1-2. Cosa puede ayuda kanaton para entende si cosa ya sinti si Jehova na maga imbusterias acerca con ele?

 IMAGINA este: El un persona quien importante contigo ya habla un cosa malo acerca contigo. Sabe tu que un imbusterias se pero el otro ya creé con ese. El mas umalin alli, ya habla sila se con otro y el otro ya creé tambien con ese. Cosa tu sinti? Si ta ama tu con el maga gente y importante contigo el de tuyu reputacion, gendeh ba hay sinti tu duele por causa con ese?—Prov. 22:1.

² Este ejemplo puede ayuda kanaton entende si cosa ya sinti si Jehova cuando ya hace malo con el de suyu reputacion. El uno del de suyu maga angel ya habla imbusterias acerca con ele na primer mujer, si Eva. Ya creé le con este imbusterias. Por causa con ese imbusterias, yan rebelde el diaton primer mayores con Jehova. Como resulta, el todo gente ya hereda culpa y muerte. (Gen. 3:1-6; Roma 5:12) El todo problema na mundo—el muerte, guerra y sufrimiento—ya existi por causa con el maga imbusterias que ya habla si Satanas na jardin de Eden. Ya sinti ba duele si Jehova por causa con ese imbusterias y el maga resulta de este? Asigurao se. Pero, nuay queda negativo si Jehova. Gane, ta esta ele el “alegre Dios.” —1 Tim. 1:11, NWT.

3. Cosa privilegio kita tiene?

³ Tiene kita el privilegio que vindica con el nombre de Jehova si obedece kita con este simple mandamiento: “Alaba con el nombre de Jehova.” (Sal. 113:1) Puede kita hace con ese si habla kita con otro el verdad acerca con Jehova. Hay hace ba tu se? Considera kita tres cosas que puede motiva kanaton para  alaba con el nombre del diaton Dios con todo corazon.

ALEGRE SI JEHOVA SI TA ALABA KITA CON EL DE SUYU NOMBRE

4. Porque el diaton alabanza ta hace alegre con Jehova? Ilustra. (Mira tambien con el letrato.)

⁴ Ta hace kita alegre con el diaton Tata na cielo si ta alaba kita con el de suyu nombre. (Sal. 119:108) Quierre decir ba de este que igual ele con el maga imperfecto gente quien hangul na alabanza? Gendeh. Considera con este ilustracion. El un bata mujer ya anda corre para abraza con el de suyu tata y ya habla, “Etu el pinaka-bueno tata na entero mundo, Pang!” Bien alegre gayot el tata na cosa ya habla el de suyu anak. Porque? Por causa ba cay ta necesita gayot le el alabanza estaba na de suyu anak? Gendeh. Sino, como un buen tata, alegre lang le cay el de suyu anak ta dale mira amor y apresacion con ele. Sabe le que este maga calidad puede ayuda con el de suyu anak para queda alegre mientras ta engranda este. Na igual manera, si Jehova, el de con todo buen Tata, alegre si ta alaba kita con ele.

5. Si ta alaba kita con el nombre del Dios, cosa kita ta puede dale prueba?

⁵ Si ta alaba kita con el diaton Tata na cielo, ta ayuda kita dale prueba que gendeh deverasan el cosa ya clama si Satanas acerca kanaton. Ya habla si Satanas que nuay ni un gente el quien hay defende con el nombre del Dios. Asegun con ele, gendeh kita puede mentena con el diaton integridad. Ya habla le que hay descanza kita sirvi con Dios si nuay mas kita cosa puede saca con Ele. (Job 1:9-11; 2:4) Pero el fiel hombre que si Job ya dale mira que imbustero si Satanas. Quetal tu? Todo kita tiene el privilegio defende con el nombre del diaton Tata y hace alegre con ele por medio na diaton integridad. (Prov. 27:11) Un grande gayot honor para hace con ese.

6. Paquemodo kita puede imita con Rey David y con el maga Levita? (Nehemias 9:5)

⁶ El amor con Dios ta motiva con el maga fiel gente para alaba con el de suyu nombre con todo corazon. Si Rey David ya escribi: “Alaba yo con Jehova; el todo cosa adentro conmigo hay alaba con el de suyu sagrao nombre.” (Sal. 103:1) Sabe si David que si ta alaba le con el nombre de Jehova, igual se como ta alaba le mismo con Jehova. Si ta oi kita con el nombre de Jehova, ta puede kita pensa con el de suyu maga bonito calidad y el de suyu maga marvelloso trabajo. Para con David, sagrao el nombre del de suyu Tata y quierre le alaba con ese con “todo cosa adentro” con ele—quierre decir, con todo corazon. Ya puede tambien dale buen ejemplo el maga Levita na diila  alabanza con Jehova. Con humildad sila ya admiti que el diila maga palabra gendeh gayot bastante para dale el alabanza que conviene ricibi el sagrao nombre de Jehova. (Le con el Nehemias 9:5.) Sin duda, el diila con todo corazon alabanza ya dale alegria con Jehova.

7. Paquemodo kita puede alaba con Jehova na diaton ministerio y na diaton maga actividad cada dia?

⁷ Ahora, puede kita hace alegre con Jehova si converza kita acerca con ele na manera que ta dale mira diaton apresacion y amor para con ele. Si talli kita na ministerio, pirmi kita ta acorda que el diaton proposito amo que ayuda con el maga gente queda cerca con Jehova y mira con ele como un amable Tata. (Sant. 4:8) Alegre kita dale mira na maga gente si paquemodo el Biblia ta revela el amor, justicia, sabeduria, poder y otro pa maga bonito calidad de Jehova. Ta alaba tambien kita y ta hace alegre con Jehova si ta pricura kita imita con ele. (Ef. 5:1) Si ta hace kita se, posible puede nota el otro que diferente kita na maga gente na este mal mundo y queda sila interesao sabe si porque. (Mat. 5:14-16) Mientras tan junto kita kanila, puede kita explica si porque kita diferente. Como resulta, puede se motiva con el maga sincero persona para conoce con el diaton Dios. Si ta alaba kita con Jehova na este maga manera, ta hace kita alegre con el de suyu corazon.—1 Tim. 2:3, 4.

ALEGRE SI JESUS SI TA ALABA KITA CON EL NOMBRE DE JEHOVA

8. Paquemodo si Jesus ya dale mira buen ejemplo si paquemodo alaba con el nombre de Jehova?

⁸ Na todo inteligente creatura na cielo y na tierra, nuay otro quien mas conoce con el Tata sino el Anak. (Mat. 11:27) Ta ama si Jesus con el de suyu Tata y ya dale le mira buen ejemplo si paquemodo alaba con el nombre de Jehova. (Juan 14:31) Cuando ya reza le con el de suyu Tata na noche antes le muri, ya habla le si cosa le ya puede cumpli na de suyu ministerio: “Ya manda yo canila conoce el de Uste Nombre.” (Juan 17:26) Cosa se quierre decir?

9. Paquemodo si Jesus ya usa un istoria para hace entende kanaton si cosa el deverasan personalidad del de suyu Tata?

⁹ Nuay lang basta habla si Jesus con el maga gente que Jehova el nombre del Dios. Sabe ya se el maga Judio. Sino, si Jesus “ya hace entende . . . si cosa el naturaleza de Dios” na maga gente. (Juan 1:17, 18, El Nuevo Testamento) Por ejemplo, el Hebreo Escritura ta revela que si Jehova lastimoso y tiene compasion. (Ex. 34:5-7) Ya hace se mas claro si Jesus cuando ya relata le el istoria acerca con el perdido anak y de suyu tata. Na istoria, ya puede mira el tata con el de suyu anak “cuando lejos pa” este. Ya hace le encuentro con el de suyu anak, ya abraza y ya perdona con ele con todo corazon. Por medio con ese istoria, mas ta puede kita imagina con el lastima y compasion de Jehova. (Luc. 15:11-32) Ya revela si Jesus el deverasan personalidad del de suyu Tata.

10. (a) Porque kita puede habla que ya usa si Jesus con el nombre del de suyu Tata y quierre le que ansina tambien hace el otro? (Marcos 5:19) (Mira tambien con el letrato.) (b) Cosa quierre si Jesus que hace kita ahora?

¹⁰ Quierre ba si Jesus que usa tambien el otro con el personal nombre del de suyu Tata? Si. El cuanto religioso lider ta creé que bien sagrao gayot el nombre del Dios poreso gendeh con ese debe menciona. Pero, nuay permiti si Jesus que ese tradicion del gente hay sangga con ele para honra con el nombre del de suyu Tata. Por ejemplo, considera con el tiempo cuando ya cura le con el un hombre que controlao de demonio na region de Geresenes. Ya tiene miedo el maga gente y ya pidi con Jesus que sale alla poreso nuay le esta na aquel region. (Mar. 5:16, 17) Maskin pa ansina,  quierre si Jesus que el maga gente alla puede conoce con el nombre de Jehova. Poreso ya habla le con el hombre con quien le ya cura que habla con otro, gendeh el cosa le ya hace sino el cosa si Jehova ya hace para con ele. (Le con el Marcos 5:19.) a Quierre tambien le ahora que manda kita conoce el nombre del de suyu Tata na entero mundo! (Mat. 24:14; 28:19, 20) Si ta hace kita se, ta hace kita alegre con Jesus, el diaton Rey.

11. Cosa si Jesus ya enseña na de suyu maga siguidores que reza y porque se importante? (Ezequiel 36:23)

¹¹ Sabe si Jesus que proposito de Jehova que santifica con el De Suyu nombre y dale prueba que imbusterias el maga cosas que ya habla acerca con Ele. Poreso, ya enseña si Jesus con el de suyu maga siguidores que reza: “Tata diamon na cielo, dale gloria con el de Uste Nombre.” (Mat. 6:9) Sabe si Jesus que amo se el de con todo grande issue donde envuelto el todo creacion. (Le con el Ezequiel 36:23.) Bien grande el cosa ya hace si Jesus para santifica con el nombre de Jehova y nuay inteligente creatura na universo el quien ya puede hace mas pa que con ese. Pero cuando ya arresta con Jesus, cosa el de suyu maga enemigo ya acusa con ele? Blasfemia! Ya sinti si Jesus que bien grande culpa gayot que hace malo con el sagrao nombre del de suyu Tata. Ya queda gayot le bien malingasa que hay acusa y sentencia con ele por causa con este crimen. Posible, amo se el razon si porque si Jesus ya experiencia “grande sufrimiento” cuanto hora antes con ele arresta.—Luc. 22:41-44.

12. Paquemodo si Jesus ya santifica con el nombre del de suyu Tata na de con todo buen manera?

¹² Para santifica con el nombre del de suyu Tata, ya aguanta si Jesus con el todo clase de sufrimiento, insulto y imbusterias que ya habla acerca con ele. Sabe le que ya obedece gayot le con el de suyu Tata y nuay le razon para tiene huya. (Heb. 12:2) Sabe tambien ele que si Satanas ta ataca gayot con ele na aquel dificil tiempo. (Luc. 22:2-4; 23:33, 34) Asigurao, quierre si Satanas que man compromiso si Jesus pero nuay gayot se sucede! Ya puede gayot dale prueba si Jesus que bien imbustero si Satanas y que tiene maga leal siervo si Jehova quien ta mentena con el diila integridad, maskin bajo na maga dificil probanza!

13. Paquemodo tu puede hace alegre con el de tuyu Rey?

 ¹³ Quierre ba tu hace alegre con el de tuyu Rey? Continua alaba con el nombre de Jehova y ayuda con otro conoce si quien gayot el diaton Dios. Si ta hace tu se, ta imita tu con Jesus. (1 Ped. 2:21) Igual con ele, ta hace tu alegre con Jehova y ta dale prueba que el De Suyu contrario, si Satanas, bien imbustero!

TA AYUDA KITA SALVA VIDA SI TA ALABA KITA CON EL NOMBRE DE JEHOVA

14-15. Cosa el maga buen resulta si ta enseña kita con el maga gente acerca con Jehova?

¹⁴ Si ta alaba kita con el nombre de Jehova, ta ayuda kita salva vida. Na cosa manera? Si Satanas “ya hace bulag el . . . inteligencia” del maga gente. (2 Cor. 4:4) Como resulta, ya creé sila con el de suyu maga imbusterias igual con este: Gendeh ta existi el Dios, lejos el Dios y nuay queber na maga gente, nuay lastima el Dios y ta castiga le con el maga malo hasta para cuando. Proposito de ese maga imbusterias que esconde y hace malo con el nombre y reputacion de Jehova para gendeh queda cerca con ele el maga gente. Pero el diaton trabajo ta sangga con el cosa quierre hace si Satanas. Ta enseña kita na maga gente el verdad acerca na diaton Tata y ta alaba con el sagrao nombre del diaton Dios. Cosa el resulta de ese?

¹⁵ Tiene gayot grande efecto el maga verdad na Palabra del Dios. Cay ta enseña kita na maga gente acerca con Jehova y si cosa clase gayot ele de Dios, ta puede kita mira maga buen resulta. El maga gente gendeh mas bulak na maga imbusterias de Satanas y igual kanaton, ta puede ya sila mira con el maga bonito calidad del diaton Tata. Ya puede sila realiza si paquemodo le de poderoso. (Isa. 40:26) Ya aprende sila confia con ele por causa na de suyu perfecto justicia. (Deut. 32:4) Manada sila cosa ya sabe por causa na de suyu grande sabeduria. (Isa. 55:9; Roma 11:33) Y ya sinti gayot sila comforta cuando ya sabe sila que el Dios amor. (1 Juan 4:8) Mientras mas ta queda sila cerca con Jehova, mas ta queda sila asigurao que puede sila vivi hasta para cuando como de suyu maga anak. Un grande privilegio gayot que puede ayuda con el maga gente para queda cerca con el diila Tata! Si ta hace kita con ese, ta mira si Jehova kanaton  como “ta trabaja junto” con ele.—1 Cor. 3:5, 9, El Nuevo Testamento.

16. Cosa el efecto con el cuanto cuando ya sabe sila el nombre del Dios? Dale maga ejemplo.

¹⁶ Posible na primero, puede lang anay kita enseña kanila que Jehova el nombre del Dios. Pero ese pa lang verdad, puede ya tene grande efecto na corazon del un sincero persona. Por ejemplo, el un joven mujer que si Aaliyah b ya engranda na un gendeh Cristiano religion. Pero ta sinti le que tiene cosa falta na diila religion y gendeh le ta sinti cerca con Dios. Ya cambia se cuando ya estudia le con el Biblia junto na maga Testigo. Ya principia le mira con Dios como de suyu Amigo. Y ya espanta le cuando ya sabe le que ya quita con el nombre del Dios na manada Biblia y ya cambia con ese maga titulo igual na Señor. Cuando ya sabe le el nombre de Jehova, ya cambia se con el de suyu vida. Ele ya habla: “Tiene nombre el de mio best Friend!” Cosa el resulta? Ele ya habla: “Tiene ya paz el de mio corazon. Un grande privilegio gayot que puede conoce con Dios.” El un musiquero que el nombre Steve ya engranda na un familia que Judio el religion. No quierre le queda parte del maskin cosa religion por causa na hipocresia que ta puede le mira alli. Pero cuando ya muri el de suyu nana, ya conforma le man junto na un Bible study que ta conduci el uno del maga Testigo de Jehova. Ya tiene gayot grande efecto con ele cuando ya sabe le el nombre del Dios. Ele ya habla: “Ahora lang yo ya puede sabe el nombre del Dios.” Y ya omenta pa le: “Por primer vez, ya puede yo entende que deverasan persona el Dios. Desde aquel, ya queda le de mio Amigo.”

17. Porque tu determinao continua alaba con el nombre de Jehova? (Mira tambien con el letrato.)

¹⁷ Na trabajo predicacion y enseñada, ta habla ba tu con otro acerca con el sagrao nombre de Jehova? Ta ayuda ba tu kanila para conoce si cosa clase gayot le de Dios? Si ta hace tu se, ta alaba tu con el nombre del Dios. Ojala continua tu alaba con el sagrao nombre de Jehova por medio que ayuda con el maga gente conoce con el Persona quien ta lleva con ese nombre. Na ansina manera, puede tu salva diila vida. Hay sigui tu con el ejemplo del de tuyu Rey, si Jesucristo. Y mas pa na todo, hay hace tu alegre con el de tuyu amable Tata, si Jehova. Ojala ‘hay alaba tu con el de suyu nombre hasta para cuando’!—Sal. 145:2.