DEL Miercoles, Enero 18, 2023, un especial anuncio el ya aparece na jw.org. Ya menciona este que ya iscuji con kanda Hermano Gage Fleegle y Hermano Jeffrey Winder para sirvi como maga miembro del Cuerpo Gobernante del Maga Testigo de Jehova. Fiel sila ya sirvi con Dios Jehova por largo tiempo.

Ya engranda si Hermano Fleegle na Pennsylvania, U.S.A., y ya sabe le el verdad na de suyu maga mayores. Cuando teenager le, ya cambia sila na un lugar que donde tiene grande necesidad. Nuay dura, ya bautiza le del Noviembre 20, 1988.

Pirmi ta anima el maga mayores de Hermano Fleegle que sirvi le con Jehova full-time. Pirmi sila ta invita maga circuit overseer y maga Bethelite na diila casa. Ya puede mira si Hermano Fleegle si paquemodo de alegre este maga hermano y hermana. Nuay dura despues del de suyu bautismo, ya principia le man regular pioneer del Septiembre 1, 1989. Despues del dos año, ya alcanza le con el de suyu goal que sirvi na Bethel—el goal que ya hace le cuando 12 año le. Ya principia le sirvi na Brooklyn Bethel del Octubre 1991.

Na Bethel, ya trabaja si Hermano Fleegle na Bindery por ocho año. Despues, yan assign con ele na Service Department. Durante na aquel tiempo, ya sirvi le por cuanto año na un congregacion que Russian el lengguaje. Del 2006, ya casa le con el un hermana que si Nadia, quien yan junto con ele sirvi na Bethel despues sila casa. Ya sirvi sila na Portuguese field y por mas de diez año, na Spanish field. Despues del manada año na Service Department, ya assign con Hermano Fleegle para trabaja na Teaching Committee Office y na uliji, na Service Committee Office. Del Marzo 2022, ya iscuji con ele para queda ayudante del Service Committee del Cuerpo Gobernante.

 Ya engranda si Hermano Winder na Murrieta, California, U.S.A. Ya puede le sabe el verdad por medio na de suyu maga mayores y ya bautiza le del Marzo 29, 1986. Pagka-sunod mes, ya decidi le man auxiliary pioneer. Yan enjoy gayot le con este poreso ya continua le. Despues man auxiliary pioneer por cuanto meses, del Octubre 1, 1986, ya principia le man regular pioneer.

Cuando teenager le, ya visita si Hermano Winder con el de suyu dos mayor hermano quien ta sirvi na Bethel aquel tiempo. Por causa con aquel, ya motiva este con ele que man apply na Bethel cuando na exacto edad ya le. Y del Mayo 1990, ya invita con ele para sirvi na Bethel na Wallkill.

Ya trabaja si Hermano Winder na manada departamento, incluido na Cleaning Department, Farm Department y Bethel Office. Ya casa le con el un hermana que si Angela del 1997 y desde aquel, junto ya sila ta sirvi na Bethel. Del 2014, ya transfiri sila na Warwick donde si Hermano Winder ya asisti na construida del facilidad del world headquarters. Del 2016, yan assign kanila na Watchtower Educational Center na Patterson donde ya trabaja si Hermano Winder na Audio/Video Services. Cuatro año despues, ya bira sila na Warwick y yan assign con Hermano Winder na Personnel Committee Office. Del Marzo 2022, ya iscuji con ele para sirvi como ayudante del Personnel Committee del Cuerpo Gobernante.

Ta reza kita que ojala bendici si Jehova kanila como “maga regalo con el maga gente” mientras ta continua sila hace esfuerzo para na Reino.—Ef. 4:8.