NA TIEMPO del Biblia, el hombre o el de suyu familia amo el quien ta dale dowry na familia del mujer na tiempo que yan uyun sila para casa. El dowry puede maga valuable cosas, animal o sen. Tiene vez, ta puede con este paga por medio na trabajo, igual na cosa ya sucede con Jacob quien ya conforma trabaja con el tata de Raquel por siete año para puede le casa con Raquel. (Gen. 29:17, 18, 20) Cosa el proposito del dowry?

El un scholar de Biblia que si Carol Meyers ya habla: “El dowry puede sirvi como pago con el familia del mujer cay gendeh mas le trabaja para kanila, ciendo importante este na maga familia que na simentera el lavida.” El dowry posible puede tambien hace fuerte con el amistad entre del maga familia del quien casa. Por causa de ese, puede man ayudajan el maga miembro del familia si enfrenta sila maga dificultad. Mas pa, el dowry hay sirvi como prueba que para casa ya el mujer y gendeh mas le hay queda bajo na cuidada del de suyu tata sino del de suyu marido ya.

El pagada de dowry gendeh quierre decir que el mujer amo un cosa que puede cumpra o vende. El libro Ancient Israel—Its Life and Institutions ya habla: “Este obligacion para paga un cantidad de sen o otro valuable cosas na familia del mujer ta dale impresion que dol ya cumpra con el mujer si ta casa el maga Israelita. Pero ta sale que ta mira sila con el [dowry], gendeh como el precio para cumpra con el mujer sino un pago para na familia na cosa que ya perde kanila.”

Na manada nacion ahora, ta paga siempre dowry el maga gente si tiene quien ta casa. Si el un Cristiano mayores ta pidi dowry, ta dale sila mira el diila “pagka-razonable” si gendeh sila ta pidi mas pa na cosa el necesita. (Fil. 4:5, NWT; 1 Cor. 10:32, 33) Na este manera, ta dale sila mira que gendeh sila “hambriento.” (2 Tim. 3:2) Puera con ese, si el Cristiano mayores gendeh ta pidi bien grande dowry, gendeh necesita cancela el hombre quien hay casa con el diila casamiento hasta hay puede le obtene bastante sen para na dowry. Y gendeh tambien sinti el hombre que obligao le descanza sirvi como un pioneer cay debe le trabaja full-time para puede obtene el sen que necesita para paga con el bien grande dowry.

Na cuanto maga lugar, tiene maga ley que ta manda paga dowry si ta casa. Na ese maga situacion, el maga Cristiano mayores ta sigui con ese maga ley. Porque? El Palabra del Dios ta pidi con el maga Cristiano que “obedece con el autoridad del gobierno” y sigui con el maga ley que gendeh contra con el maga ley del Dios.—Roma 13:1; Act. 5:29.