Despues del 1920, antes casa el de mio mayores, ya aprende sila el verdad. Ya nace yo del 1939. Cuando bata pa yo, ta queda kame na England. Ta sigui yo con el de mio mayores na maga miting y na uliji yan enroll yo na Theocratic Ministry School. Ta puede pa yo acorda con el de mio primer talk. Necesita yo para na un cajon para puede yo mira con el audience estaba na stage. Seis año pa lang yo aquel tiempo y ta nervia gayot yo mira con el audience.

Para puede yo predica, ta escribi de mio tata un simple presentacion na un card para puede yo usa na ministerio. El primer vez que ya predica yo solo amo cuando ocho año yo. Bien alegre gayot yo cuando el householder ya le con el de mio card y ya acepta dayun con el libro “Let God Be True”! Ya corre yo para habla con el de mio tata. El ministerio y el maga miting ya dale conmigo alegria y ya ayuda este conmigo para tiene el deseo sirvi con Jehova full-time.

Mas ya queda hondo el de mio amor para na verdad na Biblia despues el de mio tata man request The Watchtower para conmigo. Ta le dayun yo con el cada magasin apenas este llega. Mas ya queda fuerte el de mio confianza con Jehova y na uliji, ya dedica yo con el de mio vida con ele.

Del 1950, el diamon familia ya atende na asemblea Theocracy’s Increase na New York. Del Jueves, Agosto 3, el tema de ese dia amo “Missionary Day.” Na ese dia, si Hermano Carey Barber, quien na uliji ya queda un Cuerpo Gobernante, ya dale con el talk de bautismo. Despues le pregunta con el maga candidato de bautismo el dos pregunta na ultimo del de suyu talk,  ya para yo y ya contesta, “Si!” Once año yo aquel tiempo pero ya realiza yo que ya hace ya yo un importante decision. Pero tiene yo miedo anda na agua cay no sabe yo nada. Ya sigui conmigo el de mio angkol na pool para gendeh yo tiene miedo. Deverasan, pas-pas lang quel ya sucede y gane, nuay tupa el de mio pies na piso del pool. Ya hace conmigo pasa na un hermano para na otro; el uno ya bautiza conmigo y el otro ya alza conmigo pa-apuera del pool. Principia na ese importante dia, si Jehova ya continua hace derecho con el de mio camino.

Despues yo gradua high school, quierre yo man pioneer pero el de mio maestro ya anima conmigo que saca alto educacion. Ya sigui yo con el diila pressure y ya entra yo na universidad. Pero, ya realiza yo que gendeh esta fuerte el de mio espiritualidad si man focus yo na de mio estudiada. Poreso, ya decidi yo descanza entra escuela. Ya reza yo con Jehova acerca con el de mio decision y ya escribi yo carta con el de mio maga maestro y maestra, y ya explica que gendeh ya yo entra escuela. Por causa na de mio confianza con Jehova, ya principia dayun yo man pioneer.

Del Julio 1957, ya principia yo sirvi full-time na ciudad del Wellingborough. Ya pregunta yo na maga hermano na London Bethel si puede ba sila recomenda un experienciao pioneer hermano con quien yo puede man junto. Si Hermano Bert Vaisey ya enseña conmigo manada cosas. Un activo predicador le y ya ayuda le conmigo para tiene buen schedule na de mio predicacion. El congregacion tiene seis de edad hermana, si Hermano Vaisey y iyo. El preparacion y participacion na maga miting ya dale conmigo manada oportunidad para hace fuerte el de mio confianza con Jehova y dale mira con el de mio fe.

Despues yo man preso por corto tiempo cay nuay yo sirvi como soldao, ya conoce yo con Barbara, un special pioneer hermana. Ya casa kame del 1959, y conforme anda na maskin donde kanamon man assign. El diamon primer assignment amo na Lancashire na norte oeste del England. Despues, del Enero 1961, ya invita conmigo para atende con el un mes curso del Kingdom Ministry School na London Bethel. Despues de ese curso, yan assign conmigo na traveling work. Por dos semana, ya ricibi yo training estaba na un experienciao circuit overseer na ciudad del Birmingham, y ya permiti con Barbara que man junto conmigo. Despues, ya bira kame na diamon assignment na provincia del Lancashire y Cheshire.

Del Agosto 1962 mientras na vacacion kame, ya ricibi kame un carta estaba na branch office. El laman de ese carta amo un application form para na Gilead School! Despues reza acerca con ese, iyo y si Barbara yan fill-up con ese form y ya imbia dayun con ese para na branch office como cosa ya pidi kanamon. Despues del cinco meses, yan viaje kame para na Brooklyn, New York, para atende con el ika-38 clase del Gilead​—diez meses curso de teocratico educacion.

El cosa kanamon ya enseña na Gilead School, gendeh lang acerca na Palabra del Dios y de  suyu organizacion sino acerca tambien na diaton maga hermano y hermana na entero mundo. Na diamon edad que mas de 20 año, manada kame cosa ya puede aprende estaba na otro maga estudiante na diamon clase. Ya tiene yo el privilegio que hace assignment cada dia junto con Hermano Fred Rusk, uno del diamon maga instructor. Uno na de suyu maga bonito leccion que ya hace le claro amo que necesita pirmi dale justo consejo, quierre decir, asigura que el consejo que ta dale amo base na Biblia. El cuanto del quien ya dale talk durante el diamon clase amo el maga experienciao hermano igual con kanda Nathan Knorr, Frederick Franz y Karl Klein. Y manada kame cosa ya aprende estaba na humilde ejemplo de Hermano A. H. Macmillan quien ya enseña kanamon acerca si paquemodo si Jehova ya ayuda con el de suyu maga siervo durante el maga dificil tiempo desde 1914 hasta 1919!

Na fin del diamon clase, si Hermano Knorr ya habla kanamon de Barbara que yan assign kanamon na Burundi na Africa. Ya anda dayun kame na Bethel library para busca na Yearbook si paquemodo de manada publisher el ta sirvi na Burundi na ese tiempo. Pero ya espanta kame que nuay ni uno publisher na ese nacion! Si, hay anda kame na lugar que nuay pa gayot puede predica, un lugar que diutay lang el cosa kame sabe. Bien malingasa kame! Pero despues kame reza, ya sinti dayun kame calmao.

Na diamon assignment, el todo cosas bien diferente gayot na cosa kame ya experiencia​—el clima, el cultura y el lengguaje. Ahora, necesita kame aprende French. Necesita tambien kame busca lugar onde queda. Dos dia despues kame llega alla, uno del diamon classmate na Gilead, si Harry Arnott, ya bisita kanamon mientras pabolbida le na de suyu assignment na Zambia. Ya ayuda le kanamon busca apartment, y amo este ya queda el primer casa de misionario alla. Pero nuay tarda, ya principia tiene oposicion estaba na maga oficial de gobierno quien nuay cosa sabe acerca na maga Testigo de Jehova. Mientras alegre kame na diamon assignment, ya informa kanamon el maga autoridad que gendeh kame puede esta si nuay kame valido permit na diamon trabajo. Maka-triste cay necesita kame sale y anda na un nuevo nacion, na Uganda.

Malingasa kame cuando para anda kame na Uganda que nuay visa pero ya confia kame con  Jehova. El un hermano de Canada quien ta sirvi donde tiene grande necesidad na Uganda, ya ayuda kanamon explica el diamon situacion na un oficial de immigration. El un oficial ya habla kanamon que puede kame esta por cuanto mes hasta puede kame saca permit para puede kame esta na ese nacion. Ese ta dale prueba que ta ayuda kanamon si Jehova.

El condicion na este nuevo assignment bien diferente contra na Burundi. Ya principia ya el trabajo predicacion na este lugar maskin 28 Witness lang el tiene na entero nacion. Manada ta converza Ingles na diamon teritorio. Pero ya realiza kame que para puede kame ayuda con el maga interesao progresa, necesita kame aprende con el uno na manada lengguaje que ta converza alla. Ya principia kame predica na lugar de Kampala donde bien manada ta converza na lengguaje Luganda poreso ya principia kame aprende con ese lengguaje. Ya alcanza cuanto año para puede aprende con ese lengguaje pero ya ayuda se kanamon para queda mas efectivo na trabajo predicacion! Mas ya entende kame el espiritual necesidad del diamon Bible study. Por causa con ese, mas ya confia sila kanamon y ya habla si cosa sila ta sinti acerca na cosa sila ta aprende.

El diamon alegria que puede ayuda con el maga humilde gente aprende el verdad, mas ya omenta cuando ya ricibi kame un privilegio que nuay kame expecta​—amo que sirvi na traveling work na entero nacion. Bajo na direccion del Kenya branch, yan viaje kame con el entero nacion para busca maga lugar donde puede sirvi el maga special pioneer. Manada beses kame ya experiencia con el pagka-hospitable del maga gente quien nuay pa gayot conoce con el maga Witness. Ya ricibi sila kanamon enbuenamente y ya prepara pa gane sila comida para kanamon.

Ya experiencia tambien kame un diferente clase de viaje. Estaba na Kampala, yan viaje yo por dos dia na tren para na pantalan de Mombasa na Kenya. Despues, ya munta yo barco para na Seychelles, un grupo de maga isla na Indian Ocean. Principia del 1965 hasta 1972, yan junto conmigo si Barbara na de mio regular visitada na Seychelles. Na ese tiempo, dos publisher lang el ta queda alla. Pero na uliji, ya queda ya este un grupo y despues un congregacion. El de mi siguiente viaje amo visita con el maga hermano y hermana na Eritrea, Ethiopia y Sudan.

Ya cambia el situacion del politica na Uganda despues el un grupo de militar ya controla con el gobierno. Na ese dificil tiempo, ya hace conmigo acorda que mas bueno si obedece con el mandamiento del Biblia que ‘debolbe con Cesar el cosa de Cesar.’ (Mar. 12:17) Ya llega el tiempo que el todo foreigner quien ta queda na Uganda necesita registra na oficina del polis cerca na lugar onde sila ta queda. Ya obedece dayun kame con ese. Cuanto dia despues, mientras tan viaje kame na Kampala, un oficial de polis el ya atraca conmigo y con el otro misionario. Ya tiene gayot kame miedo! Ya acusa sila kanamon como maga espia y ya lleva sila kanamon na centro de estacion del maga polis donde ya explica kame que maga misionario kame y gendeh ta causa gulu. Ya habla kame que ya registra ya kame na polis pero nuay sila oi kanamon. Ya arresta sila kanamon y ya lleva na estacion de polis que cerca na casa del maga misionario. Ya sinti kame alivio cuando el un oficial quien sabe que yan  registro ya kame, ya conoce kanamon y ya manda larga kanamon!

Mientras tan viaje kame, pirmi kame ta tiene miedo pasa na checkpoint del maga soldao, especialmente si hace kanamon para el maga burracho soldao. Na cada situacion, ta reza kame y ta sinti calmao si ta permiti kanamon pasa. Maka-triste que del 1973, ya manda sale con el todo foreigner misionario na Uganda.

Ya ricibi ya tambien kame otro assignment, na este tiempo na Côte d’Ivoire, West Africa. Un grande cambio este para kanamon cay necesita kame aprende man anad con el nuevo cultura, pirmi usa con el lengguaje de French y junto queda na maga misionario que estaba na diferente nacion. Ya experiencia ya tambien kame el direccion de Jehova mientras el maga humilde y tiene justo condicion de corazon maga persona ta ricibi con el buen noticia. Por causa na diamon confianza, ya puede kame mira si paquemodo si Jehova ta hace derecho con el diamon camino.

Nuay tarda, ya tiene cancer si Barbara. Manada beses kame ya bolbe na Europe para cura con ele. Y del 1983 ya realiza kame que gendeh mas kame puede sirvi na diamon assignment na Africa. Bien maka-triste gayot quel para kanamon.

Mas ya agraba el cancer de Barbara mientras ta sirvi kame na London Bethel y nuay tarda, ya muri le. Ya suporta gayot conmigo el familia Bethel particular ya el un maridable quien ya ayuda conmigo man adjust y continua confia con Jehova. Na uliji, ya conoce yo con el un commuter Bethelite hermana quien ya sirvi del otro como special pioneer y ta ama gayot con Jehova. Ya casa kame de Ann del 1989 y ya principia kame sirvi na London Bethel.

Principia del 1995 hasta 2018, ya tiene yo el privilegio sirvi como el representante del world headquarters (ta llama del otro como zone overseer), y ya visita cerca maga 60 diferente nacion. Na cada visitada, ta puede yo mira si paquemodo si Jehova ta bendici con el de suyu maga siervo maskin cosa pa el diila circumstancia.

Del 2017, ya bira yo na Africa na uno del de mio visitada. Ya lleva yo con Ann na Burundi y alegre kame mira si paquemodo de manada el ya guinda na verdad. Na mismo camino donde ta predica yo na casa en casa del 1964, tiene ya un bonito facilidad de Bethel que ta sirvi con el mas de 15,500 publisher.

Bien alegre yo cuando ya ricibi yo con el lista del maga lugar que visita yo na 2018. Entrao na ese lista amo el nacion de Côte d’Ivoire. Cuando ya llega yo na Abidjan, ya sinti yo que dol aquel ya bolbe yo na de mio mismo lugar. Cuando ya mira yo con el lista del telefono del maga hermano quien ta sirvi na Bethel, ya nota yo que el quien ta queda na costao del guest room amo si Hermano Sossou. Ya acorda yo que ya sirvi le como el city overseer cuando na Abidjan yo. Pero mali yo. Otro Sossou gale quel​—el de suyu anak.

Ta cumpli gayot si Jehova con el de suyu maga promesa. Na maga dificultad que ya experiencia yo, ya enseña este conmigo que si confia kita con Jehova, hay hace gayot le derecho con el diaton camino. Ahora, quierre kame continua camina con el camino que hay queda mas claro na nuevo mundo.​—Prov. 4:18.