1. Cosa posible influencia con el tratamiento del un hombre na de suyu mujer y maga anak?

COSA quierre decir que tiene autoridad, por ejemplo, como un cabeza de un familia? El cuanto hombre ta permiti con el tradicion, cultura o background del familia que influencia con el diila tratamiento na diila mujer y maga anak. Nota si cosa si Yanita, un hermana quien ta queda na Europe, ya habla, “Na lugar onde yo ta queda, ta creé el maga gente que el maga mujer bajo que con el maga hombre y debe kanila mira como maga ayudanta.” El un hermano que si Luke, quien ta queda na United States, ya habla, “El cuanto maga tata ta enseña con el diila maga anak hombre que gendeh importante el cosa ta habla el maga mujer poreso gendeh kanila debe oi.” Pero, no quierre si Jehova que el maga hombre ansina trata con el diila mujer. (Compara na Marcos 7:13.) Entonces, paquemodo queda un buen cabeza de familia el un hombre?

2. Cosa debe sabe el un cabeza de familia y porque?

² Para queda un buen cabeza de familia, el un hombre debe entende si cosa quierre si Jehova que hace le. Necesita tambien le entende si porque si Jehova ya dale autoridad con el cuanto maga gente y si paquemodo le puede imita con el ejemplo de Jehova y de Jesus. Porque importante que sabe el un hombre con este maga cosas? Cay ya dale si Jehova cuanto autoridad con el maga cabeza de familia y ta expecta le que usa sila con ese enbuenamente.​—Luc. 12:48b.

3. Asegun na 1 Corinto 11:3, paquemodo ya arregla si Jehova con el de suyu familia?

³ Le con el 1 Corinto 11:3. Este versiculo ta menciona si paquemodo si Jehova ya organiza con el de suyu familia na cielo y na tierra. Ciendo ele “el cabeza,” tiene le el todo autoridad. Ya dale tambien autoridad si Jehova con otro pero responsable  sila con ele si paquemodo sila ta usa con el diila autoridad. (Roma 14:10; Ef. 3:14, 15) Ya dale si Jehova autoridad con Jesus para mira con el congregacion pero responsable si Jesus con Jehova si paquemodo le ta trata kanaton. (1 Cor. 15:27) Ya hace tambien arreglamiento si Jehova que el mujer y maga anak bajo na autoridad del marido pero responsable el marido con Jehova y con Jesus na manera si paquemodo le ta trata con el de suyu familia.​—1 Ped. 3:7.

4. Cosa autoridad tiene si Jehova y si Jesus?

⁴ Como el Cabeza del familia na cielo y na tierra, tiene autoridad si Jehova para hace maga ley acerca si paquemodo actua el de suyu maga anak y asigura que obedece sila con ese. (Isa. 33:22) Si Jesus, como el cabeza del Cristiano congregacion, tiene tambien el derecho para hace maga ley y asigura que ta obedece con ese.​—Gal. 6:2; Col. 1:18-20.

5. Cosa autoridad tiene el un cabeza del Cristiano familia y cosa el de suyu maga limitacion?

⁵ Igual con Jehova y con Jesus, el cabeza del Cristiano familia tiene el autoridad para hace maga decision para na de suyu familia. (Roma 7:2; Ef. 6:4) Pero, tiene limitacion el de suyu autoridad. Por ejemplo, el de suyu maga ley debe base na maga principio estaba na Palabra del Dios. (Prov. 3:5, 6) Y el un cabeza de familia, nuay autoridad para hace maga ley para con aquellos quien gendeh parte del suyu familia. (Roma 14:4) Omento pa, si ya queda ya grande el de suyu maga anak y ya sale ya na casa, ta respeta sila siempre con ele pero gendeh mas sila bajo na de suyu autoridad como el cabeza.​—Mat. 19:5.

6. Porque ya dale autoridad si Jehova con el cuanto?

⁶ Ya dale autoridad si Jehova con el cuanto cay ta ama le con el de suyu familia. Un regalo este estaba con ele. Este arreglamiento ya hace posible para tiene paz y orden el familia de Jehova. (1 Cor. 14:33, 40) Si gendeh claro si quien el tiene autoridad, el familia de Jehova hay queda trambulicao y gendeh alegre. Por ejemplo, nuay quien sabe si quien debe hace el ultimo decision y si quien el debe cumpli con ese.

7. Asegun na Efeso 5:25, 28, proposito ba de Jehova que domina el maga hombre con el maga mujer?

⁷ Si bueno que tiene autoridad el maga hombre na familia, porque bien manada maga mujer ahora ta sinti que ta maltrata y ta domina kanila el diila marido? Por causa este cay manada maga hombre gendeh ta sigui con el maga principio de Jehova para na familia y ta iscuji sigui con el maga tradicion na diila lugar. Posible tambien sila abusa con el diila mujer para satisfecha con el diila mal deseo. Por ejemplo, el un marido posible domina con el de suyu mujer para manda sinti que mas importante le o para dale mira con otro que “deverasan hombre” le. Posible le pensa que gendeh le puede forza con el de suyu mujer que ama con ele pero puede le hace manera para tiene miedo con ele. Y puede le usa con ese miedo para controla con el de suyu mujer. * Ese clase de pensamiento y conducta ta quita con el honor y respeto que conviene para na maga mujer y contra este na cosa quierre si Jehova.​—Le con el Efeso 5:25, 28.

8. Paquemodo puede aprende el un hombre queda un buen cabeza de familia?

⁸ El un hombre puede aprende queda un buen cabeza de familia si imita le con el manera ta usa si Jehova y si Jesus con el diila autoridad. Considera con el dos calidad que ya dale  mira si Jehova y si Jesus, y nota si paquemodo el un buen cabeza de familia puede dale mira con ese maga calidad na de suyu tratamiento na de suyu mujer y maga anak.

9. Paquemodo ya dale mira si Jehova que humilde le?

⁹ Humildad. Si Jehova el de con todo sabio Persona que ya existi pero ta oi le con el opinion del de suyu maga siervo. (Gen. 18:23, 24, 32) Ta permiti le que dale maga sugestion aquellos bajo na de suyu autoridad. (1 Rey 22:19-22) Perfecto si Jehova pero gendeh le ta expecta perfeccion kanaton ahora. Sino, ta ayuda le con el maga imperfecto gente quien ta sirvi con ele para tiene buen exito. (Sal. 113:6, 7) Gane, el Biblia ta habla que si Jehova amo “el quien ta ayuda” kanaton. (Sal. 27:9; Heb. 13:6) Ya admiti si Rey David que puede lang le hace acaba con el grande trabajo que ya dale con ele por causa na humildad de Jehova.​—2 Sam. 22:36.

10. Paquemodo ya dale mira si Jesus que humilde le?

¹⁰ Considera con el ejemplo de Jesus. Maskin pa ele el Señor y Maestro del de suyu maga dicipulo, ya laba le el diila pies. Cosa el razon si porque ya preserva si Jehova con este detalle na Biblia? Claro que para dale con el todo, incluido con el maga cabeza de familia un buen ejemplo para sigui. Si Jesus mismo ya habla: “Ya dale ya yo con ustedes el ejemplo para ay hace tamen ustedes como ya hace yo con ustedes.” (Juan 13:12-17) Maskin pa tiene le grande autoridad, nuay le expecta que sirvi con ele el otro. Sino ya sirvi le con otro.​—Mat. 20:28.

11. Cosa puede aprende el un cabeza de familia na humildad de Jehova y de Jesus?

¹¹ Leccion para kanaton. El un cabeza de familia puede dale mira humildad na manada manera. Por ejemplo, gendeh le ta expecta perfeccion na de suyu mujer y maga anak. Ta oi le con el opinion diila, maskin pa gendeh sila uyun na de suyu opinion. Si Marley, quien ta queda na United States, ya habla: “Tiene vez, iyo y el de mio marido tiene diferente opinion. Pero ta sinti yo que ta aprecia y ta respeta le conmigo cay ta pidi le de mio opinion y ta considera con este antes hace decision.” Omento pa, el un humilde marido preparao hace maga trabajo na casa, maskin pa na diila comunidad ta mira con este como trabajo de mujer. Pero posible dificil este hace. Porque? “Onde yo estaba,” ya habla el un hermana que si Rachel, “si  el un marido ta ayuda con el de suyu mujer laba plato o limpia casa, el de suyu maga vecinos y pariente hay cuestiona con ele si ‘deverasan hombre’ ba le. Hay pensa sila que gendeh le ta puede controla con el de suyu mujer.” Si comon ese custumbre na lugar onde tu ta queda, acorda que si Jesus ya laba con el pies del de suyu maga dicipulo maskin pa ta mira con este como trabajo del esclavo. El un buen cabeza de familia no quierre que mira con ele el otro que importante. Sino, quierre le que queda alegre el de suyu mujer y maga anak. Cosa pa otro calidad el necesita para na un buen cabeza de familia?

12. Cosa ya puede hace si Jehova y si Jesus por causa na amor?

¹² Amor. El todo cosa ta hace si Jehova amo por causa na amor. (1 Juan 4:7, 8) Ta dale le con el diaton espiritual necesidad por medio na de suyu Palabra​—el Biblia​—y de suyu organizacion. Ta dale le con el diaton emocional necesidad y ta asigura kanaton que ta ama le kanaton. Pero quetal el diaton material necesidad? Si Jehova “ta dale canaton con bondad todo el maga necesita para el diaton alegria.” (1 Tim. 6:17) Si tan kamali kita, ta corecta le kanaton pero gendeh le ta descanza ama kanaton. Por causa na amor, ya hace manera si Jehova para rescata kanaton. Y grande gayot el amor de Jesus poreso ya dale le el de suyu vida para kanaton. (Juan 3:16; 15:13) Nuay maskin cosa el puede quita con el amor de Jehova y de Jesus para con aquellos leal kanila.​—Juan 13:1; Roma 8:35, 38, 39.

13. Porque importante para na un cabeza de familia que dale mira amor na de suyu familia? (Mira tambien con el cajon “ Paquemodo el un Nuevo Casao Hombre Puede Ganá con el Respeto del De Suyu Mujer?”)

¹³ Leccion para kanaton. El todo cosa hace el un cabeza de familia debe por causa na amor. Porque bien importante este? Si apostol Juan ya contesta: “Si gendeh le ta ama con su hermano o hermana [o familia] con quien le ta puede mira, no puede tamen le ama con el Dios, con quien le no puede mira.” (1 Juan 4:11, 20) El un hombre quien ta ama con el de suyu familia y quierre imita con Jehova y con Jesus hay dale  el espiritual, emocional y material necesidad del de suyu familia. (1 Tim. 5:8) Hay enseña y disciplina le con el de suyu maga anak. Hay continua tambien le hace maga decision que ta honra con Jehova y para na bien del suyu familia. Considera kita ahora con el cada uno de este y mira si paquemodo el un cabeza de familia puede imita con Jehova y con Jesus.

14. Cosa hace el un cabeza de familia para dale el espiritual necesidad del de suyu familia?

¹⁴ Dale el espiritual necesidad del de suyu familia. Igual con el de suyu Tata, quierre si Jesus ayuda con el de suyu maga siguidores tiene buen espiritualidad. (Mat. 5:3, 6; Mar. 6:34) Na igual manera, el primer prioridad del un cabeza de familia amo para dale el espiritual necesidad del de suyu familia. (Deut. 6:6-9) Puede le este hace si asigura le que ele y el de suyu familia ta le y ta estudia con el Palabra del Dios, ta atende maga miting, ta predica con el buen noticia y ta hace manera para tiene y mentena un buen amistad con Jehova.

15. Cosa el un manera que puede dale el un cabeza de familia con el emocional necesidad del de suyu familia?

¹⁵ Dale el emocional necesidad del de suyu familia. Ya habla si Jehova que ta ama le con Jesus na presencia del otro. (Mat. 3:17) Ya dale mira si Jesus que ta ama le con el de suyu maga siguidores por medio na palabra y accion. El de suyu maga siguidores ta habla tambien con ele que ta ama sila con ele. (Juan 15:9, 12, 13; 21:16) El un cabeza de familia puede dale mira que ta ama le con el de suyu mujer y maga anak por medio na accion. El un ejemplo amo si estudia le con el Biblia junto kanila. Debe tambien le habla que ta ama y ta aprecia le kanila, y si justo, comenda kanila adelante con otro.​—Prov. 31:28, 29.

16. Cosa pa otro debe hace el un cabeza de familia y cosa le hace para queda balance?

¹⁶ Dale el material necesidad del de suyu familia. Ya asigura si Jehova que el maga Israelita tiene el cosa sila necesita maskin pa cuando ya castiga kanila por causa na diila desobediencia. (Deut. 2:7; 29:5) Ta dale tambien le el diaton maga necesidad ahora. (Mat. 6:31-33; 7:11) Na igual manera, ya dale come si Jesus con aquellos quien ya sigui con ele. (Mat. 14:17-20) Ya cura tambien le con el maga enfermo. (Mat. 4:24) Para hace alegre con Jehova, el un cabeza de familia debe dale el material necesidad del de suyu familia. Pero necesita le queda balance. Gendeh le debe queda bien ocupao na secular trabajo para suporta con el de suyu familia que gendeh ya le ta puede dale enbuenamente con el espiritual y emocional necesidad del de suyu familia.

17. Paquemodo si Jehova y si Jesus ta enseña y ta disciplina kanaton?

¹⁷ Enseña kanila. Ta enseña y ta disciplina kanaton si Jehova para na bien diaton. (Heb. 12:7-9) Igual con el de suyu Tata, si Jesus ta enseña na amable manera con aquellos bajo na de suyu autoridad. (Juan 15:14, 15) Ta conseja  le pero na buen manera. (Mat. 20:24-28) Sabe le que imperfecto kita y manada beses tan kamali.​—Mat. 26:41.

18. Cosa debe acorda el un buen cabeza de familia?

¹⁸ El un cabeza de familia quien ta imita con Jehova y con Jesus ta dale consideracion con el maga kamali del suyu mujer y maga anak. Gendeh le ta “maltrata” kanila. (Col. 3:19) Sino, ta aplica le con el principio na Galacia 6:1 y ta pricura corecta kanila “con cariño” cay sabe le que maskin ele imperfecto. Igual con Jesus, sabe le que el de con todo buen manera para enseña amo por medio na ejemplo.​—1 Ped. 2:21.

19-20. Si ta hace decision, paquemodo el un cabeza de familia puede imita con Jehova y con Jesus?

¹⁹ Decidi para na bien del familia. Ta hace maga decision si Jehova para na bien del otro. Por ejemplo, ya decidi le crea vida, gendeh para na de suyu mismo bien sino cay quierre le que queda kita alegre. Nuay quien ya forza con ele para dale con el de suyu Anak para tapa con el diaton maga pecado. Ele mismo ya decidi hace ese sacrificio para na diaton bien. Si Jesus ya hace tambien maga decision para na beneficio del otro. (Roma 15:3) Por ejemplo, nuay le porsigui descanza para enseña con el manada gente.​—Mar. 6:31-34.

²⁰ El un buen cabeza de familia sabe que uno na maga de con todo dificil cosa que debe le hace amo hace justo decision para na de suyu familia. Bien importante para con ele ese responsibilidad. Ta pricura le evita hace maga decision que nuay buen razon o base lang na emocion. Sino ta permiti le con Jehova que enseña con ele hace justo decision. * (Prov. 2:6, 7) Na ese manera, hay pensa le el bien del otro y gendeh de suyu mismo.​—Fil. 2:4.

21. Cosa kita hay discuti na siguiente articulo?

²¹ Gendeh facil el assignment que ya dale si Jehova con el maga cabeza de familia y responsable sila con ele na manera si paquemodo sila ta hace con ese. Pero si el un marido pricura sigui con el ejemplo que ya dale mira si Jehova y si Jesus, hay queda le un buen cabeza de familia. Y si cumpli el mujer con el de suyu papel, hay queda alegre el diila matrimonio. Paquemodo debe mira el un mujer con el autoridad que tiene el de suyu marido como el cabeza del familia y cosa maga dificultad ta enfrenta el mujer? El siguiente articulo hay contesta con ese maga pregunta.