1. Porque kita debe sigui na guia de Jehova? Ilustra.

 IMAGINA que ya perde tu na buuk. Peligroso alla: tiene maga animal de monte, insecto que ta lleva enfermedad, venenoso siembra y hondo agujero. Asigurao alegre gayot tu si tiene tu experienciao uban que sabe si onde el peligro y puede ayuda contigo si paquemodo evita con ese. Este mundo igual na aquel buuk que bien manada peligro que puede hace malo con el diaton espiritualidad. Pero tiene kita uban quien puede guia kanaton—si Jehova. Ta ayuda le kanaton evita con el maga peligro y ta guia kanaton para na diaton destinacion—el vida hasta para cuando na nuevo mundo.

2. Paquemodo si Jehova ta guia kanaton?

² Paquemodo si Jehova ta guia kanaton? Una, por medio na de suyu Palabra, el Biblia. Pero, ta usa tambien le maga representante na tierra. Por ejemplo, ta usa le con el “fiel y sabio esclavo” para dale espiritual comida que puede ayuda kanaton hace maga justo decision. (Mat. 24:45, NWT) Ta usa tambien si Jehova maga otro cualificao hombre para guia kanaton. Por ejemplo, el maga circuit overseer y maga anciano na congregacion ta anima y ta dale instruccion que puede ayuda kanaton enfrenta con el maga dificultad. Ta rindi gayot kita gracias na guia que ta dale si Jehova durante na este ultimo maga dia! Ta ayuda este kanaton mentena el diaton relacion con Jehova y esta na camino para na vida.

3. Cosa kita hay considera na este articulo?

³ Maskin pa ansina, posible tiene vez tan dificil kita sigui na guia de Jehova especialmente si maga imperfecto gente el ya dale con ese. Porque? Posible que no quierre kita con el consejo que ya dale sila. O baka sinti kita que gendeh justo el direccion que ya ricibi kita poreso ta pensa kita que gendeh se  estaba con Jehova. Na ese maga tiempo, necesita kita confia que si Jehova el quien ta guia con el de suyu maga siervo y hay resulta na manada bendicion si sigui kita na de suyu guia. Para ayuda kanaton, este articulo hay considera (1) si paquemodo si Jehova ta guia con el de suyu maga siervo na tiempo del Biblia, (2) si paquemodo le ta guia kanaton ahora y (3) si paquemodo kita beneficia si pirmi kita ta sigui na de suyu guia.

SI PAQUEMODO SI JEHOVA YA GUIA CON EL NACION DE ISRAEL

4-5. Paquemodo si Jehova ya dale mira que ta usa le con Moises para guia con el maga Israelita? (Mira con el letrato.)

⁴ Ya iscuji si Jehova con Moises para guia con el maga Israelita cuando ya sale sila na Egipto. Ya dale Le con el maga Israelita maga claro evidencia que ta guia Le kanila por medio con Moises. Por ejemplo, ta guia kanila el arigui de celaje si didia y arigui de fuego si denoche. (Ex. 13:21) Ya sigui si Moises con ese arigui y ya guia se con ele y con el maga Israelita para na Colorao Mar. Ya tiene gayot miedo el maga Israelita cay ta pensa sila que nuay mas ya sila onde puede pasa y ta llega ya el maga soldao de Egipto. Pensaba sila que gendeh justo el decision de Moises que lleva kanila na Colorao Mar. Pero nuay man kamali si Moises. Intencional si Jehova ya guia con el de suyu maga siervo alla. (Ex. 14:2) Despues, ya salva el Dios kanila na manera que nuay sila expecta.—Ex. 14:26-28.

⁵ Por 40 año despues quel, ya continua si Moises depende na arigui de celaje para guia con el maga siervo del Dios na desierto. a Tiene tiempo, ya pone si Jehova con el arigui arriba na tolda de Moises donde puede se mira el todo Israelita. (Ex. 33:7, 9, 10) Por medio na arigui, yan cuento si Jehova con Moises. Despues, ya habla tambien si Moises con el maga gente el instruccion de Jehova. (Sal. 99:7) Puede mira el maga Israelita el maga claro evidencia que si Jehova ta usa con Moises para guia kanila.

6. Cosa el reaccion del maga Israelita na guia de Jehova? (Numero 14:2, 10, 11)

⁶ Maka-triste, mayoria del maga Israelita ya ignora con el maga claro evidencia que si Jehova ta usa con Moises como De Suyu representante. (Le con el Numero 14:2, 10, 11.) Manada beses sila nuay acepta con ese. Como resulta, nuay permiti si Jehova con ese generacion del maga Israelita que entra na Tierra Prometido.—Num. 14:30.

7. Dale maga ejemplo de aquellos quien ya sigui na guia de Jehova. (Numero 14:24) (Mira tambien con el letrato.)

⁷ Pero, el cuanto Israelita ya sigui na guia de Jehova. Por ejemplo, si Jehova ya habla: “Ya continua [si Caleb] sigui conmigo con todo corazon.” (Le con el Numero 14:24.) Ya bendici el Dios con Caleb y ya dale pa gane con ele el lugar na Canaan que quierre le. (Jos. 14:12-14) Un buen ejemplo tambien el sunod generacion del maga Israelita cay ya sigui sila con el guia de Jehova. Cuando ya releva si Josue con Moises como el lider del maga Israelita, “ya respeta gayot sila con ele na de suyu entero vida.” (Jos. 4:14) Como resulta, ya bendici si Jehova kanila y ya dale kanila el lugar que ya promete le kanila.—Jos. 21:43, 44.

8. Explica si paquemodo si Jehova ya guia con el de suyu maga siervo durante na tiempo del maga rey. (Mira tambien con el letrato.)

⁸ Cuanto año despues, ya iscuji si Jehova maga juez para guia con el de suyu maga siervo. Despues de ese, durante na tiempo del maga rey, ya iscuji si Jehova maga profeta para guia con el de suyu maga siervo. El maga fiel rey ya sigui na consejo del maga profeta. Por ejemplo, ya acepta si Rey David con el consejo  que ya dale si profeta Natan. (2 Sam. 12:7, 13; 1 Cron. 17:3, 4) Ya confia si Rey Josafat con el guia de profeta Jahaziel y ya anima con el maga gente de Juda que “tene fe na . . . maga profeta” del Dios. (2 Cron. 20:14, 15, 20) Cuando na un dificil situacion, ya pidi ayuda si Rey Ezequias con profeta Isaias. (Isa. 37:1-6) Cada vez ta sigui el maga rey na guia de Jehova, ta bendici kanila y ta esta protegido el nacion. (2 Cron. 20:29, 30; 32:22) Bien claro gayot era para kanila que ta usa si Jehova con el maga profeta para guia con el de suyu maga siervo. Pero, mayoria del maga rey y del maga gente el ya ignora con el maga profeta de Jehova.—Jer. 35:12-15.

SI PAQUEMODO SI JEHOVA YA GUIA CON EL MAGA CRISTIANO DEL PRIMER SIGLO

9. Con quien si Jehova ya usa para guia con el maga Cristiano del primer siglo? (Mira tambien con el letrato.)

⁹ Del primer siglo, ya forma si Jehova con el Cristiano congregacion. Paquemodo le ya guia con el maga Cristiano na aquel tiempo? Ya iscuji le con Jesus como el cabeza del congregacion. (Ef. 5:23) Pero nuay si Jesus directa man cuento con el cada uno kanila para dale direccion. Ya usa le con el maga apostoles y maga anciano na Jerusalem para guia con el maga Cristiano. (Act. 15:1, 2) Ya iscuji tambien le maga anciano para guia na maga congregacion.—1 Tes. 5:12; Tito 1:5.

10. (a) Cosa el reaccion del mayoria del maga Cristiano del primer siglo na guia que ya ricibi sila? (Maga Actividad 15:30, 31) (b) Porque el cuanto na tiempo del Biblia nuay acepta con el maga representante de Jehova? (Mira con el cajon “ Si Porque el Cuanto Ya Ignora con el Claro Evidencia.”)

¹⁰ Cosa el reaccion del maga Cristiano del primer siglo? Mayoria kanila el alegre ya sigui na maga instruccion que ya ricibi sila. Gane, “ya queda sila bien alegre por el animo que ya dale canila.” (Le con el Maga Actividad 15:30, 31.) Pero, paquemodo si Jehova ta guia con el de suyu maga siervo na diaton tiempo ahora?

SI PAQUEMODO SI JEHOVA TA GUIA KANATON AHORA

11. Dale un ejemplo que ta dale mira si paquemodo si Jehova ya usa con aquellos quien ta guia na moderno tiempo.

¹¹ Ta continua si Jehova guia con el de suyu maga siervo ahora. Ta hace le con ese por medio  na de suyu Palabra y de suyu Anak, el cabeza del congregacion. Ta puede ba kita mira con el maga prueba que ta continua tambien el Dios usa con el maga representante aqui na tierra? Si. Considera, por ejemplo, con el cosa ya sucede despues del año 1870. Si Charles Taze Russell y el de suyu maga uban ya realiza que el año 1914 amo un bien importante año para na Reino del Dios. (Dan. 4:25, 26) Ya sabe se sila cay ya examina sila con el maga profecia na Biblia. Ya guia ba si Jehova con el diila maga research na Biblia? Claro gayot. Del 1914, el maga suceso na mundo ya dale prueba que ya principia ya rula el Reino del Dios. Ya sucede el Guerra Mundial I y ya tiene tambien maga epidemia, temblor y escasez de comida. (Luc. 21:10, 11) Claro gayot que ya usa si Jehova con aquellos maga sincero Cristiano para ayuda con el de suyu maga siervo.

12-13. Cosa ya hace el maga quien ta guia para progresa el trabajo predicacion y enseñada durante el Guerra Mundial II?

¹² Considera tambien si cosa ya sucede durante el Guerra Mundial II. Ya estudia el maga hermano quien ta guia na world headquarters con el Revelacion 17:8. Como resulta, ya realiza sila que el guerra ta guia gendeh para na Armagedon sino para na un tiempo de paz donde mas manada gente con quien puede predica. Poreso maskin dol gendeh practical na aquel tiempo, ya decidi sila que establicia con el Watchtower Bible College (School) of Gilead para man train con el maga misionario que predica y enseña na maga lugar na entero mundo. Gane, ya imbia con el maga misionario maskin durante el guerra. Mas pa, ya principia tambien el fiel esclavo con el Course in Theocratic Ministry b para man train con el todo na congregacion para queda mas efectivo na predicacion y enseñada. Na este maga manera, ya prepara con el maga siervo del Dios para na mas grande trabajo na futuro.

¹³ Ahora, claro kita puede mira que ya guia si Jehova con el de suyu maga siervo durante na aquel dificil tiempo. Desde el Guerra Mundial II, el maga siervo de Jehova tiene libertad para predica na manada lugar. Gane, manada gente el ya conoce con Jehova y mas ya progresa el trabajo.

14. Porque kita puede confia na direccion estaba na organizacion de Jehova y na maga anciano? (Revelacion 2:1) (Mira tambien con el letrato.)

 ¹⁴ Ahora, el maga miembro del Cuerpo Gobernante ta continua depende na guia del Cristo. Quierre sila que el maga instruccion que ta dale sila na maga hermano y hermana ta reflecta si cosa el mirada del Dios y del Cristo. Y ta usa sila con el maga circuit overseer y maga anciano para dale direccion na maga congregacion. c Ya iscuji con el maga anciano por medio na sagrao espiritu y talli sila na “mano derecha” del Cristo. (Le con el Revelacion 2:1.) Siempre, el todo anciano imperfecto y tan kamali. Tiene tiempo, yan kamali tambien si Moises, Josue y el maga apostoles. (Num. 20:12; Jos. 9:14, 15; Roma 3:23) Maskin pa ansina, ta guia el Cristo con el fiel esclavo y maga anciano, y hay continua le hace con ese “todo el dia hasta na fin del mundo.” (Mat. 28:20) Poreso, tiene kita maga razon para confia na guia que ta dale le por medio con aquellos con quien le ya iscuji para guia.

TA BENEFICIA KITA SI TA CONTINUA KITA SIGUI NA GUIA DE JEHOVA

15-16. Cosa tu ya aprende na maga experiencia de aquellos quien ya sigui na guia de Jehova?

¹⁵ Si ta continua kita sigui na guia de Jehova, ta beneficia ya kita maskin ahora pa lang. Por ejemplo, si Andy y Robyn ya aplica con el consejo que hace simple con el diila vida. (Mira con el study note na Mateo 6:22.) Como resulta, ya puede sila man volunteer na maga proyecto de construida del organizacion. Si Robyn ya habla: “Ya queda kame na maga bien diutay casa y mas mucho de ese, nuay cucina. Y necesita yo vende con el manada gamit que ta usa yo na photography, maskin pa hilig se de mio. Pero igual na mujer de Abraham, si Sara, determinao yo man focus na cosa yo puede hace para con Jehova, gendeh na cosa yo ya sacrificia.” (Heb. 11:15) Paquemodo sila ya beneficia na decision que ya hace sila? Si Robyn ya habla: “Bien alegre kame cay sabe kame que ta dale kame con Jehova el todo cosa que tiene kame. Si ta trabaja kame na maga proyecto del organizacion, ta puede kame imagina si cosa el vida na nuevo mundo.” Uyun con ese si Andy. Ele ya habla: “Bien alegre kame cay ta dale kame con el todo diamon tiempo y fuerza para suporta con el Reino.”

¹⁶ Cosa pa el otro beneficio si ta continua kita sigui na guia de Jehova? Despues gradua  na high school, quierre sigui si Marcia con el consejo que man pioneer. (Mat. 6:33; Roma 12:11) Ele ya habla: “Ya ofrece conmigo cuatro año scholarship na un universidad. Pero quierre yo alcanza con el de mio espiritual goal. Poreso, ya iscuji yo aprende un skill que puede ayuda conmigo suporta na de mio ministerio. Uno se na maga de con todo buen decision que ya hace yo. Alegre yo ahora ta sirvi como un regular pioneer y tiene yo un trabajo que ta permiti conmigo que sirvi como un commuter na Bethel y ricibi otro maga privilegio.”

17. Cosa maga omento bendicion el ricibi kita si ta continua kita sigui na guia de Jehova? (Isaias 48:17, 18)

¹⁷ Tiene vez, ta ricibi kita maga consejo que ta protege kanaton na maga cosas igual na materialismo y maga actividad que puede causa kanaton para desobedece con Dios. Hay beneficia tambien kita si sigui kita con el guia que ta dale si Jehova na este aspeto. Puede kita mentena un limpio conciencia y evita maga problema. (1 Tim. 6:9, 10) Como resulta, puede kita sirvi con Jehova con todo corazon que ta resulta na alegria, paz y satisfaccion.—Le con el Isaias 48:17, 18.

18. Porque tu determinao que continua sigui na guia de Jehova?

¹⁸ Asigurao, hay continua si Jehova usa maga representante aqui na tierra para guia kanaton durante el grande tribulacion y na Un Mil Año Rulanza del Cristo. (Sal. 45:16) Hay continua ba kita sigui con ese direccion maskin pa otro el cosa kita quierre? Mas facil con ese hace si ta sigui ya kita ahora con el guia de Jehova. Poreso, ojala continua kita sigui na guia de Jehova y de aquellos maga hombre con quien ele ya iscuji para guia kanaton. (Isa. 32:1, 2; Heb. 13:17) Mientras ta hace kita se, puede kita completamente confia con Jehova, quien ta ayuda kanaton evita con el maga espiritual peligro y ta guia kanaton para na diaton destinacion—el vida hasta para cuando na nuevo mundo.