1. Paquemodo de valuable el diaton vida con Jehova?

 IMAGINA que ya dale contigo el de tuyu amigo un bien daan pero valuable painting. Ya cambia ya el color de este y tiene maga mancha y rajao. Maskin pa ansina, millones de dollar el valor de este. Asigurao hay aprecia y protege gayot tu con este painting. Na igual manera, ya dale si Jehova kanaton un valuable regalo—el regalo de vida. Gane, ya dale le mira si paquemodo de precioso para con ele el diaton vida cuando ya dale le con el de suyu Anak para rescata kanaton.—Juan 3:16.

2. Como cosa ta habla na 2 Corinto 7:1, cosa si Jehova ta expecta que hace kita?

² Si Jehova el Tuburan del vida. (Sal. 36:9) Ta creé tambien si apostol Pablo con este verdad cay ele ya habla: “Por medio del poder de Dios tiene kita vida y puede kita move y continua existi.” (Act. 17:25, 28, El Nuevo Testamento) Poreso, puede kita habla que el diaton vida amo un regalo estaba con Dios. Ta dale le kanaton el cosa kita necesita para continua vivi. (Act. 14:15-17) Pero gendeh si Jehova ta hace maga milagro para preserva con el diaton vida. Sino, ta expecta le que hace kita esfuerzo para cuida con el diaton fisical y espiritual salud. (Le con el 2 Corinto 7:1.) Porque kita debe protege con el diaton salud y vida, y paquemodo se kita puede hace?

3. Cosa el un razon si porque kita ta pricura tene buen salud?

³ El un razon si porque quierre kita que tene buen salud amo cay quierre kita hace el todo na servicio con Jehova. (Mar. 12:30) Quierre kita ofrece con el diaton “maga cuerpo con el Dios igual como un sacrificio vivo . . . y que Ele ta gusta” poreso ta evita kita hace maga cosas que puede pone na peligro con el diaton salud. (Roma 12:1) Deverasan, limitao lang el cosa kita puede hace para gendeh enferma. Maskin pa ansina, ta hace kita esfuerzo cay quierre kita dale mira con el diaton Tata na cielo que ta aprecia kita con el regalo de vida.

4. Cosa si Rey David quierre hace?

⁴ Ya explica si Rey David si porque le ta aprecia con el regalo de vida cuando ya escribi le: “Cosa el beneficio del de mio muerte, si abaja yo na agujero? Hay alaba ba contigo el polvos? Hay proclama ba este acerca na de tuyu pagka-fiel?” (Sal. 30:9) Posible que ya escribi si David con este maga palabra cuando cerca ya le muri. Pero, determinao le pricura esta vivo para puede continua alaba con Jehova. Asigurao, amo tambien se kita todo quierre hace.

5. Si de edad kita o enfermo, cosa siempre kita puede hace?

⁵ Si enfermo kita o de edad, posible gendeh mas kita ta puede hace el manada cosas que ta hace kita de antes. Como resulta, baka man luya kita o queda triste. Maskin pa ansina, necesita siempre kita pricura cuida con el diaton salud. Porque? Cay maskin de edad ya kita o bien enfermo, puede siempre kita alaba con Jehova, igual con Rey David. Bien bonito que sabe que precioso kita con Dios maskin de edad kita o enfermo. (Mat. 10:29-31) Maskin muri kita, hay resucita le kanaton. (Job 14:14, 15) Mientras vivo kita, quierre kita protege con el diaton salud y vida.

6. Cosa si Jehova quierre que hace kita acerca na diaton comida y tomada?

⁶ El Biblia gendeh un libro acerca si paquemodo kita cuida con el diaton salud o si cosa kita debe come. Pero, ta dale este mira si cosa ta pensa si Jehova acerca na este maga cosas. Por ejemplo, ta conseja le kanaton que “evita con el maga cosas que peligroso” para na diaton cuerpo. (Ecl. 11:10) El por demas comida y tomada ta causa peligro na diaton vida y ta condena con ese el Biblia. (Prov. 23:20) Quierre si Jehova que tene kita control na cuerpo si ta decidi si cosa y si paquemodo de manada kita come y toma.—1 Cor. 6:12; 9:25.

7. Paquemodo el consejo na Proverbio 2:11 ta ayuda kanaton para hace maga buen decision acerca na diaton salud?

⁷ Si usa kita con el diaton abilidad para pensa, puede kita hace maga decision que ta dale mira el diaton apresacion para na regalo de vida. (Sal. 119:99, 100; le con el Proverbio 2:11.) Por ejemplo, puede kita hace maga buen decision acerca si cosa kita come. Si tiene kita cosa quierre come pero sabe kita que enferma kita por causa con ese, asigurao hay evita kita come con ese. Ta dale tambien kita mira que ta hace kita maga buen decision si ta pricura kita tene bastante durmida, regular man ejercicio y mentena limpio con el diaton cuerpo y casa.

8. Base na Biblia, paquemodo de importante con Jehova que pricura kita evita maga accidente?

⁸ Na Ley de Jehova para na nacion de Israel, tiene le ya inclui maga instruccion que puede ayuda para evita maga serioso accidente na casa y na trabajo. (Ex. 21:28, 29; Deut. 22:8) Si el un gente accidente ya puede mata con otro, tiene este maga serioso consequencia. (Deut. 19:4, 5) Asegun na Ley, maskin aquellos quien gendeh intencional ya puede causa el muerte del un bata que nuay pa nace hay ricibi tambien castigo. (Ex. 21:22, 23) Claro na Escritura que quierre si Jehova que pricura kita evita maga accidente.

9. Cosa kita puede hace para evita maga accidente? (Mira tambien con el maga letrato.)

⁹ Ta dale kita mira que ta aprecia kita con el regalo de vida si ta hace kita manera para esta safe na casa y na trabajo. Por ejemplo, ta buta kita con el maga agudo cosas, maga peligroso chemical o medicina na manera que gendeh puede causa peligro con otro. Y ta pricura kita que gendeh se puede incuntra el  maga bata. Con cuidao kita si ta arde fuego, ta hace hirvi agua y si ta usa maga tool, y gendeh kita basta lang ta deja con ese. Gendeh tambien kita ta maneja si gendeh enbuenamente el diaton pensamiento por causa cay ya toma kita medicina, ya toma alcoholico tomada o falta durmida. Mas pa, gendeh tambien kita ta usa cellphone mientras ta maneja.

10. Cosa kita puede hace antes y durante el un calamidad?

¹⁰ Tiene vez, gendeh kita puede evita que sucede el un tragedia igual na maga calamidad, epidemia y maga gulu. Pero si sucede ese maga cosas, puede kita menora con el peligro y esta safe si evacua kita si ya manda kanaton y si sigui kita con el otro pa maga instruccion del gobierno. (Roma 13:1, 5-7) Puede kita prepara para na cuanto maga emergencia poreso debe kita sigui con el maga direccion del local autoridad para queda kita preparao. Por ejemplo, puede kita asigura que tiene kita reserva agua, comida que gendeh pronto man buluk y first-aid kit.

11. Si tiene contagioso enfermedad que tan calayat, cosa kita debe hace?

¹¹ Cosa kita debe hace si tiene contagioso enfermedad que tan calayat na diaton lugar? Debe kita sigui con el maga direccion del gobierno, igual laba mano, man social distancing, usa mask y man quarantine. Si hace kita se, ta dale kita mira que ta aprecia gayot kita con el regalo de vida.

12. Paquemodo el principio na Proverbio 14:15 ta ayuda kanaton para queda con cuidao na maga informacion que ta oi kita?

¹² Durante el emergencia, posible puede kita oi maga informacion que gendeh deverasan estaba na diaton maga amigo, vecinos y maga noticia. En vez creé “con el todo cosa [kita] ya oi,” ta pricura kita saca exacto informacion estaba na gobierno y maga doctor. (Le con el Proverbio 14:15.) El Cuerpo Gobernante y el maga branch office ta hace gayot esfuerzo para tene exacto informacion antes dale direccion acerca na diaton maga miting y trabajo predicacion. (Heb. 13:17) Si sigui kita con el diila direccion, puede kita protege con el diaton mismo cuerpo y con otro. Mas pa, hay tene buen reputacion el congregacion na comunidad.—1 Ped. 2:12.

13. Paquemodo kita ta dale mira que ta aprecia kita con el regalo de vida si acerca na usada de sangre?

¹³ Manada gente el sabe que el maga Testigo de Jehova ta respeta con el pagka-sagrao del sangre. Ta obedece kita con el ley de Jehova acerca con ese poreso gendeh kita ta acepta abonada de sangre, maskin pa na un medical emergencia. (Act. 15:28, 29) Pero, gendeh se quierre decir que quierre kita muri. Gane, ta aprecia gayot kita con el regalo de vida. Ta pidi kita ayuda na maga doctor quien conforme dale buen curada que nuay envuelto abonada de sangre.

14. Paquemodo kita puede evita maga serioso operacion?

¹⁴ Si hace kita con el maga cosas que ya discuti kita enante na este articulo y cuida enbuenamente con el diaton salud, posible gendeh mas kita necesita operacion. Pero si opera man kanaton, mas facil kita queda bueno si ya cuida kita daan con el diaton salud. Puede tambien kita evita operacion si quita kita con el maga cosas na diaton casa y trabajo que ta causa peligro y si sigui kita con el maga ley de trafico.

15. (a) Porque importante que pirmi kita lleva un updated durable power of attorney? (Mira tambien con el letrato.) (b) Como cosa ya dale mira na video, paquemodo kita puede hace maga personal decision acerca na usada de sangre?

 ¹⁵ Cay ta aprecia kita con el regalo de vida, tan fill up kita un durable power of attorney (advance health-care directive) y ta lleva con ese pirmi. b Na ese documento, ta manda kita sabe si cosa el diaton decision acerca na abonada de sangre y na cuanto maga curada. Updated ba el de tuyu durable power of attorney? Si necesita tu man fill up o man update con ese, no man dulug. Si escribido el cosa kita quierre, mas pronto kita puede ricibi ayuda cay gendeh mas kita necesita discuti el diaton decision na maga doctor. Mas pa, puede kita asigura que gendeh dale kanaton medicina o curada que peligroso para kanaton. c

16. Cosa kita puede hace si gendeh kita asigurao si paquemodo man fill up con el durable power of attorney?

¹⁶ Maskin joven man kita o tiene buen salud, todo kita posible enferma o accidenta. (Ecl. 9:11) Poreso, bueno gayot si man fill up  kita un durable power of attorney. Si gendeh tu asigurao si paquemodo man fill up con ese documento, pidi ayuda na de ustedes maga anciano. Ta pricura sila queda familiar si paquemodo man fill up con este pero gendeh sila hay hace decision para contigo. De tuyu se responsibilidad. (Gal. 6:4, 5) Pero, puede sila ayuda contigo para entende con el cosa tu puede decidi y si paquemodo tu man fill up con el documento.

17. Paquemodo kita puede dale mira que razonable kita si acerca na diaton salud?

¹⁷ Manada del maga decision que ta hace kita acerca na salud y medical curada amo base na diaton conciencia que base na Biblia. (Act. 24:16; 1 Tim. 3:9) Si ta hace decision y ta discuti se con otro, debe kita aplica con el principio na Filipo 4:5: “Dale mira el de tuyu pagka-razonable na todo gente.” (NWT) Razonable kita si gendeh kita sobra de malingasa acerca na diaton fisical salud o man pressure con otro que tene igual decision kanaton. Ta ama kita y ta respeta con el diaton maga hermano y hermana maskin pa otro el diila maga decision que kanaton.—Roma 14:10-12.

18. Paquemodo kita puede dale mira el diaton apresacion para na regalo de vida?

¹⁸ Ta dale kita mira apresacion con Jehova, el Tuburan del vida, si ta cuida kita con el diaton vida y ta dale con ele el diaton de con todo bueno. (Rev. 4:11) Ahora, ta enfrenta pa kita maga enfermedad y calamidad. Pero, gendeh este el clase de vida que quierre el diaton Creador para kanaton. Gendeh dura, hay dale le kanaton vida eterna que nuay mas dolor y muerte. (Rev. 21:4) Mientras tanto, bien bonito cay vivo kita y ta puede sirvi con el diaton amable Tata na cielo, si Jehova!