TIENE dos joven mujer ta camina na lugar de negocio na ciudad de Baguio, na Pilipinas. Ya nota sila con el un public witnessing cart pero nuay sila atraca. Si Helen, quien ta para na costao de ese cart, yan smile kanila. Aquel maga mujer ya continua na diila caminada pero ya gusta sila con el smile de Helen.

Na uliji, mientras pabolbida el maga mujer na bus, ya mira sila con el un sign de jw.org na un Kingdom Hall. Ya acorda sila que ese mismo maga letra el cosa sila ya puede mira na cart cuando ta camina sila. Ya abaja sila na bus y ya chequia con el schedule de miting del diferente maga congregacion que escribido na gate del Kingdom Hall.

El dos mujer ya atende na siguiente miting. Y con quien sila ya puede mira cuando ya entra sila na Kingdom Hall? Con Helen! Ya acorda sila dayun que ele quel yan smile kanila. “Cuando ta atraca sila conmigo,” ya habla si Helen, “ya nervia yo un poco. Ya pensa yo que baka tiene yo cosa malo ya puede hace kanila.” Pero el maga mujer ya habla con Helen que ya mira sila con ele na cart.

El maga joven mujer ya gusta con el miting y ya queda dayun comfortable man junto con el maga hermano y hermana. Cuando ta mira sila con el otro ta limpia con el Kingdom Hall despues del miting, ya pregunta sila si puede ba sila ayuda. El un mujer gendeh ya ta queda na Pilipinas, pero el otro mujer ya principia ya atende maga miting y man Bible study​—todo se ya resulta por causa na un smile!