1. Cuando subi na cielo el maga iscujido Cristiano quien ya queda na tierra?

 DE ANTES, el maga siervo de Jehova ya pensa, ‘Cuando subi na cielo el maga iscujido Cristiano quien ya queda na tierra?’ Del una, ta creé kita que cuanto tiempo despues del guerra de Armagedon posible que tiene pa cuanto iscujido Cristiano quien hay queda aqui na Paraiso tierra. Pero na Julio 15, 2013, issue del El Torre de Guardia, ya puede kita aprende que el todo maga iscujido quien taqui pa na tierra hay subi na cielo antes principia el Armagedon.—Mat. 24:31.

2. Cosa el otro posible pregunta y cosa kita hay considera na este articulo?

² Pero, posible tiene siempre quien pregunta: Cosa hay sucede con el “otro maga carnero” del Cristo quien fiel ta sirvi con Jehova durante el grande tribulacion? (Juan 10:16; Mat. 24:21) El cuanto ahora posible tan lingasa que baka no sabe mas sila si cosa hace si llega ya se tiempo. Examina kita dos suceso na Biblia que posible ya causa kanila para pensa ansina. Despues, discuti kita maga razon si porque kita gendeh debe man lingasa.

COSA EL GENDEH SUCEDE?

3-4. Cosa posible tan lingasa el cuanto y porque?

³ El cuanto posible tan lingasa que si nuay mas ya el Cuerpo Gobernante quien ta guia kanaton, baka el otro maga carnero hay deja con el verdad. Siguro ya puede sila pensa ansina por causa na cuanto suceso na Biblia. Considera kita dos ejemplo. El primero tiene que hace con el alto sacerdote que si Jehoiada. Un fiel siervo le del Dios. Junto na de suyu mujer, si Jehosabet,  ya protege sila con el bata que si Jehoas y ya ayuda con ele para queda un bueno y fiel rey. Bueno el cosa ya hace si Jehoas cuando vivo pa si Jehoiada. Pero cuando ya muri le, ya principia hace maga cosas malo si Jehoas. Ya creé le con el maga mal principe y ya deja con Jehova.—2 Cron. 24:2, 15-19.

⁴ El sunod ejemplo amo acerca con el maga Cristiano del segundo siglo. Si apostol Juan, el ultimo apostol quien vivo na aquel tiempo, ya tiene buen influencia na manada Cristiano cay ya ayuda le kanila para continua sirvi con Jehova. (3 Juan 4) Igual con el otro maga fiel apostoles de Jesus, cuanto tiempo ya si Juan ta pricura protege con el maga congregacion desde na apostasia. (1 Juan 2:18; mira con el maga study note na 2 Tes. 2:7) Pero despues del de suyu muerte, el apostasia yan calayat igual na un quema. Adentro lang de cuanto decada, ya queda contaminao el Cristiano congregacion na maga falso doctrina.

5. Cosa kita gendeh debe pensa que sucede tambien na otro maga carnero del Cristo?

⁵ Este ba maga suceso na Biblia ta indica que ansina tambien el cosa sucede con el otro maga carnero del Cristo si hay subi ya na cielo el todo maga iscujido? Si llega se tiempo, hay principia ba tambien sila hace maga mal cosas igual con Jehoas o cae na apostasia igual con el manada Cristiano durante el segundo siglo? Nunca se sucede! Puede kita asigura que si nuay mas ya el maga iscujido Cristiano aqui na tierra, hay cuida siempre si Jehova con el otro maga carnero y hay continua sila sirvi con ele. Porque se kita puede asigura?

EL PURO ADORANZA NUNCA QUEDA CONTAMINAO

6. Cosa el tres diferente tiempo que hay examina kita?

⁶ Porque kita puede asigura que nunca queda contaminao el puro adoranza maskin durante el maga dificil tiempo na futuro? Por causa se na cosa kita ya puede aprende na Biblia acerca na tiempo donde kita ta vivi ahora. El diaton tiempo ahora bien diferente si compara na tiempo del maga Israelita de antes y na tiempo del maga Cristiano del segundo siglo. Examina kita ahora con este tres diferente tiempo: (1) El tiempo del maga Israelita, (2) el tiempo despues muri el maga apostoles y (3) el diaton tiempo, el “maga tiempo de restoracion del todo cosas.”—Act. 3:21, NWT.

7. Porque el maga fiel Israelita nuay man luya maskin pa el maga rey y el otro ya iscuji hace maga mal cosas?

⁷ El tiempo del maga Israelita. Cuanto tiempo antes muri si Moises, ya habla le con el maga Israelita: “Sabe gayot yo que si muerto ya yo, asigurao hay hace ustedes maga mal cosas y disvia na cosas que ya manda yo con ustedes.” (Deut. 31:29) Ya habla tambien si Moises kanila que si man rebelde sila, hay queda sila cautivo. (Deut. 28:35, 36) Ya sucede ba se kanila? Si. Por cuanto siglo, manada rey ya iscuji hace maga mal cosas y el maga gente ya sigui kanila na falso adoranza. Por causa con ese, ya castiga kanila si Jehova y nuay mas le permiti que tiene pa maga rey aqui na tierra quien hay rula kanila. (Eze. 21:25-27) Pero cuando ya puede mira el maga fiel Israelita que ya cumpli el cosas ya habla si Jehova, ya tiene sila el coraje que continua fiel sirvi con ele.—Isa. 55:10, 11.

8. Debe ba kita estraña que el maga Cristiano del segundo siglo ya cae na apostasia? Explica.

⁸ El tiempo despues muri el maga apostoles. Debe ba kita estraña que el maga Cristiano del segundo siglo ya cae na apostasia? Gendeh. Ya predicta si Jesus que hay sucede gayot se. (Mat. 7:21-23; 13:24-30, 36-43) El cosa ya habla kanda apostol Pablo, Pedro y Juan ta dale mira que ya principia ya cumpli  el profecia de Jesus del primer siglo. (2 Tes. 2:3, 7; 2 Ped. 2:1; 1 Juan 2:18) Del segundo siglo, ya queda contaminao el Cristiano congregacion y ya queda sila parte del Grande Babilonia, el imperio del falso religion. Otravez, ya cumpli el cosa ya predicta si Jesus.

9. Na cosa manera diferente el diaton tiempo na tiempo del maga Israelita y na tiempo del maga Cristiano del segundo siglo?

⁹ El “maga tiempo de restoracion del todo cosas.” Diferente el diaton tiempo na tiempo del maga Israelita de antes y na tiempo cuando ya principia el apostasia durante el segundo siglo C.E. Cosa ta llama con el tiempo donde kita ta vivi ahora? Mas mucho, ta llama kita con este el “ultimo maga dia” del mal sistema de las cosas. (2 Tim. 3:1) Pero el Biblia ta dale mira que tiene pa otro mas importante y mas largo tiempo que ya principia puera con ese. Hay continua se hasta puede hace bira el Mesianico Reino con el perfecto vida del maga gente y hace paraiso con el tierra. Ya llama con ese el “maga tiempo de restoracion del todo cosas.” (Act. 3:21, NWT) Ese tiempo ya principia del 1914. Con el cosa ya restora? Durante na ese tiempo, ya principia rula si Jesus como Rey na cielo. Por medio con ese, tiene otravez un rey quien representa con Jehova, un descendiente del fiel rey que si David. Pero, gendeh lang ese el cosa ya restora si Jehova. Nuay dura despues queda rey si Jesus, ya principia tambien restora con el puro adoranza! (Isa. 2:2-4; Eze. 11:17-20) Hay queda ba se otravez contaminao na apostasia?

10. (a) Cosa el Biblia ya predicta acerca na puro adoranza na diaton tiempo? (Isaias 54:17) (b) Cosa asiguranza ta dale kanaton na ese profecia?

¹⁰ Le con el Isaias 54:17. Pensa con este profecia: “Maskin cosa armas hace contra contigo gendeh tene buen exito”! Ya cumpli gayot se maga palabra na diaton tiempo ahora. Ta experiencia tambien kita con el cumplimiento de este maga palabra: “Hay enseña si Jehova con el todo de tuyu maga anak y hay tene sila abundancia paz. El pagka-recto hay queda de tuyu fundacion. . . . Gendeh tu tene miedo na maskin cosa cay gendeh se queda cerca contigo.” (Isa. 54:13, 14) Gane, maskin si Satanas mismo, “el dios de este mundo,” nuay cosa puede hace para sangga con el trabajo de enseñada que ta hace el maga siervo de Jehova. (2 Cor. 4:4) Ya puede ya restora con el puro adoranza y nunca con este puede contamina otravez el apostasia. Hay esta este hasta para cuando. Maskin cosa armas hace contra kanaton gendeh tene buen exito!

 COSA HAY SUCEDE?

11. Porque kita convincido que gendeh queda abandonao el grande grupo si na cielo ya el todo iscujido Cristiano?

¹¹ Cosa hay sucede si na cielo ya el todo maga iscujido Cristiano? Acorda que si Jesus el diaton Pastor. Ele el cabeza del Cristiano congregacion. Si Jesus claro ya habla: “Tiene ustedes un Señor lang quien el Cristo.” (Mat. 23:10, El Nuevo Testamento) Asigurao hay cumpli gayot el diaton Rey con el de suyu trabajo. Ciendo el Cristo el quien guia kanaton, nuay kita razon para tene miedo. Siempre, no sabe kita el todo detalle si paquemodo el Cristo hay guia con el de suyu maga siguidores na ese tiempo. Poreso, considera kita con el cuanto ejemplo na Biblia que puede dale kanaton asiguranza.

12. Paquemodo si Jehova ya cuida con el de suyu maga siervo (a) despues muri si Moises? (b) despues ricibi otro assignment si Elias? (Mira tambien con el letrato.)

¹² Ya muri si Moises antes ya puede entra el maga Israelita na Tierra Prometido. Cosa ya pasa kanila aquel tiempo? Ya descanza ba ayuda si Jehova con el de suyu maga siervo cay nuay mas si Moises? Nuay. Mientras fiel sila, ya continua kanila cuida si Jehova. Antes muri si Moises, ya habla si Jehova con ele que iscuji con Josue para guia con el maga Israelita. Yan train ya si Moises con Josue por cuanto decada. (Ex. 33:11; Deut. 34:9) Mas pa, manada pa otro maga hombre quien tiene capacidad para cumpli con ese assignment—el maga jefe de cada mil, de cada ciento, de cada cincuenta y de cada diez. (Deut. 1:15) Nuay gayot abandona con el maga siervo del Dios. Ansina tambien ya sucede na tiempo de Elias. Por cuanto decada, ele el quien ta guia con el maga Israelita na adoranza con Jehova. Pero ya llega el tiempo, ya dale con ele assignment si Jehova na otro lugar, na sur parte na Juda. (2 Rey 2:1; 2 Cron. 21:12) Ya queda ba abandonao el maga fiel siervo del Dios na reino del diez tribo de Israel? Nuay. Por cuanto año, yan train ya si Elias con Eliseo. Puera con ele, tiene tambien “maga anak hombre del maga profeta” quien ya ricibi training. (2 Rey 2:7) Entonces, manada fiel hombre con quien puede usa para ayuda guia con el maga siervo del Dios. Ta continua si Jehova cumpli con el de suyu proposito y ta cuida le con el de suyu maga fiel siervo.

13. Cosa asiguranza ta dale kanaton el Maga Hebreo 13:5b? (Mira tambien con el letrato.)

¹³ Despues discuti con el maga ejemplo na Biblia, cosa tu ta pensa que hay sucede si hay subi ya na cielo el todo maga iscujido Cristiano? Gendeh kita necesita hace maga  especulacion. El Biblia ya revela un simple verdad que puede kanaton dale asiguranza: Si Jehova nunca abandona con el de suyu maga siervo aqui na tierra. (Le con el Maga Hebreo 13:5b.) Igual con Moises y Elias, sabe el diutay grupo de maga iscujido Cristiano quien ta guia kanaton ahora que bien importante man train con otro. Por cuanto decada, el Cuerpo Gobernante tan train ya maga hermano quien parte del otro maga carnero para guia con el maga siervo del Dios. Por ejemplo, ya organiza sila manada escuela para man train con el maga anciano, traveling overseer, miembro del Branch Committee, overseer na Bethel y con otro. Personal tambien sila tan train con el maga ayudante del diferente maga committee del Cuerpo Gobernante. Este maga ayudante ta cumpli ya ahora maga pesao responsibilidad na organizacion. Bien preparao sila para continua con el diila trabajo que cuida con el maga carnero del Cristo.

14. Cosa el importante punto que ya discuti na este articulo?

¹⁴ Este el importante punto del cosa kita ya discuti na este articulo: Si na cielo ya el todo maga iscujido Cristiano cuanto tiempo antes principia el Armagedon, el puro adoranza hay continua aqui na tierra. Por medio con Jesucristo, el diaton Lider, hay continua kita fiel sirvi con Jehova. Deverasan, na ese tiempo, hay ataca kanaton el Gog de Magog, el alianza de maga nacion. (Eze. 38:18-20) Pero gendeh tene buen exito ese corto ataque; gendeh se puede sangga kanaton que continua adora con Jehova. Asigurao que hay salva le kanaton! Na un vision, ya mira si apostol Juan con el “grande grupo” de otro maga carnero del Cristo. Ya habla con Juan que este “grande grupo” amo aquellos quien ya sobrevivi na “grande tribulacion.” (Rev. 7:9, 14, NWT) Si, nuay cosa pasa malo kanaton!

15-16. Asegun na Revelacion 17:14, cosa hace el maga iscujido durante el guerra de Armagedon y porque este puede anima kanaton?

¹⁵ Pero, posible pregunta el cuanto: ‘Cosa hace el maga iscujido Cristiano si nuay mas ya sila aqui na tierra?’ El Biblia ta dale directa contestacion na ese pregunta. Ta revela este  que “man guerra [el maga gobierno na tierra] contra con el Carnero.” Siempre, gendeh gayot sila ganá. El Biblia ta habla: “El Carnero . . . ay gana canila.” Y quien hay ayuda con ele? El mismo versiculo ta contesta con ese pregunta. “El maga llamao, el maga escugido y el maga fiel.” (Le con el Revelacion 17:14.) Quien este sila? Aquellos maga iscujido Cristiano con quien ya resucita! Poreso si na cielo ya el todo maga iscujido cuanto tiempo antes termina el grande tribulacion, el uno na diila maga primer assignment amo que man guerra. Un extraordinario assignment gayot se! Antes queda maga Testigo de Jehova, el cuanto iscujido Cristiano ta imbisti o ta pelea con otro. Gane el cuanto kanila maga soldao de antes. Pero cuando ya queda sila maga verdadero Cristiano, ya aprende sila mentena con el paz. (Gal. 5:22; 2 Tes. 3:16) Nuay mas sila participa na maga guerra. Pero si talla ya sila todo na cielo, hay participa sila na ultimo guerra contra na maga enemigo del Dios junto con Cristo y con el maga angel.

¹⁶ Pensa tu este. Aqui na tierra, de edad ya el cuanto iscujido Cristiano y gane el otro maluya ya na fisical. Pero si hay resucita ya kanila para na cielo, hay queda sila maga poderoso y imortal espiritu creatura quien hay man guerra junto con el diila Rey y Guerrero, si Jesucristo. Despues del guerra de Armagedon, hay ayuda sila con el maga gente para queda perfecto. Asigurao que mas puede sila ayuda con el diila maga hermano y hermana si talla ya sila na cielo compara cuando maga imperfecto gente pa sila!

17. Porque kita puede habla que hay salva el todo siervo del Dios durante el guerra de Armagedon?

¹⁷ Uno ba tu del otro maga carnero? Si ansina, cosa tu necesita hace si principia ya el guerra de Armagedon? Solamente este: Confia con Jehova y sigui con el de suyu direccion. Cosa posible el incluido con ese? El Biblia ya habla: “Entra ustedes . . . na de ustedes maga bien adentro cuarto, y cerra con el maga puerta. Esconde ustedes unrato hasta pasa el rabia.” (Isa. 26:20) Hay salva el todo fiel siervo del Dios, na cielo man o na tierra, durante ese tiempo. Igual con apostol Pablo, convincido kita que maskin “el maga Principe, ni el maga cosa-cosa que ta existi o gendeh pa ta existi . . . gendeh ay puede separta canaton na amor del Dios.” (Roma 8:38, 39) Acorda con este pirmi: Ta ama contigo si Jehova y nunca le abandona contigo!