1. Cosa ta dale mira que importante para con Jesus el Escritura?

 IMAGINA si paquemodo ta enseña si Jesus de antes. Talli na de suyu memoria el maga texto na Sagrao Escritura y pirmi le ta refiri con ese. Gane, ya hace le se na de suyu maga primer palabra despues el de suyu bautismo y na de suyu maga ultimo palabra antes le muri. b (Deut. 8:3; Sal. 31:5; Luc. 4:4; 23:46) Y durante el tres y media año del de suyu ministerio, pirmi si Jesus ta le, ta refiri y ta explica con el Escritura na publico.—Mat. 5:17, 18, 21, 22, 27, 28; Luc. 4:16-20.

2. Mientras ta engranda le, cosa el ya puede ayuda con Jesus para queda bien familiar na Escritura? (Mira con el letrato na cover.)

² Manada año antes principia el de suyu ministerio, pirmi ya si Jesus ta le y ta puede oi con el Palabra del Dios. Na casa, asigurao que cada dia le ta puede oi con Maria y Jose que ta refiri na Escritura si tan cuento. c (Deut. 6:6, 7) Puede kita asigura que ta anda si Jesus na sinagoga cada Sabbath junto na de suyu familia. (Luc. 4:16) Ta oi le alla enbuenamente mientras ta le con el Escritura. Ya llega el tiempo, ya aprende tambien si Jesus le con ese. Como resulta, nuay lang si Jesus queda familiar na Escritura sino ya ama tambien le con este y ya permiti que influencia este con el de  suyu maga accion. Por ejemplo, acorda con el cosa ya sucede cuando 12 año pa lang si Jesus y talla le na templo. El maga maestro quien bien sabe acerca na Ley de Moises “ya queda espantao por causa del disuyo inteligencia, y del disuyo maga contestacion.”—Luc. 2:46, 47, 52.

3. Cosa kita hay considera na este articulo?

³ Puede tambien kita queda familiar y ama con el Palabra del Dios si regular kita le con este. Pero, paquemodo kita puede mas beneficia na cosa kita ta le? Puede kita sabe el contestacion de ese na cosa ya habla si Jesus con aquellos quien familiar na Ley, incluido el maga escriba, Fariseo y Saduceo. Ese maga religioso lider pirmi ta le con el Escritura pero gendeh sila ta beneficia na cosa sila ta le. Ya hace claro si Jesus el tres cosas que debe hace este maga persona para mas beneficia na Escritura. El cosa le ya habla kanila hay ayuda kanaton (1) para mas entende con el cosa kita ta le, (2) para incuntra maga espiritual tesoro y (3) para puede influencia con el diaton vida el Palabra del Dios.

4. Cosa el Lucas 10:25-29 ta enseña kanaton acerca na lehida de Palabra del Dios?

⁴ Quierre kita entende si cosa quierre decir del cosa kita ta le na Palabra del Dios. Cay si gendeh, gendeh kita puede beneficia. Por ejemplo, considera con el cosa ya habla si Jesus con el un hombre quien bien sabe gayot acerca na Ley. (Le con el Lucas 10:25-29.) Cuando ya pregunta el hombre si cosa le necesita hace para tene vida eterna, ya ayuda si Jesus con ele para incuntra el contestacion na Palabra del Dios. Ya pregunta si Jesus con ele: “Cosa ba ta habla na Ley? Cosa ba tu ta [le] alla?” El hombre ya puede dale con el justo contestacion cuando ya refiri le na Escritura donde ta menciona que debe ama con Dios y con el maga vecinos. (Lev. 19:18; Deut. 6:5) Pero nota si cosa le sunod ya habla: “Quien man el dimio maga vecinos?” Claro puede mira que nuay le entende si cosa gayot quierre decir del cosa le ya le. Como resulta, no sabe le si paquemodo aplica con aquel maga texto na de suyu vida.

5. Paquemodo el rezo y el hinay manera de lehida puede ayuda si ta le kita?

⁵ Mas puede kita entende con el Palabra del Dios si tiene kita buen rutina de lehida. Este el cuanto sugestion que puede ayuda contigo. Reza antes tu principia le. Necesita kita el ayuda de Jehova para entende con el Biblia poreso debe kita pidi el de suyu sagrao espiritu para ayuda kanaton man focus. Despues, hinay-hinay lang le. Puede se ayuda para entende tu con el cosa tu ta le. Posible, mas puede tu beneficia si le tu suena o sigui con el audio recording del Biblia. Si ta puede tu oi y mira con el maga palabra, hay puede se ayuda para mas aprende, entende y acorda tu con el cosa tu ta le. (Jos. 1:8) Si ya acaba ya tu le, reza otravez y rindi gracias con Jehova para na de suyu Palabra y pidi que ayuda contigo aplica con el cosa tu ya le.

6. Porque puede ayuda si considera tu maga pregunta y escribi maga corto note? (Mira tambien con el letrato.)

⁶ Este el dos pa otro sugestion que puede ayuda para mas entende tu con el Biblia. Si ta le tu, considera cuanto maga pregunta. Por ejemplo, si ta le tu un istoria, puede tu pregunta: ‘Quien el maga caracter aqui? Quien el  ta converza? Con quien le tan cuento y porque? Onde y cuando este ya sucede?’ Ese maga pregunta hay ayuda contigo para pensa y entende con el maga importante punto del cosa tu ta le. Escribi tambien maga corto note. Si ta escribi tu, ta forza tu con el de tuyu mismo cuerpo que pone na palabra con el cosa tu ta pensa y ta ayuda se para mas entende tu con el material. Ta ayuda tambien se para acorda tu con el cosa tu ya le. Puede tu escribi maga pregunta, el cosa tu ya puede man research, el maga importante punto, si paquemodo tu puede usa con el cosa tu ya le o si cosa tu ta sinti. Si escribi tu maga note, puede se ayuda para sinti tu que el Biblia personal mensaje del Dios para contigo.

7. Cosa calidad kita necesita si ta le y porque? (Mateo 24:15)

⁷ Ya enseña si Jesus si cosa el un importante calidad que necesita kita para entende con el Palabra del Dios—entendimiento. (Le con el Mateo 24:15.) Cosa el entendimiento? Amo este el abilidad para mira el coneccion entre na dos idea y si paquemodo ese de diferente na uno y otro. Puede tambien este ayuda para entende kita con el cosa que nuay claro menciona na cosa kita ta le. Mas pa, ya dale mira si Jesus que necesita kita ese calidad para puede sabe si el un suceso ba ta cumpli con el un profecia na Biblia. Necesita tambien kita entendimiento para mas beneficia na todo cosa kita ta le na Biblia.

8. Paquemodo kita le con entendimiento?

⁸ Ta dale si Jehova entendimiento con el de suyu maga siervo. Poreso, necesita kita reza con ele y pidi el de suyu ayuda para tene este calidad. (Prov. 2:6) Paquemodo tu puede actua harmonia na de tuyu rezo? Examina enbuenamente con el cosa tu ta le y nota si cosa el coneccion de ese na cosa ya tu daan sabe. Puede ayuda contigo si usa tu con el diaton maga publicacion igual na Research Guide  for Jehovah’s Witnesses. Este maga tool puede ayuda contigo para entende si cosa quierre decir del un texto y para mira si paquemodo tu se puede aplica na de tuyu vida. (Heb. 5:14) Si le tu con entendimiento, mas puede tu entende con el Biblia.

9. Cosa importante verdad el ya ignora el maga Saduceo?

⁹ Bien familiar el maga Saduceo na primer cinco libro na Hebreo Escritura pero ya ignora sila con el maga importante verdad na ese maga libro. Por ejemplo, considera si cosa ya habla si Jesus cuando ya pregunta el maga Saduceo con ele acerca na resureccion. Ya pregunta le kanila: “Noay ba ustedes [le] na libro de Moises, el istoria acerca del sampinit, donde ta habla el Dios con Moises: Yo amo el Dios de Abraham, el Dios de Isaac y el Dios de Jacob?” (Mar. 12:18, 26) Asigurao que manada beses ya el maga Saduceo ya puede le con ese na Escritura pero el pregunta de Jesus ya puede dale mira que ya ignora sila con el un importante verdad—el enseñanza acerca na resureccion.—Mar. 12:27; Luc. 20:38. d

10. Na cosa kita debe pone atencion si ta le?

¹⁰ Cosa el leccion aqui para kanaton? Si ta le kita, quierre kita sabe el todo cosas que ta enseña kanaton el un texto o istoria na Biblia. Quierre kita aprende gendeh lang el maga simple enseñanza sino incluido tambien el otro pa maga hondo verdad y principio que gendeh facil incuntra.

11. Paquemodo tu puede usa con el 2 Timoteo 3:16, 17 para incuntra maga precioso tesoro na Biblia?

¹¹ Paquemodo tu puede incuntra maga espiritual tesoro si ta le con el Biblia? Considera si cosa ta habla el 2 Timoteo 3:16, 17. (Le.) Nota que “todo el maga Escritura . . . puede gayot usa con provecho” para (1) enseña, (2) conseja, (3) corecta y (4) disciplina. Puede tu siempre provecha na este cuatro manera maskin con el maga libro del Biblia que gendeh tu pirmi ta usa. Examina con el istoria para mira si cosa este ta enseña contigo acerca con Jehova, de suyu proposito o maga principio na Biblia. Considera si paquemodo este ta puede conseja contigo. Nota si paquemodo el maga texto ta ayuda contigo para sabe si cosa maga gendeh buen custumbre tu tiene para puede tu evita con ese y esta fiel con Jehova. Examina si paquemodo puede usa con el un istoria na Biblia para corecta con el un gendeh justo idea que posible tu oi na ministerio. Y mira si paquemodo el maga texto ta disciplina y tan train contigo para tene el igual pensamiento de Jehova. Si acorda tu con este cuatro beneficio, hay puede tu incuntra maga espiritual tesoro que puede ayuda contigo para mas beneficia na de tuyu lehida de Biblia.

12. Porque si Jesus ya pregunta con el maga Fariseo “Noay ba ustedes [le]?”

¹² Ya pregunta tambien si Jesus “Noay ba ustedes [le]?” para dale mira que el maga Fariseo tiene gendeh justo mirada na Escritura. (Mat. 12:1-7) e Na aquel ocasion, ya clama el maga Fariseo que ya viola el maga dicipulo de Jesus con el Sabbath. Ya menciona si Jesus kanila dos ejemplo na Escritura y un texto estaba na Oseas para dale mira con el maga Fariseo que nuay sila entende con el ley de Sabbath y nuay sila dale mira lastima. Maskin ya le este maga hombre con el Palabra del Dios, porque nuay afecta kanila el cosa sila ya le? Cay orgulloso sila y ta le para busca mali con otro. Por causa na diila custumbre, gendeh sila ta puede entende si cosa gayot el quierre decir del cosa sila ta le.—Mat. 23:23; Juan 5:39, 40.

13. Cosa debe el diaton custumbre si ta le con el Biblia y porque?

¹³ Ya aprende kita na maga palabra de Jesus que necesita kita tene justo custumbre si ta le con el Biblia. Gendeh igual con el maga Fariseo, necesita kita queda sincero y preparao aprende. Debe kita con humildad ricibi y obedece con el Escritura. (Sant. 1:21) Si humilde kita, hay permiti kita con el Palabra del Dios que crici na diaton corazon. Puede lang afecta kanaton el maga leccion na Biblia acerca na lastima, compasion y amor si evita kita queda orgulloso o critical con otro.

14. Paquemodo kita puede sabe si ta permiti ba kita con el Biblia que afecta con el diaton vida? (Mira tambien con el maga letrato.)

¹⁴ El diaton tratamiento con otro ta dale mira si ta permiti ba kita que afecta kanaton  el Palabra del Dios. Nuay alcanza el Palabra del Dios na corazon del maga Fariseo y como resulta, ya “condena [sila] con aquellos noay culpa.” (Mat. 12:7) Na igual manera, el diaton mirada y tratamiento con otro ta dale mira si ta permiti ba kita con el Palabra del Dios que afecta con el diaton vida. Por ejemplo, ta menciona ba kita el maga buen cosas que ta mira kita con otro o pronto kita mira con el diila maga kamali? Lastimoso ba kita y preparao perdona o critical kita con otro y ta guarda agrabio? Si examina kita con el diaton mismo cuerpo na ansina manera, hay puede kita mira si ta permiti ba kita con el cosa kita ta le que afecta con el diaton pensamiento, sentido y accion.—1 Tim. 4:12, 15; Heb. 4:12.

15. Cosa el sentido de Jesus na Sagrao Escritura?

¹⁵ Ta ama gayot si Jesus con el Sagrao Escritura y puede se mira na profecia que ya menciona na Salmo 40:8: “El hacida del de uste voluntad, O el de mio Dios, amo el de mio alegria y el de uste ley taqui na de mio corazon.” Como resulta, alegre le y tiene buen exito na servicio con Jehova. Hay tene tambien kita alegria y buen exito si permiti kita que crici el Palabra del Dios na diaton corazon.—Sal. 1:1-3.

16. Cosa tu quierre hace para mas beneficia na de tuyu lehida de Palabra del Dios? (Mira con el cajon “ Si Paquemodo Puede Entende con el Cosa Tu Ta Le.”)

¹⁶ Como cosa ya habla y ya dale mira si Jesus, pricura kita progresa na diaton abilidad na lehida de Biblia. Puede kita mas entende con el Biblia si reza kita, le hinay-hinay, usa maga pregunta y escribi maga corto note. Puede tambien kita tene entendimiento si examina kita enbuenamente con el cosa kita ta le usando el diaton maga publicacion que base na Biblia. Mas manada kita cosa puede aprende na Escritura, maskin na maga texto que gendeh kita bien familiar, si busca kita maga espiritual tesoro. Y puede kita permiti con el Palabra del Dios que afecta con el diaton vida si continua kita tene el justo custumbre mientras ta le. Si hace kita este maga cosas, hay mas beneficia kita na diaton lehida de Biblia y mas queda cerca con Jehova.—Sal. 119:17, 18; Sant. 4:8.