1. Si ta considera si con quien casa, cosa debe pregunta el un hermana na de suyu mismo cuerpo?

EL TODO Cristiano bajo na autoridad de Jesucristo quien un perfecto cabeza. Pero si casa el un Cristiano mujer, ta queda le bajo na autoridad del un imperfecto gente. Gendeh se pirmi facil hace. Poreso si ta considera si con quien casa, el un hermana debe pregunta na de suyu mismo cuerpo: ‘Cosa ta dale mira que este hermano hay queda un buen cabeza de familia? Prioridad ba na de suyu vida el maga espiritual actividad? Si gendeh, cosa ta indica que hay queda le un buen espiritual cabeza despues kame casa?’ Siempre, el un hermana debe tambien pregunta na de suyu mismo cuerpo: ‘Cosa el de mio calidad que puede ayuda na diamon matrimonio? Pacienciosa ba yo y bondadoso? Tiene ba yo fuerte relacion con Jehova?’ (Ecl. 4:9, 12) Si el un hermana ta hace maga buen decision antes pa le casa, puede este ayuda para tiene le un alegre matrimonio.

2. Cosa kita considera na este articulo?

² Ta dale mira buen ejemplo el millones del diaton Cristiano hermana quien ta somete con el diila marido. Debe kanila dale comendacion. Alegre kita sirvi con Jehova junto con este maga leal hermana! Na este articulo, hay considera kita con el contestacion na este tres pregunta: (1) Cosa el cuanto maga dificultad ta enfrenta el maga mujer? (2) Porque iscuji el un mujer que somete con el de suyu marido? (3) Cosa puede aprende el maga Cristiano marido y mujer acerca si paquemodo ya somete kanda Jesus, Abigail y Maria, el nana de Jesus?

3. Porque el todo man maridable hay experiencia problema?

³ El matrimonio amo un perfecto regalo estaba con Dios pero imperfecto el maga gente. (1 Juan 1:8) Poreso, el Palabra del Dios ya dale aviso con el maga man maridable que hay enfrenta sila maga dificultad o “maga problema na diila vida casao.” (1 Cor. 7:28) Nota con el cuanto maga dificultad que posible enfrenta el un mujer.

4. Porque posible sinti el un mujer que maka-perde dignidad si somete le con el de suyu marido?

⁴ Posible por causa na de suyu background, el un mujer puede sinti que maka-perde dignidad si somete le na de suyu marido. “Na lugar onde yo ya engranda,” ya habla si Marisol, quien ta queda na United States, “pirmi ta habla con el maga mujer que debe sila queda igual na maga hombre na todo cosas. Sabe yo que si Jehova ya dale autoridad con el maga marido y ya decidi que el maga mujer debe somete y el maga mujer conviene tambien ricibi respeto. Pero, dificil siempre conmigo para tiene balance mirada con ese arreglamiento.”

5. Cosa el gendeh justo idea del otro acerca na papel del maga mujer?

⁵ Pero, posible tambien que casao el un mujer na un hombre quien ta pensa que el maga hombre mas importante que con el maga mujer. “Na diamon lugar,” ya habla el un hermana que si Ivon, quien ta queda na South America, “una ta come el maga hombre y despues el maga mujer. Ta expecta con el maga anak mujer que cuci y limpia pero ta habla con el maga anak hombre que sila el ‘don na casa’ y ta sirvi kanila el diila nana y maga hermana.” El un hermana que si Yingling, quien ta queda na Asia, ya habla: “Na diamon lengguaje, tiene expresion que el maga mujer gendeh necesita queda bright o ma-abilidad. El diila papel amo hace con el maga trabajo na casa y nuay sila derecho habla el diila opinion na diila marido.” El un marido quien gendeh ta dale mira amor y gendeh ta sigui con el cosa ta habla el Biblia, ta hace dificil con el vida del de suyu mujer, gendeh ta imita con Jesus y gendeh ta hace alegre con Jehova.​—Ef. 5:28, 29; 1 Ped. 3:7.

6. Cosa necesita hace el maga mujer para hace fuerte con el diila personal relacion con Jehova?

⁶ Como cosa ya menciona del ya pasa articulo, ta expecta si Jehova que el maga Cristiano marido hay dale el espiritual, emocional y material necesidad del diila familia. (1 Tim. 5:8) Pero, el maga mujer necesita dale tiempo cada dia para le con el Palabra del Dios, medita con ese y reza con Jehova con todo corazon. Posible, gendeh este facil hace. Ocupao el maga mujer poreso baka sinti sila que nuay sila tiempo o fuerza para hace con ese maga cosas. Pero bien importante que dale sila tiempo para hace con ese. Porque? Cay quierre si Jehova que el cada uno kanaton tiene y mentena un personal relacion con ele.​—Act. 17:27.

7. Cosa hace mas facil con el mujer para cumpli con el de suyu papel?

⁷ Deveras, posible que el un mujer necesita hace esfuerzo para somete con el de suyu imperfecto marido. Pero mas facil para con ele que cumpli con el papel que ya dale con ele si Jehova, si entende le y acepta con el maga razon na Biblia si porque le debe somete.

8. Como cosa ta habla na Efeso 5:22-24, porque el un Cristiano mujer hay iscuji somete con el de suyu marido?

⁸ El un Cristiano mujer hay iscuji somete con el de suyu marido cay amo se el cosa con ele ta pidi si Jehova. (Le con el Efeso 5:22-24.)  Ta confia le con el de suyu Tata na cielo cay sabe le que el Dios ta ama con ele y el cosa ta pidi con ele amo para na de suyu mismo bien.​—Deut. 6:24; 1 Juan 5:3.

9. Cosa sucede si el un Cristiano hermana ta respeta con el autoridad del de suyu marido?

⁹ El mundo ta anima con el maga mujer que ignora con el maga principio de Jehova y pensa que maka-perde dignidad si somete sila na diila marido. Siempre aquellos quien ta habla igual ansina, no conoce con el diaton amable Dios. Si Jehova nunca manda con el de suyu maga precioso anak mujer que hace un cosa que quita con el diila dignidad. El un hermana quien ta hace esfuerzo que cumpli con el de suyu papel que ya dale si Jehova, ta ayuda para tiene paz na familia. (Sal. 119:165) Tiene este buen resulta con el de suyu marido, con ele y con el diila maga anak.

10. Cosa maga leccion kita puede aprende na cosa ya habla si Carol?

¹⁰ El un mujer quien ta somete con el de suyu imperfecto marido ta dale mira que ta ama le y ta respeta con Jehova, el quien ya dale autoridad con el de suyu marido. “Sabe yo que tan kamali el de mio marido,” ya habla si Carol, quien ta queda na South America. “Sabe tambien yo que el de mio reaccion con ese maga kamali ta revela si paquemodo de valoroso conmigo el de mio amistad con Jehova. Poreso, ta pricura yo somete cay quierre yo hace alegre con el de mio Tata na cielo.”

11. Cosa ya ayuda con el un hermana que si Aneese para perdona y cosa kita puede aprende na cosa le ya habla?

¹¹ Posible que dificil para na un mujer que respeta y somete si ta sinti le que el de suyu marido gendeh ta considera con el de suyu sentido y lingasa. Pero nota si cosa ta hace el un casao hermana que si Aneese si ta sucede se. Ele ya habla: “Ta pricura yo gendeh rabia. Ta acorda yo que todo kita tan kamali. El de mio goal amo que perdona igual si paquemodo ta perdona si Jehova. Si ta perdona yo, ta tiene yo otravez paz na pensamiento.” (Sal. 86:5) Si ta perdona el un mujer, posible mas facil para con ele que somete.

12. Cosa maga ejemplo ta contene el Biblia?

¹² El cuanto posible sinti que mahina el persona quien ta somete. Pero gendeh gayot se  deverasan. El Biblia ta contene manada ejemplo de maga persona quien ya somete pero tiene grande coraje. Considera si cosa kita puede aprende con Jesus, Abigail y Maria.

13. Porque ta somete si Jesus con Jehova? Explica.

¹³ Ta somete si Jesus con Jehova pero gendeh por causa cay gendeh le inteligente o nuay abilidad. El de suyu simple y claro enseñanza ta dale mira que bien inteligente le. (Juan 7:45, 46) Sabe si Jehova que tiene abilidad si Jesus poreso ya permiti Le con Jesus que trabaja junto con Ele cuando ya crea Le con el universo. (Prov. 8:30; Heb. 1:2-4) Y desde el resureccion de Jesus, si Jehova ya dale con ele el “todo autoridad na cielo y na mundo.” (Mat. 28:18) Maskin pa ma-abilidad si Jesus, ya pidi siempre le guia con Jehova. Porque? Cay ta ama le con el de suyu Tata.​—Juan 14:31.

14. Cosa puede aprende el maga marido (a) na mirada de Jehova con el maga mujer? (b) na cosa ta habla el Proverbio 31?

¹⁴ Si cosa puede aprende el maga marido. Si Jehova nuay manda somete con el mujer na de suyu marido por causa cay ta mira le con el maga mujer que mas bajo que con el maga hombre. Gane, ya iscuji si Jehova con el maga mujer junto con el maga hombre para rula junto con Jesus. (Gal. 3:26-29) Ya dale mira si Jehova que ta confia le con el de suyu Anak cuando ya dale le autoridad con ele. Na igual manera, el un sabio marido hay dale cuanto autoridad con el de suyu mujer. El Biblia ya habla el maga clase de trabajo que puede hace el maga mujer. Por ejemplo, puede ele mira con el maga trabajo na casa, cumpra y vende maga propiedad y hace maga transaccion de negocio. (Le con el Proverbio 31:15, 16, 18.) Gendeh le un esclavo quien nuay derecho para habla de suyu opinion. Sino, el de suyu marido ta confia con ele y ta oi con el de suyu maga idea. (Le con el Proverbio 31:11, 26, 27.) Si el un marido ta dale ansina clase de respeto con el de suyu mujer, hay queda alegre el de suyu mujer que somete con ele.

15. Cosa puede aprende el maga mujer na ejemplo de Jesus?

¹⁵ Si cosa puede aprende el maga mujer. Maskin pa manada cosa ya puede hace si Jesus, nuay le sinti que maka-perde dignidad que somete na autoridad de Jehova. (1 Cor. 15:28; Fil. 2:5, 6) Na igual manera, el un mujer quien ta sigui na ejemplo de Jesus gendeh sinti que perde el de suyu dignidad si somete le con el de suyu marido. Hay suporta le con el de suyu marido gendeh lang por causa cay ta ama le con este sino el primer razon amo cay ta ama le y ta respeta con Jehova.

16. Asegun na 1 Samuel 25:3, 23-28, cosa maga dificultad ya enfrenta si Abigail? (Mira con el letrato na cover.)

¹⁶ Si Abigail tiene un marido que el nombre Nabal. Este hombre ta pensa lang con el de suyu mismo bien, orgulloso y no sabe rindi gracias. Si quierre si Abigail que termina el diila matrimonio, puede lang era le esta silencio y deja con David y de suyu maga uban que mata con el de suyu marido. Pero, nuay le se hace. Sino, ya hace le practical manera para protege con Nabal y diila entero familia. Imagina con el coraje que necesita si Abigail para atraca con el 400 armao gente y con respeto man cuento con David acerca con el problema. Conforme pa gane ele pidi despensa na cosa ya hace el de suyu marido. (Le con el 1 Samuel 25:3, 23-28.) Ya realiza si David que ya usa si Jehova con este animoso mujer para dale con ele consejo que ya puede sangga con ele para comete un serioso kamali.

17. Cosa puede aprende el maga marido na cosa ya sucede con kanda David y Abigail?

¹⁷ Si cosa puede aprende el maga marido. Un sabio mujer si Abigail. Y bueno ya lang que ya sigui si David con el de suyu consejo. Como  resulta, ya puede evita si David que mata con el maga inocente gente. Na igual manera, el un sabio marido ta considera enbuenamente con el opinion del de suyu mujer antes hace maga importante decision. Posible, el opinion del de suyu mujer puede ayuda con ele para evita hace gendeh justo decision.

18. Cosa puede aprende el maga mujer na ejemplo de Abigail?

¹⁸ Si cosa puede aprende el maga mujer. El un mujer quien ta ama y ta respeta con Jehova puede causa buen resulta na de suyu familia, maskin pa el de suyu marido gendeh ta sirvi con Jehova o ta sigui con el De Suyu maga principio. Gendeh le busca manera para termina con el diila matrimonio. En vez, si dale le mira respeto y somete, puede le motiva con el de suyu marido que aprende acerca con Jehova. (1 Ped. 3:1, 2) Pero maskin pa si el de suyu marido gendeh decidi sirvi con Jehova, alegre mira si Jehova que ta somete le con el de suyu marido y leal con Ele.

19. Cosa el maga situacion que el un mujer gendeh obedece con el de suyu marido?

¹⁹ Pero el un Cristiano mujer gendeh suporta con el de suyu marido si pidi este con ele que viola con el maga ley o principio na Biblia. Por ejemplo, pone kita que el marido del un hermana que gendeh Witness ya habla con ele que man imbusterias, ruba o hace maga cosas que gendeh aceptable con Jehova. El todo maga Cristiano, incluido ya el maga casao hermana, debe obedece una con Dios Jehova. Si ya pidi con el un hermana que viola con el maga principio na Biblia, gendeh le debe conforma sino explica na enbuenamente pero franca manera si porque le gendeh puede hace con ese.​—Act. 5:29.

20. Porque kita sabe que si Maria tiene cerca relacion con Jehova?

²⁰ Si Maria tiene un cerca relacion con Jehova. Claro que bien familiar le con el Escritura. Cuando yan cuento le con Elisabet, el nana de Juan Bautista, si Maria ya refiri mas de 20 beses con el Hebreo Escritura. (Luc. 1:46-55) Y considera este: Maskin pa para casa ya si Maria con Jose, el angel de Jehova nuay una aparece con Jose. El angel directa yan cuento con Maria y ya anuncia que hay pari le con el Anak del Dios. (Luc. 1:26-33) Bien conoce  si Jehova con Maria y ta confia le que si Maria hay ama y cuida con el de suyu Anak. Y asigurao, si Maria, ya continua tiene buen relacion con Jehova maskin despues muri si Jesus y resucita para na cielo.​—Act. 1:14.

21. Cosa puede aprende el maga marido na cosa ta habla el Biblia acerca con Maria?

²¹ Si cosa puede aprende el maga marido. Alegre el un sabio marido si el de suyu mujer bien familiar na Escritura. Gendeh le ta rabia o ta pensa que el de suyu mujer ya el quierre queda cabeza de familia. Sabe le que si el de suyu mujer tiene hondo saber na Biblia y maga principio de este, puede gayot ele ayuda na familia. Siempre, maskin pa mas educao el mujer que con el de suyu marido, responsibilidad siempre del de suyu marido que guia con el familia na adoranza con Jehova y na otro teocratico actividad.​—Ef. 6:4.

22. Cosa puede aprende el maga mujer con Maria?

²² Si cosa puede aprende el maga mujer. El un mujer debe somete con el de suyu marido pero responsable siempre le con el de suyu mismo espiritualidad. (Gal. 6:5) Poreso, debe le dale tiempo para na de suyu personal estudiada del Biblia y meditacion. Como resulta, puede este ayuda para mentena el de suyu amor y respeto con Jehova y queda alegre mientras ta somete con el de suyu marido.

23. Na cosa manera hay beneficia el maga mujer, el diila familia y el congregacion si ta somete sila?

²³ El maga mujer quien ta continua somete na diila marido por causa na diila amor con Jehova hay queda mas alegre y contento, contra con aquellos quien gendeh ta sigui con el arreglamiento de Jehova. Ta dale sila mira buen ejemplo para na maga jovenes, hombre man o mujer. Y ta ayuda sila para tiene buen relacion gendeh lang entre na familia sino pati na congregacion. (Tito 2:3-5) Ahora, mayoria de aquellos quien leal ta sirvi con Jehova amo maga mujer. (Sal. 68:11) Todo kita, hombre man o mujer, tiene importante papel na congregacion. El siguiente articulo hay discuti si paquemodo el cada uno kanaton puede cumpli con ese.