta ama,” ta pricura kita imita con ele. Ta imita kita con ele si kita amable, bueno y si ta perdona kita con otro. Si aquellos no conoce con Dios puede mira con el diaton buen conducta, posible puede este manda move kanila para aprende pa mas acerca con ele. (1 Ped. 2:12) El maga Cristiano mayores debe pricura trata con el diila maga anak igual si paquemodo ta trata si Jehova kanaton. Si hace sila se, el diila maga  anak posible quierre tambien queda amigo del diaton amable Tata.

13. Cosa kita debe hace para tiene animo?

¹³ Proud el un bata con el de suyu tata y alegre le cunta con otro acerca con ele. Na igual manera, proud kita con el diaton Tata na cielo, si Jehova, y quierre kita que conoce el otro con ele. Na diaton corazon, ta sinti kita igual con Rey David quien ya escribi: “Hay alaba yo con Jehova.” (Sal. 34:2) Pero, quetal si huyain kita? Paquemodo kita tiene animo? Hay tiene kita animo si pensa kita si paquemodo este hace alegre con Jehova y si paquemodo beneficia el otro si aprende sila acerca con ele. Si Jehova hay dale kanaton el animo que necesita kita. Ya ayuda le con el maga hermano del primer siglo para tiene animo y hay ayuda tambien le kanaton.—1 Tes. 2:2.

14. Cosa el cuanto razon si porque importante que hace kita dicipulo?

¹⁴ Imparcial si Jehova y alegre le mira si ta dale kita mira amor con otro, maskin de onde pa sila. (Act. 10:34, 35) Uno na maga buen manera para dale mira amor amo si predica kita con otro. (Mat. 28:19, 20) Cosa cumpli este trabajo? Aquellos quien oi kanaton puede tiene mas enbuenamente vida ahora y tiene esperanza que vivi hasta para cuando na futuro.—1 Tim. 4:16.

15-16. Cosa el maga razon si porque kita alegre?

¹⁵ Un amable Tata si Jehova poreso quierre le queda alegre el de suyu familia. (Isa. 65:14) Bien manada razon si porque kita puede queda alegre ahora, maskin pa ta enfrenta kita maga problema. Por ejemplo, asigurao kita que el diaton Tata na cielo ta ama gayot kanaton. Tiene kita el justo saber acerca na Palabra del Dios, el Biblia. (Jer. 15:16) Y parte kita del un familia quien ta ama con Jehova, ta sigui con el de suyu maga alto principio na moral y ta ama con uno y otro.—Sal. 106:4, 5.

¹⁶ Puede kita esta alegre cay tiene kita el esperanza que queda mas enbuenamente el diaton vida na futuro. Sabe kita que gendeh mas dura, si Jehova hay quita con el todo maldad. Bajo na direccion del de suyu Reino, hay queda Paraiso otravez el tierra. Tiene tambien kita el bonito esperanza que man junto otravez con aquellos quien hay resucita. (Juan 5:28, 29) Que bien bonito gayot se! Y el mas importante, asigurao kita que gendeh mas dura, todo aquellos na cielo y na tierra hay dale el honor, alabanza y adoranza que conviene para con el diaton amable Tata.