1. Porque tu ta aprecia con el Biblia?

 TA RINDI gayot kita gracias con Dios Jehova cay ya dale le kanaton el Biblia! Por medio con este, ta dale le kanaton maga buen consejo que puede ayuda kanaton para puede enfrenta con el maga problema que ta experiencia kita ahora. Ta dale tambien le kanaton un bonito esperanza para na futuro. El mas importante, ta usa si Jehova con el Biblia para puede kita sabe el manada aspeto del de suyu personalidad. Si pensa kita acerca na de suyu maga bonito calidad, mas ama kita con ele y motiva este kanaton para pricura queda amigo de suyu.—Sal. 25:14.

2. Cosa maga manera ya usa si Jehova para manda sabe con el maga gente acerca con ele?

² Quierre si Jehova que conoce con ele el maga gente. De antes, ya manda le sabe con el cuanto acerca con ele por medio na maga sueño, vision y na maga angel pa gane. (Num. 12:6; Act. 10:3, 4) Pero, gendeh kita puede estudia con este maga sueño, vision o mensaje que estaba na maga angel si nuay con este escribi. Poreso, ya manda si Jehova con el cuanto hombre que “escribi na un libro” el cosa le quierre manda sabe kanaton. (Jer. 30:2) Ciendo “perfecto el camino del verdadero Dios,” puede kita asigura que bueno gayot y puede kita beneficia na este manera que ya usa el Dios para comunica kanaton.—Sal. 18:30.

3. Paquemodo ya asigura si Jehova que hay preserva con el Biblia? (Isaias 40:8)

³ Le con el Isaias 40:8. Por miles de año ya, el Palabra del Dios ta dale buen guia con el maga fiel hombre y mujer. Paquemodo se ya queda posible ciendo ya escribi con el Biblia  del primero na maga material que pronto queda malo y nuay mas kita maga original rollo de este ahora? Ya asigura si Jehova que el maga gente hace maga copia de este. Maskin imperfecto este maga gente, con cuidao gayot sila ya hace maga copia. Por ejemplo, acerca na Hebreo Escritura, el un scholar ya escribi: “Nuay mas otro daan libro que exacto gayot el copiada.” Poreso maskin de antes pa ya escribi con el Biblia, ya usa maga material que pronto queda malo y imperfecto aquellos quien ya hace copia de este, puede kita asigura que el Biblia ahora ta puede gayot manda sabe kanaton si cosa el pensamiento del de este Autor que si Jehova.

4. Cosa kita hay discuti na este articulo?

⁴ Con Jehova estaba “todo el regalo bueno y perfecto.” (Sant. 1:17) El Biblia amo el uno na de con todo bonito regalo que ya dale kanaton si Jehova. Si tiene quien ya dale kanaton un regalo, ese regalo ta dale mira si paquemodo le de conoce kanaton y sabe le el diaton maga necesidad. Ansina tambien si acerca na Biblia. Si examina kita con este regalo, manada kita cosa aprende acerca con Jehova. Hay aprende kita si paquemodo le de conoce kanaton y sabe si cosa el diaton necesidad. Na este articulo, hay discuti kita si paquemodo el Biblia ta dale mira con el tres calidad de Jehova: el de suyu sabeduria, justicia y amor. Considera kita una si paquemodo el Biblia ta dale mira el sabeduria del Dios.

5. Cosa el un manera que ta dale mira el Biblia el sabeduria del Dios?

⁵ Sabe si Jehova que necesita kita con el de suyu maga justo consejo. Y el de suyu regalo, el Biblia, lleno de sabeduria de suyu. Tiene positivo efecto na maga gente el maga consejo del Biblia. Puede este cambia con el vida del maga gente. Cuando ya escribi si Moises con el maga primer libro del Biblia, ya habla le con el maga siervo del Dios, el maga Israelita: “Importante este maga palabra cay aqui ta depende el de ustedes vida.” (Deut. 32:47) Aquellos quien ta sigui con el Escritura puede tene alegre vida. (Sal. 1:2, 3) Maskin largo tiempo ya el ya pasa desde ya escribi con el Palabra del Dios, tiene siempre este poder para hace enbuenamente con el vida del maga gente. Por ejemplo, na jw.org, na serie “El Biblia Puede Cambia con el Vida,” puede tu mira manada ejemplo de maga gente que ta dale prueba que el Biblia “tiene poder na vida [de aquellos] quien tiene fe.”—1 Tes. 2:13, El Nuevo Testamento.

6. Porque kita puede habla que nuay otro libro el igual na Biblia?

⁶ Nuay otro libro el igual na Palabra del Dios. Porque? Cay el Autor de este, si Dios Jehova, todopoderoso, ta existi hasta para cuando y tiene incomparable sabeduria. Ta continua siempre le el maga gente con el manada maga libro maskin ya muri ya el autor de este. Pero mas mucho, el maga consejo na ese maga libro gendeh mas aplicable na uliji. Gendeh ansina el maga principio na Biblia; efectivo siempre este para na maga gente mientras ta pasa el manada tiempo. Si ta le kita con este libro y ta medita con el cosa kita ta aprende, ta usa el Autor con el de suyu poderoso sagrao espiritu para ayuda kanaton mira si paquemodo kita puede aplica con el maga consejo del Biblia na diaton vida. (Sal. 119:27; Mal. 3:16; Heb. 4:12) Quierre gayot ayuda kanaton el Autor del Biblia y debe se motiva kanaton para regular le con ese.

7. Paquemodo el Biblia ya hace unido con el maga siervo del Dios de antes?

⁷ Ta dale tambien mira el Biblia el sabeduria  del Dios cay ta hace este unido con el de suyu maga siervo. Cuando ya entra el maga Israelita na Tierra Prometido, ya esta sila na diferente maga lugar. El cuanto ya queda pescador, el otro ta cuida maga animal y el los demas maga siembrador. Pronto lang era ulvida el maga Israelita con el diila maga uban Israelita quien ta queda na otro parte del nacion. Pero, ya manda si Jehova con el maga Israelita que man junto-junto na cuanto maga ocasion para oi mientras ta le y ta explica con el de suyu Palabra. (Deut. 31:10-13; Neh. 8:2, 8, 18) Imagina si cosa sinti el un fiel Israelita si llega le na Jerusalem y mira con el millones quien ta sirvi con Jehova estaba na otro-otro parte del nacion! Ya ayuda si Jehova kanila para esta unido. Na uliji, cuando ya forma con el Cristiano congregacion, el maga hombre y mujer quien ya queda parte de este amo de diferente maga lengguaje y estado na vida. Pero cay ta ama sila con el Escritura, ya esta sila unido na adoranza na verdadero Dios. Aquellos quien ya queda Cristiano ya puede lang entende con el Palabra del Dios por causa na ayuda del diila maga hermano y hermana y na maga miting.—Act. 2:42; 8:30, 31.

8. Paquemodo el Biblia ta hace unido con el maga siervo de Jehova ahora?

⁸ El diaton sabio Dios ta continua enseña y hace unido con el de suyu maga siervo  por medio na Biblia. Alli estaba el espiritual comida que ta ricibi kita. Regular kita tan junto na diaton maga miting, asemblea y maga convencion para oi mientras ta le, ta explica y ta discuti con el Escritura. Poreso, tiene importante papel el Biblia para cumpli el proposito de Jehova que el de suyu maga siervo “sirvi con ele con unidad.”—Sof. 3:9.

9. Cosa calidad el necesita para entende con el mensaje del Biblia? (Lucas 10:21)

⁹ Considera otro prueba del sabeduria de Jehova. Ya escribi con el manada parte del Escritura na manera que el maga humilde lang el puede entende. (Le con el Lucas 10:21.) El maga gente na entero mundo ta le con el Biblia. El un scholar ya habla que “si compara na otro maga libro, mas manada el quien ta le con [el Biblia] y mas con cuidao sila con ese ta le.” Pero el maga humilde lang el ta puede entende y ta aplica con el cosa este ta habla.—2 Cor. 3:15, 16.

10. Cosa el otro manera que el Biblia ta dale mira el sabeduria de Jehova?

¹⁰ Puede tambien kita mira con el sabeduria de Jehova na Biblia na otro pa manera. Ta usa si Jehova con el Escritura gendeh lang para enseña kanaton como un grupo sino para enseña tambien y dale comforta kanaton como individual. Todo kita ta puede sinti que tiene personal interes kanaton si Jehova si ta le kita con el de suyu Palabra. (Isa. 30:21) Por ejemplo, si ta enfrenta un problema, asigurao ya experiencia ya tu que ya puede tu le un texto que dol ya escribi gayot para contigo. Pero, sabe kita que millones de maga gente el ta aprecia con el Biblia. Si ansina, porque ya queda posible que tiene este maga informacion que exacto gayot na cosa tu necesita? Posible lang se cay el Autor del Biblia amo el de con todo sabio na entero universo.—2 Tim. 3:16, 17.

11. Paquemodo ya dale mira imparcialidad el Dios cuando ya manda le escribi con el Biblia?

¹¹ El justicia amo el otro calidad de Jehova. (Deut. 32:4) Si tiene este calidad el un persona, imparcial tambien le. Ansina si Jehova. (Act. 10:34, 35; Roma 2:11) Claro se kita puede mira na maga lengguaje que ya iscuji le para usa na escribida del Biblia. Ya escribi con el mayoria del primer 39 libro del Biblia na Hebreo lengguaje que facil lang ta puede entende el maga siervo del Dios aquel tiempo. Pero del primer siglo C.E., mayoria del maga gente ta converza na Griego lengguaje poreso el ultimo 27 libro del Biblia ya escribi na ese lengguaje. Nuay decidi si Jehova que escribi con el de suyu Palabra na un lengguaje lang. Ahora, otro-otro el lengguaje del cerca ocho billon gente na tierra. Paquemodo este bien manada maga gente puede aprende acerca con Jehova?

12. Cosa el un manera que ta cumpli na ultimo maga dia el Daniel 12:4?

¹² Por medio con profeta Daniel, si Jehova ya promete que na tiempo del fin, “el verdadero sabeduria” que puede incuntra na Biblia “hay queda abundancia.” Manada el quien puede entende con este. (Le con el Daniel 12:4.) El un manera que ya queda abundancia el sabeduria amo que yan translate, yan publish y ya distribui con el maga Biblia y maga literatura que base na Biblia. El Biblia amo el libro que tiene de con todo manada translation y copia que ya distribui na entero mundo. Bien caro el manada del maga Biblia que ya hace el maga compania. Pero, el maga siervo de Jehova ya puede man translate con el completo Biblia o parte de este na mas de 240 lengguaje y maskin quien puede obtene libre copia. Como resulta, el maga gente de todo nacion ta  puede aprende con el “Buen Noticia acerca del Reino” antes llega el fin. (Mat. 24:14) El diaton Dios de justicia quierre dale oportunidad con el mas manada gente para conoce con ele por medio na de suyu Palabra. Ta hace le se cay ta ama gayot le kanaton todo.

13. Porque kita puede habla que el Biblia ta dale mira el amor de Jehova? (Juan 21:25)

¹³ Ta hace claro el Biblia que el de con todo bonito calidad del Autor de este amo el amor. (1 Juan 4:8) Considera si cosa si Jehova ya inclui na Biblia y nuay. Ya inclui le el cosa lang kita necesita para tene buen relacion con ele, alegre vida ahora y vida eterna. Cay ta ama kanaton si Jehova, nuay le dale kanaton manada informacion que gendeh kita necesita.—Le con el Juan 21:25.

14. Na cosa manera pa ta dale mira el Biblia el amor del Dios?

¹⁴ Ta dale tambien mira amor si Jehova na manera si paquemodo le ta comunica kanaton. Na Biblia, nuay le dale kanaton bien manada maga ley para dicta con el cada aspeto del diaton vida. Sino, ya usa le maga deverasan istoria, maga bonito profecia y maga practical consejo para ayuda kanaton hace maga buen decision. Na este maga manera, el Palabra del Dios ta motiva kanaton para ama y obedece gayot con ele.

15. (a) Paquemodo el Biblia ta dale prueba que tiene interes kanaton si Jehova? (b) Na letrato, de quien istoria na Biblia ta medita el bata, el joven hermano y el de edad hermana? (Gen. 39:1, 10-12; 2 Rey 5:1-3; Luc. 2:25-38)

¹⁵ El Biblia ta dale mira que si Jehova bien interesao kanaton. Na cosa manera? El de suyu Palabra lleno de maga istoria que ta dale mira el emocion del maga caracter. Ta puede  kita entende si cosa sila ta sinti cay “gente [sila] igual lang canaton.” (Sant. 5:17) Y el mas importante, si observa kita si paquemodo ya trata si Jehova con el maga gente igual kanaton, ta puede kita mas entende que “lastimoso y misericordioso” le y ta ama gayot kanaton.—Sant. 5:11.

16. Cosa kita puede aprende acerca con Jehova si ta le kita na Biblia acerca con aquellos quien ya hace kamali? (Isaias 55:7)

¹⁶ Ta dale mira el Biblia el amor de Jehova para kanaton na otro pa manera. El Escritura ta asigura kanaton que el diaton Dios gendeh hay abandona kanaton si ta puede kita hace maga kamali. Manada beses ya culpa el maga Israelita contra con Jehova pero cuando sincero sila ya arripinti, ya perdona le kanila. (Le con el Isaias 55:7.) El maga Cristiano del primer siglo sabe tambien que ta ama gayot kanila el Dios. Ya guia con apostol Pablo para anima con el de suyu maga hermano y hermana que ‘perdona y dale animo’ con el un hombre quien ya comete un serioso culpa pero ya arripinti. (2 Cor. 2:6, 7; 1 Cor. 5:1-5) Bonito gayot que nuay abandona si Jehova con el de suyu maga siervo por causa lang cay yan kamali sila! Sino, na amable manera ya ayuda le kanila, ya corecta y ya invita kanila que bira otravez con ele. Ansina tambien el cosa le ya promete para con aquellos na diaton tiempo ahora quien ya culpa pero ya arripinti.—Sant. 4:8-10.

17. Porque un bien bonito regalo el Biblia?

¹⁷ Ya dale kanaton si Jehova un bonito regalo—el de suyu Palabra. Porque este bien bonito? Como cosa kita ya puede aprende, el Biblia ta dale mira el sabeduria, justicia y amor del Dios. Este libro ta dale prueba que quierre si Jehova que conoce kita con ele. Quierre le que queda kita de suyu amigo.

18. Paquemodo kita puede dale mira apresacion na Biblia?

¹⁸ No quierre kita hace no vale nada con el “regalo bueno” estaba con Dios. (Sant. 1:17) Ojala continua kita dale mira apresacion na Palabra del Dios. Puede kita se hace si regular kita le y medita con este. Si hace kita con ese, puede kita asigura que el Autor de este hay bendici con el diaton maga esfuerzo y “hay incuntra [kita] el saber del Dios.”—Prov. 2:5.