Ya re yo cay para conmigo, gendeh religioso el de mio amigo. Ya pregunta yo, “Cosa tu sabe acerca na Biblia?” Nuay dayun le contesta. Pero na uliji, ya habla le que el de suyu nana uno del maga Testigo de Jehova y ya aprende le cuanto cosas con este. Ya queda yo interesao poreso ya habla yo con ele que habla conmigo si cosa pa le sabe.

Cerca entero noche kame yan cuento. Ya habla le conmigo que asegun na Biblia, si Satanas el quien ta rula con el mundo. (Juan 14:30) Siguro, sabe ya tu este desde antes pa. Pero para conmigo, un nuevo idea se y maka-espanta. Desde bata yo, ya sabe yo que un bueno Dios el ta controla con el mundo. Pero, dol contra se na cosa yo ta mira na mundo. Maskin pa 26 año lang yo, manada ya yo cosa ya mira que ya causa conmigo lingasa.

El de mio tata un piloto na United States Air Force. Poreso maskin bata pa yo, sabe yo que posible gayot tene nuclear war. Maskin cosa hora, puede larga nuclear bomb el maga militar. Ya sucede el guerra na Vietnam cuando colegio yo na California. Yan junto yo na otro maga estudiante para man protesta. Ta hace kanamon lagas el maga polis de garrote y gendeh kame tanto ta puede mira mientras ta corre por causa na tear gas. Bien magulu quel tiempo. Ta mata con el maga lider de politica y el maga gente bien violente mientras tan protesta. Otro-otro el opinion del maga gente acerca na cosa debe hace. Trambulicao gayot el todo.

Del 1970, ya trabaja yo na norte parte del Alaska y ya tiene bien manada sen. Despues, ya anda yo na London, ya cumpra motor y yan viaje para na sur parte pero nuay yo especifico destinacion. Despues de cuanto meses, ya llega yo na Africa. Na de mio viaje, ya puede yo conoce maga gente quien igual conmigo, quierre tambien escapa na diila maga problema.

Por causa na cosa yo ya mira, uyun yo na cosa ta enseña el Biblia que tiene un mal espiritu que  ta controla con el maga cosas na mundo. Pero si ansina, cosa ta hace el Dios? Quierre yo sabe.

Na sunod maga mes, ya sabe yo el contestacion. Y mientras ta pasa el tiempo, ya puede yo conoce manada hombre y mujer quien ya esta fiel con el verdadero Dios maskin cosa pa sila ya experiencia.

Cuando ya bira yo na London, yan contact yo con el nana del de mio amigo y ya dale le conmigo Biblia. Despues, cuando ya anda yo na Amsterdam, Netherlands, ya mira conmigo el un Testigo que ta le con el Biblia abajo del poste de luz y ya ayuda le conmigo para aprende mas. Acabar, ya anda yo na Dublin, Ireland, y ya puede incuntra con el branch office del maga Testigo de Jehova. Yan tuktuk yo na puerta. Y alla yo ya puede conoce con Arthur Matthews, un sabio y experienciao hermano. Ya habla yo que quierre yo estudia con el Biblia y ya conforma le que man Bible study conmigo.

Ya estudia yo enbuenamente y ya le con el maga libro y magasin que ya hace el maga Testigo. Y siempre, ya le yo con el Biblia y ya gusta gayot yo quel. Na maga miting na congregacion, ya puede yo mira que maskin el maga bata sabe el contestacion na maga pregunta que por manada siglo ya quierre sabe el maga educao hombre y mujer: ‘Porque tiene maldad? Quien el Dios? Cosa sucede kanaton si muri kita?’ Aquel tiempo, maga Testigo de Jehova el todo de mio maga amigo. Facil quel para conmigo ciendo nuay man yo otro conoce na aquel nacion. Ya ayuda sila conmigo para aprende ama con Jehova y tene el deseo que hace el de suyu voluntad.

Del 1972, ya bautiza yo. Un año despues, ya principia yo man pioneer y ya cambia na un diutay congregacion na Newry, Northern Ireland. Yan renta yo un casa na monte. Tiene maga vaca que persogao cerca alla y tan practice yo el de mio talk enfrente kanila. Dol ta oi gayot sila mientras tan usang. Gendeh sila ta puede dale sugestion si paquemodo progresa pero por causa kanila, ya aprende yo que mira na audience si ta dale talk. Del 1974, ya iscuji conmigo que sirvi como un special pioneer y yan junto conmigo si Nigel Pitt, quien ya queda de mio amigo.

Na aquel tiempo, grabe el violencia na Northern Ireland. Poreso, el cuanto ya llama con este como “el lugar de bomba y bala.” Comon alla que el maga gente tan peleajan na camino, tan tirajan y ta hace rebenta coche. Mas mucho, el maga  problema alla tiene que hace na politica y religion. Pero, sabe el maga Protestante y Catolico que neutral el maga Testigo si acerca na politica poreso ta puede siempre kame predica. Sabe el maga gente si cuando y onde tiene violencia, y ta habla sila kanamon para puede kame evita con el peligro.

Pero, tiene siempre maga peligroso situacion. Un dia, junto yo con el un pioneer que si Denis Carrigan y ta predica kame na un barrio donde nuay maga Testigo. Y una vez pa lang kame ya llega alla de antes. Ya acusa kanamon el un mujer que maga soldao kame de Britain. Siguro, cay nuay ni uno kanamon el tiene Irish accent. Ya tiene kame miedo. Cay gane, si bueno tu na maga soldao, puede contigo mata o tira na tuhud. Mientras ta espera kame apuera con el bus, ya mira kame que tiene coche que ya para na tienda donde talla el mujer quien ya acusa kanamon. Ya sale le y yan cuento con el dos hombre na coche y ta insiña-insiña kanamon. Despues ya anda kanamon el maga hombre y ya pregunta acerca na schedule del bus. Cuando ya llega el bus, yan cuento sila con el driver. Gendeh kame ta puede oi si cosa sila tan cuento. Nuay otro pasajero poreso convincido kame que tiene sila mal plano kanamon. Pero, nuay se sucede. Cuando pa-abajada ya yo na bus, ya pregunta yo con el driver: “Ta suspecha ba kanamon aquel maga hombre enante?” Ya contesta le: “Conoce yo con ustedes y ya habla yo se kanila. No ustedes man lingasa.”

Del 1976, na un district assembly a na Dublin, ya conoce yo con Pauline Lomax, un special pioneer de England. Humilde le, bonita y un espiritual persona. Ele y el de suyu hermano que si Ray ya engranda na verdad. Un año despues, ya casa kame de Pauline y ya continua kame sirvi como maga special pioneer na Ballymena, Northern Ireland.

Ya sirvi kame por cuanto tiempo na circuit work na Belfast, Londonderry y na otro pa maga peligroso lugar. Ya puede gayot anima kanamon el fe del diaton maga hermano y hermana quien ya deja con el diila religioso creencia y ya quita con el discriminacion y rabia para puede sirvi con Jehova. Ya bendici y ya protege gayot le kanila!

Ya queda yo na Ireland por diez año. Despues, del 1981, ya invita kanamon que atende na ika-72 clase de Gilead. Despues gradua, yan assign kanamon na Sierra Leone, West Africa.

Ya queda kame na un missionary home junto con el 11 hermano y hermana. Tiene kame un cucina, tres toilet bowl, dos shower, un telefono, un washing machine y un dryer. Pirmi ta perde corriente. Manada maga raton na quisame y maga cobra na basement.

Maskin pa dificil el situacion alla, alegre kame na ministerio. Tiene respeto el maga gente na Biblia y ta oi enbuenamente. Manada el quien yan Bible study y ya acepta con el verdad. El maga gente ta llama conmigo como “Mister Robert” y con Pauline “Misis Robert.” Pero cuando ya queda yo ocupao na branch office y ya menora el de mio tiempo na ministerio, el maga gente ya llama ya con Pauline “Misis Pauline” y conmigo “Mister Pauline.” Ta mira yo ya gusta gayot quel si Pauline!

Pobre el manada maga hermano pero pirmi si Jehova ta dale el diila necesidad—tiene vez, na maga manera que gendeh sila ta expecta. (Mat.  6:33) Ta acorda yo con el un hermana quien tiene sen que bastante lang para na comida diila man anak na ese dia. Pero, ya dale le se todo con el un enfermo hermano quien nuay sen para cumpra medicina de malaria. Despues de cuanto hora, bigla ya llega el un mujer y ya paga con el hermana para arregla con el de suyu pelo. Manada maga situacion el igual ansina.

Nueve año kame na Sierra Leone. Despues, ya cambia kanamon na Bethel na Nigeria. Poreso, na un grande branch office ya kame. Igual siempre el de mio trabajo na oficina cuando na Sierra Leone iyo pero si Pauline ya experiencia un grande cambio y yan dificil le. De antes, ta usa le 130 hora cada mes na ministerio y manada le progresivo Bible study. Pero ahora, el de suyu assignment amo man repair maga camisa. Ya alcanza cuanto tiempo antes le ya puede man adjust. Pero ya realiza le que ta aprecia gayot el otro con el trabajo que ta hace le y yan focus le el de suyu esfuerzo para anima con el otro maga Bethelite.

Nuevo kanamon el cultura de Nigeria y manada kame cosa ya aprende. Un dia, ya anda el un hermano na de mio oficina para manda conoce con el un hermana quien nuevo lang ya llega na Bethel. Cuando man lamano era yo con ele, yan hapa le enfrente conmigo. Ya espanta gayot yo! Ya acorda dayun yo con el dos texto: el Maga Actividad 10:25, 26 y Revelacion 19:10. Ya pensa yo, ‘Habla ba yo con ele que no quel hace?’ Pero ya realiza yo que ya acepta con ele na Bethel poreso sabe le si cosa ta enseña el Biblia.

Gendeh yo comfortable aquel tiempo. Poreso despues quel, yan research yo. Ya aprende yo que el hermana ya hace lang con el un practica que ta hace siempre na cuanto parte del nacion na aquel tiempo. Ta hace tambien se el maga hombre. Manera quel diila para dale mira respeto. Gendeh quel un acto de adoranza; tiene maga ejemplo que igual ansina na Biblia. (1 Sam. 24:8) Bueno ya lang, nuay yo cosa ya habla con el hermana que posible causa con ele para man huya.

Ya puede kame conoce manada maga hermano y hermana de Nigeria quien ya dale mira fuerte fe. Uno ya si Isaiah Adagbona. b Ya aprende le el verdad cuando joven le pero ya queda le  leproso. Ya pone con ele na un lugar donde ta esta el maga leproso y ele lang el Testigo alla. Maskin pa na oposicion, ya puede le ayuda con el mas de 30 leproso para acepta con el verdad y establicia un congregacion na aquel lugar.

Del 1996, yan assign kanamon na branch office na Kenya. Este el primer vez que ya llega yo na este nacion desde aquel experiencia que ya menciona yo na introduccion. Ya queda kame na Bethel y manada chonggo el ta anda alla. Ta ruba sila con el maga fruta que ta carga el maga hermana. Un dia, el un hermana na Bethel ya deja abierto con el de suyu bentana. Cuando ya bolbe le, ya mira le con el manada chonggo que ta come con el de suyu comida. Ya grita le y ya corre pa-apuera. Ya grita tambien el maga chonggo y ya brinca na bentana.

Swahili el lengguaje del congregacion diamon de Pauline. Despues de corto tiempo, yan assign conmigo que conduci con el Congregation Book Study (que ahora ta llama Estudiada del Congregacion na Biblia). Pero, gendeh pa gayot yo tanto sabe converza na ese lengguaje. Ta estudia yo adelantao con el material poreso ta puede yo le con el maga pregunta. Pero si otro el comento del maga hermano na cosa escribido, maskin diutay lang, gendeh yo ta entende con ese. Ya tiene yo huya y ya tiene lastima con el maga hermano y hermana. Pero bilib yo cay ya acepta sila con el arreglamiento con paciencia y humildad.

Nuay kame alcanza un año na Kenya. Del 1997, ya invita kanamon que sirvi na Bethel na Brooklyn, New York. Ahora, na un nacion ya kame donde el maga gente rico na material que posible tambien causa problema. (Prov. 30:8, 9) Pero maskin na ese nacion, tiene siempre fuerte fe el diaton maga hermano y hermana. Ta usa sila con el diila tiempo y material cosas, gendeh para na diila mismo bien, sino para suporta con el trabajo del organizacion de Jehova.

Na manada año, ya puede kame mira con el fe del diaton maga hermano y hermana maskin cosa pa el diila circumstancia. Na Ireland, tiene sila fe maskin tiene gulu na comunidad. Na Africa, tiene sila fe maskin pobre y lejos con otro. Na United States, tiene sila fe maskin rico na material. Asigurao, alegre gayot si Jehova mientras ta mira le con el de suyu maga siervo que ta dale mira el diila amor para con ele na todo clase de situacion.

Paspas lang el tiempo—gane, “mas corre pa na lanzadera del un tejedor.” (Job 7:6) Ta sirvi kame ahora na world headquarters na Warwick, New York, y alegre kame que continua sirvi junto na maga persona quien deverasan ta ama con uno y otro. Contento kame y alegre hace si cosa kame puede hace para suporta con el diaton Rey, si Cristo Jesus, quien cerca ya premia con el todo fiel siervo del Dios.—Mat. 25:34.