SI Yomara y el de suyu maga hermano—si Marcelo y Hiver—ta queda na un diutay barrio na Guatemala. Ya principia estudia con el Biblia si Yomara junto na maga Testigo y na uliji, ya estudia tambien el de suyu maga hermano. Pero, tiene problema. Bulak sila tres y gendeh sila ta puede le braille. Poreso, el quien tan Bible study kanila amo el ta le con el material y maga texto.

Tan dificil tambien sila para atende miting. Si sila-sila lang, gendeh sila puede man viaje por 40 minuto para na Kingdom Hall. Pero, ya hace manera el maga hermano para lleva kanila na todo maga miting. Y cuando ta principia ya sila dale parte na midweek miting, ta ayuda kanila el maga hermano para memoria con el diila maga presentacion.

Del Mayo 2019, ya principia ya tene maga miting na diila mismo barrio. Aquel tiempo, tiene un man maridable regular pioneer quien ya cambia alla. Goal diila que enseña kanila tres que le y escribi braille maskin no sabe braille este man maridable. Ya anda sila na un library para aprende acerca na braille y si paquemodo enseña con ese.

Adentro lang na cuanto meses, bueno ya sila tres le braille. Y por causa con ese, mas ya progresa pa sila na espiritual. a Ahora, regular pioneer ya kanda Yomara, Marcelo y Hiver. Un siervo ministerial si Marcelo. Activo gayot sila ta participa na maga espiritual actividad cada semana. El diila ejemplo ta motiva con otro que queda tambien activo.

Ta aprecia gayot este tres man hermano con el amor y suporta del congregacion. “Desde el primer vez que ya conoce kame con el maga Testigo, ya dale sila kanamon mira deverasan Cristiano amor,” ya habla si Yomara. “Tiene kame maga buen amigo y amiga na diamon congregacion y parte kame del un amable familia na entero mundo,” ya habla si Marcelo. Ta espera gayot si Yomara y el de suyu maga hermano con el tiempo cuando hay puede sila mira que el tierra hay queda ya paraiso.—Sal. 37:10, 11; Isa. 35:5.