1-2. (a) Porque manada ahora el tan dificil confia con aquellos na autoridad? (b) Cosa kita considera na este articulo?

MANADA ahora el tan dificil confia con aquellos na autoridad. Ya observa sila que ta protege el maga gobierno y maga ley con el maga rico y tiene poder pero gendeh ta ayuda con el maga pobre. El Biblia ta habla: “El gente ya domina con el gente para na de suyu perjuicio.” (Ecl. 8:9) Omento pa, el cuanto religioso lider ta hace maga mal cosas que ya causa con el cuanto gente para perde el confianza con Dios. Poreso si man Bible study kita junto con el un persona, necesita kita con ele ayuda confia con Jehova y con el De Suyu maga representante aqui na tierra.

² Siempre, gendeh lang el maga Bible study el necesita aprende confia con Jehova y con el de suyu organizacion. Maskin kita quien ta sirvi con Jehova por manada año debe gendeh perde confianza que el manera si paquemodo si Jehova ta hace con el maga cosas amo el de con todo bueno. Tiene vez, tiene maga situacion que posible pone na probanza con el diaton confianza con Jehova. Na este articulo, hay discuti kita con el tres situacion donde puede pruba con el diaton fe: (1) si puede kita le cuanto istoria na Biblia, (2) si ta ricibi kita maga direccion estaba na organizacion de Jehova y (3) si enfrenta kita maga dificultad na futuro.

3. Paquemodo el cuanto istoria na Biblia puede pruba con el diaton confianza con Jehova?

 ³ Si ta le kita con el Palabra del Dios, posible tiene kita maga  pregunta acerca na manera si paquemodo si Jehova ya trata con el cuanto maga gente y con el cuanto decision que ya hace le. Por ejemplo na libro de Numero, puede kita le que si Jehova ya sentencia muerte con el un Israelita cay ya pipina le leña na tiempo de Sabbath. Na segundo libro de Samuel, ya sabe kita que cuanto siglo despues, ya perdona si Jehova con Rey David na adulterio y matanza que ya comete le. (Num. 15:32, 35; 2 Sam. 12:9, 13) Posible pensa kita, ‘Porque si Jehova ya perdona con David quien ya comete matanza y adulterio pero ya sentencia muerte con el otro gente quien ya comete culpa que dol mas liviano?’ Para contesta con este pregunta, considera kita con el tres cosas que debe kita acorda si ta le kita con el Biblia.

4. Paquemodo el Genesis 18:20, 21 y Deuteronomio 10:17 puede hace fuerte con el diaton confianza na maga decision de Jehova?

⁴El Biblia gendeh pirmi ta dale el todo detalle acerca na un istoria. Por ejemplo, sabe kita que sincero ya arripinti si David na cosa le ya hace. (Sal. 51:2-4) Pero, cosa clase de persona aquel quien ya viola con el ley de Sabbath? Ya arripinti ba le con el cosa le ya hace? Ya desobedece ya ba le de antes con el maga ley de Jehova? Ya ignora ba le o nuay pa gane acepta con el maga aviso que ya dale con ele? Nuay se habla el Biblia. Pero, puede kita asigura con este: “Nuay injusticia” con Jehova. (Deut. 32:4) Ta hace le con el de suyu maga decision base na verdad—gendeh base na cosa ta habla el otro, na discriminacion o na maskin cosa que ta guia con el maga gente para tiene gendeh justo conclusion. (Le con el Genesis 18:20, 21; Deuteronomio 10:17.) Si mas aprende kita acerca con Jehova y con el de suyu maga principio, mas confia kita con el de suyu maga decision. Maskin pa puede kita le maga istoria na Biblia y tiene maga pregunta que gendeh kita puede contesta ahora, bastante ya el diaton saber acerca na diaton Dios para asigura que “recto si Jehova na todo de suyu manera.”—Sal. 145:17.

5. Paquemodo el diaton imperfeccion ta afecta con el diaton juzgamiento? (Mira tambien con el cajon “ Cay Imperfecto Kita, Gendeh Kita Pirmi Ta Entende con el Maga Cosas.”)

⁵Gendeh pirmi justo el diaton juzgamiento cay maga imperfecto kita. Ya hace kanaton el Dios asegun na de suyu imagen poreso quierre  gayot kita mira que ta trata enbuenamente con el maga gente. (Gen. 1:26) Pero cay imperfecto kita, puede kita tene gendeh justo juzgamiento maskin pa ta pensa kita que tiene kita el todo detalle. Por ejemplo, acorda si paquemodo si Jonas ya queda gendeh alegre na decision de Jehova que extende lastima con el maga de Nineve. (Jon. 3:10–4:1) Pero, considera con el resulta. Ya salva el vida del mas de 120,000 maga de Nineve quien ya arripinti! Na uliji, si Jonas el ya tiene gendeh justo juzgamiento na maga gente y gendeh si Jehova.

6. Porque gendeh kanaton necesita explica si Jehova el maga razon del de suyu maga decision?

⁶Si Jehova gendeh necesita explica con el maga gente el razon del de suyu maga decision. Deverasan, ya permiti si Jehova de antes con el de suyu maga siervo que habla con el cosa sila ta sinti acerca na maga decision que ya hace le o hay hace pa lang. (Gen. 18:25; Jon. 4:2, 3) Tiene vez, ta explica le con el de suyu decision. (Jon. 4:10, 11) Maskin pa ansina, gendeh obligao si Jehova que explica kanaton el maga razon del de suyu maga decision. Como diaton Creador, gendeh le necesita que aproba kita con el de suyu maga decision, antes o despues le hace con ese.—Isa. 40:13, 14; 55:9.

7. Cosa dificultad el posible kita enfrenta y porque?

⁷ Asigurao, tan uyun gayot kita que si Jehova pirmi ta hace si cosa el justo. Pero posible, dificil para kanaton que confia con el de suyu maga representante. Posible, pensa kita si aquellos quien tiene cuanto autoridad na organizacion de Jehova ta actua ba gayot asegun na direccion de Jehova o na diila mismo decision lang. Ese posible el cosa ya pensa el cuanto quien ya vivi na tiempo del Biblia. Considera con el maga ejemplo que ya menciona na  parapo 3. El un pariente del persona quien ya viola con el ley de Sabbath posible pensa si ya consulta ba gayot si Moises con Jehova antes sentencia muerte con aquel persona. Y el un amigo de Urias el Hitita, de quien mujer ya comete adulterio junto con David, posible pensa que ya usa si David con el de suyu poder como rey para evita con el castigo de muerte que conviene le ricibi. El deverasan, gendeh kita puede habla que ta confia kita con Jehova si gendeh kita ta confia con el de suyu maga representante aqui na tierra—aquellos con quien ta confia si Jehova.

8. Cosa el semejante na cosa ya menciona na Maga Actividad 16:4, 5 na cosa ta sucede na Cristiano congregacion ahora?

⁸ Ahora, ta guia si Jehova con el de suyu organizacion aqui na tierra por medio na “fiel y sabio esclavo.” (Mat. 24:45, NWT) Igual na cuerpo gobernante del primer siglo, este esclavo ta mira con el maga siervo del Dios na entero mundo y ta dale direccion na maga anciano na congregacion. (Le con el Maga Actividad 16:4, 5.) El maga anciano tambien ta asigura que ta sigui con ese direccion na congregacion. Ta dale kita mira que ta confia kita con el manera si paquemodo si Jehova ta hace con el maga cosas si ta obedece kita con el maga direccion que ta ricibi kita estaba na organizacion y na maga anciano.

9. Cuando kita posible man dificil coopera con el un decision que ya hace el maga anciano y porque?

⁹ Tiene vez, posible tan dificil kita coopera con el maga decision que ta hace el maga anciano. Por ejemplo del reciente maga año, manada congregacion y circuito el ya hace maga cambio. Na cuanto situacion, el maga anciano ya pidi con el maga publisher que suporta na diferente congregacion para puede usa enbuenamente con el capacidad del diaton maga Kingdom Hall. Si pidi kanaton que cambia  na otro congregacion, posible man dificil kita deja con el diaton maga amigo y familia. El maga anciano ba ya ricibi direccion estaba con Dios si onde man assign con el cada publisher? Nuay. Y ese posible el razon que man dificil kita sigui con el direccion que ricibi kita. Pero, ta confia si Jehova con el maga anciano que hace con ese maga decision y necesita tambien kita confia kanila. *

10. Asegun na Maga Hebreo 13:17, porque kita debe coopera na maga anciano?

¹⁰ Porque kita debe coopera con el maga anciano y suporta con el diila maga decision maskin pa gendeh se conveniente para kanaton? Cay si hace kita se, ta ayuda kita preserva con el unidad entre na maga siervo del Dios. (Ef. 4:2, 3) Ta progresa el congregacion si el todo humilde ta somete con el maga decision que ya hace el maga anciano. (Le con el Maga Hebreo 13:17.) El mas importante, ta dale kita mira que ta confia kita con Jehova si ta coopera kita con aquellos con quien le ta confia para cuida kanaton.—Act. 20:28.

11. Cosa puede ayuda kanaton para hace fuerte con el diaton confianza na direccion que ta ricibi kita estaba na maga anciano?

¹¹ Puede kita hace fuerte con el diaton confianza na direccion que ta ricibi kita estaba na maga anciano si acorda kita que ta pidi sila sagrao espiritu si ta discuti sila maga cosas acerca na congregacion. Ta considera tambien sila enbuenamente con el maga principio na Biblia que aplicable y ta consulta na maga guideline que ta dale el organizacion de Jehova. Quierre gayot sila hace alegre con Jehova y dale el de con todo bueno para cuida con el de suyu maga siervo. Sabe este maga fiel hombre que responsable sila con Dios si paquemodo sila ta cumpli con el diila maga responsibilidad. (1 Ped. 5:2, 3) Considera con este verdad: Na un mundo que dividido por causa na raza, religion y politica, el maga siervo de Jehova unido ta adora con el unico deverasan Dios. Ya sucede lang este cay si Jehova ta bendici con el de suyu organizacion!

12. Cosa debe considera el maga anciano si ta determina si ta arripinti ba el un persona?

¹² Ya dale si Jehova con el maga anciano el importante responsibilidad que asigura que limpio el congregacion. Si el un Cristiano ya comete un serioso culpa, ta expecta si Jehova con el maga anciano que determina si puede ba esta na congregacion ese individual. Mas pa, necesita sila determina si deverasan ba ta arripinti el persona na cosa le ya hace. Posible habla le que ta arripinti le pero ta odia ba gayot le con el cosa le ya hace? Determinao ba le que gendeh repiti con el culpa? Si el maga mal asosacion el ya guia con ele para hace maga gendeh justo cosas, conforme ba le que descanza asocia kanila? El maga anciano ta reza con Jehova, ta considera si cosa deverasan ya sucede y si cosa ta habla el Biblia y ta examina si cosa ta sinti el persona acerca na cosa le ya hace. Despues, decidi sila si posible ba esta na congregacion ese persona. Na cuanto maga situacion, debe con ele man disfellow.—1 Cor. 5:11-13.

13. Cosa lingasa kita posible tene si yan disfellow el un amigo o pariente?

¹³ Paquemodo posible pruba con el diaton confianza na maga anciano? Si el persona quien yan disfellow gendeh cerca amigo diaton o pariente, posible facil lang acepta con el decision del maga anciano. Pero, paquemodo si cerca amigo diaton el persona quien yan disfellow? Posible, man lingasa kita que el maga anciano nuay considera con el todo detalle o posible pensa kita si el decision que ya hace  sila amo ba tambien el decision que ya hace si Jehova. Cosa puede ayuda kanaton mentena el justo mirada acerca con el decision?

14. Cosa puede ayuda kanaton si decidi el maga anciano que debe man disfellow con el uno del diaton maga amigo o pariente?

¹⁴ Debe kita acorda que arreglamiento de Jehova el disfellowshipping y hay beneficia el congregacion y posible maskin el persona quien ya culpa. Si permiti esta na congregacion con el persona quien nuay arripinti, puede le influencia con otro. (Gal. 5:9) Omento pa, posible gendeh le realiza si paquemodo de serioso el de suyu culpa y posible gendeh le sinti que necesita le hace cambio na de suyu pensamiento y maga accion para obtene otravez el favor de Jehova. (Ecl. 8:11) Puede kita asigura que si ta decidi si debe ba man disfellow con el un persona, el maga anciano ta hace enbuenamente con el diila responsibilidad. Sabe sila que igual na maga juez na tiempo del Israel, “gendeh [sila] ta juzga para na gente sino para con Jehova.”—2 Cron. 19:6, 7.

15. Porque kita necesita mas confia con el direccion de Jehova ahora?

¹⁵ Mientras ta queda cerca el fin de este sistema de maga cosas, mas necesita kita confia con Jehova ahora si paquemodo le ta hace con el maga cosas. Porque? Durante el grande tribulacion, posible kita ricibi maga instruccion que dol dificil entende o aplica. Siempre, gendeh kanaton directa man cuento si Jehova. Posible, hay dale le direccion por medio na de suyu maga representante aqui na tierra. Gendeh se el tiempo para man duda o pensa, ‘Estaba ba gayot este con Jehova o decision lang este del maga responsable hermano?’ Hay confia ba tu con Jehova y con el de suyu organizacion durante ese importante tiempo? El contestacion ta depende si paquemodo tu ta mira con el teocratico direccion ahora. Si ta confia tu con el direccion que ta ricibi kita ahora y ta obedece dayun con ese, posible amo tambien se el cosa tu hace durante el grande tribulacion.—Luc. 16:10.

16. Paquemodo pruba con el diaton confianza na juzgamiento de Jehova na venedero futuro?

¹⁶ Tiene pa otro cosa que necesita kita considera enbuenamente—el juzgamiento de Jehova na fin de este sistema de maga cosas. Ahora, ta esperanza kita que manada de aquellos quien gendeh ta sirvi con Jehova, incluido ya el diaton maga pariente, hay decidi sirvi con ele antes pa llega el fin. Pero na Armagedon, si Jehova, por medio con Jesus, hay hace con el ultimo decision acerca con el diila futuro. (Mat. 25:31-33; 2 Tes. 1:7-9) Gendeh ta depende kanaton si quien ricibi el lastima de Jehova  y si quien gendeh. (Mat. 25:34, 41, 46) Hay confia ba kita con el juzgamiento de Jehova o hay causa se para man tisut kita? Claro que necesita kita hace fuerte con el diaton confianza con Jehova ahora para completamente kita confia con ele na futuro.

17. Paquemodo kita beneficia na juzgamiento de Jehova na fin del sistema del maga cosas?

¹⁷ Imagina si cosa kita sinti na nuevo mundo del Dios si mira kita con el maga resulta del juzgamiento de Jehova. Nuay mas ya el falso religion y el sistema de comercio junto con el maga gobierno que ya maltrata y ya causa sufrimiento con el maga gente desde antes. Gendeh mas kita experiencia problema na salud, vejez y muerte del diaton maga pariente y amigo. Si Satanas y el de suyu maga demonio gendeh puede influencia con el maga gente por un mil año. Gendeh mas existi el resulta del diila rebelion. (Rev. 20:2, 3) Asigurao, alegre kita cay ya confia kita si paquemodo si Jehova ta hace con el maga cosas!

18. Cosa maga leccion kita puede aprende na ejemplo del maga Israelita, como cosa ya menciona na Numero 11:4-6 y 21:5?

¹⁸ Posible ba pruba con el diaton confianza na manera si paquemodo si Jehova ta hace con el maga cosas na nuevo mundo? Por ejemplo, considera si cosa ya sucede corto tiempo despues libra con el maga Israelita desde na Egipto. El cuanto ya principia reclama cay tan miss sila con el maga comida que ya come sila alla y nuay aprecia con el provision de Jehova de mana. (Le con el Numero 11:4-6; 21:5.) Posible ba kita pensa igual ansina despues del grande tribulacion? No sabe kita si paquemodo de manada el trabajo que necesita kita hace para quita con el efecto del destrozo y hinay-hinay hace paraiso con el tierra. Posible, necesita kita hace manada trabajo y gendeh facil el vida na primero. Hay reclama ba kita acerca na cosa hay dale si Jehova na ese tiempo? Un cosa el asigurao: Si aprecia kita con el maga provision de Jehova ahora, mas aprecia kita con el cosa le hay dale na futuro.

19. Cosa el maga importante punto na este articulo?

¹⁹ Pirmi justo el manera si paquemodo si Jehova ta hace con el maga cosas. Necesita kita queda convincido con ese. Necesita tambien kita confia con aquellos con quien si Jehova ta confia que dale con el de suyu maga instruccion. Nunca ulvida con el maga palabra de Jehova que ya habla le por medio con profeta Isaias: “Puede ustedes tiene fuerza si esta ustedes calmao y dale mira confianza.”—Isa. 30:15.