1. Cosa buen calidad tiene el maga siervo de Jehova?

EL Biblia ya predicta que el maga siervo del Dios “hay ofrece con el diila mismo cuerpo” para sirvi con Jehova bajo na direccion del de suyu Anak. (Sal. 110:3) Ese profecia ta cumpli ya ahora. Cada año, el maga siervo de Jehova ta usa millones de hora para hace con el trabajo predicacion. Voluntario sila ta hace con ese y nuay pago. Ta usa tambien sila con el diila tiempo para suporta con el diila maga hermano y hermana na fisical, emocional y espiritual. El maga responsable hermano ta usa manada hora para prepara con el maga parte na miting y man shepherding con el maga hermano y hermana. Cosa ta motiva kanila para hace con ese todo? El amor—amor para con Jehova y para na projimo.—Mat. 22:37-39.

2. Asegun na Roma 15:1-3, cosa ejemplo ya dale mira si Jesus?

² Ya dale mira buen ejemplo si Jesus que hace una con el bien del otro contra na de suyu mismo cuerpo. Ta pricura kita hace con el diaton de con todo bueno para sigui con el de suyu ejemplo. (Le con el Roma 15:1-3.) Aquellos quien ta imita con ele hay tene maga beneficio. Si Jesus ya habla: “Mas grande el alegria de aquel quien ta dale contra con el quien ta recivi.”—Act. 20:35.

3. Cosa kita hay considera na este articulo?

³ Na este articulo, hay man repaso kita con el cuanto sacrificio que ya hace si Jesus para sirvi con otro y hay considera kita si paquemodo kita puede imita con el de suyu ejemplo. Hay discuti tambien kita si paquemodo kita hay tene mas deseo para sirvi con otro.

4. Paquemodo si Jesus ya hace una con el bien del otro contra na de suyu mismo cuerpo?

⁴Ya ayuda si Jesus con otro maskin pa cansao le. Pensa si cosa ya hace si Jesus cuando el manada gente ya atraca con ele na monte, posible cerca na Capernaum. Ya reza si Jesus entero noche. Bien cansao le pero cuando ya mira le con el maga gente, ya tiene le lastima con el maga pobre y enfermo junto kanila. Nuay lang le basta cura kanila sino ya dale le con el uno del maga de con todo bonito discurso—el Sermon na Monte.—Luc. 6:12-20.

5. Paquemodo el maga cabeza de familia ta imita con el ejemplo de Jesus maskin pa cansao sila?

⁵Si paquemodo el maga cabeza de familia ta imita con Jesus. Imagina con este ecsena: Despues del entero dia trabajo, bien cansao ya bolbe na casa el un cabeza de familia. Maskin pa quierre era le cancela con el diila De Familia Adoranza ese noche, ya pidi le con Jehova que dale con ele fuerza para conduci con el estudiada. Ya contesta si Jehova con el de suyu rezo y ya hace con el estudiada igual na cosa sila ta hace cada semana. El diila maga anak ya aprende un importante leccion aquel noche—para na diila mayores, mas importante el espiritual cosas contra na otro maga cosas.

6. Dale un ejemplo si paquemodo si Jesus ya sacrificia con el de suyu tiempo para ayuda con otro.

⁶Bondadoso si Jesus ta dale con el de suyu personal tiempo. Ta puede ba tu imagina si cosa ya sinti si Jesus cuando ya sabe le que ya mata con el de suyu amigo que si Juan Bautista? Asigurao, bien triste si Jesus. El Biblia ya habla: “Cuando si Jesus ya oi el noticia, ya sale Le alla na aquel lugar, ya embarca na un baroto y ya anda na un lugar silencio.” (Mat. 14:10-13) Puede kita entende si porque ele quierre queda solo-solo. Si bien dolorido kita, quierre kita esta solo. Pero, nuay se puede hace si Jesus. Una pa ya llega el maga gente na lugar silencio que quierre le anda. Cosa el reaccion de Jesus? Ya pensa le el maga necesidad del maga gente y “ya tene Le lastima” kanila. Ya puede le mira que necesita sila ayuda y comforta estaba con Dios y ya dale le se dayun kanila. Gane, “ya principia Le insiña canila [gendeh por corto tiempo sino] por largo tiempo.”—Mar. 6:31-34; Luc. 9:10, 11.

7-8. Dale un ejemplo si paquemodo el maga amable anciano ta imita con Jesus si tiene maga necesidad.

 ⁷Si paquemodo el maga amable anciano ta imita con Jesus. Ta aprecia gayot kita con el maga trabajo que ta hace el diaton maga amable anciano para kanaton. Manada de ese maga trabajo gendeh ta puede mira el congregacion. Por ejemplo, si tiene maga medical emergencia, el maga miembro del Hospital Liaison Committee ta ayuda dayun con el diila maga hermano y hermana. Mas mucho, ta sucede ese emergencia durante el noche! Pero por causa na diila compasion para na diila hermano o hermana quien ta necesita, aquellos maga amable anciano, junto con el diila maga familia, ta hace una con el bien del diila maga hermano y hermana contra na diila mismo cuerpo.

⁸ El maga anciano ta ayuda tambien na construida del maga Kingdom Hall, otro maga facilidad y na disaster relief. Y ta usa sila manada tiempo para enseña, anima y suporta kanaton. Todo este maga hermano y el diila maga familia conviene ricibi el diaton sincero comendacion. Ojala, pirmi bendici si Jehova con el diila esfuerzo. Siempre igual con otro, el maga anciano necesita queda balance. Gendeh sila debe usa bien grande tiempo para hace con ese maga teocratico actividad que gendeh mas sila puede dale con el necesidad del diila familia.

9. Asegun na Filipo 2:4, 5, cosa custumbre debe cultiva el todo Cristiano?

⁹ Le con el Filipo 2:4, 5. Siempre, gendeh kita todo maga anciano pero todo kita puede imita con Jesus que conforme hace maga sacrificio.  El Biblia ta habla que ya “queda [le] igual como un muchacho.” (Fil. 2:7) Pensa si cosa kita puede aprende na ese versiculo. El un esclavo o siervo hay busca maga oportunidad para hace alegre con el de suyu amo. Como esclavo de Jehova y quien ta sirvi con el de tuyu maga hermano y hermana, asigurao quierre tu queda mas usable con Jehova y con el de tuyu maga hermano y hermana. Puede tu se hace si considera tu con este siguiente sugestion.

10. Cosa kita puede pregunta na diaton mismo cuerpo?

¹⁰Examina con el de tuyu custumbre. Pregunta con el de tuyu mismo cuerpo igual ansina: ‘Paquemodo yo de preparao hace maga sacrificio para ayuda con otro? Cosa yo hace, si por ejemplo, ya pidi conmigo que visita con el un de edad hermano na nursing home o lleva con el un de edad hermana na maga miting? Preparao ba yo ayuda si tiene necesita maga voluntario para limpia con el lugar onde hace con el asemblea de region o para mentena con el Kingdom Hall?’ Alegre si Jehova si preparao kita dale el diaton tiempo, fuerza y material cosas—el todo cosas que ya dedica kita con ele—para ayuda con otro. Si ya nota kita que necesita pa kita hace mas, cosa kita puede hace?

11. Paquemodo el rezo puede ayuda kanaton cultiva con el calidad que conforme hace maga sacrificio?

¹¹Sincero reza con Jehova. Pone kita que necesita tu hace pa mas na cuanto aspeto pero nuay tu gana hace maga necesita cambio. Na ese situacion, sincero reza con Jehova. Queda honesto. Habla con Jehova si cosa tu ta sinti y pidi con ele que dale contigo “el voluntad [o deseo] y el fuerza para hace todo maga cosa-cosa.”—Fil. 2:13.

12. Paquemodo el maga bautizao joven hermano puede ayuda na congregacion?

¹² Si bautizao joven hermano tu, pidi con Jehova que ayuda contigo cultiva el deseo para hace pa mas na servicio na congregacion. Na cuanto nacion, mas manada el anciano contra na siervo ministerial y manada de aquellos maga siervo ministerial tiene ya edad. Mientras ta queda grande el organizacion, mas necesita kita maga joven hermano para ayuda cuida con el maga siervo de Jehova. Si conforme tu sirvi maskin onde contigo necesita, hay queda tu alegre. Porque? Cay puede tu hace alegre con Jehova, tene buen reputacion y queda satisfechao cay ya puede tu ayuda con otro.

13-14. Cosa maga practical ayuda el puede kita dale con el diaton maga hermano y hermana? (Mira con el letrato na cover.)

¹³Queda alerto na necesidad del otro. Si apostol Pablo ya habla con el maga Hebreo: “No ustedes olvida hace el bueno y man ayudahan con uno y otro, cay ese clase de sacrificio amo el ta hace alegre con Dios.” (Heb. 13:16) Un practical consejo gayot se! Nuay tarda despues ricibi con este carta, el maga Cristiano de Judea necesita deja con el diila casa, negocio, maga pariente que gendeh Cristiano y necesita sila “escapa para na monte.” (Mat. 24:16) Na aquel tiempo, bien importante que man ayudajan sila con uno y otro. Si ya aplica ya sila daan con el consejo de Pablo que dale con uno y otro con el cosa sila tiene, mas facil para kanila que adapta na diila nuevo manera de vida.

¹⁴ El diaton maga hermano y hermana posible gendeh kanaton pirmi habla acerca na diila maga necesidad. Por ejemplo, posible ya muri el mujer del un hermano. El diaton hermano ba necesita ayuda na de suyu comida, transportacion o trabajo na casa? Posible, gendeh le se manda sabe cay no quierre le destorba kanaton. Pero posible, hay aprecia gayot le si tiene kita el iniciativo que ofrece  ayuda con ele. Gendeh kita debe pensa que tiene quien hay cuida con ele o pirmi le habla si cosa le necesita. Pregunta na de tuyu mismo cuerpo, ‘Cosa ayuda yo hay aprecia si iyo el na ansina situacion?’

15. Para queda preparao hace sacrificio, cosa kita debe hace?

¹⁵Manda sinti con otro que facil contigo atraca. Asigurao, conoce tu con el maga hermano y hermana na de ustedes congregacion quien pirmi preparao ayuda con otro. Nunca sila manda sinti kanaton que destorbo kita kanila. Sabe kita que puede kita depende kanila si necesita kita ayuda y quierre kita queda igual kanila! Si Alan, un anciano que mas de 40 ya el edad, quierre manda sinti con otro que facil con ele atraca. Si Alan ya habla acerca na ejemplo de Jesus: “Ocupao si Jesus pero el maga gente que diferente el edad quierre-quierre con ele atraca y comfortable pidi el de suyu ayuda. Ta mira sila con ele como un gente quien deverasan interesao kanila. Quierre gayot yo imita con el custumbre de Jesus y conoce conmigo como un persona con quien facil para atraca, facil para queda amigo y amable.”

16. Paquemodo kanaton puede ayuda para sigui enbuenamente con el ejemplo de Jesus si aplica kita con el Salmo 119:59, 60?

¹⁶ Gendeh kita debe man luya si gendeh kita puede imita con Jesus na perfecto manera. (Sant. 3:2) El un estudiante artist gendeh puede imita na perfecto manera con el trabajo del de suyu maestro. Pero mientras ta aprende el estudiante na de suyu maga kamali y ta pricura sigui con el ejemplo del de suyu maestro, hay continua le progresa. Na igual manera, si aplica kita con el cosa kita ya aprende na diaton personal estudiada del Biblia, hace con el diaton de con todo bueno para corecta con el maga kamali que posible  kita ya hace, puede kita sigui enbuenamente con el ejemplo de Jesus.—Le con el Salmo 119:59, 60.

17-18. Mientras ta imita kita con el ejemplo de Jesus que preparao hace sacrificio, cosa maga beneficio kita hay experiencia?

¹⁷ Si preparao kita hace sacrificio, puede este motiva con otro para queda tambien igual ansina. El un anciano que si Tim ya habla: “Tiene kame maga joven hermano quien ya progresa y ya queda maga siervo ministerial—el cuanto bien joven pa. El un razon amo cay ya puede sila mira si paquemodo de preparao el otro para ayuda y quierre sila queda igual kanila. El diila esfuerzo ya puede ayuda con el diamon congregacion y ya puede mas suporta con el maga anciano.”

¹⁸ Ta vivi kita na un mundo donde el maga gente ta pensa lang con el diila mismo cuerpo. Pero, bien diferente el maga siervo de Jehova. Ya afecta gayot kanaton el ejemplo de Jesus que preparao hace sacrificio y determinao kita que sigui con el de suyu ejemplo. Gendeh kita puede sigui na de suyu ejemplo na perfecto manera pero puede kita “sigui na disuyo maga paso” enbuenamente. (1 Ped. 2:21) Mientras ta hace kita con el diaton de con todo bueno para imita con Jesus que preparao hace maga sacrificio, hay experiencia tambien kita con el alegria cay sabe kita que tiene kita el favor de Jehova.