1-2. Asegun na Mateo 5:11, paquemodo kita debe mira con el maga probanza?

YA PROMETE si Jesus con el de suyu maga siguidores que hay queda sila deverasan alegre. Y ya habla tambien le con aquellos quien ta ama con ele que hay enfrenta sila maga probanza. (Mat. 10:22, 23; Luc. 6:20-23) Alegre kita queda dicipulo del Cristo. Pero cosa kita sinti si man contra kanaton el diaton familia, persigui el gobierno o si man pressure kanaton hace cosa malo el diaton uban na trabajo o na escuela? Si pensa kita acerca con este maga cosas, posible kita man lingasa.

² Mayoria del maga gente gendeh ta pensa que el persecucion puede causa alegria. Pero, amo se mismo el cosa ta habla el Palabra del Dios que hace sila. Por ejemplo, si dicipulo Santiago ya escribi que en vez queda sobra de malingasa, debe kita queda alegre si ta enfrenta kita maga probanza. (Sant. 1:2, 12) Y ya habla si Jesus que debe kita queda alegre si ta persigui kanaton. (Le con el Mateo 5:11.) Paquemodo kita continua queda alegre maskin ta enfrenta maga probanza? Manada kita cosa puede aprende si considera kita con el carta de Santiago que ya escribi le para na maga Cristiano del primer siglo. Una, considera kita con el maga dificultad que ya enfrenta aquel maga Cristiano.

3. Cosa ya sucede despues si Santiago queda un dicipulo de Jesus?

³ Corto tiempo despues queda un dicipulo el hermano de Jesus que si Santiago, ya principia persigui con el maga Cristiano na Jerusalem. (Act. 1:14; 5:17, 18) Y cuando ya mata con dicipulo Esteban, manada Cristiano el “ya escapa para na  maga region de Judea y Samaria” y ya llega pa gane na Chipre y Antioquia. (Act. 7:58–8:1; 11:19) Ya experiencia gayot manada dificultad el maga dicipulo. Maskin pa ansina, ya continua sila predica con el buen noticia onde man sila ya guinda y ya forma maga congregacion na entero Imperio del Roma. (1 Ped. 1:1) Pero, gendeh lang ese el dificultad que ya enfrenta el maga Cristiano del primer siglo.

4. Cosa otro maga probanza ya enfrenta el maga Cristiano del primer siglo?

⁴ El maga Cristiano del primer siglo ya enfrenta diferente probanza. Por ejemplo, na maga año 50 C.E., el Romano emperador que si Claudio ya manda sale con el todo Judio na Roma. Poreso, el maga Judio quien ya queda maga Cristiano, forzao ya deja con el diila maga casa y ya cambia lugar. (Act. 18:1-3) Del maga 61 C.E., si apostol Pablo ya escribi que el maga gente ya insulta con el manada del de suyu maga hermano y hermana na publico, ya pone kanila na preso y ya ruba con el diila maga cosas. (Heb. 10:32-34) Y igual na otro maga gente, el cuanto maga Cristiano pobre y ta enferma.​—Roma 15:26; Fil. 2:25-27.

5. Cosa maga pregunta kita hay contesta?

⁵ Cuando ya escribi si Santiago con el de suyu carta antes del año 62 C.E., sabe le el maga probanza que ta experiencia el de suyu maga hermano y hermana. Ya guia si Jehova con Santiago para escribi con este maga Cristiano y dale kanila practical consejo que puede ayuda kanila esta alegre maskin pa ta enfrenta maga probanza. Examina kita con el carta de Santiago y contesta con este maga pregunta: Cosa el alegria que ta refiri si Santiago? Cosa puede quita con ese alegria na un Cristiano? Y paquemodo el sabeduria, fe y coraje puede ayuda kanaton mentena con el diaton alegria na maskin cosa probanza kita enfrenta?

6. Asegun na Lucas 6:22, 23, porque puede queda alegre el un Cristiano si ta enfrenta maga probanza?

⁶ Posible pensa el maga gente que puede lang sila queda alegre si tiene sila buen salud, manada sen y alegre familia. Pero el alegria que ya refiri si Santiago amo parte del fruta del sagrao espiritu y gendeh este ta depende na circumstancia del un persona. (Gal. 5:22) El un Cristiano puede queda deverasan alegre cay sabe le que ta hace le alegre con Jehova y ta sigui le con el ejemplo de Jesus. (Le con el Lucas 6:22, 23; Col. 1:10, 11) Igual na un fuego que ta continua arde adentro na un lampara, este clase de alegria ta continua arde adentro na corazon del un Cristiano. Gendeh este ta fundi si ta enferma kita o ta falta sen. Gendeh este ta apaga si ta gangguia kanaton o tan contra kanaton el diaton familia o el otro. En vez muri, mas ta queda este arde cada vez ta pricura apaga con este el otro. El maga probanza que ta enfrenta kita por causa na diaton fe, ta dale mira que maga deverasan dicipulo kita del Cristo. (Mat. 10:22; 24:9; Juan 15:20) Amo este el razon si porque si Santiago ya escribi: “Maga hermano y hermana, trata ustedes como un bien grande alegria el maga sufrimiento que ta experiencia ustedes.”​—Sant. 1:2.

7-8. Porque ta queda fuerte el diaton fe si ta enfrenta kita maga probanza?

⁷ Ya menciona si Santiago otro pa razon si porque el maga Cristiano preparao enfrenta maga grabe probanza. Ele ya habla: “Si ta pruba con el de ustedes fe ese para tene lang ustedes paciencia na maga sufrimiento.” (Sant. 1:3) El maga probanza puede compara na fuego que ta usa para forma con el espada de hierro. Si ta hace calenta con el espada y despues hace imfria, mas ta queda duro el hierro. Na igual manera, si ta enfrenta kita maga probanza, mas ta queda fuerte el diaton fe. Poreso, si Santiago ya escribi: “Para ay queda ustedes . . . completo y noay cosa ustedes ay falta, el de ustedes paciencia necesita produci todo clase de buen trabajo.” (Sant. 1:4) Si ta puede kita mira el diaton maga probanza ta hace fuerte con el diaton fe, ta puede kita aguanta con este con alegria.

⁸ Na de suyu carta, ya menciona tambien si Santiago con el cuanto cosas que puede hace perde con el diaton alegria. Cosa se maga dificultad y paquemodo kita puede enfrenta con ese?

9. Porque kita necesita sabeduria?

⁹ El dificultad: Si no sabe kita cosa hace. Si ta enfrenta un probanza, quierre kita depende con Jehova para ayuda kanaton hace justo decision que ta hace alegre con ele, que ta hace fuerte y ta anima con el maga hermano y hermana,  y ayuda kanaton mentena con el diaton integridad. (Jer. 10:23) Necesita kita sabeduria para sabe si cosa kita hace y si cosa kita debe habla con aquellos quien tan contra kanaton. Si no sabe kita cosa hace, posible kita man luya y perde dayun el diaton alegria.

10. Asegun na Santiago 1:5, cosa kita necesita hace para tiene sabeduria?

¹⁰ El solucion: Pidi sabeduria con Jehova. Si quierre kita aguanta con alegria con el maga probanza, debe kita pidi una con Jehova na rezo que dale kanaton el sabeduria que necesita para hace maga justo decision. (Le con el Santiago 1:5.) Cosa kita debe hace si ta sinti kita que gendeh dayun ta contesta si Jehova con el diaton rezo? Si Santiago ya habla que debe kita continua pidi con Dios. Gendeh consumi si Jehova si continua kita con ele pidi sabeduria. Gendeh le rabia kanaton. El diaton Tata na cielo “ta dale . . . con bondad” si pidi kita con ele que dale kanaton sabeduria para aguanta con el maga probanza. (Sal. 25:12, 13) Ta mira le con el diaton maga probanza. Tiene le empatia y bien quierre ayuda kanaton. Asigurao, hay hace gayot se kanaton alegre! Pero, paquemodo dale kanaton sabeduria si Jehova?

11. Cosa pa kita debe hace para tiene sabeduria?

¹¹ Ta dale kanaton sabeduria si Jehova por medio na de suyu Palabra. (Prov. 2:6) Para puede tiene ese sabeduria, debe kita estudia con el Palabra del Dios y con el diaton maga publicacion. Pero gendeh bastante que saca lang kita saber. Debe kita aplica na diaton vida el de suyu maga consejo. Si Santiago ya escribi: “Obedece el cosa ta habla el Palabra y no ustedes conforma oi-oi lang con ese.” (Sant. 1:22) Si ta aplica kita con el consejo del Dios, ta hace kita manera para tiene paz y hay queda kita mas razonable y lastimoso. (Sant. 3:17) Ese maga calidad puede ayuda kanaton enfrenta con el maskin cosa probanza y gendeh perde el alegria.

12. Porque importante que bien familiar kita con el Biblia?

 ¹² El Palabra del Dios puede compara na un espejo. Ta ayuda este kanaton mira si onde kita necesita hace cambio. (Sant. 1:23-25) Por ejemplo, despues estudia con el Palabra del Dios posible kita realiza que necesita kita controla con el diaton rabia. Na ayuda de Jehova, ya puede kita aprende queda calmao maskin pa el maga gente y maga problema ta manda kanaton consumi. Cay calmao kita, mas ta puede kita enfrenta enbuenamente con el maga problema. Mas ta puede kita pensa enbuenamente y hace maga justo decision. (Sant. 3:13) Que bien importante que bien familiar kita con el Biblia!

13. Porque kita debe estudia con el maga ejemplo na Biblia?

¹³ Tiene vez, ta puede kita aprende si cosa evita despues pa kita hace el un kamali. Pero, gendeh se el justo manera para aprende. El mas buen manera para tiene sabeduria amo si aprende kita na maga buen cosas que ya hace el otro y na diila maga kamali. Poreso, ya anima kanaton si Santiago que aprende na maga ejemplo na Biblia igual de kanda Abraham, Rahab, Job y Elias. (Sant. 2:21-26; 5:10, 11, 17, 18) Este maga leal siervo de Jehova ya puede aguanta con el maga probanza que ya puede era quita con el diila alegria. El diila buen ejemplo ta dale mira que na ayuda de Jehova puede tambien kita hace igual ansina.

14-15. Porque gendeh kita debe ignora con el diaton maga duda?

¹⁴ El dificultad: Si tan duda kita. Tiene vez, tiene kita maga cosas que tan dificil entende na Palabra del Dios. O baka nuay contesta si Jehova con el diaton maga rezo na manera que quierre kita. Puede este causa para man duda kita. Si ignora lang kita con el diaton maga duda, hay hace este luya con el diaton fe y hace malo con el diaton relacion con Jehova. (Sant. 1:7, 8) Y puede pa gane este hace perde con el diaton esperanza na futuro.

¹⁵ Ya compara si apostol Pablo con el diaton esperanza na futuro na un ancla. (Heb. 6:19) El un ancla ta hace pijo con el barco durante el un tifun y ta agarra con este para gendeh este guinda na maga piedra. Pero, queda lang usable el un ancla si el cadena que ta conecta con este para na barco gendeh hay curta. Igual con el calawang que ta hace malo con el cadena del un ancla, el maga duda ta hace malo con el diaton fe. Si ta enfrenta oposicion, el un persona quien tan duda puede perde el fe que hay cumpli si Jehova con el de suyu maga promesa. Si perde el diaton fe, perde tambien el diaton esperanza. Como cosa ya habla si Santiago, el quien tan duda amo “igual como el marijada, que ta subi y ta abaja depende con el viento.” (Sant. 1:6) El persona quien igual ansina posible gendeh gayot queda alegre.

16. Cosa kita debe hace si tiene kita maga duda?

¹⁶ El solucion: Quita con el de tuyu duda; hace fuerte con el de tuyu fe. No man alang-alang. Na tiempo de profeta Elias, el maga siervo de Jehova yan alang-alang. Si Elias ya habla kanila: “Hasta cuando ustedes gendeh puede decidi? Si si Jehova el deverasan Dios, sigui con ele; pero si si Baal, sigui con ele!” (1 Rey 18:21) Ansina tambien ahora el cosa kita debe hace. Necesita kita man research para queda convincido que si Jehova el Dios, que el Biblia amo el de suyu Palabra y el maga Testigo de Jehova amo el de suyu maga siervo. (1 Tes. 5:21) Si hace kita se, hay perde el diaton duda y queda fuerte el diaton fe. Si necesita kita ayuda para quita con el diaton maga duda, puede kita pidi ayuda na maga anciano. Debe kita actua dayun para puede mentena con el diaton alegria na servicio con Jehova.

17. Cosa hay sucede si perde el diaton animo?

¹⁷ El dificultad: Si tan luya kita. El Palabra  del Dios ta habla: “Si tan luya tu na tiempo de problema, hay menora el de tuyu fuerza.” (Prov. 24:10) El Hebreo palabra que yan translate “tan luya” quierre decir “perde animo.” Si perde el de tuyu animo, pronto lang perde el de tuyu alegria.

18. Cosa quierre decir que aguanta?

¹⁸ El solucion: Confia que hay dale contigo si Jehova el coraje para aguanta. Necesita kita coraje para puede aguanta con el maga probanza. (Sant. 5:11) El palabra que ya usa si Santiago para na “aguanta” ta dale kanaton idea acerca na un persona quien ta esta parao na de suyu posicion. Ta manda este pensa kanaton acerca con el un soldao quien con coraje ta para na de suyu posicion y gendeh tan atras maskin paquemodo pa con ele ataca el contrario.

19. Cosa kita puede aprende na ejemplo de apostol Pablo?

¹⁹ Si apostol Pablo amo un buen ejemplo quien ya aguanta y ya demonstra coraje. Tiene tiempo, ya sinti le luya. Pero ya puede le aguanta cay ya confia le con Jehova quien ya dale con ele el fuerza que necesita le. (2 Cor. 12:8-10; Fil. 4:13, NWT.) Puede tambien kita tiene el igual fuerza y coraje si humilde kita acepta que necesita kita el ayuda de Jehova.​—Sant. 4:10.

20-21. Cosa kita puede asigura?

²⁰ Puede kita asigura que gendeh castigo estaba con Jehova el maga probanza que ta enfrenta kita. Si Santiago ya asigura kanaton: “Si tu ta sufri na tentacion, no habla: ‘El Dios amo ya tenta conmigo,’ cay ningunos gendeh ta puede tenta con el Dios para hace malo, ni gendeh tamen el Dios ta tenta con ningunos.” (Sant. 1:13) Si convincido kita con ese verdad, hay queda kita mas cerca con el diaton amable Tata na cielo.​—Sant. 4:8.

²¹ Si Jehova amo “siempre y gendeh ta cambia.” (Sant. 1:17) Ya suporta le con el maga Cristiano del primer siglo na diila maga probanza y hay ayuda tambien le con el cada uno kanaton ahora. Pidi con Jehova que ayuda contigo tiene sabeduria, fe y coraje. Hay contesta le con el de tuyu maga rezo. Y puede tu asigura que hay ayuda le contigo mentena con el de tuyu alegria mientras ta aguanta con el maga probanza!